Kronoloġija - ċibersigurtà

Fis-6 ta' Ġunju 2025, il-ministri adottaw il-pjan ta' azzjoni tal-UE għall-ġestjoni ta' kriżijiet ċibernetiċi, li jipprovdi gwida għal kif l-UE għandha twieġeb għal inċidenti taċ-ċibersigurtà jew kriżijiet ċibernetiċi fuq skala kbira.

• L-UE tadotta pjan ta' azzjoni biex timmaniġġa aħjar il-kriżijiet u l-inċidenti ċibernetiċi Ewropej (stqarrija għall-istampa, 6 ta' Ġunju 2025)

Fit-2 ta' Diċembru 2024, il-ministri adottaw l-att dwar iċ-ċibersolidarjetà. Ir-regoli l-ġodda għandhom l-għan li jsaħħu s-solidarjetà u l-kapaċitajiet tal-UE li tidentifika, tħejji u tirrispondi għat-theddid u l-inċidenti taċ-ċibersigurtà u li ssaħħaħ ir-reżiljenza ċibernetika tagħha.

• Pakkett dwar iċ-ċibersigurtà: il-Kunsill jadotta liġijiet ġodda biex jissaħħu il-kapaċitajiet taċ-ċibersigurtà fl-UE (stqarrija għall-istampa, 2 ta' Diċembru 2024)

Il-Kunsill adotta liġi ġdida dwar ir-rekwiżiti taċ-ċibersigurtà għall-prodotti b’elementi diġitali bil-ħsieb li jiġi żgurat li l-prodotti, bħal kameras tad-dar konnessi, friġġijiet, TVs u ġugarelli, ikunu sikuri qabel ma jitqiegħdu fis-suq.

• Att dwar ir-reżiljenza ċibernetika: il-Kunsill jadotta liġi ġdida dwar ir-rekwiżiti tas-sigurtà għall-prodotti diġitali (stqarrija għall-istampa, 10 ta' Ottubru 2024)

Il-Kunsill adotta sanzjonijiet kontra sitt persuni involuti f'attakki ċibernetiċi li jaffettwaw is-sistemi ta' informazzjoni relatati ma' infrastruttura kritika, funzjonijiet kritiċi tal-istat, il-ħżin jew l-ipproċessar ta' informazzjoni klassifikata u timijiet ta' rispons ta' emerġenza tal-gvern fl-istati membri.

Il-persuni sanzjonati jinkludu membri tal-gruppi Callisto, Armagedddon u Wizard Spider.

• Attakki ċibernetiċi: sitt persuni miżjuda mal-lista ta' sanzjonijiet tal-UE għal attivitajiet ċibernetiċi malizzjużi/attakki ċibernetiċi kontra l-istati membri tal-UE u l-Ukrajna (stqarrija għall-istampa, 24 ta' Ġunju 2024)

Ir-rappreżentanti tal-istati membri (Coreper) laħqu pożizzjoni komuni dwar il-leġiżlazzjoni proposta rigward ir-rekwiżiti orizzontali taċ-ċibersigurtà għal prodotti b'elementi diġitali (att dwar ir-reżiljenza ċibernetika).

Ir-regoli l-ġodda proposti jridu jiżguraw li l-prodotti b'komponenti diġitali, bħal kameras tad-dar konnessi, friġġijiet intelliġenti, televixins, u ġugarelli, ikunu sikuri qabel ma jidħlu fis-suq uniku tal-UE.

• Att dwar ir-reżiljenza ċibernetika: l-istati membri jaqblu dwar pożizzjoni komuni rigward ir-rekwiżiti tas-sigurtà għall-prodotti diġitali (stqarrija għall-istampa, 19 ta' Lulju 2023)

Il-Kunsill tal-UE u l-Parlament Ewropew laħqu ftehim proviżorju dwar qafas komuni għaċ-ċibersigurtà fl-istituzzjonijiet, il-korpi, l-uffiċċji u l-aġenziji tal-UE.

Il-ftehim ser jgħin biex jittejbu r-reżiljenza tagħhom u l-kapaċitajiet tagħhom ta' rispons għall-inċidenti, u jiżgura standards komuni u kooperazzjoni.

Wara, il-ftehim ser jiġi ffinalizzat fil-livell tekniku u mbagħad jintbagħat lill-ambaxxaturi għall-UE għall-konferma. Ladarba jiġi kkonfermat kemm fil-Kunsill kif ukoll fil-Parlament, iż-żewġ istituzzjonijiet ser jadottawh formalment.

