Oiriúnach do 55

Cad é an pacáiste ‘Oiriúnach do 55’?

Is tacar é an pacáiste ‘Oiriúnach do 55’ arb é is aidhm dó astaíochtaí gás ceaptha teasa an Aontais a laghdú 55%, ar a laghad, faoi 2030 agus an tAontas a chur ar an mbealach chun aeráidneodracht a bhaint amach faoi 2050.

Leis an bpacáiste, déantar an méid seo a leanas:

• aistriú atá cóir agus cothrom ó thaobh na sochaí de a chinntiú
• nuálaíocht agus iomaíochas thionsclaíocht an Aontais a choinneáil agus a neartú agus cothrom iomaíochta i leith oibreoirí eacnamaíocha tríú tíortha a chinntiú ag an am céanna
• taca a chur faoi sheasamh an Aontais mar cheannródaí sa chomhrac domhanda i gcoinne an athraithe aeráide

An Chomhairle mar chomhreachtóir

Chuir an Coimisiún Eorpach tograí an phacáiste ‘Oiriúnach do 55’ i láthair agus pléadh ansin iad ar an leibhéal teicniúil laistigh de mheithleacha na Comhairle atá freagrach as na réimsí beartais lena mbaineann.

Ina dhiaidh sin, phléigh ambasadóirí Bhallstáit an Aontais iad in Coreper chun an bealach a réiteach do chomhaontuithe idir na 27 mBallstát. Phléigh airí an Aontais a gcuid tuairimí, i bhfoirmíochtaí éagsúla den Chomhairle, chun teacht ar chomhaontú maidir le comhsheasamh i ndáil le gach togra atá beartaithe.

Ag eascairt as an ngnáthnós imeachta reachtach, chuaigh an Chomhairle i mbun caibidlíochta ansin le Parlaimint na hEorpa chun comhaontú comhchoiteann a aimsiú i bhfianaise ghlacadh chríochnaithigh na ngníomhartha reachtacha.

Cad atá san áireamh sa phacáiste ‘Oiriúnach do 55’?

Córas trádála astaíochtaí an Aontais

Is margadh carbóin é Córas Trádála Astaíochtaí an Aontais (CTA AE) atá bunaithe ar chóras teorannaithe agus trádála lamháltas astaíochtaí do thionscail dianfhuinnimh agus don earnáil giniúna cumhachta. Is é príomhuirlis an Aontais é chun aghaidh a thabhairt ar laghduithe astaíochtaí.

Is é ab aidhm don phacáiste ‘Oiriúnach do 55’ CTA AE a athchóiriú trína dhéanamh níos uaillmhianaí. Ar na forálacha nua tá:

• astaíochtaí gás ceaptha teasa ón iompar muirí a leathnú
• lamháltais astaíochtaí a laghdú níos tapúla sa chóras agus deireadh a chur de réir a chéile le lamháltais saor in aisce do roinnt earnálacha
• an scéim dhomhanda fritháirimh agus laghdaithe carbóin don eitlíocht idirnáisiúnta (CORSIA) a chur chun feidhme trí CTA AE
• an cistiú atá ar fáil ón gciste don nuachóiriú agus ón gciste don nuálaíocht a mhéadú
• athbhreithniú ar an gcúlchiste cobhsaíochta margaidh

Ina theannta sin, cruthaítear córas trádála astaíochtaí neamhspleách nua d’fhoirgnimh, d’iompar de bhóthar agus do bhreoslaí le haghaidh earnálacha breise.

Ghlac an Chomhairle Comhshaoil cur chuige ginearálta maidir leis an athbhreithniú ar CTA AE i mí an Mheithimh 2022. I mí na Nollaig 2022, tháinig an Chomhairle ar chomhaontú sealadach le Parlaimint na hEorpa. Áiríodh leis sin méadú go 62% ar uaillmhian fhoriomlán na laghduithe ar astaíochtaí faoi 2030 sna hearnálacha a chumhdaítear le CTA AE, i gcomparáid leis an sprioc 61% a mhol an Coimisiún.

