Kunsill Trasport, Telekomunikazzjoni u Enerġija (Enerġija), 27 ta' Ġunju 2022

Riżultati ewlenin

Pakkett "Lesti għall-mira ta' 55%"

Il-Kunsill adotta l-pożizzjonijiet ta' negozjar tiegħu (approċċi ġenerali) dwar żewġ proposti li jindirizzaw l-aspetti tal-enerġija tat-tranżizzjoni klimatika tal-UE taħt il-pakkett "Lesti għall-Mira ta' 55%":

• reviżjoni tad-direttiva dwar l-effiċjenza fl-enerġija
• reviżjoni tad-direttiva dwar l-enerġija rinnovabbli

Il-qbil tal-istati membri dwar dawn iż-żewġ proposti huwa pass kbir 'il quddiem fil-ġlieda kontra t-tisħin globali. Sabiex jintlaħqu l-objettivi klimatiċi tagħna, huwa essenzjali li ssir id-dekarbonizzazzjoni tas-sistemi tal-enerġija tagħna permezz ta' użu massiv ta' enerġiji rinnovabbli u sforzi sinifikanti fl-iffrankar tal-enerġija. Dan ser jgħinna wkoll innaqqsu d-dipendenza tagħna fuq ir-Russja għall-enerġija, fil-kuntest tal-gwerra fl-Ukrajna.

Agnès Pannier-Runacher, Ministru għat-Tranżizzjoni tal-Enerġija ta' Franza

Il-produzzjoni u l-użu tal-enerġija jammontaw għal 75% tal-emissjonijiet tal-UE u l-miri miżjuda maqbula llum ser ikunu kontribut importanti biex jintlaħaq l-għan ġenerali tal-UE li jitnaqqsu l-emissjonijiet netti tal-gassijiet serra b'mill-inqas 55% sal-2030 meta mqabbla mal-livelli tal-1990.

• ''Lesti għall-mira ta' 55%'': Il-Kunsill jaqbel dwar miri ogħla għall-enerġija rinnovabbli u l-effiċjenza fl-enerġija (stqarrija għall-istampa, 27 ta' Ġunju 2022)
• Lesti għall-mira ta' 55% (informazzjoni ġenerali)

Dekarbonizzazzjoni

Il-presidenza ppreżentat rapport dwar il-progress li sar fuq proposta dwar ir-rendiment tal-bini fl-użu tal-enerġija. Il-Kummissjoni adottat din il-proposta fil-15 ta' Diċembru 2021, bħala parti mill-pakkett "Lesti għall-mira ta' 55%" u d-diskussjonijiet dwar il-proposta bdew taħt il-Presidenza Franċiża. Din id-direttiva hija strument essenzjali biex jintlaħqu l-objettivi ta' dekarbonizzazzjoni tal-UE stabbiliti għall-2030 u l-2050. Fil-livell tal-UE, il-bini jirrappreżenta 40% tal-konsum tal-enerġija u 36% tal-emissjonijiet diretti u indiretti tal-gassijiet serra relatati mal-enerġija.

• Rapport ta' progress

Il-ministri ħadu nota wkoll ta' rapport ippreżentat mill-presidenza dwar il-progress li sar fuq proposta biex jitnaqqsu l-emissjonijiet tal-metan fl-UE. Il-metan huwa gass serra b'impatt sinifikanti fuq it-tibdil fil-klima, u l-aktar tnaqqis kosteffettiv jista' jinkiseb fis-settur tal-enerġija. Il-Kummissjoni ppreżentat din il-proposta fl-14 ta' Diċembru 2021, bħala parti mill-pakkett "Lesti għall-mira ta' 55%".

• Rapport ta' progress

Ħżin tal-gass

Il-Kunsill adotta regolament dwar il-ħżin tal-gass li għandu l-għan li jiżgura li l-faċilitajiet tal-ħżin tal-gass fl-UE jimtlew qabel ix-xitwa u jkunu jistgħu jinqasmu bejn l-istati membri fi spirtu ta' solidarjetà.

• Il-Kunsill jadotta regolament dwar il-ħżin tal-gass (stqarrija għall-istampa, 27 ta' Ġunju 2022)

Is-sitwazzjoni tal-enerġija fl-UE fil-kuntest tal-gwerra fl-Ukrajna

Il-ministri kellhom skambju ta' fehmiet dwar is-sitwazzjoni tal-enerġija fl-UE fil-kuntest tal-gwerra fl-Ukrajna. Il-ministri kellhom diskussjoni politika dwar l-iżviluppi attwali fis-settur tal-gass naturali u qasmu informazzjoni dwar il-livell ta' tħejjija ta' pajjiżhom għax-xitwa li ġejja. Il-ministri ddiskutew ukoll azzjonijiet addizzjonali li għandhom jiġu previsti sabiex tissaħħaħ it-tħejjija komuni tal-UE. F'dan il-kuntest, il-ministri laqgħu l-pjan REPowerEU, ippreżentat mill-Kummissjoni f'Mejju 2022 u l-ħolqien tal-Pjattaforma tal-Enerġija tal-UE, li ser ikollha l-kompitu li taħdem ma' fornituri internazzjonali u timmaniġġa x-xiri volontarju tal-gass.

• Nota ta' informazzjoni
• Il-prezzijiet tal-enerġija u s-sigurtà tal-provvista (informazzjoni ġenerali)
• L-impatt tal-invażjoni tal-Ukrajna mir-Russja fuq is-swieq: rispons tal-UE (informazzjoni ġenerali)
• Rispons tal-UE għall-invażjoni tal-Ukrajna (informazzjoni ġenerali)

Kwistjonijiet oħra

Il-presidenza pprovdiet aġġornament dwar is-sitwazzjoni attwali u l-passi li jmiss tal-proposta dwar il-ħżin tal-gass.

Il-Kummissjoni għarrfet lill-ministri dwar l-aħħar żviluppi fil-qasam tar-relazzjonijiet esterni fir-rigward tal-enerġija.

Iċ-Ċekja ppreżentat il-programm ta' ħidma għall-presidenza li jmiss tagħha.

Il-Kunsill iddeċieda li jestendi sat-30 ta' Ġunju 2023 il-mandati ta' żewġ missjonijiet ċivili tiegħu tal-Politika ta' Sigurtà u ta' Difiża Komuni (PSDK), il-Missjoni tal-Unjoni Ewropea ta' Assistenza fil-Fruntieri għall-Punt ta' Qsim ta' Rafah (EUBAM Rafah) u l-Missjoni tal-Pulizija tal-Unjoni Ewropea għat-Territorji Palestinjani (EUPOL COPPS). Il-missjonijiet huma parti minn sforzi usa' tal-UE b'appoġġ għall-bini tal-istat Palestinjan.

Il-Kunsill adotta mingħajr dibattitu l-"punti A" elenkati hawn taħt.