Kunsill Affarijiet Barranin, 23/06/2014, 23 ta' Ġunju 2014

Il-Kunsill jappoġġa l-isforzi ta’ Kiev għal pjan ta’ paċi

Waqt laqgħa tal-Kunsill Affarijiet Barranin fil-Lussemburgu, il-ministri tal-UE ddiskutew il-proposta tal-President tal-Ukraina Poroshenko għal pjan ta’ paċi u l-vjolenza fil-Libja, is-Sirja u l-Iraq.

Il-Kunsill laqa’ l-pjan ta' paċi tal-President Poroshenko u l-passi li ħa biex jiżgura l-paċi u l-istabbiltà fl-Ukraina minn meta ħa l-kariga.

Il-Ministru għall-Affarijiet Barranin li għadu kif inħatar, Pavlo Klimkin, attenda l-laqgħa tal-Kunsill biex jispjega fid-dettall lill-kontropartijiet tiegħu tal-UE s-sitwazzjoni fuq il-post fil-Lvant tal-Ukraina u t-termini tal-pjan ta’ paċi.

Il-ministri laqgħu s-sinjali pożittivi ta’ djalogu bejn l-awtoritajiet Ukraini u Russi f’livelli ogħla minkejja s-sitwazzjoni li qed tmur għall-agħar fuq il-post. Il-Kunsill jistenna li l-Federazzjoni Russa tappoġġa l-pjan ta' paċi b’miżuri speċifiċi li jnaqqsu t-tensjoni. Il-kliem issa għandhom jinbidlu f’azzjonijiet.

Ir-Russja għandha tieħu passi biex twaqqaf il-fluss ta’ armi fuq il-fruntiera lejn il-Lvant tal-Ukraina, u biex tuża l-influwenza tagħha fuq is-separatisti biex iwaqqfu l-vjolenza u jċedu l-armi tagħhom.

Sanzjonijiet

Il-Kunsill ivvaluta l-ħidma ta’ tħejjija li saret mill-Kummissjoni, is-Servizz Ewropew għall-Azzjoni Esterna (SEAE) u l-Istati Membri dwar il-possibbiltà ta’ miżuri mmirati, li jippermettu li jittieħdu passi ulterjuri jekk ikun meħtieġ u jekk is-sitwazzjoni fuq il-post tiddeterjora.

Missjoni tal-Politika ta’ Sigurtà u ta’ Difiża Komuni (PSDK) għall-Ukraina

Il-Kunsill approva l-qafas kunċettwali għal missjoni taħt il-PSDK tal-UE biex tgħin lill-Ukraina fir-riforma tas-settur tas-sigurtà ċivili tagħha, inkluż il-pulizija u l-istat tad-dritt. Il-missjoni, li għandha titnieda fis-sajf, ser issegwi l-istess linji tal-Missjoni tal-Unjoni Ewropea għall-Istat tad-Dritt fil-Kosovo (EULEX).

Importazzjoni ta’ merkanzija mill-Krimea

Il-Kunsill adotta miżuri biex jimplimenta l-politika tal-UE għan-nuqqas ta’ rikonoxximent tal-annessjoni illegali tal-Krimea. Oġġetti li joriġinaw mill-Krimea jew Sevastopol ma jistgħux ikunu importati fl-UE sakemm ma jkunux ingħataw ċertifikat tal-oriġini mill-awtoritajiet Ukraini.

Ftehim ta' Assoċjazzjoni mal-Ukraina

Il-Kunsill qabel li jiffirma l-Ftehim ta’ Assoċjazzjoni (AA) mal-Ukraina, li jinkludi Żona ta’ Kummerċ Ħieles Approfondita u Komprensiva (DCFTA), matul il-Kunsill Ewropew fis-27 ta’ Ġunju. Huwa fakkar ukoll fl-intenzjoni tal-Kummissjoni li timpenja ruħha f'konsultazzjonijiet fuq livell politiku mal-Federazzjoni Russa dwar l-aspetti ta' implimentazzjoni tal-ftehim, sabiex tneħħi t-tħassib Russu dwar l-effetti possibbli tiegħu.

Suġġetti oħra fuq l-aġenda

Matul l-ikla ta’ nofsinhar, il-ministri ddiskutew l-aħħar żviluppi fl-Iraq u l-aspetti relatati tal-kriżi Sirjana, fil-preżenza ta’ Nikolay Mladenov, ir-Rappreżentant Speċjali tas-Segretarju Ġenerali tan-NU għall-Iraq u l-Kap tal-Missjoni ta’ Assistenza tan-NU fl-Iraq. Huma kkundannaw bil-qawwa l-attakki fuq iċ-ċittadini Iraqini mill-Istat Iżlamiku tal-Iraq u tal-Levant (ISIL) u gruppi armati oħrajn. Il-Kunsill esprima wkoll tħassib serju dwar il-kriżi umanitarja u l-ispostament massiv ta' persuni ċivili kkawżat mill-ġlied.

Fil-konklużjonijiet tagħhom, il-ministri tal-UE esprimew tħassib serju dwar l-atti ripetuti ta’ vjolenza fil-Libja, filwaqt li appellaw lin-naħat kollha biex joqogħdu lura mill-użu tal-forza u biex jindirizzaw id-differenzi permezz ta’ mezzi politiċi paċifiċi sabiex jiġi żgurat li fil-25 ta' Ġunju jkunu jistgħu jsiru elezzjonijiet parlamentari.

Il-Kunsill iddiskuta s-sitwazzjoni fil-konflitt Sirjan wara l-elezzjonijiet presidenzjali, inkluż l-aspetti umanitarji tal-kriżi, u l-isforzi diplomatiċi li qed isiru biex dan jintemm. Il-ministri laqgħu l-aħbar li l-aħħar armi kimiċi ddikjarati tas-Sirja ġew trasportati barra mill-pajjiż sabiex jinqerdu. Madankollu, bil-ħsieb tal-gravità tas-sitwazzjoni, il-Kunsill approva sanzjonijiet ġodda kontra r-reġim Sirjan.

Il-ministri kienu mħassba wkoll dwar is-sentenzi li ngħataw kontra ġurnalisti fl-Eġittu u d-deċiżjoni reċenti tal-qorti li tipproċedi bis-sentenzi għall-mewt mogħtija kontra 14-il personaġġ ewlieni mill-moviment Iżlamista.

Il-Kunsill adotta wkoll għadd ta' punti mingħajr diskussjoni.