Borradh a chur faoi iomaíochas an Aontais: an bealach chun cinn

Aon Eoraip Amháin, Aon Mhargadh Amháin

Ag teacht le chéile dóibh sa Chomhairle Eorpach, sheol ceannairí an Aontais clár oibre maidir le ‘Aon Eoraip Amháin, Aon Mhargadh Amháin’ i mí an Mhárta 2026, clár oibre a bheidh le cur chun feidhme in 2026 más féidir agus faoi dheireadh 2027 ar a dhéanaí.

Sainaithnítear sa chlár oibre sin sraith beart nithiúil i gcúig réimse a dtabharfar aghaidh orthu go práinneach chun borradh a chur faoi iomaíochas na hEorpa agus chun neamhspleáchas straitéiseach agus slándáil eacnamaíochan Aontais a fheabhsú, rud a chothóidh rathúnas agus modh sóisialta na hEorpa.

An margadh aonair a dhoimhniú agus a chomhtháthú

Rialacha a shimpliú a thuilleadh agus na hualaí riaracháin a laghdú

Fuinneamh inacmhainne a chinntiú agus an t-aistriú fuinnimh a bhaint amach

Athnuachan thionsclaíoch agus nuálaíocht na hEorpa a chothú agus na spleáchais a laghdú

Infheistíocht a shlógadh

Déanfaidh ceannairí an Aontais athbhreithniú rialta ar an dul chun cinn maidir leis na sraitheanna uile agus cuirfidh siad treoir straitéiseach bhreise ar fáil nuair is gá.

• An Chomhairle Eorpach, an 19-20 Márta 2026

Ar imeall an chruinnithe neamhfhoirmiúil den Chomhairle Eorpach in Lefkosia an 24 Aibreán 2026, shínigh Uachtaránacht na Cipire ar an gComhairle, Uachtarán Pharlaimint na hEorpa agus Uachtarán an Choimisiúin an treochlár ‘Aon Eoraip Amháin, Aon Mhargadh Amháin’, ina bhfuil tograí agus bearta nithiúla, le hamlínte agus garspriocanna, bunaithe ar an treoir a chuir ceannairí an Aontais ar fáil.

An 18 Meitheamh 2026, ar imeall chruinniú na Comhairle Eorpaí, d’eisigh an Chomhairle, an Pharlaimint agus an Coimisiún an chéad tuarascáil ar dhul chun cinn maidir leis an treochlár. Táthar ag súil go ndéanfar tuilleadh dul chun cinn maidir leis an treochlár a athbhreithniú ar bhonn ráithiúil.

Sa dara hathbhreithniú a rinne siad an 15 Deireadh Fómhair 2026, d’athdhearbhaigh institiúidí an Aontais a dtiomantas do sheachadadh tráthúil.

• Treochlár comhaontaithe ag na hinstitiúidí Eorpacha chun ‘Aon Eoraip Amháin, Aon Mhargadh Amháin’ a bhaint amach faoi dheireadh 2027 (preaseisiúint, an 24 Aibreán 2026)
• Tús láidir — an chéad tuarascáil ar dhul chun cinn maidir leis an treochlár ‘Aon Eoraip Amháin, Aon Mhargadh Amháin’ (preaseisiúint, 18 Meitheamh 2026)
• Dul chun cinn stuama á dhéanamh ar an Treochlár ‘Aon Eoraip Amháin, Aon Mhargadh Amháin’ (preaseisiúint, 15 Deireadh Fómhair 2026)

Lean an dul chun cinn le cur chun feidhme an treochláir ‘Aon Eoraip Amháin, Aon Mhargadh Amháin’ anseo:

• an treochlár ‘Aon Eoraip Amháin, Aon Mhargadh Amháin (an Coimisiún Eorpach)

An margadh aonair

Is freagracht chomhroinnte phráinneach de chuid na mBallstát uile agus institiúidí uile an Aontais é a chinntiú go mbeidh margadh aonair fíor-chomhtháite ag an Aontas a mbeidh rochtain ag daoine agus ag gnólachtaí air. Ba cheart do chuideachtaí, gan beann ar a méid, a bheith in ann oibriú gan stró ar fud an mhargaidh aonair, agus mórmhéadú a dhéanamh chun a n-acmhainneacht iomlán a bhaint amach.

Chuir ceannairí an Aontais i bhfios go láidir gur cheart dul chun cinn nithiúil follasach a dhéanamh faoi mhí an Mhárta 2027 chun bacainní ar na ceithre shaoirse a chosc agus a bhaint. Leag siad amach sé bheart tosaíochta.

Chuir ceannairí an Aontais i dtreis gur gá feabhas a chur ar na dálaí i gcomhair gnólachtaí chun an scála is gá a bhaint amach chun infheistíocht agus nuáil a dhéanamh agus chun dul san iomaíocht ar an leibhéal domhanda. Áirítear leis sin an t-athbhreithniú leanúnach ar na treoirlínte maidir le cumaisc.

