"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill Affarijiet Barranin kellu skambju ta' fehmiet dwar is-sitwazzjoni fil-Lvant Nofsani, fil-bidu tiegħu bil-kontribut tal-UE għas-sigurtà u l-istabbilizzazzjoni ta' Gaża.
Iż-żewġ missjonijiet tagħna fuq il-post jistgħu jżidu l-operazzjonijiet: waħda qed tassisti l-qsim tal-fruntieri u l-oħra qed tappoġġa lill-pulizija Palestinjana. It-tnejn li huma jistgħu jagħtu kontributi siewja għall-pjan ta' paċi u l-forza internazzjonali ta' stabbilizzazzjoni, iżda neħtieġu l-approvazzjoni min-naħa Iżraeljana.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
F'dan il-kuntest, il-ministri ffukaw fuq il-missjonijiet tal-PSDK tal-UE, EUBAM Rafah u EUPOL COPPS, ir-riforma tal-awtorità Palestinjana, l-għajnuna umanitarja u r-rikostruzzjoni, li dwarhom diversi ministri qablu li l-UE għandu jkollha vuċi akbar.
Il-Kunsill imbagħad iddiskuta s-sitwazzjoni fis-Sirja, sena wara l-waqgħa tar-reġim ta' Assad. Id-diskussjoni ffukat fuq l-istat tat-tranżizzjoni tas-Sirja u kif l-UE tista' tappoġġa aħjar il-governanza, ir-riforma tas-settur tas-sigurtà u l-kummerċ.
Ir-reġim ta' Assad spiċċa sena ilu, u s-Sirja għadha qed tiffaċċa sfidi enormi. Il-vjolenza settorjali, in-nuqqas ta' inklużività, in-nuqqas ta' istituzzjonijiet xierqa, l-istat tad-dritt, dawn huma problemi li għadhom hemm. [...] Ippermettuli nfakkar li l-UE kienet l-ewwel waħda li neħħiet is-sanzjonijiet biex tgħin lill-pajjiż jibni mill-ġdid. Iżda t-tneħħija tas-sanzjonijiet waħedha ma twassalx għal prosperità ekonomika. L-investituri jeħtieġ li jafdaw is-sistema legali; l-investituri jeħtieġ li jkunu ċerti li s-sitwazzjoni hija stabbli u ma jkunx hemm inċertezzi.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-ministri ddiskutew il-ħtieġa li r-reġim ta' sanzjonijiet tal-UE jiġi adattat hekk kif is-sitwazzjoni tevolvi, u li jsir progress bi sħubija politika ġdida bejn l-UE u s-Sirja.
Fl-aħħar nett, il-Kunsill indirizza s-sitwazzjoni fil-Libanu qabel il-Kunsill ta' Assoċjazzjoni UE-Libanu.
Waqt ikla ta' ħidma, il-Kunsill Affarijiet Barranin kellu skambju ta' fehmiet dwar ir-relazzjonijiet bilaterali bejn l-UE u ċ-Ċina, inkluż dwar ir-relazzjonijiet ġeoekonomiċi u kwistjonijiet ġeopolitiċi.
Iċ-Ċina qed tuża dejjem aktar ir-rabtiet ekonomiċi bħala arma għall-kisbiet politiċi. Dan l-aħħar ħriġna l-istrateġija konġunta tagħna għas-sigurtà ekonomika mal-Kummissjoni u qed nippjanaw li niddiversifikaw il-provvista tagħna ta' minerali kritiċi. Illum, il-ministri ddiskutew kif nistgħu nużaw aħjar l-arsenal kummerċjali tagħna biex insaħħu r-reżiljenza tal-Ewropa. L-ebda pajjiż Ewropew ma jista' jlaħħaq maċ-Ċina waħdu. L-għaqda hija s-saħħa hawnhekk.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill Affarijiet Barranin iddiskuta l-aggressjoni Russa kontra l-Ukrajna, wara intervent b'vidjokonferenza mill-Ministru għall-Affarijiet Barranin tal-Ukrajna, Andrii Sybiha, li pprovda deskrizzjoni ġenerali tas-sitwazzjoni fuq il-post, inkluż id-deliberazzjonijiet diplomatiċi attwali, u l-aktar prijoritajiet urġenti tal-Ukrajna.
