Kunsill Edukazzjoni, Żgħażagħ, Kultura u Sport, 21-22/11/2016, 21 u 22 ta' Novembru 2016

Riżultati ewlenin

21 ta' Novembru 2016

Żgħażagħ

Il-Kunsill adotta konklużjonijiet dwar il-promozzjoni ta' approċċi ġodda fil-ħidma fost iż-żgħażagħ. Il-ħidma fost iż-żgħażagħ tista' tgħin liż-żgħażagħ jiżviluppaw kompetenzi, ħiliet u attitudnijiet pożittivi.

Il-konklużjonijiet jenfasizzaw l-importanza tagħha biex jintlaħqu żgħażagħ minn ambjenti differenti, inkluż żgħażagħ marġinalizzati u żvantaġġati, lil hinn mill-istrutturi formali. Jappellaw ukoll għall-użu ta' għodod innovattivi fil-prattika tal-ħidma fost iż-żgħażagħ fl-oqsma tal-edukazzjoni u t-taħriġ, l-isport u l-kultura, is-servizzi soċjali, l-informazzjoni u t-teknoloġiji tal-kommunikazzjoni.

Il-ministri kellhom ukoll skambju ta' fehmiet dwar kif tista' tinħoloq rabta mill-ġdid bejn iż-żgħażagħ u l-proġett Ewropew, bħala segwitu għad-dibattiti fis-summit informali ta' Bratislava f'Settembru.

"Iż-żgħażagħ huma atturi importanti fis-soċjetajiet tal-lum. Hemm bżonn li nżommulhom moħħhom miftuħ, li jkollhom akkomunament globali u li jkunu lesti jaġixxu bħala voluntiera għall-Ewropa. Bħala kumpens, għandna nipprovdulhom prospetti promettenti. Madanakollu, bħala parti mix-xejra ġenerali kontra l-istabbiliment, iż-żgħażagħ qed iħossuhom aktar maqtugħin u skomdi bil-proġett tal-Unjoni Ewropea. Illum, ħejjejna messaġġi ewlenin għall-mexxejja tagħna Ewropej, wara s-summit ta' Bratislava ta' Settembru 2016, bi sforz biex nerġgħu nibnu l-fiduċja mal-ġenerazzjoni żagħżugħa."

Peter Plavčan, il-Ministru Slovakk għall-Edukazzjoni, ix-Xjenza, ir-Riċerka u l-Isport

Edukazzjoni

Il-Kunsill adotta riżoluzzjoni dwar Aġenda Ġdida għall-Ħiliet li tenfasizza l-aspetti ewlenin li ser jiggwidaw il-ħidma tal-Kunsill f'dan il-qasam, bħala tweġiba għall-komunikazzjoni tal-Kummissjoni dwar l-importanza strateġika tal-ħiliet biex isostnu l-impjiegi, it-tkabbir, u l-kompetittività.

Din tkopri oqsma bħall-iżvilupp tal-ħiliet, ir-rikonoxximent reċiproku ta' kwalifiki, l-appoġġ sew għall-edukazzjoni u t-taħriġ vokazzjonali u l-edukazzjoni għolja, kif ukoll modi kif jiġi esplorat il-potenzjal sħiħ tal-ekonomija diġitali, bil-għan li jiġi promoss 'investiment tul il-ħajja fil-persuni'.

Il-Kunsill laħaq ukoll qbil politiku dwar rakkomandazzjoni dwar Opportunitajiet Ġodda għall-Adulti, fil-qafas tal-Garanzija ta' Ħiliet proposta mill-Kummissjoni. Hija għandha l-għan li tipprovdi opportunitajiet għal adulti b'livell baxx ta' ħiliet biex jakkwistaw sett ta' ħiliet, għarfien u kompetenzi rilevanti għas-suq tax-xogħol u l-parteċipazzjoni attiva fis-soċjetà.

Il-Kunsill adotta konklużjonijiet dwar il-prevenzjoni tar-radikalizzazzjoni li twassal għal estremiżmu vjolenti, li huma f'waqthom ħafna fil-kuntest tal-ewwel anniversarju mill-attakki terroristiċi ta' Pariġi.

Huma jenfasizzaw il-ħtieġa li l-ideoloġiji estremisti vjolenti eżistenti jiġu mxekkla u sfidati u li jiġu kkuntrastati b'alternattivi attraenti li mhumiex vjolenti u li l-ġenituri, l-ulied, il-ħaddiema żgħażagħ pari u oħrajn li għandhom kuntatt ma' żgħażagħ li qegħdin fir-riskju ta' radikalizzazzjoni vjolenti jiġu appoġġati.

Jenfasizzaw ukoll il-ħtieġa li jiġu involuti u jkun hemm kooperazzjoni mal-fornituri ta' servizzi fil-ġlieda kontra d-diskors ta' mibegħda illegali online, b'rispett sħiħ għal-libertà ta' espressjoni, fid-dawl tar-rwol tal-mezzi ta' komunikazzjoni soċjali bħala mezz ewlieni għall-immirar, is-solleċitazzjoni u l-attivazzjoni ta' persuni potenzjalment radikali biex iwettqu reati vjolenti.

"Għadna kif fakkarna l-anniversarju ta' niket tal-attakki ta' Pariġi fejn intilfu tant ħajjiet innoċenti u inkissru tant familji. Il-ġlieda kontra r-radikalizzazzjoni u l-estremiżmu vjolenti jibqgħu importanti fl-aġenda tagħna. Huwa evidenti li kull livell ta' governanza għandu jiġi involut fil-ġlieda kontrihom. Illum il-Kunsill qabel li jiffoka fuq miżuri preventivi bħall-edukazzjoni, l-attivitajiet volontarji u kulturali u l-ħidma fost iż-żgħażagħ. Jistgħu jiġu kkunsidrati "ġentili", iżda jekk jiġu addottati b'mod mifrux u vigoruż, jistgħu fil-fatt jipproteġu s-soċjetajiet liberali tagħna".

