Kunsill Trasport, Telekomunikazzjoni u Enerġija (Telekomunikazzjoni), 3 ta' Ġunju 2022

Riżultati ewlenin

Intelliġenza artifiċjali

Fir-rigward tal-proposta għal Att dwar l-Intelliġenza Artifiċjali, il-Kunsill evalwa l-progress li sar u approva rapport ta' progress ippreżentat mill-presidenza.

L-abbozz ta' Regolament ippreżentat mill-Kummissjoni Ewropea f'April 2021 huwa element ewlieni fil-politika tal-UE biex jitrawmu l-iżvilupp u l-adozzjoni, fil-livell Ewropew, ta' intelliġenza artifiċjali (IA) affidabbli li tirrispetta d-drittijiet fundamentali.

Il-proposta tistabbilixxi qafas legali uniformi u orizzontali għall-IA bil-għan li:

• jiżgura li s-sistemi tal-IA mqiegħda fis-suq tal-UE u użati fl-Unjoni Ewropea, inkluż minn fornituri mhux tal-UE, jirrispettaw il-valuri u l-liġijiet eżistenti tal-Unjoni Ewropea dwar id-drittijiet fundamentali
• jiżgura ċ-ċertezza legali biex jiġu ffaċilitati l-investiment u l-innovazzjoni fl-IA
• itejjeb il-governanza u l-infurzar effettiv tal-liġi eżistenti dwar id-drittijiet fundamentali u r-rekwiżiti tas-sikurezza applikabbli għas-sistemi tal-IA

Il-ministri appoġġaw l-objettivi ewlenin tal-proposta u ħadu nota tar-rapport ta' progress. Il-ħidma fil-Kunsill ser tkompli taħt il-presidenza Ċeka.

• Abbozz ta' regolament li jistabbilixxi regoli armonizzati dwar l-intelliġenza artifiċjali (Att dwar l-Intelliġenza Artifiċjali)
• Approċċ Ewropew għall-intelliġenza artifiċjali (Informazzjoni tal-Kummissjoni)
• Futur diġitali għall-Ewropa (informazzjoni ġenerali)

Qafas għal Identità Diġitali Ewropea

Il-Kunsill evalwa l-progress li sar u approva rapport ta' progress ippreżentat mill-presidenza dwar il-proposta għal Regolament dwar qafas Ewropew għall-Identità Diġitali. Il-qafas il-ġdid propost ser jemenda r-regolament tal-2014 dwar l-identifikazzjoni elettronika u s-servizzi fiduċjarji għal tranżazzjonijiet elettroniċi fis-suq intern (Regolament eIDAS), li kien stabbilixxa s-sisien għal sistema biex jiġu aċċessati s-servizzi u jitwettqu t-tranżazzjonijiet online u bejn il-fruntieri fl-UE b'mod sigur.

Il-proposta għandha l-għan li tiżgura aċċess universali għan-nies u n-negozji għal identifikazzjoni u awtentikazzjoni elettronika sigura u affidabbli permezz ta' kartiera Ewropea tal-identità diġitali. Din il-kartiera għandha tiġi rikonoxxuta mis-settur pubbliku tal-UE, mill-fornituri privati tas-servizzi li jeħtieġu awtentikazzjoni b'saħħitha tal-utent u mill-pjattaformi online l-kbar. Il-proposta toħloq ukoll qafas legali għall-iskambju ta' attributi ta' identifikazzjoni u informazzjoni marbuta mal-identità. Din tipprevedi l-kontroll mill-utenti u l-protezzjoni tad-data tagħhom u l-kondiviżjoni mmirata ta' data dwar l-identità limitata għall-ħtiġijiet tas-servizz speċifiku mitlub.

Il-ministri appoġġaw l-objettivi ewlenin tal-proposta u ħadu nota tar-rapport ta' progress. Il-ħidma fil-Kunsill ser tkompli taħt il-presidenza Ċeka.

• Regolament dwar qafas Ewropew għall-Identità Diġitali
• Identità Diġitali Ewropea (Informazzjoni tal-Kummissjoni)
• Futur diġitali għall-Ewropa (informazzjoni ġenerali)

L-Att dwar id-Data

Il-Kunsill evalwa l-progress fir-rigward tal-proposta għal Regolament dwar regoli armonizzati dwar l-aċċess ġust għad-data u l-użu tagħha.

L-objettivi ewlenin ta' dik il-proposta huma li tiżgura l-ġustizzja fl-allokazzjoni tal-valur mid-data fost l-atturi fl-ekonomija tad-data u trawwem l-aċċess għad-data u l-użu tagħha. Hija leġiżlazzjoni orizzontali, li dalwaqt għandha tiġi kkomplementata b'leġiżlazzjoni komplementari għal setturi speċifiċi. Din il-proposta leġiżlattiva hija għalhekk pass importanti fl-iżvilupp tal-ekonomija Ewropea tad-data.

Il-ministri appoġġaw l-objettivi ewlenin tal-proposta u ħadu nota tar-rapport ta' progress. Il-ħidma fil-Kunsill ser tkompli taħt il-presidenza Ċeka.

