"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Wara laqgħa informali waqt il-kolazzjon ma' Sviatlana Tsikhanouskaya, il-mexxejja tal-forzi pro demokratiċi Belarussi, il-Kunsill qasam il-fehmiet tiegħu dwar il-Belarussja, u adotta sanzjonijiet kontra dawk responsabbli għall-eskalazzjoni ta' ksur serju tad-drittijiet tal-bniedem fil-Belarussja u r-repressjoni vjolenti tas-soċjetà ċivili, l-oppożizzjoni demokratika u l-ġurnalisti, kif ukoll dawk wara l-inżul furzat u illegali ta' titjira ta' Ryanair f'Minsk fit-23 ta' Mejju 2021.
Illum adottajna l-akbar pakkett ta' sanzjonijiet fir-rigward tal-Belarussja, li jelenka 86 individwu u entità. Dawn il-miżuri ġew ikkoordinati wkoll mal-Kanada, ir-Renju Unit u l-Istati Uniti. [...] L-Unjoni Ewropea tibqa' lesta li tappoġġa Belarussja b'futur demokratiku permezz ta' pjan komprensiv ta' appoġġ ekonomiku sa €3 biljuni, u tkompli tagħmel pressjoni fuq ir-reġim ta' Lukashenko permezz ta' sanzjonijiet fuq individwi u entitajiet adottati llum u sanzjonijiet ekonomiċi li għandhom jiġu deċiżi dalwaqt.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-ministri approvaw ukoll għażliet għal sanzjonijiet ekonomiċi mmirati bil-għan li dawn jiġu adottati malajr, wara gwida mill-Kunsill Ewropew aktar tard din il-ġimgħa.
Il-Kunsill tenna l-messaġġ tiegħu lir-reġim tal-Belarussja li għandu immedjatament u mingħajr kondizzjonijiet jeħles lill-priġunieri politiċi kollha u lil dawk detenuti talli talbu b'mod paċifiku r-rispett għal-libertajiet fundamentali tagħhom, iwaqqaf aktar repressjoni, iżomm lil dawk responsabbli għal għemilhom, u jibda djalogu nazzjonali ġenwin u inklużiv mas-soċjetà usa’.
L-Iraq
Il-ministri għall-affarijiet barranin qiesu l-aħħar żviluppi fl-Iraq, b'mod partikolari l-elezzjonijiet li ġejjin tal-Iraq, kwistjonijiet relatati mas-sigurtà, l-istabbiltà reġjonali u l-impenn bilaterali.
L-Iraq qed iwettaq riformi komprensivi, iżda s-sitwazzjoni ekonomika u tas-sigurtà għadha kritika. Sabiex jingħata appoġġ lill-pajjiż fil-perkors ta' riforma tiegħu, il-Kunsill iddeċieda li jsejjaħ il-Kunsill ta' Kooperazzjoni dwar il-Ftehim ta' Sħubija u Kooperazzjoni UE-Iraq fil-livell ministerjali qabel tmiem l-2021.
Wara stedina mill-gvern Iraqi, ir-Rappreżentant Għoli ħabbar id-deċiżjoni tiegħu li jibgħat missjoni ta' osservazzjoni tal-UE għall-elezzjonijiet Iraqini li ġejjin skedati għall-10 ta' Ottubru 2021.
Il-ministri kellhom opportunità li jaqsmu l-fehmiet tagħhom direttament mal-Ministru għall-Affarijiet Barranin Iraqi Fuad Hussein, waqt ikla ta' ħidma informali li matulha huwa informa lill-ministri tal-UE dwar l-aħħar żviluppi domestiċi.
Amerka Latina u l-Karibew
Il-Kunsill qasam il-fehmiet tiegħu dwar l-Amerka Latina u l-Karibew, b'enfasi partikolari fuq l-iżviluppi politiċi u ekonomiċi, kif ukoll fuq il-konsegwenzi soċjoekonomiċi drammatiċi tat-tixrid tal-COVID-19 fir-reġjun.
L-Amerka Latina tibqa' wieħed mir-reġjuni tad-dinja li huwa eqreb lejn l-UE f'termini ta' valuri u appoġġ għal ordni multilaterali bbażat fuq ir-regoli. L-UE hija wkoll l-akbar investitur tar-reġjun u wieħed mill-imsieħba kummerċjali ewlenin.
