Kunsill Affarijiet Barranin (Kummerċ), 30 ta' Mejju 2024

Riżultati ewlenin

Kummerċ u kompetittività – Il-futur tal-politika kummerċjali tal-UE

Il-Kunsill Affarijiet Barranin, fil-konfigurazzjoni tiegħu tal-Kummerċ, kellu dibattitu ta' orjentazzjoni dwar "Kummerċ u kompetittività – Il-futur tal-politika kummerċjali tal-UE".

Il-ministri ddiskutew kif il-politika kummerċjali tal-UE tista' tgħin biex jiġi minimizzat l-impatt negattiv fuq in-negozji tal-UE tal-isfidi ġeopolitiċi attwali bħall-gwerra ta' aggressjoni kontra l-Ukrajna, it-tranżizzjoni tal-enerġija, iż-żieda fl-ostakli għall-kummerċ, il-frammentazzjoni tal-kummerċ u l-ħolqien ta' teknoloġiji ġodda.

Il-koerenza tal-politika kummerċjali ma' politiki oħra tal-UE u kif jista' jittejjeb u jiġi żgurat l-aċċess għall-materja prima kritika li l-UE teħtieġ għat-tranżizzjoni doppja ekoloġika u diġitali kienu wkoll parti minn dan id-dibattitu.

Mingħajr il-kummerċ, ma jista' jkun hemm ebda kompetittività. U mingħajr kompetittività, ma hemm ebda prosperità. Għalhekk żgur li l-kompetittività ser tkun waħda mill-prijoritajiet kummerċjali ewlenin għaċ-ċiklu leġiżlattiv li jmiss. Biex nagħmlu dan, neħtieġu politika kummerċjali miftuħa, proattiva u ambizzjuża.

Hadja Lahbib, Ministru għall-Affarijiet Barranin, l-Affarijiet Ewropej u l-Kummerċ Barrani

Għad-diskussjoni attenda l-Viċi President Eżekuttiv tal-Kummissjoni Ewropea, Valdis Dombrovskis. Il-ministri kellhom dan id-dibattitu wara l-pubblikazzjoni tar-rapport indipendenti ta' livell għoli ta' Enrico Letta dwar "Much more than a market" u bi tħejjija għar-rapport li jmiss ta' Mario Draghi dwar il-kompetittività tal-Ewropa.

• Il-politika kummerċjali tal-UE (informazzjoni ġenerali)

Relazzjonijiet kummerċjali u ta' investiment bejn l-UE u l-Afrika

Il-Kunsill iddiskuta l-istat tar-relazzjonijiet kummerċjali u ta' investiment bejn l-UE u l-Afrika u kif nistgħu napprofondixxu r-relazzjonijiet tagħna biex nibnu sħubija ta' benefiċċju reċiproku fuq livell multilaterali, kontinentali, reġjonali u bilaterali.

Fil-bidu tal-presidenza tagħna għidna li waħda mill-prijoritajiet tagħna tkun li nsaħħu r-relazzjonijiet mal-Afrika. Issa qed inwettqu dik il-wegħda. Ninsabu kuntenti li qed naraw progress fl-istrateġija "Global Gateway", il-Faċilità Ewropea għall-Paċi u l-implimentazzjoni tal-Ftehim ta' Samoa. Illum ilqajna wkoll id-dħul fis-seħħ imminenti tal-Ftehim ta' Sħubija Ekonomika mal-Kenja.

Hadja Lahbib, Ministru għall-Affarijiet Barranin, l-Affarijiet Ewropej u l-Kummerċ Barrani

L-UE hija l-akbar sieħeb kummerċjali tal-Afrika, l-akbar investitur u l-akbar donatur tal-għajnuna uffiċjali għall-iżvilupp (ODA). Aktar minn 90% tal-esportazzjonijiet mill-pajjiżi Afrikani jidħlu fl-UE mingħajr dazju peress li huma koperti mis-Sistema Ġeneralizzata ta' Preferenzi (SĠP), il-ftehimiet ta' sħubija ekonomika (FSE) mal-Afrika sub-Saħarjana, jew il-ftehimiet ta' kummerċ ħieles (FTAs) ma' ċerti pajjiżi tal-Afrika ta' Fuq.