I mí na Nollag 2022, tháinig an Chomhairle agus Parlaimint na hEorpa ar chomhaontú polaitiúil sealadach freisin maidir leis an athbhreithniú ar rialacha chóras trádála astaíochtaí an Aontais (CTA AE) a bhfuil feidhm acu maidir le hearnáil na heitlíochta. Leis an gcomhaontú seo, cinntíodh go rannchuidíonn an eitlíocht le cuspóirí an Aontais maidir le hastaíochtaí a laghdú faoi Chomhaontú Pháras.

Ghlac an Chomhairle cinneadh maidir le cúlchiste cobhsaíochta an mhargaidh, mar chuid de CTA AE, i mí an Mhárta 2023. Ghlac sí an t-athbhreithniú ar CTA AE go foirmiúil i mí Aibreáin 2023.

• ‘Oiriúnach do 55’: príomhphíosaí reachtaíochta glactha ag an gComhairle chun spriocanna aeráide 2030 a bhaint amach (preaseisiúint, an 25 Aibreán 2023)
• ‘Oiriúnach do 55’: Cinneadh glactha ag an gComhairle maidir le cúlchiste cobhsaíochta an mhargaidh (preaseisiúint, an 28 Márta 2023)

I i mí na Nollag 2022, ghlac an Chomhairle cinneadh maidir le fógra a thabhairt faoi cheanglais fritháirithe CORSIA. Is scéim dhomhanda é CORSIA (Scéim Fritháirithe agus Laghdaithe Carbóin don Eitlíocht Idirnáisiúnta) chun astaíochtaí CO2 ón eitlíocht idirnáisiúnta a fhritháireamh, ar scéim í ina bhfuil Ballstáit an Aontais rannpháirteach.

• Cinneadh maidir leis na ceanglais fritháirimh ar astaíochtaí aeriompair (CORSIA) glactha ag an gComhairle (preaseisiúint, an 19 Nollaig 2022)

Ciste aeráide sóisialta

Is é is aidhm don chiste aeráide sóisialta aghaidh a thabhairt ar thionchair shóisialta agus dáileacháin an chórais nua trádála astaíochtaí atá beartaithe d’fhoirgnimh agus iompar de bhóthar.

Bunaithe ar phleananna aeráide sóisialta atá le forbairt ag na Ballstáit, is é is aidhm don chiste bearta tacaíochta agus infheistíochtaí a chur ar fáil ar mhaithe leis na grúpaí leochaileacha seo a leanas:

• líonta tí
• micrifhiontair
• úsáideoirí iompair

Is féidir leis an gciste tacaíocht ioncaim dhíreach shealadach a chumhdach chomh maith. Cuid de bhuiséad an Aontais atá sa chiste agus cuirtear ioncam sannta seachtrach suas go huasmhéid €65 bhilliún leis.

Tháinig airí comhshaoil an Aontais ar chomhaontú maidir leis an seasamh caibidlíochta ón gComhairle i ndáil leis an gciste aeráide sóisialta a chruthú i mí an Mheithimh 2022. I mí na Nollag 2022, tháinig an Chomhairle agus Parlaimint na hEorpa ar chomhaontú polaitiúil sealadach maidir leis an togra le haghaidh an chiste. Ghlac an Chomhairle na rialacha nua i mí Aibreáin 2023.

• ‘Oiriúnach do 55’: príomhphíosaí reachtaíochta glactha ag an gComhairle chun spriocanna aeráide 2030 a bhaint amach (preaseisiúint, an 25 Aibreán 2023)

Sásra coigeartaithe carbóin ar theorainneacha

Is é an sásra coigeartaithe carbóin ar theorainneacha (SCCT) uirlis an Aontais chun sceitheadh carbóin a chomhrac. Cuireann an córas seo praghas cóir ar an gcarbón a astaítear le linn táirgeadh earraí allmhairithe sna hearnálacha is déine ar charbón ­– iarann agus cruach, stroighin, leasacháin, alúmanam, leictreachas agus hidrigin, agus spreagann sé táirgeadh tionsclaíoch níos glaine i dtíortha nach bhfuil san Aontas.

