Kunsill Edukazzjoni, Żgħażagħ, Kultura u Sport, 17/02/2017, 17 ta' Frar 2017

Riżultati ewlenin (kwistjonijiet fil-qasam tal-edukazzjoni)

Il-Kunsill adotta konklużjonijiet fir-rigward tal-investiment fiż-żgħażagħ tal-Ewropa, b’attenzjoni partikolari għall-Korp Ewropew ta’ Solidarjetà. Il-konklużjonijiet jipprovdu rispons politiku għall-inizjattiva ta’ Diċembru tal-Kummissjoni fir-rigward taż-Żgħażagħ, li pproponiet pakkett ta’ miżuri bil-għan li jtejbu l-ħiliet u l-opportunitajiet taż-żgħażagħ sabiex jiġi indirizzat il-qgħad fost iż-żgħażagħ u tiżdied il-parteċipazzjoni taż-żgħażagħ u l-mobbiltà fit-tagħlim.

Il-pakkett jinkludi komunikazzjoni dwar il-Korp Ewropew ta’ Solidarjetà li għandu l-għan li jippermetti li aktar żgħażagħ jieħdu sehem f’firxa wiesgħa ta’ attivitajiet ta’ solidarjetà. Dan jista’ jsir permezz ta’ xogħol volontarju jew permezz ta’ impjieg, traineeship jew apprendistat b'appoġġ għal organizzazzjoni nongovernattiva (NGO), awtorità lokali jew kumpanija privata attiva fl-indirizzar ta’ sitwazzjonijiet diffiċli fl-Unjoni Ewropea kollha. Iż-żgħażagħ kollha ser ikunu jistgħu jipparteċipaw, irrispettivament mill-isfond, l-edukazzjoni, il-livell ta’ ħiliet, jew kwalunkwe diżabilità tagħhom.

Il-ministri ddiskutew ukoll il-kontribut li l-edukazzjoni u t-taħriġ jistgħu jagħtu għall-koeżjoni soċjali u l-promozzjoni ta’ valuri komuni Ewropej fil-qafas tas-Semestru Ewropew 2017.

B’mod partikolari, il-ministri indirizzaw miżuri possibbli biex jittaffew l-inugwaljanzi fl-edukazzjoni minħabba d-disparitajiet soċjoekonomiċi, kif urew ir-riżultati tal-PISA tal-2015. Qiesu wkoll kif il-programmi ta' edukazzjoni u taħriġ ipprovduti mill-istati membri tal-UE jistgħu jittejbu permezz tal-istabbiliment ta’ objettivi nazzjonali u Ewropej.

Il-ministri enfasizzaw li l-linji ta' politika dwar l-edukazzjoni għandhom rwol fundamentali fil-promozzjoni tal-inklużjoni u r-rispett għad-diversità fl-Unjoni Ewropea u li l-valuri fundamentali tal-UE u l-mudell edukattiv Ewropew għandhom jiġu ppreservati. L-iżgurar ta' edukazzjoni inklużiva ta' kwalità għolja għandu jitqies ukoll f'perspettiva ta' tagħlim tul il-ħajja li jkopri l-aspetti kollha tal-edukazzjoni.

“It-titjib tas-sistemi tagħna tal-edukazzjoni u t-taħriġ huwa kruċjali, mhux biss għaliex dan jista’ jiġġenera benefiċċji ekonomiċi u jnaqqas il-qgħad, iżda wkoll peress li jippromovi l-mobbiltà soċjali u jibqa’ wieħed mill-aħjar mezzi għall-prevenzjoni tal-esklużjoni soċjali. L-edukazzjoni ma tistax tagħmel kollox waħedha, teħtieġ appoġġ ekonomiku, soċjali u finanzjarju.”

Evarist Bartolo, Ministru għall-Edukazzjoni u x-Xogħol ta’ Malta