Kunsill Agrikoltura u Sajd, 12 u 13 ta' Diċembru 2021

Riżultati ewlenin

Sajd

Opportunitajiet tas-sajd fl-Atlantiku, fil-Baħar tat-Tramuntana, fil-Mediterran u fil-Baħar l-Iswed għall-2022

Matul il-laqgħa ta' jumejn, l-istati membri ħadu sehem f'konsultazzjonijiet trilaterali biex jiddeterminaw l-opportunitajiet tas-sajd għall-maġġoranza tal-istokkijiet kummerċjali fl-ilmijiet tal-UE u mhux tal-UE, fil-Mediterran u fil-Baħar l-Iswed. Dawn il-konsultazzjonijiet għandhom ikomplu t-Tnejn filgħaxija sakemm jintlaħaq ftehim politiku finali dwar id-drittijiet tas-sajd għall-2022.

F'Diċembru ta' kull sena, il-Kunsill Agrikoltura u Sajd jiltaqa' biex jistabbilixxi l-limiti ta' qbid tas-sena ta' wara – magħrufa wkoll bħala qabdiet totali permissibbli (TACs) – għall-biċċa l-kbira tal-istokkijiet tal-ħut kummerċjali, flimkien ma' kwoti nazzjonali għal kull speċi bil-ħsieb li tiġi żgurata s-sostenibbiltà tal-istokkijiet tal-ħut u tas-settur tas-sajd tal-UE, kif ukoll id-dimensjonijiet ambjentali, ekonomiċi u soċjali tas-sajd. L-istokkijiet ikkonċernati huma dawk li l-UE timmaniġġa waħedha, b'mod konġunt ma' pajjiżi ġirien li mhumiex fl-UE, jew permezz ta' ftehimiet milħuqa taħt l-organizzazzjonijiet reġjonali tal-ġestjoni tas-sajd (RFMOs).

Id-deċiżjoni tal-Kunsill hija bbażata fuq proposta mfassla mill-Kummissjoni Ewropea, filwaqt li tqis l-aqwa parir xjentifiku disponibbli, l-għanijiet tal-politika komuni tas-sajd (PKS) u r-rendiment massimu sostenibbli (MSY) stabbiliti għal kull speċi.

• Proposta għal Regolament tal-Kunsill li jistabbilixxi għall-2022 l-opportunitajiet tas-sajd għal ċerti stokkijiet tal-ħut u ċerti gruppi ta' stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f'ċerti ilmijiet mhux tal-Unjoni

Agrikoltura

Pjan ta' kontinġenza għal kriżijiet għas-sigurtà tal-ikel

Il-Kunsill adotta konklużjonijiet dwar il-pjan ta' kontinġenza tal-Kummissjoni Ewropea għall-iżgurar tal-provvista tal-ikel u s-sigurtà tal-ikel fi żminijiet ta' kriżi. L-għan tal-pjan huwa t-tħejjija għal sfidi futuri potenzjali inkluż avvenimenti estremi tat-temp, kwistjonijiet tas-saħħa tal-pjanti u tal-annimali, u nuqqas ta' kontributi ewlenin bħall-fertilizzanti, l-enerġija u x-xogħol. Il-ministri laqgħu l-inizjattiva u rrikonoxxew l-importanza li wieħed jibni fuq it-tagħlimiet meħuda mill-pandemija tal-COVID-19. B'mod partikolari huma enfasizzaw l-importanza li tinżamm il-mobbiltà transkonfinali tal-persuni, l-oġġetti u l-kapital, inkluż matul żminijiet ta' kriżi.

• Il-Kunsill japprova konklużjonijiet dwar pjan ġdid għas-salvagwardja tal-provvista tal-ikel tal-Ewropa (stqarrija għall-istampa, 13 ta' Diċembru 2021)
• Konklużjonijiet tal-Kunsill dwar il-pjan ta' kontinġenza għall-iżgurar tal-provvista tal-ikel u s-sigurtà tal-ikel fi żminijiet ta' kriżi
• Komunikazzjoni tal-Kummissjoni: Pjan ta' kontinġenza għall-iżgurar tal-provvista tal-ikel u s-sigurtà tal-ikel fi żminijiet ta' kriżi

Prattiki kummerċjali inġusti fil-katina tal-provvista tal-ikel

Kien hemm dibattitu politiku dwar il-kwistjoni tal-prattiki kummerċjali inġusti (UTPs) fil-katina tal-provvista tal-ikel tal-UE. Id-diskussjoni ffukat b'mod partikolari fuq żewġ għodod ewlenin fil-livell tal-UE għall-ġlieda kontra l-UTPs fl-agrikoltura: Id-Direttiva (UE) 2019/633 u l-miżuri stabbiliti bħala parti mill-politika agrikola komuni. Abbażi tal-esperjenzi tagħhom fil-livell nazzjonali, il-ministri qasmu l-perspettivi tagħhom dwar l-effettività ta' dawn l-għodod fit-tisħiħ tal-pożizzjoni tal-bdiewa fil-katina tal-provvista.