Il-prijoritajiet tagħna huma tnejn: it-tqegħid ta' aktar pressjoni fuq Moska u l-ġenerazzjoni ta' aktar appoġġ għal Kiev. L-Ewropa qed tipprovdi lill-Ukrajna b'rekord ta' €27 biljun f'appoġġ militari din is-sena u lħaqna wkoll il-wegħda tagħna li nipprovdu 2 miljun projettili tal-artillerija. Iżda huwa ċar ukoll li mhux il-waqt li nnaqqsu r-ritmu. Irridu nagħmlu aktar biex insaħħu d-difiża tal-Ukrajna u s-saħħa tagħha fin-negozjati filwaqt li r-Russja tibqa' tirrifjuta l-paċi.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Id-diskussjoni tal-UE27 li segwiet iffukat l-ewwel fuq il-garanziji tas-sigurtà tal-UE għall-Ukrajna. Il-ministri kellhom skambju ta' fehmiet dwar l-objettiv li l-Ukrajna titqiegħed f'pożizzjoni ta' saħħa fin-negozjati diplomatiċi li għaddejjin.
Il-ministri kienu ċari li kwalunkwe ftehim ta' paċi jrid jinkludi garanziji ta' sigurtà b'saħħithom. Peress li l-Ukrajna tpoġġiet taħt pressjoni biex tirrinunzja għal sħubija fin-NATO, din ser tkun l-unika salvagwardja li kapaċi twaqqaf lir-Russja milli terġa' tinvadi. L-UE ser tagħmel il-parti tagħha, inkluż b'taħriġ u appoġġ għall-industrija tad-difiża.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-ministri ttrattaw ukoll il-kwistjoni tal-finanzjament għall-Ukrajna fl-2026-2027, qabel id-diskussjoni li jmiss fil-Kunsill Ewropew ta' Diċembru.
Barra minn hekk, id-diskussjoni ministerjali ffukat fuq modi kif tiġi intensifikata l-pressjoni fuq ir-Russja, b'mod partikolari permezz ta' miżuri mmirati biex ifixklu l-flotta mistura u dawk li qed jippermettu l-operazzjonijiet tagħha. F'dan il-kuntest, il-Kunsill adotta miżuri restrittivi kontra disa' faċilitaturi tal-flotta mistura.
Il-ministri kkondividew l-opinjoni li l-immirar tal-flotta mistura tar-Russja għandu jibqa' prijorità ewlenija tal-UE u li l-ħidma fuq l-impożizzjoni ta' aktar miżuri restrittivi kemm kontra l-flotta mistura kif ukoll kontra l-faċilitaturi tagħha għandha tkompli fuq bażi regolari.
Fl-aħħar nett, il-Kunsill impona miżuri restrittivi addizzjonali mmirati lejn 12-il individwu u 2 entitajiet fid-dawl tal-attivitajiet ibridi kontinwi tar-Russja, inkluż il-Manipulazzjoni tal-Informazzjoni u l-Interferenza minn Barranin (FIMI) kontra l-UE u l-istati membri u s-sħab tagħha, u wessa' l-kamp ta' applikazzjoni tas-sanzjonijiet kontra l-Belarussja fid-dawl tal-ksur reċenti tal-ispazju tal-ajru fil-Litwanja u stati membri oħra affettwati mill-attivitajiet ibridi tal-Belarussja.
Il-Kunsill adotta dikjarazzjoni tal-Unjoni Ewropea u tal-istati membri tagħha dwar l-użu sħiħ tal-qafas tal-liġi internazzjonali tal-baħar b'rabta mat-theddid mill-"flotta mistura" u mal-protezzjoni tal-infrastruttura kritika taħt il-baħar.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Taħt ġrajjiet kurrenti, ir-Rappreżentant Għoli informat lill-ministri għall-affarijiet barranin dwar l-eskalazzjoni tal-vjolenza fil-parti tal-Lvant tar-Repubblika Demokratika tal-Kongo, inkluż is-sitwazzjoni fir-reġjun tal-Lagi l-Kbar.
