"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Barranin (Difiża), 28 ta' Settembru 2026
Riżultati ewlenin
Il-Kunsill Affarijiet Barranin, li laqqa' l-ministri għad-difiża, sar fi Brussell u kien ippresedut mir-Rappreżentant Għoli tal-UE għall-Affarijiet Barranin u l-Politika ta' Sigurtà, Kaja Kallas.
Appoġġ tal-UE għall-Ukrajna
Il-ministri għad-difiża tal-UE ddiskutew l-appoġġ militari tal-UE għall-Ukrajna, fl-isfond tal-aħħar żviluppi fuq il-post u l-isforzi diplomatiċi li għaddejjin biex tintlaħaq paċi ġusta u dejjiema appoġġata minn garanziji ta' sigurtà robusti.
Il-Ministru għad-Difiża tal-Ukrajna, Evgeniy Khmara, ingħaqad mal-ministri tal-UE permezz ta' vidjokonferenza għal skambju informali. Il-ministru Ukren ippreżenta l-aktar ħtiġijiet urġenti fil-kamp tal-battalja u dawk finanzjarji u l-perspettivi dwar l-avvanz tal-kooperazzjoni u l-integrazzjoni tal-kumpaniji Ukreni fil-bażi industrijali u teknoloġika tad-difiża Ewropea.
Id-diskussjoni ministerjali sussegwenti ffukat fuq id-difiża tal-ajru, il-Faċilità Ewropea għall-Paċi (EPF), il-Missjoni ta' Assistenza Militari tal-UE (EUMAM) b'appoġġ għall-Ukrajna, u l-flotta mistura tar-Russja.
Id-difiża tal-ajru tibqa' l-prijorità ewlenija għall-Ukrajna. Naraw l-attakki kuljum. Il-ministru għad-difiża tal-Ukrajna, Khmara, reġa' għamel dan ċar ħafna.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-ministri evalwaw l-isforzi biex jissaħħu l-kapaċitajiet ta' difiża tal-ajru tal-Ukrajna. Ir-Rappreżentant Għoli fakkret li l-pjanijiet ta' akkwist b'valur ta' €28.3 biljun diġà ġew approvati taħt is-Self ta' Appoġġ għall-Ukrajna, inkluż ix-xiri futur ta' missili Patriot. Il-ministri enfasizzaw ukoll il-ħtieġa għal konsenji immedjati minn stokkijiet eżistenti u żieda fil-kapaċitajiet ta' produzzjoni.
Il-Kunsill reċentement qabel dwar il-mobilizzazzjoni ta' €6.6 biljun taħt il-Faċilità Ewropea għall-Paċi għall-appoġġ militari lill-Ukrajna. Ir-Rappreżentant Għoli ssottolinjat li l-EPF tibqa' wieħed mill-istrumenti ċentrali tal-UE għall-appoġġ lill-Ukrajna u ħabbret diskussjonijiet mal-istati membri dwar ir-riforniment tal-faċilità lil hinn miċ-ċiklu ta' finanzjament attwali tagħha.
Dwar it-taħriġ militari, il-ministri qablu dwar l-ewwel pass tar-rieżami strateġiku tal-EUMAM Ukraine, u b'hekk estendew il-mandat tal-missjoni għal sentejn oħra. Il-missjoni ser tistabbilixxi wkoll ċellola ta' koordinazzjoni fi Kiev biex issaħħaħ l-edukazzjoni militari u tiffaċilita l-iskambju ta' tagħlimiet mill-kamp tal-battalja.
Fl-aħħar nett, ir-Rappreżentant Għoli aġġornat lill-ministri dwar l-isforzi navali tal-PSDK biex jiġu miġġielda l-attivitajiet tal-flotta mistura tar-Russja, inkluż it-tlugħ abbord ta' bastimenti suspettużi għall-verifika tal-bandiera.
Il-Kunsill kellu skambju ta' fehmiet dwar is-sitwazzjoni fil-Lvant Nofsani u l-implikazzjonijiet tagħha għad-difiża u s-sigurtà Ewropea, inkluż il-libertà ta' navigazzjoni, il-kampanja ibrida tar-Russja li qed teskala, u r-rieżami li jmiss tad-direttiva dwar l-akkwist pubbliku fil-qasam tad-difiża.
