Táirgí a dhéantar le saothar éignithe

Teicstílí

Talmhaíocht

Mianadóireacht

Straitéis an Aontais chun cosc a chur ar tháirgí a dhéantar le saothar éignithe

Ghlac an tAontas rialacha chun toirmeasc a chur ar aon táirge a dhéantar le saothar éignithe a chur ar mhargadh an Aontais agus a chur ar fáil ar mhargadh an Aontais, nó a onnmhairiú as margadh an Aontais.

Chun an méid sin a bhaint amach, bunaítear leis an reachtaíocht, a glacadh in Mí na Samhna 2024, creat struchtúrtha chun toirmeasc a chur ar shaothar éignithe a úsáid i dtáirgeadh earraí an Aontais agus laistigh de shlabhraí soláthair.

Cuirfidh sé ar chumas an Aontais táirge a thoirmeasc agus a bhaint den mhargadh aonair má léirítear go bhfuil saothar éignithe i gceist leis, gan beann ar é a bheith táirgthe laistigh den Aontas nó é a bheith allmhairithe isteach san Aontas.

• Táirgí a dhéantar le saothar éignithe: toirmeasc glactha ag an gComhairle (preaseisiúint, an 19 Samhain 2024)

Imscrúduithe

Chun cuidiú le measúnú a dhéanamh ar na sáruithe a d’fhéadfaí a dhéanamh ar an rialachán seo, bunóidh an Coimisiún bunachar sonraí ina mbeidh faisnéis infhíoraithe a nuashonraítear go rialta faoi na rioscaí a bhaineann leis an saothar éignithe, limistéir nó táirgí.

Tá údaráis éagsúla i gceannas ar na himscrúduithe a stiúradh:

• is é an Coimisiún atá inniúil lasmuigh de chríoch an Aontais
• is é an t-údarás inniúil náisiúnta atá i gceannas nuair a bhíonn na rioscaí laistigh de chríoch Ballstáit

Ba cheart d’údaráis na mBallstát eolas a roinnt le Ballstáit eile má tá amhras orthu go bhfuil sáruithe á ndéanamh ar an rialachán in áiteanna san Aontas, nó eolas a roinnt leis an gCoimisiún, má mheasann siad go n‑úsáidtear saothar éignithe i dtríú tír.

Is iad seo a leanas na critéir chun measúnú a dhéanamh ar sháruithe ar an rialachán seo:

• scála agus déine an tsaothair éignithe amhrasta
• líon nó méid na dtáirgí a chuirtear ar mhargadh an Aontais nó a chuirtear ar fáil ar mhargadh an Aontais
• sciarna gcodanna den chríochtáirge ar dócha go ndearnadh le saothar éignithe é
• a chóngaraí atá na hoibreoirí eacnamaíocha do rioscaí amhrasta an tsaothair éignithe ina gcuid slabhraí soláthair, chomh maith leis an gcumhacht atá acu chun aghaidh a thabhairt orthu

Cinneadh críochnaitheach

Is é an t-údarás a bhí i gceannas ar an imscrúdú a dhéanfaidh an cinneadh críochnaitheach.

Beidh feidhm ag an gcinneadh a dhéanfaidh údarás náisiúnta i ngach Ballstát eile agus bunófar é ar phrionsabal an aitheantais fhrithpháirtigh.

Má chinneann na húdaráis gur úsáideadh saothar éignithe, is féidir leo na táirgí a thoirmeasc agus a tharraingt siar ó mhargadh an Aontais agus ó na margaí ar líne. Má chuireann táirgeoirí deireadh leis an saothair éignithe ina gcuid oibríochtaí nó ina gcuid slabhraí soláthair, áfach, féadfar táirgí a bhfuil toirmeasc orthu a cheadú ar ais ar mhargadh an Aontais.

Cad iad na táirgí a mbeidh cosc orthu?

Cumhdaítear leis an togra gach táirge a mhonaraítear trí shaothar éignithe nó a chuirtear ar an margadh san Aontas nó a chuirtear ar fáil ar an margadh sin, nó a onnmhairítear as an Aontas.

Cumhdófar gach earnáil tionsclaíochta leis an reachtaíocht nua.

Muinín tomhaltóirí a mhéadú

Cuirfidh na rialacha nua le muinín na dtomhaltóirí toisc go ráthaítear go gcloífidh táirgí ar mhargadh an Aontais le caighdeáin chearta an duine.

I gcás gnólachtaí, d’fhéadfadh an togra iarrachtaí inbhuanaitheachta sóisialta a chuíchóiriú, agus muinín agus inchreidteacht an phobail a chothú i measc custaiméirí.

Is é is cuspóir don toirmeasc a mheastar a bheidh ann rannchuidiú go gníomhach le hiarrachtaí domhanda arb é is aidhm dóibh deireadh a chur leis an saothar éignithe agus cosaint a thabhairt do chearta oibrithe agus leanaí.