Proċeduri tal-artikolu 7

Kif jaħdem l-artikolu 7?

L-artikolu 7 TUE qiegħed hemm biex jintuża bħala l-aħħar għażla sabiex jitħarsu l-valuri li fuqhom hija msejsa l-UE.

Bis-saħħa tiegħu d-drittijiet ta' sħubija fl-UE jistgħu jiġu sospiżi, inkluż id-drittijiet tal-vot fil-Kunsill tal-UE u l-Kunsill Ewropew, jekk pajjiż jikser b'mod serju u persistenti l-prinċipji li fuqhom hija msejsa l-UE. Dawk il-valuri huma deskritti fl-Artikolu 2 TUE. Huma jinkludu:

• ir-rispett għad-dinjità tal-bniedem
• il-libertà
• id-demokrazija
• l-ugwaljanza
• l-istat tad-dritt
• ir-rispett tad-drittijiet tal-bniedem, inkluż id-drittijiet ta' persuni li jagħmlu parti minn minoranzi

Anke jekk stat membru jkun soġġett għal proċedura skont l-artikolu 7, l-obbligi tas-sħubija tiegħu jibqgħu vinkolanti.

Meta jista' jiġi attivat l-artikolu 7?

L-artikolu 7 jinkludi żewġ proċeduri biex jitħarsu l-valuri tal-UE.

Miżuri preventivi (l-artikolu 7(1))

L-artikolu 7(1) jista' jiġi attivat jekk ikun hemm riskju ċar ta' ksur serju tal-valuri tal-UE. Dan jagħti bidu għal djalogu bejn l-istituzzjonijiet tal-UE u l-istat membru sabiex jiġi indirizzat it-tħassib qabel ma l-kwistjoni tiġi eskalata.

Il-proċedura tibda bi proposta li ssir minn terz tal-istati membri tal-UE, mill-Parlament Ewropew jew mill-Kummissjoni Ewropea. Imbagħad il-Kunsill jikseb l-approvazzjoni tal-Parlament Ewropew. Jekk erba' minn kull ħames membri tal-Kunsill jivvotaw favur, il-Kunsill jista' mbagħad jiddetermina li hemm riskju ċar ta' ksur serju tal-prinċipji fundamentali minn stat membru u jagħmel rakkomandazzjonijiet xierqa.

Sanzjonijiet (l-artikolu 7(2))

Jekk stati membru jinstab li jkun qiegħed jikser b'mod serju u persistenti l-valuri tal-UE, l-artikolu 7(2) jippermetti azzjoni aktar qawwija, inkluż sanzjonijiet. Dan jista' jinvolvi s-sospensjoni tad-drittijiet tal-vot ta' stat membru fil-Kunsill, li jista' jkollha impatt sinifikanti fuq l-influwenza tiegħu fl-UE.

L-istadju tas-sanzjonijiet huwa meta jiġi involut il-Kunsill Ewropew. Il-proċedura tibda bi proposta li ssir minn terz tal-istati membri tal-UE jew mill-Kummissjoni. Imbagħad il-Kunsill Ewropew jikseb l-approvazzjoni tal-Parlament Ewropew. Dment li l-membri tal-Kunsill Ewropew jaqblu b'mod unanimu, il-Kunsill Ewropew jista' mbagħad jiddetermina li stat membru jkun qed jikser b'mod serju u persistenti l-valuri tal-UE.

Jekk dan iseħħ, il-Kunsill jista' jiddeċiedi li jissospendi wħud mid-drittijiet li jirriżultaw mill-applikazzjoni tat-trattati għall-istat membru inkwistjoni, inkluż id-drittijiet tal-vot tiegħu. Dik id-deċiżjoni tittieħed b'maġġoranza kwalifikata.

L-artikolu 7 – x'seħħ s'issa

L-artikolu 7 evolva minn mindu nħoloq biex jindirizza diversi kriżijiet, filwaqt li jiżgura li jibqa' jiġi applikat kif xieraq u jibqa' rilevanti u flessibbli b'reazzjoni għal ċirkostanzi li dejjem jinbidlu.