Ghlac an Chomhairle an Rialachán maidir le SCCT go foirmiúil i mí Aibreáin 2023 agus tháinig sé i bhfeidhm go hiomlán an 1 Eanáir 2026.

I mí Mheán Fómhair 2025, ghlac an Chomhairle tacar athruithe chun SCCT a shimpliú agus chun an rómhaorlathas a laghdú, mar chuid de phacáiste reachtach Omnibus I. Tháinig an rialachán i bhfeidhm an 20 Deireadh Fómhair 2025.

I mí na Nollag 2025, mhol an Coimisiún Eorpach bearta breise chun an sásra coigeartaithe carbóin ar theorainneacha a neartú agus a leathnú.

An 12 Meitheamh 2026, chomhaontaigh an Chomhairle an seasamh uaithi maidir leis an togra. Tacaíonn an Chomhairle le leathnú SCCT chuig táirgí iartheachtacha roghnaithe agus liosta na dtáirgí a chumhdaítear á bheachtú ag an am céanna. Tacaíonn sé freisin le bearta nua frith-imchéimniúcháin a thabhairt isteach agus soiléiríonn sé na coinníollacha faoina bhféadfar díolúintí sealadacha a dheonú in imthosca eisceachtúla.

• ‘Oiriúnach do 55’: príomhphíosaí reachtaíochta glactha ag an gComhairle chun spriocanna aeráide 2030 a bhaint amach (preaseisiúint, an 25 Aibreán 2023)
• Bearta chun sásra coigeartaithe carbóin ar theorainneacha an Aontais a neartú comhaontaithe ag an gComhairle (preaseisiúint, an 12 Meitheamh 2026)

Spriocanna na mBallstát maidir le hastaíochtaí a laghdú

Leis an Rialachán maidir le Comhroinnt Díchill, leagtar síos spriocanna ceangailteacha bliantúla maidir le hastaíochtaí gás ceaptha teasa do na Ballstáit in earnálacha nach gcumhdaítear faoi Chóras Trádála Astaíochtaí an Aontais (CTA AE) ná faoin Rialachán maidir le húsáid talún, athrú ar úsáid talún agus foraoiseacht (LULUCF). Áirítear ar na hearnálacha sin:

• iompar de bhóthar agus iompar muirí intíre
• foirgnimh
• talmhaíocht
• dramhaíl
• tionscail bheaga

Leis na rialacha nua, mar chuid den phacáiste ‘Oiriúnach do 55’, méadófar an sprioc laghdaithe astaíochtaí gás ceaptha teasa ar leibhéal an Aontais do 2030 ó 29% go 40%, i gcomparáid le 2005, sna hearnálacha lena mbaineann. Tabharfaidh siad na spriocanna náisiúnta cothrom le dáta dá réir sin.

Tháinig airí comhshaoil an Aontais ar chomhaontú maidir le seasamh caibidlíochta ón gComhairle maidir leis na rialacha athbhreithnithe an 29 Meitheamh 2022. I mí na Samhna 2022, tháinig an Chomhairle ar chomhaontú sealadach le Parlaimint na hEorpa. Ghlac an Chomhairle an rialachán i mí an Mhárta 2023.

• An pacáiste ‘Oiriúnach do 55’: Rialacháin glactha ag an gComhairle maidir le comhroinnt díchill agus úsáid talún agus earnáil na foraoiseachta (preaseisiúint, an 28 Márta 2023)

Astaíochtaí agus aistrithe a eascraíonn as gníomhaíochtaí a bhaineann le húsáid talún, le hathrú ar úsáid talún agus leis an bhforaoiseacht

Leis an rialachán maidir le húsáid talún, athrú ar úsáid talún agus foraoiseacht (LULUCF), leagtar amach gealltanas ceangailteach don Aontas astaíochtaí a laghdú agus aistrithe a mhéadú in earnálacha na húsáide talún agus na foraoiseachta. Leis an bpacáiste ‘Oiriúnach do 55’, tá na forálacha níos uaillmhianaí.

