"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Kummerċ), 24 ta' Novembru 2025
Riżultati ewlenin
Relazzjonijiet kummerċjali bejn l-UE u l-Istati Uniti
Waqt l-ikla ta' nofsinhar, il-ministri għall-kummerċ tal-UE kellhom skambju ta' fehmiet mas-Segretarju tal-Kummerċ tal-Istati Uniti Howard Lutnick u mar-Rappreżentant tal-Kummerċ tal-Istati Uniti Jamieson Greer.
Id-diskussjoni kienet tħares 'il quddiem u ffukat fuq ir-relazzjoni kummerċjali trans-Atlantika wara li ġiet konkluża d-Dikjarazzjoni Konġunta UE-Stati Uniti dwar il-kummerċ tal-21 ta' Awwissu 2025 u l-isfidi globali komuni marbuta, pereżempju, mal-kapaċitajiet żejda globali, ir-reżiljenza tal-katina tal-provvista u s-sigurtà ekonomika.
Id-diskussjonijiet tal-lum irriaffermaw l-impenn komuni tal-UE u tal-Istati Uniti li jimplimentaw bis-sħiħ id-Dikjarazzjoni Konġunta ta' Awwissu u li jibnu fuq il-progress li għamilna biex niżguraw kummerċ stabbli, ġust u prevedibbli. Ninsabu determinati li nimxu ‘l quddiem flimkien, mingħajr ma ndgħajfu l-bilanċ tal-ftehim hekk kif inkomplu nindirizzaw l-isfidi komuni u nsaħħu r-rabtiet ekonomiċi tagħna.
Lars Løkke Rasmussen, ministru għall-affarijiet barranin tad-Danimarka
Il-ministri u l-Kummissarju Šefčovič issottolinjaw li d-dikjarazzjoni konġunta reġgħet stabbiliet livell sinifikanti ta' prevedibbiltà u stabbiltà fil-kummerċ transatlantiku. Fl-istess ħin, enfasizzaw l-importanza li l-isfidi globali jiġu indirizzati flimkien. Iż-żewġ naħat affermaw mill-ġdid l-impenn tagħhom li jkomplu b'interazzjoni intensiva fix-xhur li ġejjin.
Kummerċ UE-Stati Uniti: fatti u ċifri (Infografika)
Relazzjonijiet kummerċjali bejn l-UE u ċ-Ċina
Il-ministri kellhom skambju ta' fehmiet dwar is-sitwazzjoni attwali u l-prospetti futuri għar-relazzjonijiet kummerċjali bejn l-UE u ċ-Ċina, f'kuntest ta' żbilanċi dejjem jiżdiedu. Il-Kunsill irrieżamina d-defiċit kummerċjali li qed jikber, ir-restrizzjonijiet li ilhom jeżistu fuq l-aċċess għas-suq u l-użu persistenti tal-kummerċ miċ-Ċina bħala lieva, anke permezz ta' kontrolli tal-esportazzjoni fuq materja prima kritika u restrizzjonijiet li jaffettwaw lis-semikondutturi.
Il-Kummissjoni tat aġġornament dwar l-interazzjoni reċenti tagħha mal-kontropartijiet Ċiniżi, fost oħrajn dwar il-kontrolli tal-esportazzjoni fuq elementi tal-materjali tal-art rari, li l-awtoritajiet Ċiniżi ssospendew globalment għal sena wara l-fehim bejn l-Istati Uniti u ċ-Ċina.
Il-ministri qablu li s-sospensjoni temporanja ma indirizzatx il-vulnerabbiltà sottostanti u enfasizzaw il-ħtieġa li tiġi aċċellerata d-diversifikazzjoni tas-sorsi tal-provvista, tiġi approfondita l-kooperazzjoni ma' sħab tal-istess fehma u tkompli tiġi implimentata l-istrateġija tal-UE għat-tneħħija tar-riskji.
Kummerċ bejn l-UE u ċ-Ċina: fatti u ċifri (Infografika)
Negozjati kummerċjali bilaterali li għaddejjin
Il-ministri evalwaw il-progress fin-network tal-UE ta' negozjati kummerċjali bilaterali li għaddejjin. Huma enfasizzaw l-importanza tad-diversifikazzjoni tal-kummerċ fil-kuntest attwali tal-instabbiltà u l-frammentazzjoni ġeoekonomika. Id-diskussjoni ffukat b'mod partikolari fuq l-Indja, fejn in-negozjati daħlu f'fażi kritika. Il-Kummissjoni ddeskriviet il-ħidma reċenti fuq ftehim kummerċjali possibbli li għandu l-għan li jiżgura eżitu kummerċjalment sinifikattiv fix-xhur li ġejjin.
Il-ministri ddiskutew l-elementi ewlenin ta' pakkett potenzjali, inkluż il-liberalizzazzjoni tat-tariffi għall-prodotti industrijali, it-tneħħija ta' ostakli mhux tariffarji, u l-ħtieġa li l-UE tiżgura mill-inqas l-istess livell ta' aċċess għas-suq li l-Indja tista' tagħti lil pajjiżi terzi oħra.
Matul id-diskussjoni, il-ministri esprimew ukoll l-appoġġ tagħhom għall-finalizzazzjoni rapida tal-ħidma fuq il-ftehimiet diġà nnegozjati u għat-tkomplija tal-impenn fin-negozjati li għaddejjin.
Taħt "affarijiet oħra", il-Kummissjoni Ewropea infurmat lill-ministri dwar ir-rapport annwali tagħha rigward l-implimentazzjoni u l-infurzar tal-politika kummerċjali tal-UE, u l-Kummissarju Šefčovič ippreżenta r-rapport ta' progress annwali tiegħu dwar is-simplifikazzjoni, l-implimentazzjoni u l-infurzar.
L-Estonja, il-Finlandja, il-Ġermanja, il-Latvja, il-Litwanja, il-Polonja u l-Iżvezja infurmaw lill-ministri dwar it-talbiet tagħhom għal proposta tal-Kummissjoni dwar tariffi addizzjonali fuq prodotti importati mir-Russja u l-Belarussja.
Il-Litwanja infurmat ukoll lill-ministri dwar is-sitwazzjoni fil-fruntiera mal-Belarussja wara l-attakk ibridu reċenti u l-aspetti kummerċjali tiegħu, inkluż l-għeluq tal-fruntiera u l-impatti fuq it-traffiku tal-merkanzija.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