• Iċ-ċibersigurtà fl-istituzzjonijiet, fil-korpi, fl-uffiċċji u fl-aġenziji tal-Unjoni: il-Kunsill u l-Parlament jilħqu qbil proviżorju (stqarrija għall-istampa, 26 ta' Ġunju 2023)

Biċ-ċiberspazju bħala qasam għall-kompetizzjoni strateġika, ir-riskji għas-sigurtà u d-difiża tal-UE jiżdiedu fi żmien ta' żieda fit-tensjonijiet ġeopolitiċi u dipendenza akbar fuq it-teknoloġiji diġitali.

Il-konklużjonijiet tal-Kunsill dwar iċ-ċiberdifiża jisħqu fuq il-ħtieġa li l-UE u l-istati membri tagħha:

• isaħħu aktar ir-reżiljenza tagħhom biex jiffaċċjaw it-theddid ċibernetiku
• iżidu ċ-ċibersigurtà u ċ-ċiberdifiża komuni tagħhom kontra mġiba malizzjuża u atti ta' aggressjoni fiċ-ċiberspazju

• Ċiberdifiża: il-konklużjonijiet tal-Kunsill jisħqu fuq l-importanza li tkompli tissaħħaħ ir-reżiljenza tal-UE biex tiffaċċja t-theddid ċibernetiku (stqarrija għall-istampa, 23 ta' Mejju 2023)

Il-Kunsill adotta leġiżlazzjoni għal livell għoli komuni ta' ċibersigurtà madwar l-Unjoni kollha biex ikomplu jitjiebu r-reżiljenza u l-kapaċitajiet ta' rispons għall-inċidenti kemm tas-settur pubbliku kif ukoll ta' dak privat, u tal-UE kollha kemm hi.

Id-direttiva l-ġdida, imsejħa "NIS2", ser tissostitwixxi d-direttiva attwali dwar is-sigurtà tan-networks u tas-sistemi tal-informazzjoni (id-Direttiva NIS).

• L-UE tiddeċiedi li ssaħħaħ iċ-ċibersigurtà u r-reżiljenza madwar l-Unjoni kollha: il-Kunsill jadotta leġiżlazzjoni ġdida (stqarrija għall-istampa, 28 ta' Novembru 2022)

Il-Kunsill adotta l-pożizzjoni tiegħu dwar qafas komuni għaċ-ċibersigurtà fl-istituzzjonijiet, il-korpi, l-uffiċċji u l-aġenziji tal-UE.

Fl-isfond ta' għadd akbar ta' attakki ċibernetiċi sofistikati kontra l-amministrazzjoni pubblika tal-UE, f'Marzu 2022 il-Kummissjoni Ewropea pproponiet miżuri bl-għan li jiżguraw livell komuni għoli ta' ċibersigurtà.

Bil-ħolqien ta' qafas komuni, dawn il-miżuri għandhom l-għan li jtejbu r-reżiljenza u l-kapaċitajiet ta' rispons għall-inċidenti tal-entitajiet kollha tal-UE u li jindirizzaw id-differenzi fl-approċċ tagħhom.

Wara li l-Kunsill adotta l-pożizzjoni tiegħu, il-pass li jmiss huwa l-bidu tan-negozjati mal-Parlament Ewropew, ladarba l-Parlament ikun ivvota fuq il-mandat ta' negozjar tiegħu.

• Iċ-ċibersigurtà fl-istituzzjonijiet, il-korpi u l-aġenziji tal-UE: il-Kunsill jadotta l-pożizzjoni tiegħu dwar regoli komuni (stqarrija għall-istampa, 18 ta' Novembru 2022)

Il-Kunsill adotta konklużjonijiet li jappellaw għal sigurtà aktar b'saħħitha tal-ktajjen tal-provvista tat-teknoloġiji tal-informazzjoni u tal-komunikazzjoni (ICT) tal-UE. Il-konklużjonijiet jindirizzaw ukoll id-dipendenzi fil-ktajjen tal-provvista tal-ICT. Is-sejħa għal azzjoni hija saħansitra aktar urġenti fil-kuntest tal-aggressjoni tar-Russja lejn l-Ukrajna.

color: inherit; color: inherit; color: inherit; Fil-konklużjonijiet, il-Kunsill jappella għal aġġustamenti fl-oqfsa ta' skrinjar għall-akkwistpubblikujew l-investiment dirett barrani, inkluż kriterji tal-għażla relatati maċ-ċibersigurtà. L-istati membri stiednu lill-Kummissjoni toħroġ linji gwida metodoloġiċi biex l-awtoritajiet kontraenti jiġu mħeġġa jagħmlu enfasi xierqa fuq il-prattiki taċ-ċibersigurtà tal-offerenti u s-sottokuntratturi tagħhom.