Il-Kunsill esprima r-rieda tiegħu li jaħdem flimkien biex jiżgura appoġġ qawwi għar-reġjun biex tiġi indirizzata l-pandemija tal-COVID-19, permezz ta' approċċ ta' Tim Ewropa, inkluż permezz ta' aċċess akbar għal vaċċini u donazzjonijiet ta' vaċċini. Il-ministri enfasizzaw ukoll il-ħtieġa li tissaħħaħ ir-reżiljenza finanzjarja tar-reġjun billi jissaħħu r-relazzjonijiet kummerċjali mal-pajjiżi u s-sħab l-aktar importanti, eż. il-Messiku, iċ-Ċilì u l-Mercosur.
Fl-aħħar nett, il-Kunsill iddiskuta hotspots reġjonali, fejn huwa meħtieġ appoġġ għal djalogu politiku. Ser tintbagħat missjoni esploratorja elettoralifil-Venezwela biex jiġi kkunsidrat jekk il-kundizzjonijiet jippermettux missjoni ta' osservazzjoni f'Novembru.
Ġrajjiet Kurrenti
Ir-Rappreżentant Għoli informa lill-ministri dwar iż-żjara reċenti tiegħu fil-Libanu, li matulha huwa wassal il-messaġġ tal-UE ta' solidarjetà lill-poplu Libaniż, u l-appell tal-UE lill-mexxejja politiċi Libaniżi biex jieħdu r-responsabbiltà għall-ħolqien ta' gvern ġdid orjentat lejn ir-riforma.
Il-ministri ddiskutew fil-qosor lit-Turkija qabel il-Kunsill Ewropew, u fl-isfond tal-laqgħa reċenti tar-Rappreżentant Għoli mal-Ministru għall-Affarijiet Barranin Tork Mevlüt Çavuşoğlu.
Il-ministri tal-UE għall-affarijiet barranin ġew infurmati dwar l-eżitu tal-laqgħa ta' livell għoli tad-Djalogu bejn Belgrad u Pristina li saret fil-15 ta' Ġunju 2021. Matul il-laqgħa, l-ewwel waħda ta' livell għoli f'disa' xhur, il-partijiet ikkonfermaw l-impenn tagħhom għan-normalizzazzjoni komprensiva tar-relazzjonijiet u qablu li jkomplu l-proċess ta' djalogu f'Lulju.
Il-Kunsill kellu skambju ta' fehmiet fil-qosor dwar il-Proċess ta' Paċi fil-Lvant Nofsani. F'dan il-kuntest ir-Rappreżentant Għoli informa lill-ministri dwar il-kuntatti reċenti tiegħu mal-Ministru għall-Affarijiet Barranin Iżraeljan il-ġdid, Yair Lapid.
Il-Kunsill imbagħad iddiskuta s-sitwazzjoni drammatika f'Tigray, l-Etjopja, fejn kriżi umanitarja sħiħa bħalissa qed timbotta madwar 400,000 persuna lejn ix-xifer ta' karestija kkawżata mill-bniedem u telf ta' ħajjiet. Il-qsim tal-fehmiet dwar l-Etjopja ser jidher bħala punt ta' diskussjoni sħiħ fuq l-aġenda tal-Kunsill Affarijiet Barranin ta' Lulju.
Ir-Rappreżentant Għoli ppreżenta lill-Kunsill il-Komunikazzjoni Konġunta dwar ir-relazzjonijiet bejn l-UE u r-Russja, bil-ħsieb ta' diskussjoni strateġika fil-Kunsill Ewropew aktar tard din il-ġimgħa.
Fl-aħħar nett, il-ministri ddiskutew fil-qosor ir-riżultati tal-elezzjonijiet presidenzjali Iranjani, u s-sitwazzjoni attwali tan-negozjati li għaddejjin fi Vjenna, bil-għan li tingħata ħajja ġdida lill-PAKK.
Affarijiet oħra
Il-Kunsill adotta konklużjonijiet dwar ir-rwol tal-wirt kulturali fil-promozzjoni tal-paċi, id-demokrazija u l-iżvilupp sostenibbli, u t-tielet ċiklu ta' sanzjonijiet tal-UE wara l-kolp ta' stat militari u r-repressjoni sussegwenti fil-Myanmar/Burma.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Illum adottajna l-akbar pakkett ta' sanzjonijiet fir-rigward tal-Belarussja, li jelenka 86 individwu u entità. Dawn il-miżuri ġew ikkoordinati wkoll mal-Kanada, ir-Renju Unit u l-Istati Uniti. [...] L-Unjoni Ewropea tibqa' lesta li tappoġġa Belarussja b'futur demokratiku permezz ta' pjan komprensiv ta' appoġġ ekonomiku sa €3 biljuni, u tkompli tagħmel pressjoni fuq ir-reġim ta' Lukashenko permezz ta' sanzjonijiet fuq individwi u entitajiet adottati llum u sanzjonijiet ekonomiċi li għandhom jiġu deċiżi dalwaqt.