Suġġetti oħra fuq l-aġenda

Il-Kunsill irċieva informazzjoni mill-presidenza dwar is-sitwazzjoni attwali tan-negozjati fuq ir-regolament dwar il-kontroll tas-sajd u l-inizjattiva BIOEAST; din tal-aħħar kienet ukoll is-suġġett ta' dikjarazzjoni kondiviża mid-delegazzjoni Ungeriża f'isem il-11-il stat membru tal-BIOEAST. Il-Kummissjoni aġġornat lill-ministri dwar ir-regolament propost dwar prodotti mingħajr deforestazzjoni u modi biex tittejjeb l-effettività tal-investiment pubbliku taħt il-Fond Ewropew għall-Affarijiet Marittimi, is-Sajd u l-Akkwakultura. Punti oħra mqajma mill-istati membri kienu jinkludu fratturi tal-għadam tal-karina f'tiġieġ tal-bajd (id-Danimarka), is-sostenibbiltà fil-katina tal-provvista tal-ikel (is-Slovakkja), l-esportazzjonijiet agroalimentari lejn iċ-Ċina (il-Litwanja), iż-żieda fil-prezzijiet għall-inputs agrikoli (Spanja), il-pjanijiet strateġiċi tal-PAK, u kwistjonijiet fis-settur tal-laħam tal-majjal (it-tnejn iċ-Ċekja).

• Proposta għal regolament tal-Parlament Ewropew u tal-Kunsill dwar il-kontroll tas-sajd
• Proposta għal regolament tal-Parlament Ewropew u tal-Kunsill dwar it-tqegħid għad-dispożizzjoni fis-suq tal-Unjoni kif ukoll l-esportazzjoni mill-Unjoni ta' ċerti komoditajiet u prodotti assoċjati mad-deforestazzjoni u d-degradazzjoni tal-foresti u li jħassar ir-Regolament (UE) Nru 995/2010
• Konklużjonijiet tal-Konferenza virtwali ta' livell għoli dwar il-Prospettiva tal-BIOEAST (27 ta' Settembru 2021) - informazzjoni mill-presidenza

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Dikjarazzjoni festiva konġunta tal-Ministri għall-Agrikoltura tal-Grupp ta' Visegrad (ir-Repubblika Ċeka, l-Ungerija, il-Polonja u s-Slovakkja), il-Bulgarija, il-Kroazja, l-Estonja, il-Latvja, il-Litwanja, ir-Rumanija u s-Slovenja fl-anniversarju tal-Inizjattiva BIOEAST

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Approċċ komuni biex jitnaqqas l-għadd ta' fratturi tal-għadam tal-karina f'tiġieġ tal-bajd ‒ informazzjoni mid-delegazzjoni Daniża

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• It-trasformazzjoni tal-katina tal-provvista tal-ikel lejn is-sostenibbiltà ‒ tagħlimiet meħuda mill-Kodiċi ta' Kondotta tal-UE ‒ informazzjoni mid-delegazzjoni Slovakka

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Żieda fl-ispejjeż tal-fertilizzanti u l-materja prima għall-għalf tal-annimali u l-impatt tagħhom fuq is-settur agrikolu ‒ informazzjoni mid-delegazzjoni Spanjola

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Tħejjija tal-pjanijiet strateġiċi tal-PAK u l-implimentazzjoni tar-riforma l-ġdida tal-PAK ‒ informazzjoni mid-delegazzjoni Ċeka

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Is-sitwazzjoni kritika tas-settur tal-ħnieżer fl-UE ‒ informazzjoni mid-delegazzjoni Ċeka

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN

Punti A

Il-Kunsill adotta mingħajr diskussjoni l-punti li jidhru fil-listi ta' punti A leġiżlattivi u mhux leġiżlattivi.

Statistika dwar il-biedja

Il-ministri adottaw emenda għar-Regolament (UE) 2018/1091 fir-rigward tal-kontribuzzjoni tal-Unjoni għall-istatistika integrata tal-azjendi agrikoli skont il-qafas finanzjarju 2021-2027. Dan ir-regolament għandu l-għan li jiżgura li jiżdied l-appoġġ finanzjarju lill-istati membri biex jiġbru d-data dwar l-istruttura tal-azjendi agrikoli, billi jiffissa l-pakketti finanzjarji relatati għall-perjodu 2021-2027.

Atti delegati skont il-politika agrikola komuni 2021-2027

Il-Kunsill ikkonferma l-intenzjoni tiegħu li ma jqajjimx oġġezzjonijiet għal żewġ atti delegati li jissupplimentaw id-dispożizzjonijiet tal-politika agrikola komuni (PAK) riformata. L-ewwel att jistabbilixxi rekwiżiti addizzjonali għal ċerti tipi ta' intervent speċifikati mill-istati membri fil-pjanijiet strateġiċi u r-regoli tal-PAK tagħhom dwar il-proporzjon għall-istandard 1 tal-kundizzjoni agrikola u ambjentali tajba (KAAT). It-tieni att jistabbilixxi regoli dwar l-aġenziji tal-pagamenti u korpi oħra, il-ġestjoni finanzjarja, l-approvazzjoni tal-kontijiet, il-garanziji u l-użu tal-euro.