"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (suq intern u industrija), 24 ta' Frar 2022, 24 ta' Frar 2022
Riżultati ewlenin
L-ekosistema industrijali tal-mobbiltà
Il-ministri kellhom dibattitu dwar il-ġejjieni tal-ekosistema industrijali tal-mobbiltà fil-kuntest tat-tranżizzjoni ekoloġika.
Id-dekarbonizzazzjoni tal-mezzi tagħna ta' trasport hija fundamentali biex niġġieldu l-problemi marbutin mal-klima. F’dan il-kuntest, jeħtieġ li nantiċipaw l-impatt tal-Patt Ekoloġiku u l-programm "Lesti għall-mira ta’ 55 %" fuq it-trasport, pereżempju is-settur tal-karozzi, tal-ferroviji u tal-ajru. Dan għaliex dawn it-testi ser jimplikaw trasformazzjonijiet straordinarjament profondi tal-ktajjen ta’ produzzjoni tagħna u tal-ħtiġijiet ta’ ħiliet tagħna. Dan jista' jinkiseb biss permezz ta’ appoġġ u investiment sostanzjali. Nixtiequ jkollna l-ewwel fehmiet tal-pajjiżi Ewropej dwar l-indikaturi u l-għodod li għandna bżonn nużaw biex inwettqu dawn it-trasformazzjonijiet.
Agnès Pannier-Runacher, ministru delegata ta' Franza responsabbli mill-Industrija
L-istati membri appoġġaw il-fatt li l-Kunsill Kompetittività għandu jaqdi rwol importanti biex jiggwida d-diversi politiki mmirati biex iħaffu t-tranżizzjoni ekoloġika tal-Unjoni Ewropea, fid-dawl tal-isfidi industrijali relatati.
Il-ministri indirizzaw l-isfidi speċifiċi li t-tranżizzjoni għall-implimentazzjoni tal-pakkett “aġġustament għall-55” toħloq għall-industriji tal-mobbiltà. Huma ddiskutew l-istima tagħhom tal-iskala u l-ispiża tat-tranżizzjoni ekoloġika tal-mobbiltà, u wkoll il-vantaġġi dejjiema tagħha u l-azzjonijiet meħtieġa biex jappoġġaw din it-tranżizzjoni.
Il-presidenza ssoktat id-diskussjonijiet li kienu saru fil-laqgħa informali tal-ministri għall-industrija fil-31 ta’ Jannar u l-1 ta’ Frar f’Lens (Franza). Il-ministri setgħu jaqsmu l-fehmiet tagħhom dwar kif jistgħu jiġu żgurati il-provvisti, interni u esterni, ta’ materja prima kritika għall-industrija Ewropea sabiex tissaħħaħ l-awtonomija strateġika tal-Unjoni.
Il-presidenza fakkret li kien essenzjali li jsir progress fuq tliet assi: (i) l-iżgurar tal-provvisti barra mill-Unjoni Ewropea, (ii) l-iżvilupp tar-riċiklaġġ u tal-innovazzjoni, biex jittejjeb il-konsum tal-materja prima u tinżamm il-materja prima li diġà qiegħda fl-Ewropa, u (iii) il-ħolqien ta’ qafas għall-estrazzjoni fl-Ewropa.
Sussidji barranin
Il-ministri kellhom dibattitu ta’ orjentazzjoni dwar ir-regolament dwar is-sussidji barranin li jfixklu s-suq intern.
Kompetizzjoni ġusta, mingħajr distorsjoni minn sussidji barranin, hija kondizzjoni meħtieġa għall-kompetittività tal-kumpaniji tagħna u għas-sostenibbiltà tal-proġetti industrijali Ewropej li jikkontribwixxu għat-tisħiħ tal-awtonomija strateġika tagħna. Din il-proposta hija għalhekk element ewlieni fl-implimentazzjoni tal-istrateġija industrijali Ewropea tagħna.
Agnès Pannier-Runacher, ministru delegata ta' Franza responsabbli mill-industrija
L-għan ta’ din il-proposta huwa li tindirizza d-distorsjonijiet maħluqa fis-suq uniku minn sussidji mogħtija mill-awtoritajiet pubbliċi ta’ pajjiżi terzi lil kumpaniji li jwettqu attività ekonomika fl-Unjoni Ewropea.
Il-ministri qablu li s-sussidji mħallsa minn pajjiżi terzi jeħtieġ li jiġu sorevljati bl-istess mod bħas-sussidji tal-istati membri. Diversi ministri appoġġaw lill-Kummissjoni Ewropea bħala l-uniku korp li għandu s-setgħa li jinforza r-regolament, filwaqt li xi wħud enfasizzaw il-ħtieġa għal rwol aktar attiv għall-istati membri fl-implimentazzjoni ta' dan ir-regolament.
Pakkett dwar is-semikondutturi (Att dwar iċ-Ċipep)
Il-Kummissjoni ppreżentat fil-qosor lill-ministri l-pakkett dwar is-semikondutturi, jew l-"Att dwar iċ-Ċipep", li ġie ppubblikat fit-8 ta’ Frar.
Peress li l-industrija tas-semikondutturi hija ferm importanti għall-ekonomija Ewropea, dan is-suġġett ser jerġa’ jkun fuq l-aġenda ta’ laqgħa li jmiss tal-Kunsill Kompetittività.
