"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Trasport), 3 ta' Ġunju 2021
Riżultati ewlenin
Ajru Uniku Ewropew 2+
Il-Kunsill laħaq qbil dwar il-pożizzjoni tiegħu ("approċċ ġenerali") rigward il-proposti għar-rieżami tal-qafas leġiżlattiv tal-Ajru Uniku Ewropew (SES). L-inizjattiva SES għandha l-għan li tirriforma l-industrija tas-servizzi tan-navigazzjoni bl-ajru sabiex isir effiċjenti il-mod kif jiġi organizzat u ġestit l-ispazju tal-ajru Ewropew.
Il-ġestjoni tat-traffiku tal-ajru mhijiex bħal kwalunkwe attività ekonomika oħra. Hija intrinsikament marbuta mas-sikurezza u s-sigurtà taċ-ċittadini, u r-regolamentazzjoni tagħha ma tistax titħalla kompletament f'idejn is-suq. Minħabba l-impatt enormi tal-pandemija tal-COVID-19 fuq l-avjazzjoni, is-settur jeħtieġ riforma analizzata bir-reqqa, li tiżgura s-simplifikazzjoni u tnaqqas l-ispejjeż, bħala l-bażi għall-irkupru tiegħu. Barra minn hekk, jeħtieġ li din ir-riforma tgħin biex jitnaqqas l-impatt ambjentali tal-avjazzjoni. Il-pożizzjoni tal-Kunsill tqis dan b'mod sħiħ. Fl-istess ħin, tiżgura li l-miżuri jittieħdu fl-aktar livell effettiv u li jiġu rispettati d-drittijiet u r-responsabbiltajiet tal-istati membri dwar is-sikurezza u s-sigurtà tal-ispazju tal-ajru tagħhom skont il-Konvenzjoni ta' Chicago.
Pedro Nuno Santos, Ministru għall-Infrastruttura u d-Djar tal-Portugall, president tal-laqgħa tal-lum
Il-Kunsill qabel dwar approċċ ġenerali dwar regoli riveduti għall-użu ta' vetturi mikrija għall-ġarr tal-merkanzija bit-triq. Il-proposta għandha l-għan li tistabbilixxi qafas regolatorju ċar u uniformi għas-suq tal-vetturi mikrija b'rabta mal-ġarr tal-merkanzija, u li ttaffi r-restrizzjonijiet fuq l-użu ta' vetturi mikrija fit-trasport internazzjonali.
Ċertifikati ta' pajjiżi terzi fin-navigazzjoni interna
Il-Kunsill qabel ukoll dwar approċċ ġenerali dwar proposta għal direttiva emendatorja dwar il-miżuri tranżizzjonali għar-rikonoxximent taċ-ċertifikati ta' pajjiżi terzi fin-navigazzjoni interna. L-emenda ser tiżgura l-kontinwità u ċ-ċertezza legali għall-individwi u l-operaturi ekonomiċi fis-settur tal-passaġġi fuq l-ilma interni.
Il-ferroviji fuq quddiem nett tal-mobbiltà Intelliġenti u sostenibbli
Il-Kunsill approva konklużjonijiet dwar "Il-ferroviji fuq quddiem nett tal-mobbiltà intelliġenti u sostenibbli".
Fl-isfond tal-Patt Ekoloġiku Ewropew, l-istrateġija għal mobbiltà sostenibbli u intelliġenti u - naturalment - is-Sena Ewropea tal-Ferroviji, issa huwa żmien ideali biex il-Kunsill jevalwa l-isforzi biex jippromwovi l-ferroviji u jagħmel stqarrija politika ambizzjuża dwar il-ferroviji. It-tqegħid tal-ferroviji fuq quddiem nett kien wieħed mill-għanijiet tal-presidenza Portugiża u jirrifletti perfettament l-objettivi tal-politika tal-UE. Huwa ta' importanza kbira għalija li meta nitkellmu dwar il-ferroviji f'kuntest ta' politika, naraw il-valur tagħhom għal mobbiltà aktar ekoloġika, kif ukoll il-kontribut tagħhom għall-koeżjoni soċjali u territorjali, u għall-industrijalizzazzjoni u l-iżvilupp ekonomiku.
