Il-protezzjoni tad-data fl-UE

Data personali fl-era diġitali

Żviluppi teknoloġiċi mgħaġġla fl-aħħar żewġ deċennji ħolqu sfidi ġodda għall-protezzjoni tad-data personali. L-iskala tal-kondiviżjoni u l-ġbir tad-data kibret b'mod esponenzjali, kultant fuq livell globali, u l-individwi qed jagħmlu dejjem aktar l-informazzjoni personali disponibbli pubblikament.

L-integrazzjoni ekonomika u soċjali li tirriżulta mill-operat tas-suq intern wasslet ukoll għal żieda sostanzjali fil-flussi transfruntiera ta' data.

Biex jittieħed kont sħiħ ta' dawn l-iżviluppi kollha u tiġi promossa l-ekonomija diġitali, jeħtieġ jiġi żgurat livelli għoli ta' protezzjoni tad-data personali, waqt li fl-istess ħin ikun permess il-moviment liberu ta' dik id-data.

Fil-każ ta' data personali użata għal skopijiet ta' infurzar tal-liġi, hemm bżonn dejjem jikber li l-awtoritajiet fl-istati membri jipproċessaw u jiskambjaw id-data bħala parti mill-ġlieda kontra l-kriminalità u t-terroriżmu tranżnazzjonali.

F'dan il-kuntest, regoli ċari u konsistenti dwar il-protezzjoni tad-data fil-livell tal-UE huma fundamentali biex titjieb il-kooperazzjoni bejn dawk l-awtoritajiet.

Il-protezzjoni tad-data bħala dritt fundamentali

Mill-iffirmar tat-Trattat ta' Liżbona fl-2007, il-protezzjoni tad-data personali saret dritt fundamentali skont id-dritt tal-UE, rikonoxxut minn:

• it-Trattat dwar il-Funzjonament tal-Unjoni Ewropea
• il-Karta tad-Drittijiet Fundamentali tal-UE

Dan ifisser li l-UE għandha bażi legali speċifika biex fuqha tadotta leġiżlazzjoni li tipproteġi dan id-dritt fundamentali.

L-Artikolu 8 tal-Karta tad-Drittijiet Fundamentali tal-UE jistipula li kull persuna fl-UE għandha d-dritt għal:

• protezzjoni tad-data personali li tirrigwardaha
• aċċess għal data miġbura li tirrigwardaha, u d-dritt għar-rettifika tagħha

Eżempji ta' data personali

• l-isem u l-kunjom
• l-indirizz tad-dar
• l-indirizz elettroniku bħal [email protected]

• in-numru tal-karta ta' identifikazzjoni
• data ta' lokalizzazzjoni, pereżempju l-funzjoni tad-data ta' lokalizzazzjoni fuq mowbajl
• l-indirizz tal-Protokoll tal-Internet (IP)

• l-id tal-cookie
• l-identifikatur tar-reklamar tat-telefown tiegħek
• id-data miżmuma minn sptar jew tabib, li jista' jkun simbolu li jidentifika persuna b'mod inekwivokabbli

Direttiva dwar il-protezzjoni tad-data fl-infurzar tal-liġi

Din id-direttiva dwar il-protezzjoni tad-data personali pproċessata għall-finijiet tal-infurzar tad-dritt kriminali għandha l-għan li tipproteġi d-dritt tal-individwi għall-protezzjoni tad-data personali tagħhom filwaqt li tiggarantixxilivell għoli ta' sigurtà pubblika.

Tapplika kemm għall-ipproċessar transfruntier kif ukoll għal dak nazzjonali tad-data mill-awtoritajiet kompetenti tal-istati membri għall-finijiet tal-infurzar tad-dritt kriminali.

Id-direttiva kienet adottata fl-2016 u daħlet fis-seħħ fl-2018.

• Protezzjoni tad-data (Kummissjoni Ewropea)
• Kontrollur Ewropew għall-Protezzjoni tad-Data (sit web)