"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Trasport), 9 ta' Diċembru 2021
Riżultati ewlenin
Ħarsa ġenerali lejn il-pakkett "Lesti għall-mira ta' 55%"
Il-Kunsill beda l-laqgħa billi ħa nota tal-progress ġenerali fil-pakkett ta' proposti leġiżlattivi "Lesti għall-mira ta' 55%" f'konfigurazzjonijiet differenti tal-Kunsill. Il-pakkett "Lesti għall-mira ta' 55%" għandu l-għan li jgħin lill-UE tilħaq il-mira tagħha ta' tnaqqis tal-emissjonijiet netti ta' gassijiet serra b'mill-inqas 55% sal-2030 meta mqabbla mal-1990, u ssir newtrali għall-klima sal-2050.
Il-ministri mbagħad kellhom l-ewwel diskussjoni formali tagħhom dwar kull waħda mit-tliet proposti dwar it-trasport tal-pakkett "Lesti għall-mira ta' 55%" — ReFuelEU Aviation, FuelEU Maritime u dik dwar l-infrastruttura tal-fjuwils alternattivi — sabiex jiggwidaw il-ħidma ulterjuri fuq dawn il-fajls.
Dawn il-proposti ser jaqdu rwol sinifikanti fl-isforzi tal-UE biex tnaqqas l-emissjonijiet tagħha mit-trasport b'90%, li huwa prerekwiżit biex jintlaħaq l-għan tan-newtralità klimatika tal-2050.
Il-Kunsill ħa nota tal-progress u kellu dibattitu ta' orjentazzjoni dwar proposta li għandha l-għan li tiżgura kondizzjonijiet ekwivalenti ta' kompetizzjoni għat-trasport bl-ajru sostenibbli (ReFuelEU Aviation).
Il-proposta għandha l-għan li żżid kemm id-domanda kif ukoll il-provvista ta' fjuwils tal-avjazzjoni sostenibbli (SAFs), fosthom fjuwils tal-avjazzjoni sintetiċi, filwaqt li tiżgura kondizzjonijiet ekwivalenti ta' kompetizzjoni fis-suq tat-trasport bl-ajru tal-UE.
It-trasport bl-ajru ntlaqat ħażin ħafna mill-pandemija. Madankollu, l-uniku mod biex l-industrija tirkupra huwa li taġixxi fuq l-ambizzjonijiet klimatiċi, filwaqt li tiżgura l-konnettività bl-ajru għaċ-ċittadini u suq kompetittiv.
Jernej Vrtovec, Ministru għall-Infrastruttura tas-Slovenja u president tal-laqgħa tal-Kunsill
Matul id-dibattitu tal-Kunsill, il-ministri appoġġaw b'mod ġenerali l-objettivi tal-proposta. Huma ppreżentaw il-fehmiet tagħhom dwar kif dawn l-objettivi jistgħu jinkisbu bl-użu ta' tipi differenti ta' fjuwils u bl-użu ta' livelli differenti ta' użu tal-fjuwils fis-snin li ġejjin. Diversi delegazzjonijiet enfasizzaw il-ħtieġa li tiġi ppreservata l-konnettività u li jitqiesu s-sitwazzjonijiet speċifiċi ta' stati membri differenti. Il-ministri ssottolinjaw ukoll il-ħtieġa li tinżamm il-kompetittività tas-settur tal-avjazzjoni Ewropew, li qed jiffaċċja l-konsegwenzi tal-pandemija. Huma enfasizzaw l-importanza li tiġi żgurata biżżejjed kapaċità ta' produzzjoni u distribuzzjoni għall-provvista ta' fjuwils tal-avjazzjoni sostenibbli meħtieġa għas-settur u biex tiġi evitata l-frammentazzjoni tas-suq. Xi stati membri esprimew tħassib dwar ir-regoli baġitarji f'dak li jirrigwarda l-użu tad-dħul mill-multi.
Fjuwils rinnovabbli u b'livell baxx ta' emissjonijiet tal-karbonju fit-trasport marittimu
Il-Kunsill ħa nota tal-progress u kellu dibattitu ta' orjentazzjoni dwar proposta għall-promozzjoni tal-użu ta' fjuwils rinnovabbli u b'livell baxx ta' emissjonijiet tal-karbonju fit-trasport marittimu (FuelEU Maritime).
Il-proposta għandha l-għan li żżid id-domanda għal fjuwils rinnovabbli u b'livell baxx ta' emissjonijiet tal-karbonju, u l-użu konsistenti tagħhom, fis-settur marittimu, filwaqt li tiżgura l-operat mingħajr xkiel tat-traffiku marittimu u tevita distorsjonijiet fis-suq intern.