Pedro Nuno Santos, Ministru għall-Infrastruttura u d-Djar tal-Portugall, president tal-laqgħa tal-lum
Il-Kunsill adotta wkoll konklużjonijiet dwar l-istrateġija għal mobbiltà sostenibbli u intelliġenti tal-Kummissjoni. Il-ministri mbagħad qasmu l-fehmiet tagħhom dwar it-triq 'il quddiem dwar din l-istrateġija, inkluż elementi li mhumiex deskritti fil-konklużjonijiet tal-Kunsill. Id-diskussjoni, kif ukoll il-konklużjonijiet, ser jgħinu lill-Kummissjoni tiffoka l-ħidma futura tagħha f'dan il-qasam.
Ninsab kuntent ħafna bil-kunsens li lħaqna aħna Ministri għat-Trasport dwar dan it-test ambizzjuż u li jħares 'il quddiem. Dawn il-konklużjonijiet jibagħtu messaġġ politiku ċar rigward l-impenn tagħna għal sistema tat-trasport u tal-mobbiltà aktar sostenibbli, inklużiva, intelliġenti, sikura u reżiljenti. Din it-trasformazzjoni hija essenzjali u ser tagħti kontribut kbir biex jintlaħaq l-objettiv tan-newtralità klimatika fl-UE sal-2050, f'konformità mal-Ftehim ta' Pariġi. It-trasport issa ser ikun fil-qalba tal-indirizzar tal-kwistjonijiet klimatiċi tagħna.
Pedro Nuno Santos, Ministru għall-Infrastruttura u d-Djar tal-Portugall, president tal-laqgħa tal-lum
Il-presidenza infurmat lill-ministri dwar is-sitwazzjoni attwali tal-proposta biex jiġu riveduti r-regoli tal-UE dwar it-tariffi għall-użu tat-toroq (Direttiva Eurovignette) biex jitnaqqsu l-emissjonijiet ta' gassijiet serra, it-trasport bit-triq isir aktar ekoloġiku u jsir kontribut għall-finanzjament tal-infrastruttura tat-toroq. Il-presidenza Portugiża għandha l-għan li tilħaq qbil politiku mal-Parlament Ewropew dwar dan il-fajl ta' prijorità qabel tmiem il-mandat tagħha.
Il-Kunsill iddiskuta affarijiet oħra mqajma mid-delegazzjoni Litwana dwar l-inżul furzat tal-inġenju tal-ajru ċivili f'Minsk fit-23 ta' Mejju. Il-ministri appoġġaw il-punt Litwan taħt "Affarijiet oħra" u l-konklużjonijiet tal-Kunsill Ewropew tal-24 ta' Mejju. Huma kkonfermaw l-importanza li jinżamm front b'saħħtu u magħqud biex jiġu salvagwardjati s-sikurezza u s-sigurtà taċ-ċittadini tal-UE.
Bħala l-aħħar punt wara ħafna oħrajn taħt "Affarijiet oħra", il-presidenza Slovena li jmiss ippreżentat il-programm ta' ħidma tagħha għat-tieni nofs tal-2021.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-ġestjoni tat-traffiku tal-ajru mhijiex bħal kwalunkwe attività ekonomika oħra. Hija intrinsikament marbuta mas-sikurezza u s-sigurtà taċ-ċittadini, u r-regolamentazzjoni tagħha ma tistax titħalla kompletament f'idejn is-suq. Minħabba l-impatt enormi tal-pandemija tal-COVID-19 fuq l-avjazzjoni, is-settur jeħtieġ riforma analizzata bir-reqqa, li tiżgura s-simplifikazzjoni u tnaqqas l-ispejjeż, bħala l-bażi għall-irkupru tiegħu. Barra minn hekk, jeħtieġ li din ir-riforma tgħin biex jitnaqqas l-impatt ambjentali tal-avjazzjoni. Il-pożizzjoni tal-Kunsill tqis dan b'mod sħiħ. Fl-istess ħin, tiżgura li l-miżuri jittieħdu fl-aktar livell effettiv u li jiġu rispettati d-drittijiet u r-responsabbiltajiet tal-istati membri dwar is-sikurezza u s-sigurtà tal-ispazju tal-ajru tagħhom skont il-Konvenzjoni ta' Chicago.