"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
L-aktar punt importanti hu li kkonfermajna mill-ġdid l-unità qawwija u l-approċċ magħqud tagħna dwar l-isfidi għas-sigurtà Ewropea. L-għaqda tagħna hija s-saħħa tagħna, u ma hemm l-ebda dubju fil-Kunsill dwar dan.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Kunsill Affarijiet Barranin ġie aġġornat dwar l-aħħar żviluppi fit-tisħiħ tal-forzi militari tar-Russja madwar l-Ukrajna u kellu diskussjoni dwar is-sitwazzjoni tas-sigurtà Ewropea, li kopriet ukoll is-sitwazzjoni fil-Belarussja u l-Każakistan.
Fil-kuntest ta' din id-diskussjoni, il-ministri kellhom l-opportunità li jaqsmu fehmiethom informalment permezz ta' vidjokonferenza mas-Segretarju tal-Istat tal-Istati UnitiAntony Blinken.
Il-Kunsill approva wkoll konklużjonijiet dwar il-kwistjoni. Il-konklużjonijiet jissottolinjaw li t-tentattivi tar-Russja li terġa' toħloq linji diviżorji fil-kontinent Ewropew idgħajfu l-pedamenti u l-prinċipji ewlenin li fuqhom hija mibnija s-sigurtà Ewropea, u jġibu lura memorji koroh ta' żoni ta' influwenza li ma hemmx lok għalihom fis-seklu 21. Il-Kunsill jafferma mill-ġdid l-appoġġ sħiħ u indiskutibbli tiegħu lill-Ukrajna u jiċċara li kwalunkwe aggressjoni militari ulterjuri kontra l-Ukrajna ser ikollha konsegwenzi enormi u kosti kbar.
Il-ministri qablu li l-UE għandha tkompli bl-isforzi diplomatiċi biex tikkonvinċi lir-Russja tagħżel it-triq tad-djalogu, u inkarigaw lir-Rappreżentant Għoli biex ikompli jikkoordina l-pożizzjoni tal-UE ma' sħab ewlenin bħall-Istati Uniti, in-NATO u l-OSKE. Fl-istess ħin, l-UE ser tkompli tiġġieled kontra d-diżinformazzjoni.
Filwaqt li l-ewwel għażla hija d-djalogu, ir-Rappreżentant Għoli għamilha ċara li l-ħidma fuq it-tħejjija ta' reazzjonijiet għal aggressjoni potenzjali Russa kienet avvanzata, u qed tiġi segwita f'koordinazzjoni ma' sħab ewlenin.
Fl-aħħar nett, l-UE ser iżżid l-isforzi tagħha biex issaħħaħ ir-reżiljenza tal-Ukrajna u sħab oħra permezz ta' pakkett ta' assistenza finanzjarja li jikkonsisti f'self u għotjiet ta' emerġenza, appoġġ kontra t-theddid ċibernetiku u ibridu, u appoġġ għas-sigurtà u d-difiża, inkluż permezz tar-riforma tas-settur tal-edukazzjoni militari tal-Ukrajna.
Sirja
Il-Kunsill Affarijiet Barranin kellu skambju ta' fehmiet dwar is-Sirja abbażi ta' informazzjoni pprovduta mill-Mibgħut Speċjali tan-Nazzjonijiet Uniti Geir Pedersen.
Wara aktar minn deċennju, il-kunflitt fis-Sirja għadu 'l bogħod milli jintemm u għadu sors ta' tbatija u instabbiltà.
Il-Kunsill tenna l-appell tiegħu għal soluzzjoni politika u enfasizza li l-ebda normalizzazzjoni, tneħħija tas-sanzjonijiet jew rikostruzzjoni ma tkun possibbli sakemm ir-reġim Sirjan ma jkunx involut fi tranżizzjoni politika. Il-ministri għal darb'oħra talbu li r-reġim u l-alleati tiegħu jimpenjaw ruħhom lejn l-implimentazzjoni sħiħa tar-Riżoluzzjoni 2254 tal-KSNU.
L-UE ser taħdem ma' sħab tal-istess fehma, inkluż il-Lega Għarbija, biex tgħin lill-poplu Sirjan u tmexxi l-proċess politiku 'l quddiem. Qed tippjana li torganizza s-sitt Konferenza ta' Brussell f'Mejju 2022, biex tiġġenera finanzjament għall-poplu Sirjan u għall-komunitajiet li jospitaw ir-refuġjati, biex tagħti vuċi lis-soċjetà ċivili Sirjana, u biex iżżid il-momentum għal soluzzjoni politika għall-kunflitt.
Libja
Il-Kunsill Affarijiet Barranin kellu skambju ta' fehmiet dwar l-aħħar żviluppi fil-Libja, b'mod partikolari l-posponiment tal-elezzjonijiet nazzjonali, li kienu skedati li jsiru fl-24 ta' Diċembru 2021.
Il-pajjiż jinsab f'salib it-toroq importanti u l-UE tibqa' impenjata li tappoġġa lil-Libjani biex jorganizzaw elezzjonijiet ħielsa, ġusti, inklużivi u kredibbli malajr kemm jista' jkun.
Il-ministri kkonfermaw il-prijoritajiet tal-UE - il-Libjani għandhom id-dritt li jagħżlu r-rappreżentanti tagħhom permezz ta' elezzjonijiet u l-pajjiż għandu jinħeles mill-preżenza armata barranija kollha - u ħeġġew lill-partijiet ikkonċernati kollha biex jaqblu dwar it-triq 'il quddiem biex il-Libjani jingħataw il-possibbiltà li jivvutaw f'elezzjonijiet.
Ir-rappreżentant Għoli ħabbar ukoll li ser tiġi vvalutata l-possibbiltà li tintbagħat missjoni ta' osservazzjoni elettorali, ladarba l-Libjani jkunu ddeċidew dwar kalendarju elettorali ġdid.
Ġrajjiet Kurrenti
Fir-rigward tal-Mali, il-ministri kkundannaw il-preżenza hemmhekk tal-grupp Wagner, u d-deċiżjoni meħuda mill-awtoritajiet tal-Mali li jkollhom perjodu ta' tranżizzjoni itwal ta' erba' snin.
Ir-Rappreżentant Għoli ħabbar li kien hemm qbil politiku biex jiġu adottati sanzjonijiet kontra dawk li jfixklu t-tranżizzjoni, b'solidarjetà mad-deċiżjoni meħuda reċentement mill-Komunità Ekonomika tal-Istati tal-Afrika tal-Punent (ECOWAS).
Ir-Rappreżentant Għoli enfasizza li l-UE kienet qed issegwi mill-qrib ħafna l-iżviluppi fil-Burkina Faso, esprima tħassib dwar id-detenzjoni tal-President Kaboré u l-preżenza ta' suldati armati fil-kwartieri ġenerali tal-istazzjon tar-radju u tat-televiżjoni nazzjonali, u appella għar-rispett tal-Kostituzzjoni u l-ħelsien tal-President Kaboré.
Konklużjonijiet tal-Kunsill
Il-Kunsill approva konklużjonijiet li japprovaw il-prijoritajiet il-ġodda għall-perjodu 2022-2024 fi ħdan is-sħubija strateġika NU-UE dwar l-operazzjonijiet ta' paċi u l-ġestjoni ta' kriżijiet.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-aktar punt importanti hu li kkonfermajna mill-ġdid l-unità qawwija u l-approċċ magħqud tagħna dwar l-isfidi għas-sigurtà Ewropea. L-għaqda tagħna hija s-saħħa tagħna, u ma hemm l-ebda dubju fil-Kunsill dwar dan.