Taħt affarijiet oħra, Ċipru informa lill-Kunsill dwar il-kandidatura ta' Ċipru għall-presidenza tal-OSKE. Is-Slovenja ġibdet l-attenzjoni għal-laqgħa reċenti mal-istati tal-Afrika tal-Punent fil-marġini tas-summit UE-UA, li s-Slovenja ppresediet f'isem ir-Rappreżentant Għoli, u l-Awstrija infurmat lill-ministri dwar il-laqgħa reċenti tal-Ħbieb tal-Balkani tal-Punent fi Vjenna
Il-Kunsill adotta aktar sanzjonijiet kontra 3 persuni u entità waħda responsabbli għall-vjolenza minn gruppi organizzati fil-Haiti.
Il-Kunsill approva konklużjonijiet dwar "L-avvanz ta' sħubijiet ta' benefiċċju reċiproku permezz ta' finanzjament aħjar, ugwaljanza bejn il-ġeneri, saħħa globali, u kummerċ", li jaffermaw mill-ġdid l-impenn tal-UE għal sħubijiet internazzjonali bħala pedament tal-azzjoni esterna tagħha, b'kontribut għall-iżvilupp sostenibbli, il-qerda tal-faqar, l-istabbiltà globali u ordni internazzjonali bbażata fuq ir-regoli.
Il-ministri approvaw l-approċċ komprensiv spjegat fil-konklużjonijiet, b'mod partikolari dwar il-finanzjament għall-iżvilupp, l-implimentazzjoni effettiva tal-Istrateġija tal-UE għas-Saħħa Globali, l-avvanz tal-ugwaljanza bejn il-ġeneri u s-saħħa u d-drittijiet sesswali u riproduttivi, u t-tisħiħ tal-kapaċità kummerċjali permezz tal-Għajnuna għall-Kummerċ.
Bl-approvazzjoni ta' dawn il-konklużjonijiet, il-Kunsill ikkonferma li l-UE tinsab lesta biex tadatta l-azzjoni esterna tagħha għal ambjent globali li qed jinbidel filwaqt li tibqa' sieħeb affidabbli u bbażat fuq il-prinċipji, inkluż bħala l-akbar fornitur globali tal-ODA, flimkien mal-istati membri. Huwa appella għal implimentazzjoni effettiva, impatt li jista' jitkejjel, trasparenza u responsabbiltà fil-oqsma kollha ta' azzjoni, u għat-tkomplija tal involviment mas-sħab u l-istituzzjonijiet internazzjonali biex jiġu avvanzati l-iżvilupp sostenibbli, is-sigurtà tas-saħħa globali, l-ugwaljanza bejn il-ġeneri u l-kummerċ inklużiv, f'konformità mal-Aġenda 2030 u ma' impenji internazzjonali oħra.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-Kunsill adotta konklużjonijiet għall-Konferenza ta' Reviżjoni tal-2026 tal-Partijiet għat-Trattat dwar in-Nonproliferazzjoni tal-Armi Nukleari (TNP), li jaffermaw mill-ġdid l-appoġġ inekwivoku tiegħu għat-TNP bħala l-pedament tar-reġim globali ta' nonproliferazzjoni nukleari, il-pedament għall-kisba tad-diżarm nukleari, u element importanti fl-iżvilupp ta' applikazzjonijiet tal-enerġija nukleari għal finijiet paċifiċi. Qabel il-Konferenza ta' Rieżami tal-2026, it-Trattat qed jiffaċċa sfidi notevoli, inkluż il-qawmien mill-ġdid tar-retorika nukleari, kif jixhdu l-azzjonijiet tar-Russja fil-gwerra ta' aggressjoni fuq skala kbira mhux ġustifikata u illegali tagħha kontra l-Ukrajna.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
