"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ekonomiċi u Finanzjarji, 13 ta' Mejju 2025
Riżultati ewlenin
SAFE
Il-Kunsill kellu dibattitu ta' orjentazzjoni dwar l-istrument propost ta' Azzjoni għas-Sigurtà tal-Ewropa (SAFE). Il-ministri enfasizzaw il-ħtieġa urġenti li tiġi appoġġata l-industrija tad-difiża Ewropea u ddiskutew l-aspetti baġitarji u ekonomiċi tal-assistenza finanzjarja pprovduta mill-istrument SAFE.
Jeħtieġ li nirrilaxxaw €150 biljun f'self attraenti għall-investiment fid-difiża bħala kwistjoni ta' prijorità. Il-presidenza Pollakka għandha l-għan li tadotta r-regolament SAFE malajr kemm jista' jkun. Is-sigurtà ma tistax tinxtara, trid tinbena!
Andrzej Domanski, Ministru għall-Finanzi tal-Polonja
SAFE huwa strument finanzjarju ġdid li jgħin lill-istati membri jżidu n-nefqa fuq l-akkwist komuni fil-qasam tad-difiża permezz ta' assistenza finanzjarja ta' mhux iktar minn €150 biljun f'self lill-istati membri.
Dan l-approċċ għall-akkwist komuni ser ikun ta' benefiċċju kemm għall-istati membri kif ukoll għall-industrija, peress li ser jgħin biex jiżdiedu l-ekonomiji ta' skala, jitnaqqsu l-ispejjeż u tissaħħaħ l-interoperabbiltà tas-sistemi u l-komponenti.
Il-proposta bħalissa qed tiġi diskussa fil-korpi preparatorji tal-Kunsill. Il-presidenza għandha l-għan li l-proposta tiġi adottata malajr kemm jista' jkun.
Il-Kunsill laħaq approċċ ġenerali dwar id-direttiva dwar ir-regoli tal-VAT għall-bejgħ mill-bogħod ta' oġġetti importati u t-taxxa fuq il-valur miżjud (VAT) fuq l-importazzjoni. Il-Kunsill issa ser jikkonsulta lill-Parlament Ewropew dwar it-test qabel ma jadottah formalment.
Ir-regoli l-ġodda ser itejbu l-ġbir tal-VAT fuq oġġetti importati billi jagħmlu lill-fornituri responsabbli għall-VAT imħallsa fuq l-importazzjoni. Dan ser jagħtihom inċentiv ieħor biex jużaw il-punt uniku ta' servizz għall-importazzjonijiet (IOSS) tal-VAT għall-obbligi kollha tal-VAT.
Il-portal tal-IOSS iservi bħala punt ta' kuntatt għall-importazzjoni ta' oġġetti minn pajjiżi terzi fl-Unjoni Ewropea. L-għan tiegħu huwa li jissimplifika d-dikjarazzjoni u l-ħlas tat-taxxa fuq il-valur miżjud meta jiġu importati oġġetti fl-UE.
Il-ministri ddiskutew il-kompetittività u s-simplifikazzjoni regolatorja u kif jista' jittejjeb l-ambjent tan-negozju tal-Ewropa. Il-fokus ta' dan il-punt tal-aġenda kien fuq l-unjoni tat-tfaddil u tal-investimenti (SIU). Il-Kummissjoni adottat l-istrateġija għall-SIU fid-19 ta' Marzu 2025. L-istrateġija hija parti mill-isforzi tal-UE biex issaħħaħ il-kompetittività tagħha u trawwem it-tkabbir ekonomiku billi timmobilizza l-kapital privat.
Fil-laqgħa tal-lum il-Kummissjoni ppreżentat l-SIU lill-ministri li kellhom skambju ta' fehmiet dwar l-istrateġija. Il-ministri qablu mal-objettiv tal-SIU li jiġi mobilizzat il-kapital privat. L-importanza tat-tlestija tas-suq uniku għall-kapital ġiet enfasizzata bħala rekwiżit biex dawn is-sorsi ta' finanzjament privat jiġu sfruttati u diretti lejn investimenti produttivi fl-UE.
Il-ministri qasmu l-fehmiet tagħhom dwar is-sitwazzjoni attwali tal-impatt ekonomiku u finanzjarju tal-aggressjoni tar-Russja kontra l-Ukrajna. Dan huwa punt rikorrenti fuq l-aġenda tal-ministri għall-finanzi u l-affarijiet ekonomiċi. Il-fokus tal-iskambju, ibbażat fuq preżentazzjoni tas-Stockholm Institute of Transition Economics, kien fuq is-sitwazzjoni reali tal-ekonomija tar-Russja.
Il-Kummissjoni tat ukoll aġġornament dwar l-implimentazzjoni tal-appoġġ tal-UE lill-Ukrajna. Faċilità ddedikata għall-Ukrajna toffri sa €50 biljun f'appoġġ finanzjarju stabbli u prevedibbli mill-2024 sal-2027. L-UE tipprovdi wkoll self ta' €18.1 biljun f'Assistenza Makrofinanzjarja (AMF) bħala parti minn inizjattiva tal-UE u tal-G7 ta' €45 biljun, li hu mistenni li jitħallas lura mid-dħul li jirriżulta mill-immobilizzazzjoni tar-riżervi tal-Bank Ċentrali tar-Russja fl-UE.
Il-presidenza u l-Kummissjoni għarrfu lill-Kunsill dwar l-eżiti ewlenin tal-laqgħa tal-Ministri għall-Finanzi u l-Gvernaturi tal-Banek Ċentrali tal-G20, li saret fit-23 u l-24 ta' April, u l-laqgħat tar-rebbiegħa tal-FMI/Grupp tal-Bank Dinji.
Il-Kunsill adotta deċiżjonijiet ta' implimentazzjoni li japprovaw emendi mmirati ppreżentati min-Netherlands, il-Portugall, is-Slovakkja u Spanja għall-pjanijiet għall-irkupru u r-reżiljenza (RRP) tagħhom. Dawn il-pjanijiet jippermettu lill-istati membri jibbenefikaw mill-RRF - il-programm tal-UE ta' appoġġ finanzjarju fuq skala kbira b'rispons għall-isfidi li ħolqot il-pandemija tal-COVID-19 għall-ekonomija Ewropea.
Sal-lum, l-UE żborżat aktar minn €311 biljun mill-faċilità lill-istati membri.
Fil-marġini tal-laqgħa tal-Kunsill sar djalogu ekonomiku u finanzjarju annwali mas-sħab reġjonali.
Il-presidenza attwali u t-tnejn li jmiss (il-Polonja, id-Danimarka u Ċipru) kif ukoll il-Kummissjoni, il-BĊE, is-sħab tal-Balkani tal-Punent, it-Turkija, il-Moldova u l-Ukrajna bħala osservatur iddiskutew l-iżviluppi ekonomiċi, l-isfidi u l-pjanijiet ta' politika.
Il-parteċipanti tad-djalogu adottaw konklużjonijiet konġunti bi gwida politika mmirata għal kull sieħeb parteċipanti.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
