"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill Affarijiet Barranin iddiskuta l-aggressjoni Russa kontra l-Ukrajna, wara intervent b'vidjokonferenza mill-Ministru għall-Affarijiet Barranin tal-Ukrajna Dmytro Kuleba, li aġġorna lill-kontropartijiet tiegħu tal-UE dwar l-aħħar żviluppi fuq il-post, u l-ħtiġijiet l-aktar urġenti tal-Ukrajna, speċjalment f'termini ta' sistemi ta' difiża tal-ajru u infrastruttura tal-enerġija.
Fid-diskussjoni li segwiet, bosta ministri kkundannaw l-attakki bil-missili tar-Russja kontra l-popolazzjoni ċivili, u l-attakk reċenti kontra l-Isptar tat-Tfal fi Kiev.
Il-Kunsill imbagħad iffoka fuq l-appoġġ militari tal-UE lill-Ukrajna, u ddiskuta l-ħtieġa li jiġi żblukkat l-appoġġ tal-UE fil-qafas tal-Faċilità Ewropea għall-Paċi. Fir-rigward tal-użu ta' profitti mhux mistennija li jirriżultaw minn assi Russi immobilizzati, ir-Rappreżentant Għoli aġġorna lill-Ministri tal-UE dwar il-progress lejn l-ewwel trasferiment ta' €1.4 biljun mistenni fil-bidu ta' Awwissu, li ser jintuża biex jiffinanzja l-akkwist ta' tagħmir militari ta' prijorità (difiża tal-ajru, sistemi tal-artillerija u munizzjon), kif ukoll l-akkwist mill-industrija tad-difiża Ukrena.
Imbagħad il-Kunsill iddiskuta l-passi li jmiss wara s-Summit dwar il-Paċi li sar reċentement fl-Iżvizzera. F'dan il-kuntest ir-Rappreżentant Għoli saħaq li hemm bżonn l-UE tagħmel sforz akbar biex tinvolvi lis-sħab globali madwar id-dinja kollha, u li l-Formula ta' Paċi ta' Zelenskyy tibqa' l-uniku pjan ta' paċi reali appoġġat mill-UE.
L-uniku wieħed favur il-gwerra huwa Putin, li qed jappella għad-diviżjoni u l-konsenja tal-Ukrajna bħala prekundizzjonijiet għal kwalunkwe taħdida u kwalunkwe waqfien mill-ġlied. U kuljum jibgħat tfakkiriet fil-forma ta' eluf ta' missili, droni, glide bombs, u aktar offensiva militari. Għalhekk, jekk tixtieq titkellem dwar il-partit tal-gwerra, tkellem dwar Putin, mhux dwar l-Unjoni Ewropea.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Fl-aħħar nett, ir-Rappreżentant Għoli ħabbar li l-laqgħat informali tal-Ministri għad-Difiża u l-Affarijiet Barranin skedati lejn l-aħħar ta' Awwissu ser isiru fi Brussell.
Il-Bank Ewropew tal-Investiment
Waqt l-ikla ta' nofsinhar, il-Ministri għall-Affarijiet Barranin tal-UE kellhom skambju informali ta' fehmiet mal-President tal-Bank Ewropew tal-Investiment, Nadia Calviño.
Il-ministri laqgħu r-rwol li qed jespandi tal-BEI fil-qasam tal-industrija tas-sigurtà u d-difiża, esprimew interess biex dan ikompli jikber, u appellaw għall-għoti ta' appoġġ fuq terminu qasir lill-Ukrajna. Huma laqgħu wkoll l-appoġġ imsaħħaħ tal-Grupp tal-BEI għas-sistema u n-negozju tal-enerġija tal-Ukrajna.
Il-President tal-BEI kkonfermat ukoll l-impenn tal-BEI li jikkontribwixxi għall-istabbiltà finanzjarja fix-Xatt tal-Punent u li jappoġġa l-aġenda ta' riforma tal-Awtorità Palestinjana, f'konformità mal-appoġġ tal-Kummissjoni.
