"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Le cead uaitse, úsáidfimid fianáin le sonraí comhlánaithe anaithnide a tháirgeadh maidir le brabhsáil agus iompraíocht na gcuairteoirí ar ár suíomh gréasáin. Úsáidfimid na sonraí sin chun feabhas a chur ar an eispéireas agat ar ár suíomh.
An Chomhairle Gnóthaí Ginearálta, 26 Bealtaine 2026
Na príomhthorthaí
Chuir na hairí atá freagrach as gnóthaí Eorpacha tús leis na hullmhúcháin do Chomhairle Eorpach mhí an Mheithimh trí phlé a dhéanamh ar an dréachtchlár oibre anótáilte agus bhí díospóireacht bheartais acu maidir leis an gcéad chreat airgeadais ilbhliantúil (CAI) eile 2028-2034 agus béim á leagan acu ar a rannchuidiú le comhtháthú an mhargaidh aonair. Phléigh an Chomhairle freisin staid na himeartha maidir leis an gcaidreamh idir an tAontas agus an Ríocht Aontaithe agus bhí plé tírshonrach aici faoin idirphlé maidir leis an smacht reachta inar díríodh ar an staid sa Fhrainc, sa Chróit, san Iodáil agus sa Laitvia.
Ag féachaint chun cinn ar an gComhairle Eorpach i mí an Mheithimh, cuireadh tús lenár n-ullmhúcháin le malartú an lae inniu. Ag an am céanna, tá dlús á chur le hobair Uachtaránacht na Cipire ar an gcéad Chreat Airgeadais Ilbhliantúil eile. Bhí plé tairbheach againn, rud a chuir ar ár gcumas machnamh a dhéanamh ar an gcaoi ar féidir leis an gCreat Airgeadais Ilbhliantúil rannchuidiú le comhtháthú an mhargaidh aonair ar mhaithe le hiomaíochas an Aontais — ceann de na príomhthosaíochtaí atá againn, atá ailínithe go hiomlán leis an ngealltanas a leagtar amach sa dearbhú comhpháirteach ‘Eoraip amháin, Margadh amháin’.
Marilena Raouna, Leas-Aire Gnóthaí Eorpacha Phoblacht na Cipire
Ullmhúchán don chruinniú a bheidh ag EUCO i mí an Mheithimh
Thosaigh an Chomhairle an t-ullmhúchán do Chomhairle Eorpach mhí an Mheithimh trí phlé a dhéanamh ar an dréachtchlár oibre anótáilte. Meastar go bpléifidh na ceannairí an méid a leanas:
cogadh foghach na Rúise ar an Úcráin
a bhfuil tarlaithe le déanaí sa Mheánoirthear
an chéad Chreat Airgeadais Ilbhliantúil (CAI) eile 2028-2034
I seisiún poiblí, bhí díospóireacht bheartais ag an gComhairle maidir leis an gcéad CAI eile 2028-2034 agus béim á leagan ar a rannchuidiú le comhtháthú mhargadh aonair an Aontais. Is é CAI buiséad fadtéarmach an Aontais, lena gcumhdaítear tréimhse seacht mbliana.
Cumhdaítear sa togra ón gCoimisiún Eorpach don chéad CAI eile roinnt gnéithe lena dtacófar le comhtháthú an mhargaidh aonair. Is é is aidhm do na Pleananna Comhpháirtíochta Náisiúnta agus Réigiúnaí infheistíochtaí agus athchóirithe a spreagadh lena dtabharfar aghaidh ar bhacainní ar an Margadh Aonair. an Ciste Eorpach um Iomaíochas, atá ceaptha chun tacú le tionscail agus teicneolaíochtaí straitéiseacha; Leis an ionstraim um an Eoraip Dhomhanda, féachtar le comhpháirtíochtaí seachtracha a fhorbairt mar bhealach chun leasanna straitéiseacha an Aontais a chur chun cinn. Ar deireadh, le cistí sonracha, amhail an tSaoráid um Chónascadh na hEorpa, maoineofar bonneagar trasteorann, agus le hionstraimí spriocdhírithe amhail an Clár um an Margadh Aonair agus Custam, díreofar ar fhorfheidhmiú, caighdeánú agus comhar riaracháin.
