Ftehimiet internazzjonali u r-rwol tal-Kunsill

Tgħallem dwar ir-rwol ċentrali li għandu l-Kunsill fil-ftehimiet internazzjonali ma' pajjiżi, reġjuni u organizzazzjonijiet internazzjonali mhux tal-UE, u għaliex u kif l-UE tikkonkludi dawn il-ftehimiet.

X'jagħmel il-Kunsill fil-ftehimiet internazzjonali

Il-Kunsill tal-UE għandu rwol ċentrali fin-negozjati u l-konklużjoni ta' ftehimiet. Huwa involut fl-istadji kollha tal-proċedura, mill-għoti tal-mandat għan-negozjati lin-negozjatur (normalment il-Kummissjoni), sal-awtorizzazzjoni tal-iffirmar tal-ftehim u l-adozzjoni tad-deċiżjoni finali dwar il-kunsens tal-UE li tintrabat bih.

Fil-biċċa l-kbira, il-Kunsill jieħu d-deċiżjonijiet tiegħu relatati ma' ftehimiet internazzjonali permezz ta' votazzjoni b'maġġoranza kwalifikata. Madankollu, jivvota b'unanimità f'oqsma fejn tkun meħtieġa l-unanimità għal-leġiżlazzjoni tal-UE, bħat-tassazzjoni, u għal kategoriji speċifiċi ta' ftehimiet, bħal ftehimiet ta' assoċjazzjoni.

Ir-rwoli tal-istituzzjonijiet tal-UE fin-negozjar u l-konklużjoni ta' ftehimiet internazzjonali u l-passi proċedurali huma stabbiliti fit-Trattat dwar il-Funzjonament tal-Unjoni Ewropea.

Ħafna korpi preparatorji tal-Kunsill jikkontribwixxu għat-tħejjija, in-negozjar u l-konklużjoni ta' ftehimiet internazzjonali, inkluż il-Kumitat tar-Rappreżentanti Permanenti (Coreper), il-Kumitat tal-Politika Kummerċjali u l-gruppi ta' ħidma li jiffukaw fuq oqsma ġeografiċi jew ta' politika speċifiċi.

• Kif jivvota l-Kunsill
• Korpi preparatorji tal-Kunsill

Għaliex l-UE tinvolvi ruħha fi ftehimiet internazzjonali

Il-ftehimiet internazzjonali huma kruċjali għall-UE peress li javvanzaw l-objettivi ta' politika tagħha, jippromwovu l-interessi ekonomiċi tagħha u jsaħħu l-influwenza globali tagħha billi jiddefendu l-valuri tagħha fix-xena dinjija.

Huma jistgħu jkopru oqsma wesgħin, bħall-kummerċ, il-kooperazzjoni u l-iżvilupp, jew jittrattaw oqsma speċifiċi ta' politika bħas-sajd, id-dwana, it-trasport, ix-xjenza u t-teknoloġija.

Il-ftehimiet internazzjonali jrawmu l-kooperazzjoni dinjijau huma għodda essenzjali għaż-żamma tal-istabbiltà, il-predittività, is-sigurtà u l-ekwità mad-dinja kollha. Dawn jgħinu jippreservaw ordni internazzjonali bbażata fuq ir-regoli peress li jistabbilixxu regoli u standards komuni.

Billi jaġixxu bħala entità waħda fl-Unjoni Ewropea, l-istati membri tal-UE jibbenefikaw minn aktar setgħa ta' negozjar meta jagħmlu ftehimiet ma' partijiet terzi.

Tipi ta' ftehimiet internazzjonali

L-UE nnegozjat u kkonkludiet aktar minn 1000 ftehim internazzjonali ma' pajjiż jew pajjiżi mhux fl-UE, kif ukoll ma' organizzazzjonijiet internazzjonali, bħad-WTO jew in-NU.

L-aktar tipi komuni ta' ftehimiet konklużi mill-UE jinkludu:

• ftehimiet ta' assoċjazzjoni
• ftehimiet ta' kummerċ ħieles
• ftehimiet ta' sħubija ekonomika
• ftehimiet ta' sħubija u kooperazzjoni

L-UE tista' tikkonkludi ftehimiet internazzjonali, dment li l-konklużjoni tal-ftehim tkun:

• prevista fit-trattati
• meħtieġa biex jinkiseb wieħed mill-objettivi ta' politika tal-UE msemmija fit-trattati
• prevista f'att tal-UE legalment vinkolanti
• li x'aktarx taffettwa r-regoli komuni jew tibdel il-kamp ta' applikazzjoni tagħhom

Il-ftehimiet internazzjonali konklużi mill-UE, bħala persuna ġuridika, jorbtu lill-istituzzjonijiet u l-istati membri tagħha.

Dawn huma parti integrali mid-dritt tal-UE u jaqgħu f'kategorija għalihom, peress li huma separati mil-leġiżlazzjoni primarja (trattati tal-UE) u mil-leġiżlazzjoni sekondarja (regolamenti u direttivi). Is-saħħa legali tagħhom hija superjuri għal dik ta' leġiżlazzjoni sekondarja, li għalhekk trid tkun konformi magħhom.

Sospensjoni ta' ftehimiet internazzjonali

Abbażi ta' proposta mill-Kummissjoni jew mir-Rappreżentant Għoli għall-Affarijiet Barranin u l-Politika ta' Sigurtà, il-Kunsill jista' jadotta deċiżjoni biex jissospendi parzjalment jew kompletament l-applikazzjoni ta' ftehim internazzjonali jew biex itemm ftehim fid-dawl ta' sitwazzjoni partikolari.

Xi eżempji jinkludu:

• is-sospensjoni tal-ftehim għall-faċilitazzjoni tal-viża mar-Russja b'reazzjoni għall-invażjoni fuq skala sħiħa tal-Ukrajna (2022)
• is-sospensjoni tal-ftehim għall-faċilitazzjoni tal-viża mal-Belarussja b'reazzjoni għall-attakki ibridi mnedija mir-reġim ta' Lukashenka (2021)
• is-sospensjoni parzjali tal-ftehim ta' kooperazzjoni mas-Sirja b'reazzjoni għall-ksur tad-drittijiet tal-bniedem mir-reġim Sirjan (2011)
• is-sospensjoni ta' partijiet mill-ftehim ta' Cotonou maż-Żimbabwe minħabba tħassib li għadu għaddej dwar id-drittijiet tal-bniedem, id-demokrazija u l-istat tad-dritt (2010)

Ara wkoll

• Bażi ta' data tal-Kunsill tal-ftehimiet u l-konvenzjonijiet

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Bażi tad-data ta' ftehimiet internazzjonali (Ġurnal Uffiċjali tal-UE)
• Diviżjoni tal-kompetenzi fi ħdan l-Unjoni Ewropea (Ġurnal Uffiċjali tal-UE)
• Ftehimiet kummerċjali tal-UE