Dwar il-libertà ta' navigazzjoni fl-Istrett ta' Hormuz u fl-Istrett ta' Bab el-Mandeb, kif ukoll fil-Baħar l-Aħmar, il-ministri għad-difiża tal-UE evalwaw inizjattivi diplomatiċi differenti. Barra minn hekk, ir-Rappreżentant Għoli pprovdiet aġġornament dwar l-Operazzjoni EUNAVFOR ASPIDES u l-ħtieġa għal assi nazzjonali addizzjonali biex jiġi żgurat li l-Operazzjoni tkun tista' tappoġġa b'mod effettiv il-libertà ta' navigazzjoni f'Bab-el-Mandeb.
Il-ministri esprimew ukoll tħassib dejjem akbar dwar il-kampanja ibrida tar-Russja li qed teskala, li għandha l-għan li ddgħajjef l-unità u s-solidarjetà Ewropej. Id-diskussjoni ffukat fuq għażliet ta' rispons fil-livell tal-UE, inkluż il-protokoll tas-sigurtà ta' emerġenza mħabbar reċentement, il-koordinazzjoni kontinwa man-NATO fejn xieraq, u t-tisħiħ tal-istrumenti rilevanti għad-dispożizzjoni tal-UE.
L-atti sostnuti tar-Russja ta' sabotaġġ, ħruq doluż u vjolazzjoni tal-ispazju tal-ajru għadhom jippersistu. Min-naħa tal-UE, is-sanzjonijiet kontra l-awturi u t-tkeċċija tad-diplomatiċi Russi għandhom l-impatt tagħhom, iżda jeħtieġ li nħarsu lejn x'nistgħu nagħmlu aktar.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kummissjoni pprovdiet aġġornament dwar il-ħidma għar-reviżjoni tad-direttiva dwar l-akkwist pubbliku fil-qasam tad-difiża. Il-laqgħa kienet opportunità għall-ministri biex jipprovdu aktar gwida lill-Kummissjoni.
Affarijiet oħra u deċiżjonijiet oħra
Taħt “affarijiet oħra”, id-Danimarka pprovdiet aġġornament dwar Greenland fid-dawl tal-aħħar żviluppi, inkluż il-ftehim li ġie ssiġillat reċentement bejn id-Danimarka, Greenland u l-Istati Uniti biex jiġi emendat u ssupplimentat il-Ftehim ta' Difiża tal-1951.
Il-Kunsill approva l-ewwel ħames proġetti Ewropej tad-difiża ta' interess komuni taħt il-Programm għall-Industrija tad-Difiża Ewropea (EDIP).
Il-Kunsill iddeċieda wkoll li jġedded il-mandati tal-Missjoni tal-UE ta' Assistenza fil-Fruntieri għall-Punt ta' Qsim ta' Rafah (EUBAM Rafah) u tal-Missjoni tal-Pulizija tal-UE fit-Territorji Palestinjani (EUPOL COPPS) għal disa' xhur sat-30 ta' Ġunju 2027.
Il-Kunsill iddeċieda wkoll li jsaħħaħ l-Arkitettura tar-Rispons għat-Theddid Spazjali tal-UE b'rispons għaż-żieda fl-imġiba irresponsabbli u ostili fil-qasam tal-ispazju.
Fl-istess jum, il-Kunsill iddeċieda li jissanzjona 10 individwi u 17-il entità oħra minħabba d-deportazzjoni illegali sistematika ta' tfal Ukreni lejn ir-Russja, kif ukoll li jimponi miżuri restrittivi fuq 10 individwi Russi b'rabta mal-projbizzjoni tal-partit tal-oppożizzjoni Yabloko mill-elezzjonijiet tad-Duma tal-Istat.
Qabel ma bdiet il-laqgħa tal-lum tal-KAB dwar id-Difiża, il-Bord ta' Tmexxija tal-Aġenzija Ewropea għad-Difiża (EDA) – imlaqqa' fil-livell ministerjali – laqa' u kellu skambju ta' fehmiet dwar l-ewwel rapport annwali dwar il-prontezza tad-difiża, imħejji mill-EDA qabel il-laqgħa tal-Kunsill Ewropew tal-15 u s-16 ta' Ottubru. Il-Bord approva wkoll it-tieni fażi tat-tisħiħ tal-Aġenzija, filwaqt li bena fuq approċċ gradwali ppreżentat f'Mejju 2026.
L-Ewropa teħtieġ bidla deċiżiva fl-iskala u l-pass tal-investiment fid-difiża, l-iżvilupp tal-kapaċitajiet, l-innovazzjoni u l-kapaċità industrijali.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