Mar mhír ar leith faoi ‘aon ghnó eile’, tharraing toscaireacht na Fraince aird na Comhairle ar ról sonrach na réigiún is forimeallaíagusna dtíortha agus na gcríoch thar lear san Aontas i gcomhthéacs an chéad CAI eile.
An caidreamh idir an tAontas Eorpach agus an Ríocht Aontaithe
Bhí seisiún tuairimíochta ag na hairí maidir le staid na himeartha i ndáil leis an gcaidreamh idir an tAontas agus an Ríocht Aontaithe.
Chuir an Coimisiún agus SEGS na hairí ar an eolas faoi na forbairtí maidir le cur chun feidhme na gcomhaontuithe atá ann cheana agus faoin gclár oibre athnuaite tar éis an chéad chruinnithe mullaigh idir an tAontas agus an Ríocht Aontaithe i mí na Bealtaine 2025. Thug an Chomhairle dá haire an dul chun cinn inter alia a mhéid a bhaineann leis an gcaibidlíocht atá ar siúl faoi láthair maidir le limistéar coiteann sláintíochta agus fíteashláintíochta (comhaontú SPS), comhaontú chun córais trádála astaíochtaí gás ceaptha teasa an Aontais agus na Ríochta Aontaithe (comhaontú ETS) a nascadh agus comhaontú maidir le Scéim Taithí don Aos Óg. Cuireadh na hairí ar an eolas freisin faoi chur chun feidhme na Comhpháirtíochta Slándála agus Cosanta, chomh maith leis an gcaibidlíocht atá ar na bacáin maidir le comhaontú i ndáil le rannpháirtíocht na Ríochta Aontaithe i margadh inmheánach leictreachais an Aontais (comhaontú leictreachais), agus comhaontú maidir le ranníocaíocht airgeadais na Ríochta Aontaithe chun éagothromaíochtaí eacnamaíocha, sóisialta agus críochacha san Aontas a laghdú (comhaontú comhtháthaithe).
Bhí plé tírshonrach ag na hairí faoi chuimsiú an idirphlé bhliantúil maidir leis an smacht reachta, inar díríodh ar an staid sa Fhrainc, sa Chróit, san Iodáil agus sa Laitvia.
Ba é sin an dara babhta den phlé tírshonrach i mbliana. I dtús báire, i gcás gach tíre, chuir an Coimisiún príomhthorthaí na caibidle tírshonraí ábhartha i láthair sa tuarascáil uaidh maidir leis an smacht reachta le haghaidh na bliana 2025. Ina dhiaidh sin, chuir na toscaireachtaí ábhartha na príomhfhorbairtí náisiúnta i láthair mar aon le gnéithe ar leith dá gcreat náisiúnta maidir leis an smacht reachta. Bhí babhta barúlacha agus ceisteanna ann ansin inar roinn toscaireachtaí eile a dtaithí agus dea-chleachtais maidir leis na forbairtí a luadh. Ina dhiaidh sin, chuir an toscaireacht, a raibh a staid á plé, barúlacha breise i láthair.
Mar mhír ar leithligh, faoi ‘aon ghnó eile’, chuir toscaireacht na hUngáire nuashonrú ar fáil maidir leis an nós imeachta leanúnach faoi Airteagal 7(1) CAE a bhaineann le staid an smachta reachta sa tír.
Ghlac an Chomhairle Treoir maidir leis an gceart chun vótáil agus an ceart chun seasamh mar iarrthóir i dtoghcháin bhardasacha a bhfuil ag saoránaigh an Aontais a bhfuil cónaí orthu i mBallstát nach náisiúnaigh dá chuid iad. Ghlac an Chomhairle cinneadh chun go leasófaí an Gníomh Eorpach um Thoghcháin le seachvótáil a cheadú d’Fheisirí Pharlaimint na hEorpa agus iad ag súil le breith iad nó tar éis páiste a thabhairt ar ar an saol.
Le linn an bhricfeasta, beidh seisiún tuairimíochta ag na hairí maidir le fadbhreathnaitheacht straitéiseach, agus cuirfidh an Coimisiún a straitéis um an gcothroime idirghlúine i láthair go hachomair.
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