Is-sitwazzjoni fil-Lvant Nofsani
Il-Kunsill Affarijiet Barranin iddiskuta s-sitwazzjoni fil-Lvant Nofsani, b'enfasi fuq is-sitwazzjoni fuq il-post, inkluż is-sitwazzjoni umanitarja f'Gaża u s-sitwazzjoni tal-ostaġġi.
Il-Kunsill ġie infurmat mir-Rappreżentanti Speċjali tal-UE għad-Drittijiet tal-Bniedem, Olof Skoog, u għall-Proċess ta' Paċi fil-Lvant Nofsani, Sven Koopmans.
Wara kważi għaxar xhur -290 jum- il-gwerra f'Gaża ma battietx, u qed naraw evakwazzjonijiet furzati ġodda ta' persuni ċivili eżawriti. Hemm aktar minn 17 000 orfni f'Gaża. U l-aċċess umanitarju, li dejjem kien diffiċli, issa sfaxxa fix-xejn.
Kważi kulħadd f'Gaża jiddependi fuq l-għajnuna biex jibqa' ħaj. 96% tal-popolazzjoni ta' Gaża għandha insigurtà tal-ikel akuta. Tista' tgħid li trid, iżda dan huwa orrur, intollerabbli, u rridu nagħmlu dak kollu li nistgħu biex inwaqqfuh. F'ġieħ l-umanità tagħna stess.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Ir-Rappreżentant Għoli nnota li, sfortunatament, in-negozjati għal waqfien mill-ġlied u l-ħelsien tal-ostaġġi ma kellhom l-ebda eżitu pożittiv.
Matul id-dibattitu, il-ministri ddiskutew ir-riskji ta' eskalazzjoni reġjonali, u l-aħħar opinjoni konsultattiva tal-Qorti Internazzjonali tal-Ġustizzja. Huma ddiskutew ukoll kif jistgħu jibnu fuq il-kooperazzjoni mas-sħab Għarab u sħab oħra lejn proċess sinifikattiv lejn is-soluzzjoni ta' żewġ stati.
Il-Kunsill kellu wkoll skambju dwar kif l-aħjar jiżdied l-appoġġ tal-UE għall-Awtorità Palestinjana, biex jiġi evitat il-kollass tagħha għall-benefiċċju kemm tal-Palestinjani, kif ukoll tal-Iżraeljani. F'dan il-kuntest, il-Ministri tal-UE ġew aġġornati mill-Kummissjoni dwar l-assistenza politika u finanzjarja tal-UE lill-Awtorità Palestinjana, fil-forma ta' pakkett ta' appoġġ pluriennali sostantiv li ser jappoġġa l-aġenda ta' riforma tal-Awtorità Palestinjana.
Fl-aħħar nett, il-Kunsill evalwa t-tħejjijiet li għaddejjin għall-Kunsill ta' Assoċjazzjoni UE-Iżrael.
Ġrajjiet kurrenti
Taħt Ġrajjiet Kurrenti, il-Kunsill kellu skambju ta' fehmiet dwar id-diplomazija diġitali, abbażi ta' rapport ta' progress reċenti mis-SEAE u l-Kummissjoni.
Konklużjonijiet tal-Kunsill u deċiżjonijiet oħra
Il-Kunsill approva l-konklużjonijiet dwar il-ftuħ ta' djalogu mal-Armenja dwar il-liberalizzazzjoni tal-viża.
Il-Kunsill adotta wkoll miżuri ta' assistenza fil-qafas tal-Faċilità Ewropea għall-Paċi b'appoġġ għall-Forzi Armati tal-Armenja u tar-Repubblika Iżlamika tal-Mauritania.
Fl-aħħar nett, il-Kunsill estenda l-miżuri restrittivi tal-UE fid-dawl tal-azzjonijiet tal-Federazzjoni Russa li għadhom qed jiddestabbilizzaw is-sitwazzjoni fl-Ukrajna sal-31 ta' Jannar 2025, u elenka erba' individwi u żewġ entitajiet fuq ksur serju tad-drittijiet tal-bniedem, inkluż tortura u vjolenza sesswali u abbażi tal-ġeneru sistematika u mifruxa.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
