"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Barranin (Difiża), 1 ta' Diċembru 2025
Riżultati ewlenin
Appoġġ militari tal-UE għall-Ukrajna
Il-ministri għad-difiża tal-UE ddiskutew l-appoġġ militari tal-UE għall-Ukrajna wara skambju mal-Ministru għad-Difiża tal-Ukrajna, Denys Shmyhal, u fil-preżenza tas-Segretarju Ġenerali tan-NATO, Radmila Shekerinska.
Din tista' tkun ġimgħa kruċjali għad-diplomazija. Għadhom għaddejjin taħditiet intensi bl-għan li tintemm il-gwerra tar-Russja. Kulħadd jilqa' l-ispinta għall-paċi minbarra r-Russja. [...] F'din il-gwerra, hemm aggressur wieħed u vittma waħda. Xogħolna huwa li nagħmlu dak kollu li nistgħu biex nappoġġaw lill-vittma u mhux nippremjaw l-aggressjoni. L-għan huwa li jkun hemm paċi ġusta u dejjiema.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-ministri ddiskutew l-opzjonijiet ta' finanzjament għall-appoġġ militari lill-Ukrajna, it-tisħiħ tal-kooperazzjoni industrijali fil-qasam tad-difiża u l-isforzi biex tiġi miġġielda l-flotta mistura Russa. Ir-Rappreżentant Għoli aġġornat ukoll lill-Kunsill dwar il-ħidma li tinsab għaddejja fir-rigward tal-kontribut tal-UE għall-garanziji tas-sigurtà għall-Ukrajna.
Fir-rigward tal-finanzjament, il-ministri għad-difiża tal-UE enfasizzaw li jeħtieġ li jintlaħaq qbil dwar l-opzjonijiet ta' finanzjament bħala kwistjoni ta' urġenza. Ir-Rappreżentant Għoli saħqet li soluzzjoni pluriennali tkun bidla radikali għad-difiża tal-Ukrajna peress li tkun tfisser tmiem aktar mgħaġġel tal-gwerra ta' Putin.
Il-Kunsill iddiskuta wkoll ir-rwol li ż-żewġ missjonijiet tal-UE - EUMAM u EUAM Ukraine - jista' jkollhom fit-tisħiħ tal-Ukrajna.
Fir-rigward tal-kooperazzjoni industrijali fil-qasam tad-difiża mal-Ukrajna, il-ministri ddiskutew kif jista' jiġi mobilizzat finanzjament privat addizzjonali, inkluż permezz tal-Bank Ewropew tal-Investiment.
L-Ewropa u l-Ukrajna jridu jibnu flimkien, jipproduċu flimkien u jinnovaw flimkien. Dan huwa ta' benefiċċju għaż-żewġ naħat. L-Ukrajna għandha l-esperjenza fil-kamp tal-battalja li neħtieġu għall-industrija tad-difiża tagħna. Ninsab kuntenta li aktar stati membri qed jagħmlu dan.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill iddiskuta l-prontezza tad-difiża tal-UE, b'enfasi fuq l-implimentazzjoni tal-komunikazzjoni konġunta dwar 'Il-Pjan Direzzjonali għall-2030 Inseddqu l-Paċi – Nippreparaw id-Difiża' ippreżentata fis-16 ta' Ottubru 2025, u l-kompiti sussegwenti tal-laqgħa tal-Kunsill Ewropew ta' Ottubru. Saret enfasi partikolari fuq oqsma ta' kapaċità ta' prijorità u proġetti konkreti.
Kulħadd qabel li l-Ewropa trid tkompli tagħti spinta lid-difiżi proprji tagħha. M'għandniex wisq żmien biex naġixxu. [...] Il-mexxejja taw direzzjoni ċara bil-Programm għall-Prontezza tad-Difiża. Bħalissa qed jiġu stabbiliti koalizzjonijiet tal-kapaċità. Xi wħud diġà ltaqgħu b'rabta mad-difiża tal-ajru u d-droni, pereżempju. Oħrajn ser isiru dalwaqt. Fl-ewwel nofs tas-sena d-dieħla huma mistennija proġetti konkreti.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill indirizza wkoll l-inizjattivi ewlenin biex jgħinu fil-koordinazzjoni tal-investiment f'oqsma fejn l-ebda stat membru ma jista' jwettaq dan waħdu.
Fl-aħħar nett, il-ministri ddiskutew il-pakkett dwar il-mobbiltà militari, li ġie ppreżentat mir-Rappreżentant Għoli u l-Kummissjoni Ewropea f'Novembru 2025. F'dan il-kuntest ir-Rappreżentant Għoli enfasizzat li l-kapaċità taċ-ċaqliq tat-truppi hija ta' importanza kbira għad-deterrenza, u li l-mobbiltà militari hija polza tal-assigurazzjoni kruċjali għas-sigurtà Ewropea, u bħala tali jeħtieġ li tiġi aċċellerata.
Bord ta' Tmexxija tal-Aġenzija Ewropea għad-Difiża
Il-ministri għad-difiża tal-UE ltaqgħu fil-Bord ta' Tmexxija tal-Aġenzija Ewropea għad-Difiża (EDA) taħt il-presidenza tar-Rappreżentant Għoli Kallas fil-kapaċità tagħha bħala Kap tal-Aġenzija.
Minbarra l-Baġit Ġenerali tal-EDA għall-2026, it-tabella tal-persunal, u l-qafas ta' ppjanar ta' tliet snin, il-ministri pprovdew gwida dwar kif l-EDA għandha tissaħħaħ f'konformità mal-konklużjonijiet tal-Kunsill Ewropew ta' Ottubru 2025.
Il-ministri ġew ippreżentati wkoll b'sinteżi tal-proposti għal proġetti kollaborattivi ta' żvilupp tal-kapaċitajiet fuq terminu medju sa twil.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
