An chaoi a ndéanann an tAontas ábhar díobhálach ar líne a chomhrac

An chaoi a gcabhraíonn an Gníomh um Sheirbhísí Digiteacha le dul i ngleic le hábhar díobhálach

Le teacht chun cinn na meán sóisialta agus ardán ar líne, is féidir le faisnéis bhréagach nó mhíthreorach scaipeadh go tapa, rud a mhúnlaíonn tuairimí an phobail, a bhaineann an bonn ó mhuinín an phobail agus a chuireann próisis dhaonlathacha agus comhtháthú sochaíoch i mbaol.

Cuidíonn Gníomh an Aontais um Sheirbhísí Digiteacha leis an mbolscaireacht, an mhífhaisnéis agus an bhréagnuacht ar líne a chomhrac trí na diancheanglais seo a leanas a thabhairt isteach d’ardáin ar líne:

cuntasacht as ábhar neamhdhleathach agus fíneálacha as neamhchomhlíonadh

measúnuithe riosca ar fhaisnéis dhíobhálach

trédhearcacht maidir leis an gcaoi a n-oibríonn algartaim

uirlisí tuairiscithe d’úsáideoirí agus rialacha fógraíochta níos déine

freagairt ar ghéarchéimeanna chun srian a chur le faisnéis bhréagach le linn éigeandálaí

iniúchtaí neamhspleácha ar iarrachtaí i gcoinne ábhar neamhdhleathach

Na difríochtaí idir bolscaireacht, mífhaisnéis agus bréagnuacht

bolscaireacht

fíricí a ndearnadh ionramháil orthu chun tionchar a imirt ar thuairimí an phobail

mífhaisnéis

faisnéis bhréagach nach mbaineann rún mailíseach léi

bréagnuacht

faisnéis mhíthreorach chun dallamullóg a chur ar dhaoine

Bíonn tionchar ag bolscaireacht, mífhaisnéis agus bréagnuacht ar dhaoine ar bhealaí éagsúla, ach is fíor go bhfuil ról ag gach ceann acu maidir le casadh a chur san fhírinne.

Is éard is bolscaireacht ann faisnéis a dhéantar d'aon ghnó agus a dháiltear chun tionchar a imirt ar an mbealach a smaoiníonn daoine nó a n-iompraíonn siad iad féin, de ghnáth chun tacú le clár oibre polaitiúil nó idé-eolaíoch. Féadfaidh rian den fhírinne a bheith i gceist leis an mbolscaireacht, ach de ghnáth bíonn sí aontaobhach nó claonta, agus cuirtear béim ar dhearcthaí áirithe ar bhealach straitéiseach.

Is éard is mífhaisnéis ann faisnéis nach bhfuil ceart ach a scaipeann daoine a chreideann gur fíor í ach gan é a bheith de rún acu an dallamullóg a chur ar dhaoine eile. Is féidir le mífhaisnéis eascairt as míthuiscintí, ráflaí nó taighde easnamhach.

Is éard is bréagnuacht ann nuacht bhréagach nó áibhéalach a cheaptar d'aon ghnó chun daoine a chur amú, mearbhall a chruthú nó cláir oibre fholaithe a chur chun cinn. Is minic a chuirtear an bhréagnuacht i láthair ar bhealach a dhéanann aithris ar fhíorthuairiscí nuachta.

Bréagnuacht san Aontas

Tá scaipeadh ábhair dhíobhálaigh ar líne fós ina shaincheist mhór san Aontas, go háirithe maidir le himeachtaí polaitiúla. In 2018, breathnaíodh i suirbhé Eorabharaiméadair ar cé chomh feasach agus a bhí saoránaigh an Aontais ó thaobh bréagnuacht ar líne agus ar a ndearcthaí ina leith.

Tagann 65% de mhuintir na hEorpa ar an mbréagnuacht roinnt uaireanta sa mhí

Foinse: Eorabharaiméadar 464

Tá 71% de dhaonra na mBallstát muiníneach gur féidir leo bréagnuacht a aithint

Foinse: Eorabharaiméadar 464

Is sa raidió is mó a chuirtear iontaoibh agus is i líonraí sóisialta is lú a chuirtear iontaoibh ó thaobh nuachta de

Foinse: Eorabharaiméadar 464

Féach freisin