Il-konklużjonijiet jidentifikaw leġiżlazzjoni speċifika għaċ-ċibernetika eżistenti u dik futura li tista' wkoll tikkontribwixxi għas-sigurtà tal-katina tal-provvista tal-ICT:

• color: inherit; id-direttiva riveduta dwar is-Sigurtà tan-Networks u tal-Informazzjoni (NIS2)
• color: inherit; skemi ta' ċertifikazzjoni maħruġa fil-qafas stabbilit mill-Att dwar iċ-Ċibersigurtà
• color: inherit; il-proposta tal-Att dwar ir-Reżiljenza Ċibernetika

Il-konklużjonijiet jissuġġerixxu wkoll l-użu ta' mekkaniżmi ta' appoġġ għall-finanzjament tal-bini ta' infrastruttura diġitali sigura, it-tisħiħ tal-fehim u s-sensibilizzazzjoni komuni, u l-approfondiment tal-kooperazzjoni internazzjonali biex tiżdied is-sigurtà tal-katina tal-provvista tal-ICT fl-UE u lil hinn minnha.

• Il-Kunsill jaqbel li tissaħħaħ is-sigurtà tal-ktajjen tal-provvista tal-ICT (stqarrija għall-istampa, 17 ta' Ottubru 2022)

Fil-kuntest tal-aggressjoni Russa fl-Ukrajna u wara l-approvazzjoni tal-Boxxla Strateġika mill-Kunsill Ewropew fl-24 u l-25 ta' Marzu, il-Kunsill tal-UE tenna fil-konklużjonijiet tiegħu l-importanza li jiġi żviluppat Sett ta' Għodod tal-UE kontra Theddid Ibridu.

Dan is-sett ta' għodod jintroduċi l-qafas għal reazzjoni koordinata għal theddid u kampanji ibridi li jaffettwaw lill-UE u lis-sħab tagħha. Huwa jiġbor flimkien l-atturi, il-politiki u l-istrumenti rilevanti kollha biex jiġi miġġieled l-impatt tat-theddid ibridu b'mod aktar koordinat.

Il-Kunsill tenna li r-responsabbiltà primarja għall-ġlieda kontra t-theddid ibridu hija tal-istati membri u saħaq li d-deċiżjonijiet dwar reazzjoni koordinata tal-UE għal kampanji ibridi għandhom:

• iservu biex jitħarsu d-demokrazija u d-dritt internazzjonali
• iservu biex jintlaħqu l-objettivi tal-Unjoni
• ikunu proporzjonati għal kull kampanja
• ikollhom għarfien tas-sitwazzjoni
• jieħdu kont tal-kuntest usa'
• jirrispettaw id-dritt internazzjonali u jħarsu d-drittijiet u l-libertajiet fundamentali

• Konklużjonijiet tal-Kunsill dwar Qafas għal reazzjoni koordinata tal-UE għal kampanji ibridi (stqarrija għall-istampa, 21 ta' Ġunju 2022)

Il-Kunsill approva l-konklużjonijiet dwar l-iżvilupp tal-qagħda ċibernetika tal-UE, li tikkonċerna s-saħħa u r-reżiljenza taċ-ċibersigurtà globali fir-rigward tat-theddid ċibernetiku.

Permezz tal-iżvilupp tal-qagħda ċibernetika, l-UE tista' tiġġieled aħjar l-attivitajiet ċibernetiċi offensivi mmirati lejn l-UE u l-istati membri tagħha. L-għan huwa li jingħata rispons kemm immedjat kif ukoll fit-tul lill-atturi li jfittxu li jiċħdu lill-UE aċċess sigur u miftuħ għaċ-ċiberspazju, inkluż billi jiġi evitat u skoraġġut it-theddid filwaqt li jittejbu wkoll il-kapaċitajiet ċibernetiċi.

Il-konklużjonijiet jirriżultaw minn diversi liġijiet u politiki tal-UE, inkluż il-Boxxla Strateġika, il-pjan ta' azzjoni tal-UE biex tissaħħaħ il-politika ta' sigurtà u ta' difiża tagħha sal-2030.

• Qagħda ċibernetika: il-Kunsill japprova konklużjonijiet (stqarrija għall-istampa, 23 ta' Mejju 2022)

Il-Kunsill iddeċieda li jestendi l-qafas għal miżuri restrittivi kontra attakki ċibernetiċi li jheddu lill-UE u lill-istati membri tagħha għal tliet snin oħra, sat-18 ta' Mejju 2025.

