Kunsill Affarijiet Ġenerali, 21 ta' Settembru 2021

Riżultati ewlenin

Il-Ministri vvalutaw is-sitwazzjoni attwali fir-relazzjonijiet bejn l-UE u r-Renju Unit, fid-dawl tal-avvenimenti reċenti rigward l-implimentazzjoni tal-protokoll dwar l-Irlanda/l-Irlanda ta' Fuq.

Il-Viċi President tal-Kummissjoni Ewropea Maroš Šefčovič aġġorna lill-ministri dwar l-aħħar żviluppi, inkluż iż-żjara reċenti tiegħu fl-Irlanda u l-Irlanda ta' Fuq, u l-ministri tennew l-appoġġ tagħhom għall-approċċ tal-Kummissjoni Ewropea.

Huma enfasizzaw il-ħtieġa li jiġu identifikati soluzzjonijiet fit-tul, flessibbli u prattiċi biex jiġu indirizzati l-kwistjonijiet esperjenzati miċ-ċittadini u n-negozji fir-rigward tal-implimentazzjoni prattika tal-protokoll, filwaqt li jiġu rispettati l-prinċipji li jirfdu l-protokoll. Huma tennew li l-UE mhux ser taqbel ma' negozjar mill-ġdid tal-protokoll, li huwa s-soluzzjoni maqbula bejn ir-Renju Unit u l-UE għall-problemi kkawżati mill-Brexit għall-gżira tal-Irlanda.

L-UE ser tkompli timpenja ruħha mar-Renju Unit biex jinstabu soluzzjonijiet fil-qafas tal-protokoll. Ser nagħmlu l-almu tagħna biex inġibu lura l-prevedibbiltà u l-istabbiltà għaċ-ċittadini u n-negozji fl-Irlanda ta' Fuq u biex niżguraw li jkunu jistgħu jagħmlu l-aħjar użu mill-opportunitajiet ipprovduti mill-protokoll, inkluż l-aċċess għas-suq uniku. Gašper Dovžan, Segretarju tal-Istat fil-Ministeru għall-Affarijiet Barranin tas-Slovenja

• Dikjarazzjoni mill-Kummissjoni Ewropea wara t-tħabbira tar-Renju Unit dwar l-operat tal-Protokoll dwar l-Irlanda/l-Irlanda ta' Fuq (Kummissjoni Ewropea, 6 ta' Settembru 2021)
• Dikjarazzjoni mill-Viċi President Maroš Šefčovič wara t-tħabbira tal-lum mill-gvern tar-Renju Unit rigward il-Protokoll dwar l-Irlanda/l-Irlanda ta' Fuq (Kummissjoni Ewropea, 21 ta' Lulju 2021)
• Applikazzjoni tal-liġi tal-Unjoni relatata mal-prodotti tal-laħam fl-Irlanda ta' Fuq wara tmiem il-perjodu ta' tranżizzjoni: dikjarazzjoni unilaterali mill-UE (30 ta' Ġunju 2021)

koordinazzjoni tal-UE b'rabta mal-COVID-19

Il-ministri kellhom skambju ta' fehmiet dwar il-koordinazzjoni tal-UE dwar il-COVID-19 wara l-waqfa tas-sajf. Huma ddiskutew kwistjonijiet relatati mat-tilqim u miżuri għall-ivvjaġġar.

Huwa kruċjali li l-istati membri jkomplu jipprovdu rispons trasparenti u koordinat għall-pandemija u jżidu r-rata tal-kopertura tat-tilqim tal-popolazzjoni sabiex tissokta l-ħajja normali. Gašper Dovžan, Segretarju tal-Istat fil-Ministeru għall-Affarijiet Barranin tas-Slovenja

Fost is-suġġetti diskussi llum, issemmew it-tilqim booster jew dożi addizzjonali, kif ukoll il-ħtieġa li tiġi indirizzata l-eżitazzjoni għat-tilqim u d-diżinformazzjoni dwar it-tilqim u l-importanza tal-kondiviżjoni tat-tilqim ma' pajjiżi terzi.

Dwar il-koordinazzjoni tal-miżuri għall-ivvjaġġar, bħalissa għaddejja ħidma biex jiġi kkunsidrat jekk hijiex meħtieġa reviżjoni biex titqies is-sitwazzjoni attwali (fost l-oħrajn, ir-rati għoljin ta' tilqim, is-sitwazzjoni epidemjoloġika li qed tevolvi u l-esperjenza taċ-ċertifikati tal-COVID).

• Il-pandemija tal-coronavirus COVID-19: ir-rispons tal-UE (informazzjoni ġenerali)

Laqgħa tal-Kunsill Ewropew tal-21 u t-22 ta' Ottubru

Il-Ministri kellhom l-ewwel skambju dwar l-abbozz ta' aġenda annotata għall-Kunsill Ewropew tal-21 u t-22 ta' Ottubru: koordinazzjoni tar-rispons għall-pandemija tal-COVID-19, valutazzjoni tal-progress fi kwistjonijiet diġitali, tħejjijiet għall-COP26 fi Glasgow (klima) u l-COP15 f'Kunming (bijodiversità) u għas-summits li jmiss ma' pajjiżi terzi, bħal-Laqgħa Asja-Ewropa (ASEM) u s-Sħubija tal-Lvant fost suġġetti oħra.

• Aġenda proviżorja (13 ta' Settembru 2021)

Konferenza dwar il-Futur tal-Ewropa

Il-Presidenza tat aġġornament dwar il-Konferenza dwar il-Futur tal-Ewropa, wara t-tnedija tal-panels taċ-ċittadini Ewropej fis-17 ta' Settembru u fit-tħejjija għall-plenarja ta' Ottubru. Id-delegazzjonijiet kellhom l-opportunità li jiskambjaw fehmiet dwar dawn il-kwistjonijiet.

• Konferenza dwar il-Futur tal-Ewropa: enfasi fuq iċ-ċittadini
• Konferenza dwar il-Futur tal-Ewropa (informazzjoni ġenerali u kronoloġija)

Prijoritajiet tal-presidenza Slovena

Matul sessjoni pubblika, il-presidenza Slovena ppreżentat il-prijoritajiet ġenerali tagħha, kif ukoll dawk li jaqgħu taħt il-kompetenza tal-Kunsill Affarijiet Ġenerali.

• Programm tal-presidenza Slovena

Programmazzjoni leġiżlattiva

Matul dibattitu pubbliku, il-Kummissjoni ppreżentat ir-Rapport ta' Prospettiva Strateġika tal-2021 u l-ittra ta' intenzjoni tagħha.

• Rapport ta' Prospettiva Strateġika (Kummissjoni Ewropea)
• Ittra ta' intenzjoni fir-rigward tat-tħejjija tal-Programm ta' Ħidma tal-Kummissjoni għall-2022

Affarijiet oħra

Il-Kummissjoni aġġornat lill-ministri dwar ir-relazzjonijiet bejn l-UE u l-Iżvizzera. Kien hemm ukoll punt ta' informazzjoni dwar is-summit UE-MED ta' nhar il-Ġimgħa li għadda f'Ateni.