"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Żvilupp), 25/11/2019, 25 ta' Novembru 2019
Riżultati ewlenin
Ġrajjiet kurrenti
Il-Kunsill għamel referenza għall-Forum Globali dwar ir-Refuġjati, li ser isir f'Ġinevra fis-17-18 ta' Diċembru 2019. Il-ministri għall-iżvilupp ġew infurmati dwar l-involviment usa' tal-UE li jkopri l-firxa sħiħa ta' oqsma tal-Patt Globali dwar ir-Refuġjati.
Il-Kunsill kien aġġornat ukoll dwar is-sitwazzjoni attwali tan-negozjati dwar is-sħubija futura bejn l-UE u l-pajjiżi Afrikani, tal-Karibew u tal-Paċifiku (AKP), fid-dawl tal-iskadenza tal-qafas ta' Cotonou fl-2020.
L-UE trid timmassimizza l-impatt tal-għajnuna tagħha għall-iżvilupp
Arkitettura finanzjarja għall-iżvilupp
Jeħtieġ li nimmassimizzaw ir-riżultati tal-iżvilupp sostenibbli, permezz ta' investimenti ta' kwalità, u interessati wkoll fl-ingranaġġ, il-viżibbiltà u fl-aħħar mill-aħħar ritorn politiku lejn l-Unjoni Ewropea.
Federica Mogherini, Rappreżentant Għoli għall-Affarijiet Barranin u l-Politika ta' Sigurtà
Il-ministri għall-iżvilupp kellhom skambju ta' fehmiet dwar l-arkitettura finanzjarja futura għall-iżvilupp sostenibbli wara l-ħruġ tar-rapport tal-Grupp ta' Persuni Għorrief fit-8 ta' Ottubru 2019.
Il-President tal-Grupp ta' Persuni Għorrief Thomas Wieser ippreżenta r-rapport finali dwar kif għandu jiġi massimizzat il-valur miżjud tal-arkitettura finanzjarja Ewropea għall-iżvilupp, b'kont meħud tal-korpi nazzjonali u internazzjonali eżistenti involuti. Il-President tal-Bank Ewropew tal-Investiment (BEI), Werner Hoyer u l-President tal-Bank Ewropew għar-Rikostruzzjoni u l-Iżvilupp (BERŻ), Sir Suma Chakrabarti attendew ukoll il-laqgħa u ppreżentaw il-fehmiet tagħhom.
Ir-rapport jargumenta b'appoġġ għall-konsolidazzjoni u s-simplifikazzjoni tal-finanzjament għall-iżvilupp u l-attivitajiet klimatiċi barra mill-UE f'entità waħda, "Bank Ewropew dwar il-Klima u l-Iżvilupp Sostenibbli", sabiex jiġu evitati duplikazzjonijiet u biex jissaħħu l-preżenza, ir-rwol u l-kapaċità fit-tul tal-UE li twettaq il-prijoritajiet ta' żvilupp tagħha. Ir-rapport jiddeskrivi wkoll diversi għażliet dwar kif dan jista' jinkiseb. Barra minn hekk, ir-rapport jargumenta favur it-teħid ta' passi aktar immedjati biex jinħoloq ċentru ta' politika b'saħħtu fl-UE u biex il-baġit tal-UE għall-iżvilupp jintuża fil-Qafas Finanzjarju Pluriennali li jmiss bħala katalist għar-riforma tas-sistema eżistenti.
Matul id-diskussjoni, il-ministri enfasizzaw l-importanza ta' ħidma lejn viżjoni komuni u strateġika, u t-titjib tal-koerenza u l-effettività tal-azzjoni tal-UE, biex b'hekk tingħata aktar viżibbiltà u impatt akbar lill-UE bħala l-akbar donatur fid-dinja. Il-ministri enfasizzaw ukoll li kemm jista' jkun malajr għandha ssir ħidma fuq miżuri għal perijodu qasir u li soluzzjonijiet fuq perijodu itwal għandhom ikunu bbażati fuq analiżi fil-fond.
Il-Presidenza Finlandiża għandha l-għan li tadotta konklużjonijiet tal-Kunsill dwar ir-rapport sa Diċembru 2019, b'kont meħud tal-gwida pprovduta mill-ministri għall-iżvilupp.
Appoġġ għall-pajjiżi li qed jiżviluppaw fi tranżizzjoni
Il-Kunsill iddiskuta kif l-UE u l-istati membri jistgħu jikkooperaw aħjar biex jappoġġaw l-iżvilupp ta' pajjiżi fi tranżizzjoni, b'attenzjoni partikolari għall-każijiet tal-Etjopja u s-Sudan. Il-ministri qasmu l-esperjenza tagħhom u identifikaw l-aħjar prattiki, sfidi u prijoritajiet li fil-każ tal-Etjopja, jiffokaw fuq it-tranżizzjoni ekonomika, inkluż l-involviment tas-settur privat.
Fi skambju qasir ta' fehmiet dwar is-Sudan, abbażi tad-diskussjonijiet mill-ministri għall-affarijiet barranin fil-11 ta' Novembru, il-Kunsill afferma mill-ġdid l-appoġġ tiegħu għall-proċess ta' paċi u tenna l-importanza li n-nisa u ż-żgħażagħ jiġu inklużi biex tinkiseb stabbiltà fit-tul, kif ukoll l-urġenza li t-tranżizzjoni demokratika tiġi akkumpanjata bir-riżorsi meħtieġa.
Matul ikla ta' ħidma, il-ministri għall-iżvilupp tal-UE kellhom skambju ta' fehmiet mal-Ministru għall-Edukazzjoni tal-Etjopja, Dr. Tilye Gete. Huma taw ħarsa lejn l-isfidi għat-tagħlim fl-Afrika minn perspettiva tal-ugwaljanza bejn il-ġeneri.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Jeħtieġ li nimmassimizzaw ir-riżultati tal-iżvilupp sostenibbli, permezz ta' investimenti ta' kwalità, u interessati wkoll fl-ingranaġġ, il-viżibbiltà u fl-aħħar mill-aħħar ritorn politiku lejn l-Unjoni Ewropea.
