"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.

Żur il-paġna tal-politika tal-cookies tagħna għal aktar informazzjoni u biex tibdel is-settings tiegħek.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

Ħames raġunijiet biex nagħtu importanza lir-reżistenza għall-antimikrobiċi (AMR)

Ir-reżistenza għall-antimikrobiċi (AMR) isseħħ meta mikroorganiżmu jibqa' jgħix minkejja li jkun espost għal mediċini mfassla biex irażżnuh jew joqtluh.

L-użu żejjed u l-użu ħażin tal-antimikrobiċi huma l-muturi ewlenin tal-AMR. L-antimikrobiċi – inkluż l-antibijotiċi, l-antivirali, l-antifungali u l-antiparassitiċi – huma mediċini li jintużaw għall-prevenzjoni u l-kura ta' infezzjonijiet fil-bnedmin, fl-annimali jew fil-pjanti.

Dan huwa l-mod kif normalment isseħħ l-AMR:

Użu mhux xieraq tal-antimikrobiċi → il-batterji jiżviluppaw reżistenza → l-antimikrobiċi jsiru inqas effettivi → il-mard jinfirex aktar faċilment

Fit-13 ta' Ġunju 2023, il-Kunsill adotta rakkomandazzjoni għall-ġlieda kontra l-AMR. L-inizjattiva tfittex li tippromwovi l-użu responsabbli tal-antimikrobiċi, li ttejjeb il-prevenzjoni u l-kontroll tal-infezzjonijiet, u li żżid ir-riċerka u l-innovazzjoni, fost azzjonijiet oħra.

1. Batterji reżistenti jinfettaw madwar 800 000 persuna fis-sena

Fl-2020, aktar minn 800 000 persuna ġew infettati minn batterji reżistenti għall-antibijotiċi fl-Ewropa. Il-mard li rriżulta kien jinkludi l-pulmonite u infezzjonijiet taċ-ċirkolazzjoni tad-demm u intra-addominali.

Minkejja tnaqqis żgħir fl-2020, l-għadd ta' infezzjonijiet qed jikber

Din il-grafika turi l-għadd stmat ta' infezzjonijiet b'batterji reżistenti għall-antibijotiċi fl-UE u fiż-Żona Ekonomika Ewropea (ŻEE).

Verżjoni testwali

Grafika lineari tan-numru ta' infezzjonijiet b'batterji reżistenti għall-antibijotiċi fl-UE u fiż-ŻEE fil-perjodu 2016-2020.

L-għadd ta' infezzjonijiet jikber kull sena bejn l-2016 u l-2019, b'685 433 infezzjoni fl-2016 u 865 767 fl-2019. Fl-2020 in-numru ta' infezzjonijiet huwa iktar baxx, 801 517, forsi minħabba l-bidliet fil-prattiki tas-sorveljanza u tal-kura tas-saħħa matul il-pandemija tal-COVID-19 u l-miżuri meħuda biex jiġi kkontrollat it-tixrid tal-virus.

Skont l-OECD, 70% tal-infezzjonijiet iseħħu f'ambjenti tal-kura tas-saħħa. L-AMR tikkomprometti l-kirurġija, it-trapjanti, il-kura intensiva, u s-saħħa ta' persuni b'sistemi immunitarji mdgħajfa, bħall-pazjenti bil-kanċer, li għalihom infezzjoni sempliċi tista' tikkawża l-mewt.

It-tfal taħt it-12-il sena u l-adulti ta' aktar minn 70 sena huma l-aktar gruppi vulnerabbli. L-irġiel huma wkoll aktar suxxettibbli min-nisa biex jiżviluppaw infezzjonijiet reżistenti.

2. 100 persuna mietu mill-AMR kuljum fl-Ewropa fl-2020

Xi infezzjonijiet li kien hemm kura għalihom fil-passat saru diffiċli jew saħansitra impossibbli li jiġu kkurati. Jekk l-AMR tkompli tiżviluppa, qtugħ żgħir fil-ġilda u infezzjonijiet u kirurġija ħafifa jistgħu jsiru theddida għall-ħajja.

L-infezzjonijiet reżistenti għall-mediċini joqtlu 35 000 persuna kull sena

Din il-grafika turi l-għadd stmat ta' mwiet minħabba infezzjonijiet b'batterji reżistenti għall-antibijotiċi fl-UE u fiż-ŻEE.

Verżjoni testwali

Grafika tal-għadd ta' mwiet minħabba infezzjonijiet b'batterji reżistenti għall-antibijotiċi fl-UE u fiż-ŻEE fil-perjodu 2016-2020. L-għadd ta' mwiet jiżdied kull sena bejn l-2016 u l-2019, bi 30 730 mewt fl-2016 u 38 710 fl-2019.

Fl-2020, l-għadd ta' mwiet jonqos għal 35 813. 35 813 huwa bejn wieħed u ieħor l-għadd ta' passiġġieri li jidħlu fi 13-il bastiment tal-kruċieri.

Il-Greċja u l-Italja kellhom l-ogħla rati ta' mwiet

Din il-grafika turi l-għadd stmat ta' mwiet li jistgħu jiġu attribwiti lill-AMR għal kull 100 000 persuna skont il-pajjiż fl-2020.

Verżjoni testwali

Bar chart tan-numru ta' mwiet attribwibbli għar-reżistenza għall-antimikrobiċi għal kull 100 000 persuna fil-pajjiżi tal-UE u taż-ŻEE.

Fit-tabella, il-Greċja tispikka bħala l-pajjiż bl-ogħla rata ta' mwiet, b'20 mewta għal kull 100 000 persuna, segwita mill-Italja, b'19-il mewta għal kull 100 000 persuna.