Leagtar síos leis na rialacha nua sprioc mhéadaithe ar leibhéal an Aontais de 310 milliún tona, ar a laghad, de choibhéis CO₂ glan-aistrithe gás ceaptha teasa do 2030. Sainítear spriocanna ceangailteacha náisiúnta do gach Ballstát.

Ghlac an Chomhairle Comhshaoil cur chuige ginearálta maidir le rialachán athbhreithnithe LULUCF an 29 Meitheamh 2022. Thángthas ar chomhaontú sealadach le Parlaimint na hEorpa i mí na Samhna 2022. Ghlac an Chomhairle an rialachán i mí an Mhárta 2023.

• An pacáiste ‘Oiriúnach do 55’: Rialacháin glactha ag an gComhairle maidir le comhroinnt díchill agus úsáid talún agus earnáil na foraoiseachta (preaseisiúint, an 28 Márta 2023)

Caighdeáin CO₂ le haghaidh gluaisteán agus veaineanna

Is ó ghluaisteáin agus veaineanna a thagann 15% d’astaíochtaí iomlána dé-ocsaíde carbóin san Aontais. Mar chuid den phacáiste 55, ghlac an tAontas rialacha nua lena rialaítear astaíochtaí CO₂ ó na feithiclí sin.

Tugtar isteach leis an rialachán spriocanna forchéimnitheacha laghdaithe astaíochtaí ar fud an Aontais do ghluaisteáin agus veaineanna do 2030 agus ina dhiaidh sin, lena n-áirítear sprioc laghdaithe 100% do ghluaisteáin agus veaineanna nua do 2035.

Ghlac an Chomhairle cur chuige ginearálta maidir leis an togra i mí an Mheithimh 2022. Thángthas ar chomhaontú le Parlaimint na hEorpa i mí Dheireadh Fómhair 2022. Ghlac an Chomhairle an rialachán i mí an Mhárta 2023.

• ‘Oiriúnach do 55’: rialachán maidir le hastaíochtaí CO2 i gcás gluaisteáin agus veaineanna nua glactha ag an gComhairle (preaseisiúint, an 28 Márta 2023)

Astaíochtaí meatáin san earnáil fuinnimh a laghdú

Chuir an Coimisiún i láthair an togra le haghaidh rialacha nua de chuid an Aontais maidir le laghdú astaíochtaí meatáin san earnáil fuinnimh i mí na Nollag 2021, mar chuid den phacáiste ‘Oiriúnach do 55’.

I mí na Nollag 2022, tháinig an Chomhairle ar chomhaontú (‘cur chuige ginearálta’) maidir leis an togra. I mí na Samhna 2023, tháinig anChomhairle agus Parlaimint na hEorpa ar chomhaontú sealadach maidir leis an rialachán. Ghlac an Chomhairle na rialacha nua i mí Bealtaine 2024.

Is é is aidhm don rialachán astaíochtaí meatáin a rianú agus a laghdú in earnáil an fhuinnimh. Is é an rialachán seo an chéad reachtaíocht dá leithéid agus is rannchuidiú ríthábhachtach é leis an ngníomhú ar son na haeráide, ós rud é gurb é meatán an dara gás ceaptha teasa is tábhachtaí tar éis dé-ocsaíd charbóin.

Eascraíonn sé as an bhfís straitéiseach a leagtar amach i Straitéis an Aontais um Meatán in 2020. Ag Comhdháil Aeráide COP26 na Náisiún Aontaithe in 2021, sheol an tAontas an Gealltanas Domhanda maidir le Meatán i gcomhpháirtíocht leis na Stáit Aontaithe, gealltanas inar gheall os cionn 100 tír a n-astaíochtaí meatáin a laghdú 30% faoi 2030 i gcomparáid le leibhéil 2020.