Peter Plavčan, il-Ministru Slovakk għall-Edukazzjoni, ix-Xjenza, ir-Riċerka u l-Isport

22 ta' Novembru 2016

Kultura u l-awdjoviżiv

Il-Kunsill ħa nota ta' rapport ta' progress fil-proposta għal direttiva riveduta dwar servizzi tal-media awdjoviżiva (AVMS). Il-proposta għandha l-għan li tallinja d-direttiva AVMS aħjar mal-era diġitali, b'kont meħud tal-pass mgħaġġel tal-progress teknoloġiku, il-ħolqien ta' mudelli ġodda ta' negozju u t-tendenzi tal-konsum li qed jinbidlu.

Il-kwistjonijiet maġġuri li għadhom qed jiġu diskussi fil-Kunsill huma l-estensjoni tal-kamp ta' applikazzjoni tad-direttiva għall-pjattaformi għall-iskambju tal-vidjos u sa fejn għandhom jiġu rregolati, ir-regoli kwantitattivi dwar ir-reklamar televiżiv, l-obbligazzjonijiet għall-fornituri ta' servizzi on-demand biex jiġu promossi x-xogħlijiet Ewropej, l-allinjament tar-regoli bejn is-servizzi lineari u dawk on-demand, il-prinċipju tal-pajjiż tal-oriġini, u r-rwol ta' korp Ewropew ta' regolaturi nazzjonali (ERGA).

"Il-bidliet fl-ekosistema tas-Servizzi tal-Media Awdjoviżiva kellhom bżonn reviżjoni tad-direttiva AVMS sabiex tkun adatta għall-era l-ġdida diġitali. Wieħed mill-għanijiet tagħha huwa li l-industrija tal-media Ewropea tibqa' ta' suċċess. Jeħtieġ li l-Ewropa jkollha suq uniku kompetittiv għall-kontenut awdjoviżiv li jiffaċilita l-provvista, ilaħħaq mad-domanda tal-udjenza, tkun fejn tkun, u li jiżgura kundizzjonijiet ugwali għall-fornituri kollha. Fl-istess ħin, jeħtieġ li nżommu l-objettivi ta' ordni pubbliku tagħna tal-protezzjoni tal-minuri, il-promozzjoni tax-xogħlijiet Ewropej u l-ġlieda kontra d-diskors ta' mibegħda. Il-Presidenza tagħna għamlet progress konsiderevoli fuq il-proposta l-ġdida u ninsabu kburin li ngħadduha lill-Presidenza Maltija".

Marek Maďrič, il-Ministru Slovakk għall-Kultura u President tal-Kunsill

Il-Kunsill adotta approċċ ġenerali fir-rigward tad-deċiżjoni dwar Sena Ewropea tal-Wirt Kulturali (2018). L-għan ġenerali ta' din l-inizjattiva huwa li titkattar is-sensibilizzazzjoni dwar ir-rikkezza tal-wirt kulturali Ewropew u l-opportunitajiet li tista' toffri u li taqsam il-valuri u l-ideali Ewropej inkorporati fil-wirt kulturali. Fl-istess ħin, tipprova li tinġibed l-attenzjoni lejn l-isfidi li qed jiffaċċa l-wirt kulturali.

"Il-wirt kulturali Ewropew huwa l-ġojjell li jixraqlu li jidher u li jkun maħbub fl-Ewropa kollha. Għaldaqstant il-presidenza tagħna għamlet sforzi biex twitti t-triq kemm jista' jkun malajr biex is-Sena Ewropea tal-Wirt Kulturali ssir fl-2018. Ninsabu kuntenti li llum fil-Kunsill qbilna dwar approċċ ġenerali dwar din id-deċiżjoni importanti li ser terġa' tpoġġi għal darba oħra l-Wirt kulturali fiċ-ċentru tal-attenzjoni. L-appoġġ unanimu tal-istati membri juri b'mod ċar kemm din id-deċiżjoni hija f'waqtha. Issa nistgħu nibdew in-negozjati mal-Parlament Ewropew."

Marek Maďrič, il-ministru Slovakk għall-Kultura u President tal-Kunsill

L-iżvilupp ta' approċċ strateġiku fir-relazzjonijiet kulturali internazzjonali issa ilu xi ftit li sar ta' prijorità għall-Kunsill. Il-ministri iddiskutew kif l-UE u l-istati membri tagħha jistgħu jikkooperaw b'mod effettiv biex jinkiseb approċċ aktar strateġiku u globali f'dan il-qasam.

Sport

Il-Kunsill adotta konklużjonijiet dwar id-diplomazija bl-isport li jirreferu għall-użu tal-isport bħala mezz biex jiġu influwenzati r-relazzjonijiet diplomatiċi, interkulturali, soċjali, ekonomiċi u politiċi. Din il-kwistjoni ġiet indirizzata wkoll fil-laqgħa mar-rappreżentanti għall-isport.

Il-konklużjonijiet jistiednu lill-istati membri biex jesploraw kif jista' jintuża aħjar il-potenzjal tal-isport fil-livell nazzjonali, b'mod partikolari permezz tal-edukazzjoni u l-involviment ta' atleti magħrufin sew bħala messaġġiera, biex jiġu promossi l-valuri pożittivi tal-sport u dawk Ewropej.