Turkija
It-Turkija kisbet l-istatus ta' kandidat tal-UE f'Diċembru 1999. L-UE u t-Turkija bdew in-negozjati għall-adeżjoni f'Ottubru 2005, iżda wara r-rigress tat-Turkija fil-qasam tad-demokrazija, tal-istat tad-dritt u tad-drittijiet fundamentali, in-negozjati bejn l-UE u t-Turkija dwar l-adeżjoni ilhom wieqfa għal kollox minn Ġunju 2018.
Applikazzjoni għas-sħubija fl-UE
Fl-1987, it-Turkija applikat biex tingħaqad mal-Komunità Ekonomika Ewropea, kif kienet tissejjaħ dan iż-żmien.
Fil-laqgħa tiegħu f'Ħelsinki f'Diċembru 1999, il-Kunsill Ewropew ta l-istatus ta' kandidat lit-Turkija.
Negozjati tal-adeżjoni
Fil-laqgħa tiegħu fis-16 u s-17 ta' Diċembru 2004, il-Kunsill Ewropew iddeċieda li t-Turkija ssodisfat b'mod suffiċjenti l-kriterji biex jinfetħu n-negozjati għall-adeżjoni.
Il-Kunsill qabel dwar qafas għan-negozjati mat-Turkija fit-3 ta' Ottubru 2005. Fl-istess jum, tnedew in-negozjati f'konferenza intergovernattiva bejn l-UE u t-Turkija.
Fi Frar 2008, il-Kunsill adotta verżjoni riveduta tas-sħubija għall-adeżjoni mat-Turkija. Din tagħti bażi biex tgħin lit-Turkija tħejji għas-sħubija eventwali mal-UE billi tiddeskrivi l-oqsma ta' prijorità ewlenin u sservi ta' kejl tal-progress fir-riformi.
F'Ġunju 2018, il-Kunsill innota għall-ewwel darba li t-Turkija kienet qed titbiegħed mill-UE u li għaldaqstant in-negozjati għall-adeżjoni tat-Turkija kienu effettivament wieqfa għal kollox u ma jista' jitqies ebda kapitolu ieħor għall-ftuħ jew għall-għeluq.
Laqgħat tal-Konferenza dwar l-Adeżjoni
In-negozjati tal-adeżjoni jsiru f'konferenzi intergovernattivi (imsejħa wkoll "konferenzi dwar l-adeżjoni") bejn il-ministri u l-ambaxxaturi tal-istati membri tal-UE u l-pajjiż kandidat. In-negozjati jkopru l-korp ta' drittijiet u liġi komuni (l-"acquis tal-UE") u huma maqsuma f'kapitoli differenti, jew raggruppamenti ta' kapitoli, li jkopru oqsma ta' politika differenti. Il-konferenzi dwar l-adeżjoni jistgħu jsiru jew fil-livell ministerjali jew tad-deputati.
Qabel il-waqfien li hemm bħalissa fin-negozjati għall-adeżjoni, l-UE u t-Turkija kellhom 12-il laqgħa bħal dawn. Fl-aħħar laqgħa, li saret fit-30 ta' Ġunju 2016, il-konferenza fetħet negozjati dwar il-kapitolu 33, li jittratta d-dispożizzjonijiet finanzjarji u baġitarji. Fl-2006, il-Kunsill kien ikkonkluda li tmien kapitoli rilevanti għar-restrizzjonijiet tat-Turkija fir-rigward ta' Ċipru ma kinux ser jinfetħu u l-ebda kapitolu ieħor ma kien ser jingħalaq proviżorjament sakemm it-Turkija ma tkunx issodisfat l-impenji tagħha relatati mal-Protokoll Addizzjonali għall-Ftehim ta' Assoċjazzjoni bejn l-UE u t-Turkija (il-"Ftehim ta' Ankara").
Bħala parti min-negozjati tal-adeżjoni kienu nfetħu 16-il kapitolu u wieħed minnhom kien ingħalaq proviżorjament.
Rieżami annwali tal-progress
Kull sena, il-Kunsill is-soltu jadotta konklużjonijiet dwar it-tkabbir li jevalwaw il-progress li jkun sar f'kull wieħed mill-kandidati u s-sħab tal-UE, inkluż it-Turkija, fil-perkors Ewropew tagħhom.
Relazzjonijiet tal-UE mat-Turkija
It-Turkija tibqa' pajjiż kandidat u hija sieħeb ewlieni tal-UE f'ħafna oqsma ta' interess komuni, fosthom il-migrazzjoni, il-ġlieda kontra t-terroriżmu, is-saħħa pubblika, il-klima u kwistjonijiet reġjonali. F'Marzu 2021, il-Kunsill Ewropew iddikjara li l-UE hija lesta li tidħol fi djalogu mat-Turkija b'mod gradwali, proporzjonat u riversibbli f'oqsma ta' interess komuni, soġġett għal kundizzjonalitajiet stabbiliti.
L-UE għandha interess strateġiku f'ambjent stabbli u sigur fil-Lvant tal-Mediterran u sikwit appellat lit-Turkija biex tnaqqas it-tensjonijiet fiż-żona, tirrispetta s-sovranità u l-integrità territorjali tal-istati membri kollha tal-UE u tippromwovi relazzjonijiet tajba mal-ġirien b'mod sostenibbli.
L-UE u t-Turkija għandhom ftehim ta' assoċjazzjoni li jmur lura għall-1963 li għandu l-għan li jsaħħaħ il-kooperazzjoni ekonomika u r-relazzjonijiet kummerċjali bilaterali. L-Unjoni Doganali bejn l-UE u t-Turkija ilha fis-seħħ sa mill-1995.