"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-ministri responsabbli għall-affarijiet Ewropej komplew it-tħejjijiet għall-Kunsill Ewropew ta' Ottubru 2025 billi ddiskutew l-abbozz ta' konklużjonijiet. Il-Kunsill iddiskuta wkoll il-Qafas Finanzjarju Pluriennali (QFP) 2028-2034 il-ġdid, ħa nota ta' rapport ta' progress dwar is-simplifikazzjoni u kellu d-disa' seduta ta' smigħ dwar is-sitwazzjoni tal-istat tad-dritt fl-Ungerija.
Il-qafas finanzjarju pluriennali li jmiss għandu jippermetti li l-prijoritajiet strateġiċi tagħna jiġu konkretizzati. Neħtieġu qafas finanzjarju li jkun aktar sempliċi, aktar reattiv u li jħalli aktar impatt, jekk irridu UE b'saħħitha, reżiljenti u kompetittiva fil-futur. Id-diskussjoni tal-lum fil-Kunsill Affarijiet Ġenerali timmarka pass importanti lejn it-tisħiħ tal-kompetittività Ewropea fil-QFP li jmiss. Id-djalogu kostruttiv tagħna jagħtini kuraġġ u nistenna b'interess li nkomplu d-diskussjonijiet tagħna fil-Kunsilli tal-Affarijiet Ġenerali f'Novembru u Diċembru.
Marie Bjerre, Ministru għall-Affarijiet Ewropej tad-Danimarka
Tħejjija tal-Kunsill Ewropew ta' Ottubru
Il-Kunsill kompla t-tħejjijiet għal-laqgħa tal-Kunsill Ewropew tat-23 ta' Ottubru 2025 billi ddiskuta l-abbozz ta' konklużjonijiet. Il-mexxejja mistennija jiddiskutu:
il-gwerra ta' aggressjoni tar-Russja kontra l-Ukrajna,
l-aħħar żviluppi fil-Lvant Nofsani b'enfasi fuq Gaża,
Il-Kunsill kellu t-tieni dibattitu ta' orjentazzjoni dwar il-QFP tal-UE għall-2028-2034.
Abbażi ta' nota tal-presidenza, il-ministri kellhom skambju ta' fehmiet dwar kwistjonijiet orizzontali, bħall-governanza, il-prevedibbiltà, l-impatt u l-kapaċità ta' rispons tal-QFP li jmiss. Iddiskutew ukoll l-"Intestatura 2" tal-qafas li - permezz ta' inizjattivi bħal Fond Ewropew għall-Kompetittività ġdid u l-programm Orizzont Ewropa - għandu l-għan li jixpruna l-prosperità permezz tal-kompetittività, ir-riċerka u l-innovazzjoni fl-UE.
Id-dibattitu ser jinforma l-ewwel kaxxa ta' negozjar, id-dokument li għandu l-għan li jidentifika elementi għall-konsiderazzjoni politika u jiffaċilita d-diskussjoni tagħhom mill-mexxejja tal-UE. Il-presidenza Daniża biħsiebha tressaq din l-ewwel kaxxa ta' negozjar mingħajr numri qabel il-laqgħa tal-Kunsill Ewropew f'Diċembru 2025.
Il-Kunsill ħa nota ta' rapport ta' progress dwar il-pakketti leġiżlattivi ta' simplifikazzjoni omnibus. Bħala segwitu għas-sejħa tal-mexxejja tal-UE, il-Kummissjoni ressqet diversi pakketti "Omnibus", bl-għan li tissimplifika l-leġiżlazzjoni eżistenti f'diversi oqsma: ir-rapportar korporattiv dwar is-sostenibbiltà u r-rekwiżiti tad-diliġenza dovuta, ċerti programmi ta' investiment tal-UE, il-miżuri ta' simplifikazzjoni għall-agrikoltura, il-kumpaniji żgħar b'kapitalizzazzjoni medja u d-diġitalizzazzjoni, id-difiża, u s-sustanzi kimiċi.
L-aġenda ta' simplifikazzjoni hija prijorità ewlenija għall-Kunsill. Wara l-impetu mill-presidenza Pollakka, il-presidenza Daniża ser tkompli tittratta l-proposti ta' simplifikazzjoni omnibus attwali kollha bħala prijorità u ser tavvanza l-eżami tagħhom, it-tħejjija ta' mandati ta' negozjar u n-negozjati mal-Parlament Ewropew b'ritmu mgħaġġel.
Seduta ta' smigħ tal-Artikolu 7 dwar is-sitwazzjoni tal-istat tad-dritt fl-Ungerija
Bħala parti mill-proċedura tal-Artikolu 7(1) TUE, il-Kunsill organizza d-disa' seduta ta' smigħ tal-Ungerija bħala parti minn din il-proċedura. Hija kopriet il-kwistjonijiet kollha li tqajmu mill-proposta raġunata tal-Parlament Ewropew ta' Settembru 2018, li tat bidu għall-proċedura. L-għan kien li l-Kunsill jingħata stampa aġġornata tas-sitwazzjoni tal-istat tad-dritt fl-Ungerija.
L-iskambji ffukaw b'mod partikolari fuq il-funzjonament tas-sistema kostituzzjonali u l-kontrolli u l-bilanċi, l-indipendenza tal-ġudikatura, il-miżuri kontra l-korruzzjoni, il-protezzjoni tal-ispazju ċiviku, il-pluraliżmu tal-media, il-libertà ta' għaqda u l-protezzjoni tad-drittijiet LGBTIQ+ fl-Ungerija.
Waqt ikla ta' ħidma, il-ministri kellhom skambju estensiv ta' fehmiet li jipprovdi kontribut għall-proposta li jmiss tal-Kummissjoni dwar Tarka Ewropea għad-Demokrazija.
Affarijiet oħra
Il-ministru Awstrijak u s-segretarju tal-istat Sloven għall-affarijiet Ewropej infurmaw lill-Kunsill dwar iż-żjara reċenti tagħhom fil-pajjiżi tal-Balkani tal-Punent.
Id-delegazzjoni Netherlandiża ssottolinjat l-importanza tar-rispett għall-primazija tad-dritt tal-UE u d-drittijiet tal-bniedem u l-libertajiet fundamentali taċ-ċittadini kollha.
Id-delegazzjoni Franċiża infurmat lill-Kunsill dwar ir-rispett u l-promozzjoni tal-valuri tal-Unjoni Ewropea, inkluż permezz tal-finanzjament tal-UE.
Punti oħra
Il-Kunsill adotta, bħala punt mingħajr diskussjoni, deċiżjoni li tawtorizza lill-Kummissjoni tiffirma l-ftehim dwar il-parteċipazzjoni tal-Iżvizzera fi programmi tal-Unjoni.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