It-trasport marittimu huwa vettur essenzjali għall-kummerċ u l-konnettività interni u esterni tal-UE. Ma nistgħux innaqqsu l-marka tal-karbonju tagħna biżżejjed mingħajr il-kontribut tas-settur marittimu, minkejja li dan għandu l-isfidi tiegħu, partikolarment minħabba n-natura globali tat-trasport marittimu.
Jernej Vrtovec, Ministru għall-Infrastruttura tas-Slovenja u president tal-laqgħa tal-Kunsill
Matul id-diskussjoni tagħhom, il-ministri qablu b'mod ġenerali dwar il-biċċa l-kbira tal-objettivi tal-proposta, sa fejn din tippromwovi l-użu ta' fjuwils rinnovabbli u b'livell baxx ta' emissjonijiet tal-karbonju f'settur li għadu jiddependi kważi għalkollox fuq il-fjuwils fossili. Għadd ta' ministri enfasizzaw l-importanza tad-dimensjoni globali, kemm biex jintlaħqu l-ambizzjonijiet, speċjalment fi ħdan l-Organizzazzjoni Marittima Internazzjonali (OMI), iżda wkoll biex jiġi indirizzat it-tħassib b'rabta mar-rilokazzjoni jew ir-ridirezzjoni ta' emissjonijiet tal-karbonju li tista' tiġi kkawżata mill-obbligi li titnaqqas l-intensità tal-emissjonijiet ta' gassijiet serra tal-bastimenti u l-obbligi imposti fuq il-portijiet Ewropej.
Għadd ta' ministri enfasizzaw il-kumplessità tal-proposta u r-rabta qawwija tagħha ma' inizjattivi oħrajn tal-pakkett "Lesti għall-mira ta' 55%", b'mod partikolari d-direttiva dwar l-enerġija rinnovabbli, is-sistema tal-UE għall-iskambju ta' kwoti tal-emissjonijiet u r-regoli li jappoġġaw l-introduzzjoni ta' infrastruttura tal-fjuwils alternattivi, filwaqt li saħqu fuq il-ħtieġa li jkun hemm stampa ċara tal-impatt ġenerali fuq is-settur. Diversi ministri esprimew tħassib dwar aspetti ta' governanza, bħall-impożizzjoni ta' pieni u l-użu tagħhom, kif ukoll ir-rwol tal-awtoritajiet pubbliċi fl-infurzar tar-regolament. B'mod ġenerali tqies li hi meħtieġa aktar ħidma sabiex il-proposta tkun tista' tiġi eżaminata kif xieraq.
Il-Kunsill ħa nota tal-progress u kellu dibattitu ta' orjentazzjoni dwar abbozz ta' regolament dwar il-varar ta' infrastruttura ta' fjuwils alternattivi (AFIR).
L-objettiv tal-proposta huwa l-appoġġ għall-varar madwar l-UE ta' infrastruttura pubblikament aċċessibbli ta' irriċarġjar u riforniment għal fjuwils alternattivi fit-trasport bit-triq, l-avjazzjoni u s-settur tat-trasport fuq l-ilma. Għandha wkoll l-għan li tiżgura li l-infrastruttura tkun interoperabbli u faċli biex tintuża.
Bħalissa, id-dilemma dwar liem hi l-problema oriġinali għadha qed ixxekkel il-bidla għal fjuwils aktar ekoloġiċi. Minn naħa, infrastruttura limitata żżomm lil ħafna nies milli jixtru vetturi li jaħdmu bi fjuwils alternattivi; min-naħa l-oħra, ma nagħmlux progress rapidu biżżejjed fil-bini tal-infrastruttura minħabba l-biża' li nispiċċaw b'investiment mitluf. Dawn ir-regoli riveduti fuq firxa wiesgħa huma essenzjali biex tissolva din il-problema, peress li ser jiżguraw ċertezza legali, iżidu l-fiduċja tal-konsumaturi u jipprovdu sinjal ċar lill-industrija, lill-manifatturi tal-karozzi u lil partijiet ikkonċernati l-oħrajn.