Rappurtar Korporattiv dwar is-Sostenibbiltà (CSRD)
Il-Kunsill unanimament/b’maġġoranza kbira adotta approċċ ġenerali għad-Direttiva proposta dwar ir-Rappurtar Korporattiv dwar is-Sostenibbiltà (CSRD).
L-adozzjoni, fuq l-inizjattiva tal-presidenza Franċiża, ta’ pożizzjoni komuni mill-istati membri dwar dan it-test tirrappreżenta pass kbir ’il quddiem għat-tranżizzjoni ekoloġika tan-negozji tagħna. Dan huwa pass ieħor lejn kapitaliżmu aktar responsabbli. L-Ewropa ser isservi bħala punt ta’ referenza għall-istandards mhux finanzjarji fil-futur.
Olivia Grégoire, segretarju tal-istat Franċiż għall-ekonomija soċjali, is-solidarjetà u r-responsabbiltà.
Il-proposta għandha l-għan li tindirizza n-nuqqasijiet fir-regoli eżistenti dwar id-divulgazzjoni ta’ informazzjoni mhux finanzjarja, li ma għandhomx livell adegwat ta' kwalità u komparabbiltà, biex ikunu jistgħu jitqiesu kif xieraq mill-investituri.
Dawn in-nuqqasijiet ixekklu t-tranżizzjoni għal ekonomija sostenibbli. Barra minn hekk iż-żieda fit-talbiet għal data li attwalment mhumiex armonizzati toħloq piż kbir għan-negozji li jeħtieġ jiġi ssimplifikat.
Il-presidenza pprovdiet informazzjoni dwar is-sitwazzjoni attwali tal-eżami tal-proposta tal-Kummissjoni għal ċarġer komuni għat-tagħmir tar-radju. B’mod partikolari, infurmat lill-ministri dwar il-mandat ta’ negozjar adottat mill-Kumitat tar-rappreżentanti permanenti tal-Kunsill fis-26 ta’ Jannar.
Il-presidenza spjegat li, minħabba l-impatt dirett fuq il-kumdità ta’ kuljum tal-konsumaturi Ewropej kif ukoll fuq it-tnaqqis tal-iskart elettroniku, il-rpresidenza ser tagħmel kull sforz biex tavvanza d-diskussjonijiet kemm jista’ jkun.
Governanza korporattiva sostenibbli u d-diliġenza dovuta
Il-Kummissjoni Ewropea ppreżentat lill-ministri l-proposta dwar il-governanza korporattiva sostenibbli u d-diliġenza dovuta.
Din il-proposta ġiet adottata fit-23 ta’ Frar 2022. Din għandha l-għan li tgħin lill-kumpaniji jimmaniġġjaw aħjar il-kwistjonijiet ta’ sostenibbiltà fl-operazzjonijiet u l-ktajjen tal-valur tagħhom, inkluż id-drittijiet soċjali u tal-bniedem, it-tibdil fil-klima u l-ambjent.
color: inherit;
Il-Kummissjoni Ewropea pprovdiet informazzjoni dwar l-istrateġija tal-UE għall-istandardizzazzjoni.Din l-istrateġija hija għodda ewlenija għas-suq intern, it-tranżizzjoni diġitali u ambjentali u, b’mod aktar ġenerali, għall-kompetittività Ewropea fuq skala globali.
Il-Kummissjoni Ewropea ppreżentat ukoll ir-rapport annwali tagħha dwar is-suq uniku. Dan ir-rapport jippreżenta l-istat tas-suq unik, filwaqt li jagħti attenzjoni partikolari lill-irkupru ekonomiku mill-kriżi tal-COVID-19 u jidentifika l-ħtiġijiet ta’ investimenti li jagħmlu s-suq uniku aktar reżiljenti. Il-Kummissjoni Ewropea ppreżentat ukoll ir-rapport dwar id-dipendenzi.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Id-dekarbonizzazzjoni tal-mezzi tagħna ta' trasport hija fundamentali biex niġġieldu l-problemi marbutin mal-klima. F’dan il-kuntest, jeħtieġ li nantiċipaw l-impatt tal-Patt Ekoloġiku u l-programm "Lesti għall-mira ta’ 55 %" fuq it-trasport, pereżempju is-settur tal-karozzi, tal-ferroviji u tal-ajru. Dan għaliex dawn it-testi ser jimplikaw trasformazzjonijiet straordinarjament profondi tal-ktajjen ta’ produzzjoni tagħna u tal-ħtiġijiet ta’ ħiliet tagħna. Dan jista' jinkiseb biss permezz ta’ appoġġ u investiment sostanzjali. Nixtiequ jkollna l-ewwel fehmiet tal-pajjiżi Ewropej dwar l-indikaturi u l-għodod li għandna bżonn nużaw biex inwettqu dawn it-trasformazzjonijiet.
L-adozzjoni, fuq l-inizjattiva tal-presidenza Franċiża, ta’ pożizzjoni komuni mill-istati membri dwar dan it-test tirrappreżenta pass kbir ’il quddiem għat-tranżizzjoni ekoloġika tan-negozji tagħna. Dan huwa pass ieħor lejn kapitaliżmu aktar responsabbli. L-Ewropa ser isservi bħala punt ta’ referenza għall-istandards mhux finanzjarji fil-futur.