Fis-sitt summit bejn l-Unjoni Ewropea u l-Unjoni Afrikana fi Frar 2022, iż-żewġ naħat qablu li jagħtu spinta lill-integrazzjoni ekonomika reġjonali u kontinentali, b'mod partikolari permezz taż-Żona ta' Kummerċ Ħieles Kontinentali Afrikana (AfCFTA).

• Relazzjonijiet bejn l-UE u l-Afrika (informazzjoni ġenerali)
• Ftehim ta' Samoa (informazzjoni ġenerali)
• Global Gateway (informazzjoni ġenerali)

Segwitu għat-13-il Konferenza Ministerjali tad-WTO (MC13)

Matul ikla ta' ħidma, il-ministri qasmu l-fehmiet tagħhom dwar is-segwitu għat-13-il Konferenza Ministerjali li saret mis-26 ta' Frar sat-2 ta' Marzu 2024 f'Abu Dhabi.

Il-ministri ddispjaċihom li, minkejja l-isforzi intensivi mwettqa mill-UE fit-tħejjija għat-13-il Konferenza Ministerjali u waqtha, il-konferenza kisbet inqas riżultati tanġibbli milli wieħed kien qed jittama inizjalment. Huma kkonfermaw mill-ġdid ir-rwol ewlieni tad-WTO fis-sistema multilaterali bbażata fuq ir-regoli u ssottolinjaw il-ħtieġa li titkompla l-ħidma fuq l-isfidi l-aktar immedjati ta' wara t-13-il Konferenza Ministerjali.

Fl-isfond tal-isfidi globali li qed jiżdiedu, l-iżgurar tal-kontinwità tal-ħidma tad-WTO ma għadux biżżejjed. Hija meħtieġa riforma usa' tad-WTO. Fin-nuqqas ta' mandat ċar mit-13-il Konferenza Ministerjali, waħda mill-isfidi ewlenin issa hija kif għandha tiġi stabbilita aġenda ta' riforma.

• It-13-il Konferenza Ministerjali tad-WTO (MC13)

Affarijiet oħra

Taħt affarijiet oħra, il-presidenza infurmat lill-ministri dwar id-deċiżjoni, meħuda mill-kontropartijiet tagħhom għall-Affarijiet Barranin fis-27 ta' Mejju 2024, li jaħdmu fuq laqgħa tal-Kunsill ta' Assoċjazzjoni UE-Iżrael.

Konklużjonijiet dwar il-kontrolli tal-esportazzjoni

Il-Kunsill approva konklużjonijiet li jindirizzaw l-erba' "Tweġibiet Proposti" mressqa mill-Kummissjoni Ewropea fil-White Paper tagħha dwar il-kontrolli tal-esportazzjoni tal-24 ta' Jannar 2024, li jipproponu azzjonijiet fuq perjodu qasir u medju biex titjieb il-koordinazzjoni tal-kontrolli tal-esportazzjoni fuq oġġetti b'użu doppju fl-UE.

Fil-konklużjonijiet, il-Kunsill jappella għall-implimentazzjoni sħiħa tar-Regolament (UE) 2021/821 dwar l-Użu Doppju, inkluż analiżi ulterjuri dwar kif il-qafas attwali jista' jippermetti l-introduzzjoni temporanja ta' ċerti punti ġodda fuq il-lista Ewropea ta' użu doppju, u jagħraf l-importanza tal-koordinazzjoni fost l-istati membri, filwaqt li jħeġġeġ lill-Kummissjoni tiffaċilita din il-koordinazzjoni f'konformità mar-regolament.

• Konklużjonijiet tal-Kunsill dwar il-White Paper dwar il-Kontrolli tal-Esportazzjoni

Il-Kunsill adotta wkoll, mingħajr diskussjoni, il-punti fuq il-lista ta' punti A mhux leġiżlattivi.