In-Norveġja u n-Netherlands huma l-pajjiżi bl-aktar rati baxxi ta' mwiet, it-tnejn b'2 mewtiet għal kull 100 000 persuna.

Il-medja tal-UE hija ta' 6 mewtiet għal kull 100 000 persuna.

3. L-AMR hija preżenti fl-annimali, fl-ikel, fil-pjanti u fl-ambjent

L-antimikrobiċi jintużaw ukoll għat-trattament tal-bhejjem, tal-akkwakultura u tal-annimali. Jilħqu wkoll l-ambjent permezz tal-awrina u l-ħmieġ tal-bniedem u tal-annimali, ir-rimi mhux xieraq tal-mediċini u l-użu ta' demel ikkontaminat fl-agrikoltura. B'riżultat ta' dan, ir-residwi huma preżenti wkoll fil-ħamrija, fl-ilma u fil-pjanti, u dan iżid ir-riskju ta' aktar kontaminazzjoni.

Il-konsum tal-antibijotiċi fil-bnedmin issa huwa ogħla milli fl-annimali li jipproduċu l-ikel

Il-grafika ta' hawn taħt turi l-konsum tal-antimikrobiċi fl-annimali mrobbija fl-irziezet, meta mqabbel mal-bnedmin. L-użu tal-antibijotiċi fl-annimali li jipproduċu l-ikel qed jonqos.

Verżjoni testwali

Grafika lineari tal-konsum tal-antimikrobiċi fl-annimali mrobbija fl-irziezet, meta mqabbla mal-bnedmin.

L-użu tal-antibijotiċi fl-annimali li jipproduċu l-ikel jonqos minn 154.7 mg ta' ingredjent antimikrobiku attiv għal kull kg ta' bijomassa fl-2014 għal 104.8 mg fl-2018, filwaqt li l-użu fil-bnedmin jiżdied, minn 125.3 mg fl-2014 għal 131.7 fl-2018.

Għalkemm il-konsum fl-annimali qed jonqos, l-użu ħażin għadu jipperikola kemm l-annimali kif ukoll lill-bnedmin, peress li l-annimali jistgħu jittrażmettu batterji reżistenti lill-bnedmin permezz ta' kuntatt dirett jew tal-katina alimentari.

4. Il-ġlieda kontra l-batterji reżistenti tinvolvi spejjeż sostanzjali tal-kura tas-saħħa

L-ispiża stmata tal-AMR għas-sistemi tal-kura tas-saħħa fl-Ewropa hija ta' €1.1 biljun fis-sena.

Meta infezzjoni ma tirrispondix għal trattament antimikrobiku tal-ewwel linja (l-aktar għażla ta' kura effettiva u sikura għall-pazjent), il-professjonisti tal-kura tas-saħħa jirrikorru għal alternattiviogħla fil-prezz, bħal mediċini tat-tieni u t-tielet linja (l-aħħar għażliet ta' trattament disponibbli). Il-kumplikazzjonijiet jew it-tul ta' żmien itwal ta' marda jew trattament xi kultant jirrikjedu rikoveri itwal fl-isptar, bl-ispejjeż korrispondenti.

Ir-reżistenza għall-antibijotiċi tal-aħħar istanza qed tikber

Din il-grafika turi li l-AMR għall-antibijotiċi tat-tieni u t-tielet linja, użati meta l-batterji jkunu reżistenti għal antibijotiċi komuni, hija għolja u hija mistennija li tkompli tiżdied fil-pajjiżi tal-UE/taż-ŻEE. Jekk ma tittieħed l-ebda azzjoni effettiva, l-esperti jbassru li l-AMR ser tiġġenera piż ekonomiku u tas-saħħa sinifikanti.

Verżjoni testwali

Grafika lineari tar-reżistenza għall-antimikrobiċi għall-antibijotiċi tal-ewwel, it-tieni u t-tielet linja, fejn ir-reżistenza għall-antibijotiċi tal-ewwel linja hija mbassra li tonqos bi 11% fl-2050 meta mqabbla mal-2005, u r-reżistenza għall-antibijotiċi tat-tieni u t-tielet linja hija mbassra li tiżdied bi 72% u 119% rispettivament sal-2050, meta mqabbla mal-2005.

5. L-AMR tagħmel ħsara lill-ekonomija

Il-mard fit-tul u l-mortalità għandhom impatt dirett fuq l-ekonomiji tagħna. L-AMR tista' tfixkel ukoll il-kummerċ tal-bhejjem u tal-prodotti tal-bhejjem, peress li taffettwa s-saħħa u l-benessri tal-annimali u b'hekk il-produttività tagħhom.

Reżistenza akbar għall-antimikrobiċi tfisser impatt akbar fuq il-PDG globali

Din il-grafika turi t-telf ekonomiku potenzjali li jirriżulta mill-impatt tal-AMR fuq is-saħħa tal-ħaddiema u s-saħħa tal-annimali jekk ma tittieħed l-ebda azzjoni effettiva.

Verżjoni testwali

Grafika lineari dwar it-telf ekonomiku potenzjali li jirriżulta mill-impatt tar-reżistenza għall-antimikrobiċi fuq is-saħħa tal-ħaddiema u s-saħħa tal-annimali jekk ma tittieħed l-ebda azzjoni effettiva.

F'xenarju ottimist b'reżistenza baxxa għall-antimikrobiċi, il-piż ekonomiku huwa mbassar li jkun sinifikanti, b'telf globali tal-PDG ta' 1.1% fl-2050.

F'xenarju pessimist b'reżistenza għolja għall-antimikrobiċi, l-ispejjeż ekonomiċi huma mbassra li jkunu severi, b'telf globali tal-PDG ta' 3.8% fl-2050.


Ara wkoll:

L-aħħar reviżjoni: 2 ta' Ġunju 2025