• Proposta għal Regolament tal-Parlament Ewropew u tal-Kunsill dwar regoli armonizzati dwar l-aċċess ġust għad-data u l-użu tagħha (l-Att dwar id-Data)
• Ħajtek online: l-UE kif qed tagħmilha aktar faċli u sikura għalik? (artiklu dwar is-suġġett)
• Futur diġitali għall-Ewropa (informazzjoni ġenerali)

Tranżizzjoni diġitali u ekoloġika

Il-Kunsill kellu wkoll dibattitu ta' orjentazzjoni dwar it-tranżizzjoni diġitali u ekoloġika abbażi ta' nota ppreżentata mill-presidenza. Il-ministri ddiskutew kif għandu jitkejjel u jiġi vvalutat l-impatt ambjentali tat-teknoloġija diġitali, u arranġamenti għall-iżvilupp ta' teknoloġija diġitali sostenibbli li taqdi t-tranżizzjoni ekoloġika tal-ekonomija.

B'mod aktar speċifiku, il-ministri qasmu l-fehmiet tagħhom dwar il-possibbiltà li jiġu stabbiliti, fil-livell Ewropew, metodoloġiji għall-kejl tal-impronta ambjentali tal-qasam diġitali, b'kont meħud tal-potenzjal tiegħu li jnaqqas l-impronta ambjentali ta' setturi oħra. Il-ministri ddiskutew ukoll il-miri konkreti li l-Ewropa għandha tistabbilixxi sal-2030 u l-lievi li għandhom jingħataw prijorità fil-livell Ewropew biex jiġu indirizzati l-aktar fatturi importanti tal-ispejjeż ambjentali fis-settur diġitali, b'mod partikolari rigward it-tagħmir diġitali, u biex jitħeġġu l-użi u s-servizzi li jwasslu għal din it-tranżizzjoni.

Il-ministri enfasizzaw li, filwaqt li l-użu intelliġenti ta' teknoloġiji diġitali nodfa jista' jaġixxi bħala faċilitatur ewlieni għall-azzjoni klimatika, għas-sostenibbiltà ambjentali u għall-kisba tal-Għanijiet ta' Żvilupp Sostenibbli tan-NU, is-settur tat-teknoloġiji tal-informazzjoni u tal-komunikazzjoni (ICT) jeħtieġ li jiżgura wkoll id-disinn u l-użu ambjentalment sodi tat-teknoloġiji l-u prodotti diġitali.

Huma nnotaw ukoll li l-Ewropa tista' tikkompeti globalment fis-suq tat-teknoloġiji ekoloġiċi, b'mod partikolari billi tippromwovi t-teknoloġiji innovattivi, l-elettronika effiċjenti fl-użu tal-enerġija u s-sostenibbiltà ambjentali tas-soluzzjonijiet tal-ICT. Il-ministri enfasizzaw il-ħtieġa li tinħoloq metodoloġija għall-kejl tal-impronta ambjentali diġitali, jiġu stabbiliti miri għall-2030 u strateġija ambizzjuża għat-tranżizzjoni diġitali u ekoloġika fil-livell Ewropew.

Affarijiet oħra

Taħt "affarijiet oħra", il-presidenza infurmat lill-ministri dwar is-sitwazzjoni attwali tal-proposti leġiżlattivi attwali.

Fir-rigward tar-Regolament dwar il-privatezza u l-komunikazzjoni elettronika (Privatezza Elettronika), il-presidenza infurmat lill-ministri dwar is-sitwazzjoni attwali fil-Kunsill u n-negozjati li għaddejjin mal-Parlament Ewropew dwar dan il-fajl, inkluż l-eżitu tat-trilogu tal-31 ta' Marzu 2022.

Fir-rigward tal-abbozz ta' Deċiżjoni dwar il-Perkors għad-Deċennju Diġitali, il-presidenza infurmat lill-ministri dwar il-mandat għal negozjati mal-Parlament Ewropew approvat mill-Kumitat tar-Rappreżentanti Permanenti fil-11 ta' Mejju 2022.

Fir-rigward tad-Direttiva dwar miżuri għal livell għoli komuni ta' ċibersigurtà fl-UE kollha (id-Direttiva NIS riveduta jew "NIS 2"), il-presidenza infurmat lill-ministri dwar il-ftehim proviżorju li ntlaħaq mal-Parlament Ewropew fit-12 ta' Mejju 2022.

Il-presidenza infurmat ukoll lill-ministri dwar is-sitwazzjoni attwali rigward id-Dikjarazzjoni Ewropea dwar id-Drittijiet u l-Prinċipji Diġitali għad-Deċennju Diġitali.

Barra minn hekk, il-presidenza u delegazzjonijiet oħra infurmaw lill-ministri dwar il-Konferenza tal-Plenipotenzjarji tal-Unjoni Internazzjonali tat-Telekomunikazzjoni li għandha ssir f'Bucharest mis-26 ta' Settembru sal-14 ta' Ottubru 2022.

Id-delegazzjoni Awstrijaka, Ċeka u dik Slovakka infurmaw ukoll lill-ministri dwar l-eżitu tas-sessjoni ta' ħidma ta' livell għoli "L-Umaniżmu Diġitali u l-Intelliġenza Artifiċjali", li saret fi Brussell fit-3 ta' Marzu 2022.

Fl-aħħar nett, il-presidenza Ċeka li jmiss ippreżentat il-programm ta' ħidma tagħha għat-tieni nofs tal-2022.