Kif l-UE tiġġieled il-kontenut ta' ħsara online

Kif id-DSA jgħin biex jiġi indirizzat il-kontenut ta' ħsara

Biż-żieda tal-media soċjali u l-pjattaformi online, l-informazzjoni falza jew qarrieqa tista' tinxtered malajr, waqt li ssawwar l-opinjoni pubblika, iddgħajjef il-fiduċja tal-pubbliku u thedded il-proċessi demokratiċi u l-koeżjoni tas-soċjetà.

L-att dwar is-servizzi diġitali (DSA) jgħin biex tiġi miġġielda l-propaganda, il-miżinformazzjoni u l-aħbarijiet foloz online billi introduċa rekwiżiti stretti għall-pjattaformi online:

responsabbiltà għall-kontenut illegali u multi għan-nuqqas ta' konformità

valutazzjonijiet tar-riskju dwar informazzjoni ta' ħsara

trasparenza fil-mod kif jaħdmu l-algoritmi

għodod ta' rapportar tal-utenti u regoli aktar stretti dwar ir-reklami

rispons għall-kriżijiet biex tiġi limitata l-informazzjoni falza waqt emerġenzi

awditi indipendenti tal-isforzi kontra l-kontenut illegali

Differenzi bejn il-propaganda, il-miżinformazzjoni u l-aħbarijiet foloz

propaganda

fatti manipulati biex jinfluwenzaw l-opinjoni pubblika

miżinformazzjoni

informazzjoni falza mingħajr intenzjoni malizzjuża

aħbarijiet foloz

informazzjoni biex tqarraq bil-persuni

Il-propaganda, il-miżinformazzjoni u l-aħbarijiet foloz jinfluwenzaw lin-nies b'modi differenti, iżda t-tlieta li huma jikkontribwixxu biex jgħawġu l-verità.

Il-propaganda hija informazzjoni mfassla apposta u mqassma biex tinfluwenza lin-nies fil-mod kif jaħsbu jew iġibu ruħhom, normalment b'appoġġ għal aġenda politika jew ideoloġika. Il-propaganda jista' jkun fiha informazzjoni fattwali, iżda normalment tkun unilaterali jew preġudikata, waqt li tenfasizza ċerti fehmiet b'mod strateġiku.

Il-miżinformazzjoni hija informazzjoni żbaljata li n-nies li jemmnuha jqassmuha mingħajr l-intenzjoni ta' qerq. Il-miżinformazzjoni tista' tirriżulta minn nuqqas ta' ftehim, xnigħat jew riċerka inadegwata.

L-aħbarijiet foloz huma aħbarijiet foloz jew esaġerati mfassla bl-intenzjoni li jqarrqu bin-nies, joħolqu konfużjoni jew jippromwovu aġendi moħbija. L-aħbarijiet foloz spiss jiġu ppreżentati b'mod li jimitaw rapporti veri tal-aħbarijiet.

Aħbarijiet foloz fl-UE

It-tixrid ta' kontenut ta' ħsara online jibqa' problema kbira fl-UE, b'mod partikolari b'rabta ma' avvenimenti politiċi. Fl-2018, stħarriġ tal-Ewrobarometru ħares lejn kemm iċ-ċittadini tal-UE kienu konxji tal-aħbarijiet foloz online u l-attitudnijiet tagħhom lejhom.

65% tal-Ewropej jiltaqgħu ma' aħbarijiet foloz diversi drabi fix-xahar

Sors: Ewrobarometru 464

71% huma fiduċjużi li jistgħu jidentifikaw l-aħbarijiet il-foloz

Sors: Ewrobarometru 464

Il-fiduċja fl-aħbarijiet hija l-ogħla għar-radju u l-aktar baxxa għan-networks soċjali

Sors: Ewrobarometru 464

Ara wkoll