"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ekonomiċi u Finanzjarji, 21 ta' Jannar 2025
Riżultati ewlenin
Programm ta' ħidma tal-Presidenza
Il-presidenza Pollakka ppreżentat il-programm ta' ħidma tagħha għall-ewwel semestru tas-sena bit-tema "Sigurtà, Ewropa!"
Wasal iż-żmien li jiġi żgurat li l-Unjoni tkun sigura u kompetittiva. Dan huwa partikolarment importanti f'ambjent li qed jinbidel globalment. Mingħajr ekonomija kompetittiva mhux ser ikollna Ewropa b'saħħitha. Jeħtieġ li nbaxxu l-prezzijiet tal-enerġija, nissimplifikaw radikalment l-ambjent tan-negozju u niżguraw li aktar kapital privat qed jidħol fl-ekonomija Ewropea. U l-aħħar iżda mhux l-inqas, jeħtieġ li ninvestu aktar fil-kapaċitajiet u t-tħejjija tad-difiża tagħna.
Andrzej Domanski, Ministru għall-Finanzi tal-Polonja
Taħt il-presidenza Pollakka, id-direzzjoni ewlenija tal-ħidma tal-Kunsill Affarijiet Ekonomiċi u Finanzjarji ser tkun li tiġi indirizzata l-isfida tat-tnaqqis fil-kompetittività tal-UE.
L-aktar oqsma importanti li fuqhom ser tiffoka l-presidenza huma s-simplifikazzjoni tas-suq uniku biex tissaħħaħ il-kompetittività tal-ekonomija Ewropea, il-ħidma fuq l-aspetti finanzjarji tat-tisħiħ tal-kapaċitajiet ta' difiża tal-UE u l-appoġġ lill-Ukrajna.
Il-presidenza Pollakka ser tibqa' impenjata li tiżgura appoġġ sostnut għall-Ukrajna u li tavvanza t-tħejjijiet biex tiffinanzja l-isforzi ta' rikostruzzjoni tagħha.
Il-ministri ħadu sehem f'dibattitu ta' orjentazzjoni dwar l-iżgurar ta' ambjent kummerċjali kompetittiv fuq livell globali fl-Ewropa permezz tas-simplifikazzjoni, anqas burokrazija u tnaqqis tal-piż regolatorju.
Il-ministri appoġġaw bil-qawwa l-prospett li jitnaqqsu u jiġu ssimplifikati r-rekwiżiti ta' rappurtar għan-negozji u esprimew impenn kondiviż għal passi sinifikanti lejn simplifikazzjoni regolatorja għall-kumpaniji, bħala mod effettiv biex tittejjeb il-kompetittività tal-ekonomija tal-UE.
Il-ministri stennew b'interess il-proposta ppjanata tal-Kummissjoni għal "pakkett ta' simplifikazzjoni Omnibus" li għandu l-għan li jissimplifika u jnaqqas il-piż regolatorju fuq in-negozji.
L-aggressjoni tar-Russja kontra l-Ukrajna
Il-ministri ddiskutew is-sitwazzjoni attwali tal-impatt ekonomiku u finanzjarju tal-aggressjoni tar-Russja kontra l-Ukrajna fil-preżenza tal-Ministru għall-Finanzi tal-Ukrajna Sergii Marchenko.
Il-Kummissjoni infurmat dwar is-sitwazzjoni ekonomika u baġitarja fl-Ukrajna, inkluż dwar l-implimentazzjoni tal-Faċilità għall-Ukrajna u l-implimentazzjoni tal-ftehim tal-G7 dwar self ta' $50 biljun (€45 biljun) lill-Ukrajna li għandu jiġi sservizzjat u mħallas lura minn flussi futuri ta' dħul straordinarju li jirriżulta mill-immobilizzazzjoni ta' assi sovrani Russi.
Il-Kunsill adottat rakkomandazzjonijiet rigward il-pjanijiet fiskali-strutturali fuq terminu medju ta' 21 stat membru fil-kuntest tal-implimentazzjoni tal-qafas ta' governanza ekonomika: Ċipru, ir-Repubblika Ċeka, id-Danimarka, l-Estonja, il-Finlandja, Franza, il-Greċja, l-Irlanda, l-Italja, il-Kroazja, il-Latvja, il-Lussemburgu, Malta. in-Netherlands, il-Polonja, il-Portugall, ir-Rumanija, is-Slovakkja, is-Slovenja, Spanja u l-Iżvezja.
Il-Kunsill adotta wkoll rakkomandazzjonijiet għal seba' stati membri li bħalissa jinsabu taħt proċedura ta' defiċit eċċessiv biex jieħdu azzjoni effettiva biex jikkoreġu d-defiċit tagħhom f'perjodu ta' żmien definit. Dawn il-pajjiżi huma l-Belġju, Franza, l-Italja, Malta, il-Polonja, is-Slovakkja u r-Rumanija.
Ir-rakkomandazzjonijiet skont il-proċedura ta' defiċit eċċessiv fihom perkors baġitarju korrettiv u skadenza għal kull stat membru. Il-perkorsi baġitarji fil-pjanijiet fiskali-strutturali fuq terminu medju u dawk taħt il-proċedura ta' defiċit eċċessiv huma allinjati.
Filwaqt li tmexxi 'l quddiem il-ħidma fuq is-Semestru Ewropew 2025, il-Kummissjoni ppreżentat ir-Rapport dwar il-Mekkaniżmu ta' Twissija tal-2025 u l-abbozz ta' rakkomandazzjoni tal-Kunsill dwar il-politika ekonomika taż-żona tal-euro.
Il-Kunsill adotta deċiżjonijiet ta' implimentazzjoni li japprovaw emendi mmirati ppreżentati minn Ċipru, il-Greċja u Spanja għall-pjanijiet tagħhom għall-irkupru u r-reżiljenza.
Taħt punti mingħajr diskussjoni, il-Kunsill ħatar lis-Sa Bruna Szego bħala l-President tal-Awtorità għall-Ġlieda Kontra l-Ħasil tal-Flus. Il-Kunsill adotta regolament dwar l-Ispazju Ewropew tad-Data dwar is-Saħħa.
Dokumenti tal-laqgħat
Dokumenti ta' tħejjija
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