• Oiriúnach do 55: cead críochnaitheach tugtha ag an gComhairle chun astaíochtaí meatáin a laghdú in earnáil an fhuinnimh (preaseisiúint, an 27 Bealtaine 2024)

Breoslaí eitlíochta inbhuanaithe

Tá sé d’acmhainneacht ag breoslaí eitlíochta inbhuanaithe (bithbhreoslaí ardfhorbartha agus leictreabhreoslaí) astaíochtaí ó aerárthaí a laghdú go suntasach. Ní bhaintear leas as an acmhainneacht sin den chuid is mó, áfach, ós rud é nach bhfuil sna breoslaí sin ach 0.05% den ídiú breosla iomlán in earnáil na heitlíochta.

Is é is aidhm don Rialachán maidir le ReFuelEU Aviation lorg comhshaoil na hearnála eitlíochta a laghdú agus a chur ar a cumas cabhrú leis an Aontas a spriocanna aeráide a bhaint amach.

I mí an Mheithimh 2022, tháinig an Chomhairle ar chomhaontú maidir le cur chuige ginearálta don togra. Thángthas ar chomhaontú sealadach le Parlaimint na hEorpa i mí Aibreáin 2023. Ghlac an Chomhairle an rialachán nua i mí Dheireadh Fómhair 2023.

• An tionscnamh ‘RefuelEU Aviation’: dlí nua glactha ag an gComhairle chun an earnáil eitlíochta a dhícharbónú (preaseisiúint, an 9 Deireadh Fómhair 2023)

Breoslaí dícharbónaithe sa loingseoireacht

In ainneoin an dul chun cinn a rinneadh le blianta beaga anuas, braitheann an earnáil mhuirí go hiomlán beagnach ar bhreoslaí iontaise agus is foinse shuntasach gás ceaptha teasa agus astaíochtaí truailleán díobhálacha eile í. Is é is aidhm don tionscnamh ‘FuelEU Maritime’ déine gás ceaptha teasa an fhuinnimh a úsáidtear ar bord long a laghdú suas le 80% faoi 2050. Leis na rialacha nua, cuirtear úsáid breoslaí in-athnuaite agus ísealcharbóin chun cinn sa loingseoireacht.

I mí an Mheithimh 2022, tháinig an Chomhairle ar chomhaontú maidir le cur chuige ginearálta don togra. I mí an Mhárta 2023, tháinig an Chomhairle agus an Pharlaimint ar chomhaontú sealadach.

Ghlac an Chomhairle na rialacha nua i mí Iúil 2023, agus an nós imeachta reachtach á chur i gcrích aici.

• An tionscnamh ‘FuelEU Maritime’: dlí nua glactha ag an gComhairle chun an earnáil mhuirí a dhícharbónú (preaseisiúint, an 25 Iúil 2023)

Bonneagar breoslaí malartacha

Is é príomhchuspóir an rialacháin maidir le bonneagar breoslaí malartacha (AFIR) a chinntiú go mbeidh rochtain ag saoránaigh agus ag gnólachtaí ar líonra bonneagair leordhóthanach chun feithiclí bóthair agus longa a athluchtú nó a athbhreoslú le breoslaí malartacha.

Cuirfidh na rialacha nua ar chumas na hearnála iompair a lorg carbóin a laghdú go suntasach. Leagtar síos roinnt spriocanna iontu do 2025 nó 2030, lena n-áirítear:

• stáisiúin athluchtaithe le haghaidh carranna agus veaineanna a shuiteáil gach 60 km
• stáisiúin athbhreoslaithe hidrigine a fhreastalaíonn ar charranna agus leoraithe a imscaradh ó 2030 ar aghaidh i ngach nód uirbeach
• go mbeidh úsáideoirí feithiclí leictreacha nó hidrigine in ann íoc go héasca ag pointí athluchtaithe nó athbhreoslaithe

I mí an Mheithimh 2022, tháinig an Chomhairle ar chomhaontú faoi chomhsheasamh (cur chuige ginearálta) maidir leis an togra ón gCoimisiún le haghaidh an rialacháin seo. I mí an Mhárta 2023, tháinig an Chomhairle agus an Pharlaimint ar chomhaontú sealadach.

Ghlac an Chomhairle na rialacha nua i mí Iúil 2023.