Jernej Vrtovec, Ministru għall-Infrastruttura tas-Slovenja u president tal-laqgħa tal-Kunsill
Matul id-dibattitu, il-ministri esprimew appoġġ wiesa' għall-objettivi u l-approċċ tal-proposta. Madankollu, ħafna ministri enfasizzaw li l-istess soluzzjoni mhix adatta għal kull kuntest u li tkun meħtieġa flessibbiltà biex jitqiesu l-ispeċifiċitajiet nazzjonali, bħad-daqs tas-superfiċje, id-densità tal-popolazzjoni u tat-traffiku u l-ġeografija. Għadd ta' ministri qiesu li għadhom qed jiġu żviluppati teknoloġiji mingħajr emissjonijiet, b'mod partikolari għal vetturi tqal tat-triq. Għaldaqstant ikun importanti li jiġi ssorveljat l-iżvilupp ta' teknoloġiji u swieq differenti biex naraw fejn is-soluzzjonijiet huma vijabbli u kosteffiċjenti. Ikunu meħtieġa miżuri u inċentivi li jakkumpanjawhom għal żvilupp inizjali mgħaġġel tas-suq, iżda dawn ma għandhomx ifixklu l-investiment privat.
Xi ministri semmew il-ħtieġa li nqisu l-interkonnessjonijiet mal-proposti l-oħrajn tal-pakkett "Lesti għall-mira ta' 55%" u l-importanza li tiġi stabbilita ekosistema għat-trasformazzjoni lejn mobbiltà nadifa. Għadd ta' stati membri qalu li d-dispożizzjonijiet dwar ir-ritorn tal-vetturi fil-pakkett dwar il-Mobbiltà kienu kontradittorji għall-għanijiet klimatiċi u talbu lill-Kummissjoni tieħu azzjoni biex tikkanċella din il-miżura.
Taħt affarijiet oħra, il-presidenza infurmat lill-ministri dwar is-sitwazzjoni attwali tal-proposti leġiżlattivi attwali.
Dwar regoli riveduti għall-użu ta' vetturi mikrija għat-trasport ta' merkanzija bit-triq, il-presidenza laħqet qbil proviżorju mal-Parlament Ewropew f'Ottubru. Qed tippjana li tippreżenta t-test għall-adozzjoni fl-aħħar laqgħa tal-Kunsill ta' din is-sena.
Dwar ir-riforma tal-ġestjoni tat-traffiku tal-ajru Ewropew magħrufa bħala l-Ajru Uniku Ewropew, il-presidenza kellha żewġ laqgħat ta' "trilogu" mal-Parlament Ewropew. F'dawk il-laqgħat sar xi progress, b'mod partikolari dwar kwistjonijiet tekniċi.
Barra minn hekk, il-korpi preparatorji tal-Kunsill qed jeżaminaw l-abbozz ta' deċiżjoni dwar l-implimentazzjoni tan-notifika ta' kumpens taħt l-Iskema ta' Kumpens u Tnaqqis tal-Karbonju għall-Avjazzjoni Internazzjonali (CORSIA) għall-operaturi ta' inġenji tal-ajru bbażati fl-UE.
Id-delegazzjoni Belġjana esprimiet it-tħassib tagħha dwar xejriet ġodda fit-trasport tal-merkanzija bit-triq f'termini tal-għadd ta' attestazzjonijiet tas-sewwieqa għal sewwieqa minn pajjiżi terzi, li hija tqis bħala sfida għall-kondizzjonijiet soċjali u l-bidla modali.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Id-delegazzjoni Ċiprijotta, f'isem id-delegazzjoni Ċiprijotta, Bulgara, Estonjana, Griega, Ungeriża, Litwana, Maltija, Pollakka, Portugiża u dik Slovakka, għarrfet lill-ministri dwar il-kwistjoni tal-konnettività bl-ajru. Appellat għal miżuri li jindirizzaw id-distakk fil-konnettività madwar l-UE li rriżulta mill-pandemija, biex jiġi ffaċilitat l-irkupru rapidu tas-settur u biex tiġi żgurata tranżizzjoni ekoloġika bla xkiel u ġusta għall-istati membri kollha.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-Kummissjoni aġġornat lill-ministri dwar il-kwistjonijiet tal-Formoli tal-Lokalizzazzjoni tal-Passiġġieri u l-ħaddiema tat-trasport. Enfasizzat il-ħtieġa li l-istati membri jikkooperaw biex irażżnu t-tixrid tal-varjant il-ġdid tal-COVID-19. Enfasizzat ukoll il-ħtieġa li tiġi żgurata l-protezzjoni tas-suq uniku, li titlob li r-rwol essenzjali tal-ħaddiema tat-trasport jiġi rikonoxxut u li jinżamm it-trattament speċjali tagħhom.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
It-trasport bl-ajru ntlaqat ħażin ħafna mill-pandemija. Madankollu, l-uniku mod biex l-industrija tirkupra huwa li taġixxi fuq l-ambizzjonijiet klimatiċi, filwaqt li tiżgura l-konnettività bl-ajru għaċ-ċittadini u suq kompetittiv.
