An Chomhairle um Oideachas, An Óige, Cultúr agus Spórt, 24/02/2016, 24 Feabhra 2016

Na príomhthorthaí

Ghlac an Chomhairle rún maidir le forbairt agus cuimsitheacht shoch-eacnamaíoch a chur chun cinn san Aontas Eorpach tríd an oideachas. Dírítear sa téacs ar bearta chun a áirithiú go ndéanfar infheistíocht spriocdhírithe i gcúrsaí oideachais agus ar an mbealach is fearr chun aghaidh a thabhairt ar bhearnaí i scileanna chun poist a athshlánú agus chun fás eacnamaíoch inbhuanaithe a chur chun cinn san Eoraip. Ag an am céanna, leagann sí béim ar ról an oideachais atá chomh tábhachtach céanna chun saoránacht agus cuimsiú sóisialta a chur chun cinn.

Phléigh na hAirí an chaoi a bhféadfaí na sineirgí idir an t-oideachas, margadh an tsaothair agus an tsochaí a mhéadú d’fhonn an fheasacht a ardú agus béim a leagan ar an bpráinn a bhaineann le go leor de na saincheisteanna a bhaineann le forbairt scileanna.

Faisnéis faoin gcruinniú

Dúirt an tAire Jet Bussemaker: "Tá sé bunriachtanach go bhforbrófar agus go mbainfear úsáid as tacar cuí cothrom scileanna chun go mbeidh buntáiste ag daltaí, ag mic léinn, ag múinteoirí agus ag daoine fásta i margadh saothair atá ag athrú agus a bhfuil méadú ag teacht faoina raon feidhme domhanda".

Bainfear úsáid as toradh phlé na n-Airí sa tionscnamh “Clár Oibre do Scileanna Nua don Eoraip" atá beartaithe ag an gCoimisiún, arb é is aidhm dó infheistíocht fhadsaoil a dhéanamh i ndaoine, chomh maith le hinfhostaitheacht a mhéadú.

Ar deireadh, bhí malartú tuairimí ag na hAirí maidir le luachanna saoránachta agus bunúsacha a chur chun cinn tríd an oideachas, sna sála ar dhearbhú Pháras a glacadh beagnach bliain ó shin ag an gcruinniú neamhfhoirmiúil a bhí ag na hAirí Oideachais i bPáras.

Chuir na hAirí i bhfios go láidir nach í an infhostaitheacht amháin is cuspóir leis an oideachas. Baineann cúram tábhachtach amháin le hurraim a chothú do luachanna bunúsacha comhroinnte Eorpacha, amhail saoirse cainte, saoránacht dhaonlathach agus comhionannas.