• Bonneagar breoslaí malartacha: dlí nua le haghaidh tuilleadh stáisiún athluchtaithe agus athbhreoslaithe ar fud na hEorpa glactha ag an gComhairle (preaseisiúint, an 25 Iúil 2023)

Fuinneamh in-athnuaite

Rinneadh athbhreithniú ar Threoir an Aontais maidir le fuinneamh in-athnuaite mar chuid den phacáiste ‘Oiriúnach do 55’. Bhí sé d’aidhm ag an athbhreithniú sciar na bhfoinsí fuinnimh in-athnuaite i dtomhaltas fuinnimh foriomlán an Aontais a mhéadú go 42.5% faoi 2030, le breisiú táscach 2.5% breise a d’fhágfadh go mbeadh an sciar foriomlán in ann 45% a bhaint amach.

Áirítear sa Treoir fospriocanna earnálacha agus bearta ar fud na n-earnálacha, agus béim ar leith á leagan ar earnálacha ina raibh an dul chun cinn le comhtháthú na bhfoinsí fuinnimh in-athnuaite níos moille, go háirithe i réimsí an iompair, na bhfoirgneamh agus an tionscail.

Chomhaontaigh airí fuinnimh an Aontais a seasamh comhpháirteach i ndáil le Treoir athbhreithnithe an Aontais maidir le fuinneamh in-athnuaite an 27 Meitheamh 2022. I mí an Mhárta 2023, tháinig an Chomhairle agus Parlaimint na hEorpa ar chomhaontú polaitiúil sealadach. Ghlac an Chomhairle na rialacha nua i mí Dheireadh Fómhair 2023.

• Fuinneamh in-athnuaite: rialacha nua glactha ag an gComhairle (preaseisiúint, an 9 Deireadh Fómhair 2023)

Éifeachtúlacht fuinnimh

Le treoir athbhreithnithe an Aontais maidir le héifeachtúlacht fuinnimh, laghdófar ídiú fuinnimh deiridh ar leibhéal an Aontais de 11.7% in 2030 i gcomparáid leis na réamh-mheastacháin a rinneadh in 2020.

Leis na rialacha nua, cuirfear dlús le hiarrachtaí na mBallstát i réimse na héifeachtúlachta fuinnimh trí oibleagáidí bliantúla maidir le coigiltis fuinnimh a mhéadú agus ídiú fuinnimh na bhfoirgneamh san earnáil phoiblí a laghdú.

An 27 Meitheamh 2022, ghlac an Chomhairle cur ‘chuige ginearálta’ maidir leis na rialacha nua atá beartaithe. I mí an Mhárta 2023, tháinig an Chomhairle agus Parlaimint na hEorpa ar chomhaontú polaitiúil sealadach maidir le hathbhreithniú ar an treoir.

Ghlac an Chomhairle an treoir nua i mí Iúil 2023.

• An treoir maidir le héifeachtúlacht fuinnimh glactha ag an gComhairle (preaseisiúint, an 25 Iúil 2023)

Feidhmíocht fuinnimh foirgneamh

Is i bhfoirgnimh a chaitear 40% den fhuinneamh a thomhlaítear san Aontas agus is de bharr foirgneamh a scaoiltear 36% de na hastaíochtaí gás ceaptha teasa, díreacha agus indíreacha, a bhaineann le fuinneamh san Aontas. Is é is aidhm don treoir maidir le feidhmíocht fuinnimh foirgneamh, arna athbhreithniú in 2024, foirgnimh san Aontas a dhéanamh níos tíosaí ar fhuinneamh faoi 2030 agus ina dhiaidh sin.

Is iad príomhspriocanna na treorach nua:

• go mbeidh gach foirgneamh nua saor ó astaíochtaí faoi 2030
• go ndéanfar gach foirgneamh atá ann cheana a chlaochlú ina fhoirgneamh astaíochtaí nialasacha faoi 2050

I mí Dheireadh Fómhair 2022, ag teacht le chéile dóibh i dtionól na Comhairle, tháinig Ballstáit an Aontais ar chomhaontú faoi chomhsheasamh ('cur chuige ginearálta') maidir leis an togra ón gCoimisiún le haghaidh athbhreithniú ar an treoir. An 7 Nollaig 2023, tháinig an Chomhairle agus an Pharlaimint ar chomhaontú polaitiúil sealadach maidir leis an togra. Ghlac an Chomhairle na rialacha nua i mí Aibreáin 2024.