D’iarr siad freisin ar an gCoimisiún a chinntiú go ndéanfar rialacha an mhargaidh aonair a fhorfheidhmiú go tráthúil agus go láidir.

An simpliú

D’iarr ceannairí an Aontais go leanfaí den obair leanúnach maidir le rialacha a shimpliú agus ualaí riaracháin a laghdú ar leibhéal an Aontais, ar an leibhéal náisiúnta agus ar an leibhéal réigiúnach agus shainaithin siad bearta nithiúla chun a chinntiú a thuilleadh go mbeidh an timpeallacht rialála fabhrach don nuálaíocht agus do FBManna araon.

Ina theannta sin, d’iarr ceannairí an Aontais ar an gCoimisiún an méid seo a leanas a dhéanamh:

• a chinntiú go mbeidh na tionscnaimh nua uile de chuid an Aontais i gcomhréir leis an bprionsabal ‘simplíocht trí dhearadh’ agus go ngabhfaidh measúnuithe tionchair ardcháilíochta leo, go rannchuideoidh siad le spriocanna iomaíochais an Aontais, agus go laghdóidh siad na costais agus go seachnóidh siad na hualaí
• tús áite a thabhairt do rialacháin seachas do threoracha
• teorainn a chur leis an úsáid a bhaintear as gníomhartha tarmligthe agus cur chun feidhme, ar cheart dóibh a bheith dírithe ar ghnéithe teicniúla

D’iarr siad freisin ar na comhreachtóirí gan ualaí breise riaracháin a thabhairt isteach i ngníomhartha dlí an Aontais agus thathantaigh siad ar na Ballstáit gan ceanglais náisiúnta dhíréireacha a fhorchur agus rialacha an Aontais á dtrasuí agus á gcur chun feidhme acu.

Fuinneamh

Chuir ceannairí an Aontais i bhfios go láidir go bhfuil an t-aistriú fuinnimh ríthábhachtach chun neamhspleáchas straitéiseach na hEorpa a bhaint amach, chun an spleáchas ar mhargaí luaineacha breoslaí iontaise a laghdú, chun athléimneacht a neartú, chun praghsanna fuinnimh a ísliú go struchtúrach, agus chun fuinneamh glan, flúirseach agus dúchasach a chur ar fáil.

Ag an am céanna, tá gá le réitigh spriocdhírithe sa ghearrthéarma chun a chinntiú go mbeidh an fuinneamh inacmhainne.

Ós rud é gur imir an choinbhleacht sa Mheánoirthear tionchar láithreach ar phraghsanna fuinnimh do shaoránaigh agus do ghnólachtaí an Aontais, leag an Chomhairle Eorpach béim ar an ngá atá le freagairt chomhordaithe.

Tá sraith beart chun na críche sin sa chlár oibre ‘Aon Eoraip Amháin, Aon Mhargadh Amháin’.

Thairis sin, d’iarr ceannairí an Aontais ar na Ballstáit agus ar an gCoimisiún dlús a chur le cur chun feidhme chlár oibre 2030 an Aontais Fuinnimh, chun leictriúchán méadaithe agus inacmhainne a cheadú go tapa.

Tionscal agus nuálaíocht

Athnuachan thionsclaíoch na hEorpa a chothú, dlús a chur leis an nuálaíocht agus spleáchais straitéiseacha a laghdú, is réamhchoinníollacha anois iad don athléimneacht, don fhás agus do chruthú post.

Sa chlár oibre ‘Aon Eoraip Amháin, Aon Mhargadh Amháin’, d’iarr ceannairí an Aontais go ndéanfaí roinnt gníomhaíochtaí.

Chuir ceannairí an Aontais i bhfios go láidir freisin nach mór leanúint de na naisc thrádála agus infheistíochta a éagsúlú, lena n-áirítear rochtain a áirithiú ar acmhainní riachtanacha, slabhraí soláthair, margaí agus teicneolaíochtaí.

Infheistíocht

Tá aontas coigiltis agus infheistíochta ina bhfuil margadh caipitil lán-chomhtháite ríthábhachtach chun an caipiteal cothromais a chur ar fáil do ghnólachtaí Eorpacha chun go mbeidh siad in ann nuáil agus fás a dhéanamh agus chun poist ardcháilíochta agus fás inbhuanaithe a chruthú san Aontas.

D’iarr ceannairí an Aontais go ndéanfaí gníomhaíocht i roinnt réimsí chun na críche sin.

D’iarr ceannairí an Aontais ar an gCoimisiún agus ar na comhreachtóirí comhtháthú mhargadh baincéireachta an Aontais a dhoimhniú trí dhul chun cinn a dhéanamh i dtreo an t-aontas baincéireachta a thabhairt i gcrích.

• An t-aontas coigiltis agus infheistíochta

Féach freisin