Kunsill Affarijiet Barranin, 22/07/2014, 22 ta' Lulju 2014

Il-Kunsill jieħu azzjoni fuq it-twaqqigħ tat-titjira MH17

Imlaqqgħin fil-Kunsill Affarijiet Barranin fi Brussell, il-ministri tal-UE ddiskutew is-sitwazzjoni fl-Ukraina wara t-twaqqigħ tat-titjira MH17 kif ukoll aktar sanzjonijiet kontra r-Russja. Ġew diskussi wkoll Gaża u l-Iraq.

L-UE u l-Istati Membri tagħha maħsudin u mnikkta ħafna bit-twaqqigħ tat-Titjira MH17 tal-Malasian Airlines f'Donetsk, l-Ukraina u t-telf traġiku ta' daqstant ħajjiet innoċenti.

Il-ministri tal-UE esprimew l-aktar kondoljanzi profondi tagħhom lill-popli u l-gvernijiet tan-nazzjonijiet kollha milquta u b'mod partikolari lill-familji tal-vittmi.

Huma jikkundannaw bil-qawwa it-tkomplija ta' attivitajiet illegali minn militanti armati fl-Ukraina tal-Lvant u jistgħu jikkunsidraw in-nomina possibbli ta' dawn il-gruppi bħala organizzazzjonijiet terroristiċi.

Huma ħeġġew lill-Federazzjoni Russa tuża b'mod attiv l-influwenza tagħha fuq dawn il-gruppi biex tiggarantixxi aċċess għas-sit tat-tiġrif u tikkoopera mas-superviżuri tal-OSKE u l-esperti internazzjonali.

Investigazzjoni internazzjonali trasparenti u indipendenti dwar it-twaqqigħ tal-ajruplan MH17

Il-Kunsill appella lis-separatisti biex jiżguraw aċċess sħiħ, immedjat, bla periklu u sigur għas-sit tat-tiġrif. Huwa jappoġġa l-appell tal-KSNU u tal-Kunsill Permanenti tal-OSKE għal investigazzjoni internazzjonali trasparenti u indipendenti.

Dawk direttament u indirettament responsabbli mit-twaqqigħ għandhom jinżammu responsabbli u jitressqu quddiem il-ġustizzja.

Sanzjonijiet

Il-Kunsill talab biex titħaffef it-tħejjija tal-miżuri maqbula fil-laqgħa speċjali tal-Kunsill Ewropew fis-16 ta' Lulju. Għandha tiġi stabbilita minnufih lista ta' entitajiet u persuni li jaqgħu taħt il-kriterji msaħħa adottati mill-Kunsill fit-18 ta' Lulju.

Rigward aktar miżuri sinifikanti mmirati, il-Kunsill talab lill-Kummissjoni u lis-SEAE biex jiffinalizzaw il-ħidma preparatorja tagħhom u biex fl-24 ta' Lulju jippreżentaw proposti biex tittieħed azzjoni, inkluż dwar l-aċċess għas-swieq tal-kapital, id-difiża, il-prodotti b'użu doppju, u teknoloġiji sensittivi, inkluż fis-settur tal-enerġija.

Pjan ta' paċi u waqfien mill-ġlied

Il-Kunsill enfasizza l-appoġġ tiegħu għal riżoluzzjoni paċifika tal-kriżi fl-Ukraina. Il-ministri tal-UE appellaw għal appoġġ għall-OSKE u għall-Grupp ta' Kuntatt Trilaterali fl-isforzi tagħhom biex jinħolqu kondizzjonijiet għal waqfien mill-ġlied sostenibbli.

Huma ħeġġew ukoll lir-Russja biex twaqqaf il-fluss ta' armi, tagħmir u militanti fuq il-fruntiera u biex tirtira t-truppi addizzjonali tagħha miż-żona tal-fruntiera.

L-aktar deċiżjonijiet reċenti dwar l-Ukraina

18 ta' Lulju - il-kriżi fl-Ukraina: L-UE twessa' l-ambitu tas-sanzjonijiet

Fit-18 ta' Lulju, il-Kunsill wessa' l-bażi legali għall-miżuri restrittivi tal-UE u għamel possibbli li jiġu mmirati entitajiet li materjalment jew finanzjarjament jappoġġaw l-azzjonijiet kontra l-Ukraina.

16 ta' Lulju - laqgħa speċjali tal-Kunsill Ewropew

Il-mexxejja ddispjaċihom li r-Russja u s-separatisti ma kinux ħadu l-passi mitluba fil-konklużjonijiet tal-Kunsill Ewropew tas-27 ta' Ġunju. Huma qablu dwar sett ġdid ta' 6 miżuri restrittivi kontra r-Russja.

26 ta' Ġunju - konklużjonijiet tal-Kunsill Ewropew

Il-mexxejja tal-UE ddefinixxew 4 passi speċifiċi li għandhom jittieħdu mir-Russja u s-separatisti biex titnaqqas it-tensjoni.

Suġġetti oħra fuq l-aġenda

Proċess ta' paċi fil-Lvant Nofsani

Il-Kunsill huwa estremament imħasseb biż-żieda kontinwa fil-vjolenza f'Gaża u jappella għal waqfien immedjat mill-ġlied. Huwa laqa' l-isforzi li għaddejjin minn sħab reġjonali biex jiġi stabbilit waqfien mill-ġlied u appella lill-Ħamas biex jaqbel dwar tali waqfien mill-ġlied.

Waqt l-ikel, il-ministri ddiskutew l-aktar żviluppi reċenti fl-Iraq. Huma tennew it-tħassib serju tagħhom dwar is-sitwazzjoni tas-sigurtà li qed tiddeterjora rapidament fl-Iraq, waqt li kkundannaw bil-qawwa l-attakki li saru mill-Istat Iżlamiku tal-Iraq u l-Levant (ISIL).

Laqgħa ministerjali tas-Sħubija tal-Lvant

Fit-22 ta' Lulju, fil-marġini tal-Kunsill Affarijiet Barranin, il-ministri tal-UE attendew ukoll il-5 laqgħa annwali tas-Sħubija tal-Lvant (SL). Id-diskussjoni ffukat fuq l-implimentazzjoni ta' Ftehimiet ta' Assoċjazzjoni u ta' Kummerċ Ħieles, kif ukoll il-bżonn ta' divrenzjar akbar fir-relazzjonijiet bilaterali. Il-ministri ddiskutew ukoll it-tħejjija tas-Summit tas-Sħubija tal-Lvant li għandu jsir f'Riga f'Mejju 2015.

Il-Kunsill adotta wkoll għadd ta' punti mingħajr diskussjoni:

• konklużjonijiet dwar ir-Repubblika Ċentru-Afrikana (FR)
• konklużjonijiet dwar ir-Reġjun tal-Lagi l-Kbar
• estensjoni tal-EUCAP Nestor
• estensjoni tal-EUCAP Sahel Niger
• sanzjonijiet tal-UE aktar ibsin kontra r-reġim Sirjan
• stabbiliment ta' missjoni biex tagħti parir dwar ir-riforma tas-settur tas-sigurtà ċivili fl-Ukraina