• Ag obair i dtreo foirgnimh atá saor ó astaíochtaí faoi 2050: rialacha glactha ag an gComhairle chun feidhmíocht fuinnimh a fheabhsú (preaseisiúint, an 12 Aibreán 2024)

Pacáiste maidir leis an margadh hidrigine agus gáis dhícharbónaithe

Is é is aidhm don phacáiste maidir leis an margadh hidrigine agus gáis dhícharbónaithe lorg carbóin an mhargaidh gáis a laghdú. Is é an sprioc atá ann aistriú ó ghás nádúrtha go gáis in-athnuaite agus ísealcharbóin agus borradh a chur faoina nglacadh san Aontas faoi 2030 agus ina dhiaidh sin.

Is éard atá sa phacáiste rialachán agus treoir. Leagtar síos leis an bpacáiste rialacha comhchoiteanna an mhargaidh inmheánaigh le haghaidh gáis in-athnuaite agus nádúrtha agus hidrigine. Is é is aidhm dóibh creat rialála a chruthú le haghaidh bonneagar agus margaí hidrigine tiomnaithe agus le haghaidh pleanáil chomhtháite gréasáin. Ina theannta sin, socraíonn siad rialacha le haghaidh cosaint tomhaltóirí agus neartaíonn siad slándáil an tsoláthair.

Shocraigh an Chomhairle an seasamh caibidlíochta uaithi (cur chuige ginearálta) le Parlaimint na hEorpa maidir leis an dá thogra i mí an Mhárta 2023. I mí na Nollag 2023, tháinig an Chomhairle agus an Pharlaimint ar chomhaontú polaitiúil sealadach ar an rialachán maidir le comhrialacha an mhargaidh inmheánaigh do gháis in-athnuaite agus nádúrtha agus don hidrigin. Thángthas ar chomhaontú sealadach maidir leis an treoir an 28 Samhain 2023.

Ghlacan Chomhairle an pacáiste i mí na Bealtaine 2024.

• Oiriúnach do 55: pacáiste an mhargaidh gáis agus hidrigine formheasta ag an gComhairle (preaseisiúint, an 21 Bealtaine 2024)

Cánachas fuinnimh

Is é is aidhm don togra le haghaidh athbhreithniú ar an treoir ón gComhairle le haghaidh cáin a ghearradh ar tháirgí fuinnimh agus ar leictreachas an méid seo a leanas a dhéanamh:

• an cánachas ar tháirgí fuinnimh agus ar leictreachas a ailíniú le beartais fuinnimh, chomhshaoil agus aeráide an Aontais
• margadh inmheánach an Aontais a chaomhnú agus a fheabhsú trí raon feidhme na dtáirgí fuinnimh agus struchtúr na rátaí a thabhairt cothrom le dáta agus trí chuíchóiriú a dhéanamh ar an úsáid a bhaineann na Ballstáit as díolúintí agus laghduithe cánach
• an acmhainneacht giniúna ioncaim a chaomhnú do bhuiséid na mBallstát

Tá an togra á phlé faoi láthair i dtionól na Comhairle. I mí na Nollag 2022, bhí díospóireacht bheartais ag airí airgeadais an Aontais maidir leis an athbhreithniú ar an treoir maidir le cánachas fuinnimh. I mí na Nollag 2024, bhí díospóireacht bheartais eile acu maidir leis an athbhreithniú agus ba dhíol sásaimh dóibh an dul chun cinn a rinneadh go dtí seo.

• An Chomhairle Gnóthaí Eacnamaíocha agus Airgeadais, an 10 Nollaig 2024
• An Chomhairle Gnóthaí Eacnamaíocha agus Airgeadais, an 6 Nollaig 2022
• Togra le haghaidh athbhreithniú ar chánachas fuinnimh

Féach freisin