Dan il qafas jippermetti lill-UE timponi miżuri restrittivi mmirati fuq persuni jew entitajiet involuti f'attakki ċibernetiċi li jikkawżaw impatt sinifikanti, u li jikkostitwixxu theddida esterna għall-UE jew l-istati membri tagħha.

• Attakki ċibernetiċi: il-Kunsill jestendi r-reġim tas-sanzjonijiet (stqarrija għall-istampa, 16 ta' Mejju 2022)

Il-Kunsill u l-Parlament Ewropew laħqu ftehim proviżorju dwar miżuri għal livell għoli komuni ta' ċibersigurtà madwar l-Unjoni, sabiex jitjiebu aktar ir-reżiljenza u l-kapaċitajiet ta' rispons għall-inċidenti kemm tas-settur pubbliku kif ukoll dak privat u tal-UE kollha kemm hi.

Ladarba tiġi adottata, id-direttiva l-ġdida, imsejħa "NIS2" ser tissostitwixxi d-direttiva attwali dwar is-sigurtà tan-networks u tas-sistemi tal-informazzjoni (id-direttiva NIS).

Il-leġiżlazzjoni l-ġdida ser:

• tiżgura ġestjoni u kooperazzjoni aktar b'saħħithom tar-riskju u tal-inċidenti
• testendi l-kamp ta' applikazzjoni tar-regoli

• It-tisħiħ taċ-ċibersigurtà u r-reżiljenza fl-UE kollha – qbil proviżorju tal-Kunsill u tal-Parlament Ewropew (stqarrija għall-istampa, 13 ta' Mejju 2022)

Il-Kunsill u l-Parlament Ewropew laħqu ftehim proviżorju dwar l-Att dwar ir-Reżiljenza Operazzjonali Diġitali (DORA), li ser jiżgura li s-settur finanzjarju fl-Ewropa jkun jista' jkompli jwettaq operazzjonijiet reżiljenti matul tfixkil operazzjonali serju.

Id-DORA joħloq qafas regolatorju dwar ir-reżiljenza operazzjonali diġitali fejn id-ditti kollha jinħtieġu jiżguraw li jkunu jistgħu jifilħu, jirrispondu u jirkupraw minn kull tip ta' tfixkil u theddid relatati mal-ICT.

L-UE qed issaħħaħ is-sigurtà tal-IT ta' entitajiet finanzjarji bħal banek, kumpaniji tal-assigurazzjoni u ditti tal-investiment, minħabba r-riskji dejjem jiżdiedu ta' attakki ċibernetiċi.

• Finanzi diġitali: Intlaħaq ftehim proviżorju dwar id-DORA (stqarrija għall-istampa, 11 ta' Mejju 2022)

Il-ministri tal-UE responsabbli għat-telekomunikazzjoni u l-affarijiet diġitali ltaqgħu fit-8 u d-9 ta' Marzu 2022 f'laqgħa informali organizzata mill-presidenza Franċiża tal-Kunsill.

Il-ministri appellaw għat-tisħiħ u l-aċċellerazzjoni tal-pass tal-kooperazzjoni Ewropea fil-qasam taċ-ċibersigurtà, wara żieda fil-livelli ta' theddid ċibernetiku, aggravata mis-sitwazzjoni fl-Ukrajna u r-riskju ta' inċidenti ċibernetiċi fl-UE. Huma appellaw ukoll għal aktar informazzjoni dwar ir-riskji li jheddu n-networks u l-infrastruttura tal-komunikazzjoni Ewropej, u għal rakkomandazzjonijiet dwar kif tista' tissaħħaħ ir-reżiljenza tagħhom.

Is-27 ministru adottaw dikjarazzjoni politika maħsuba biex tagħti spinta lill-kapaċitajiet taċ-ċibersigurtà tal-UE.

• Laqgħa informali tal-ministri inkarigati mit-telekomunikazzjoni (presidenza Franċiża)

Matul il-Kunsill Telekomunikazzjoni ta' Diċembru, il-ministri tal-UE qablu fuq "approċċ ġenerali" dwar miżuri għal livell komuni għoli ta' ċibersigurtà madwar l-UE kollha skont l-hekk imsejħa direttiva "NIS2".

L-għan tal-leġiżlazzjoni huwa li tkompli ttejjeb ir-reżiljenza u l-kapaċitajiet ta' rispons għall-inċidenti kemm tas-settur pubbliku kif ukoll ta' dak privat, u tal-UE kollha kemm hi. Għandha l-għan li tneħħi d-diverġenzi fir-rekwiżiti taċ-ċibersigurtà u fl-implimentazzjoni tal-miżuri taċ-ċibersigurtà fi stati membri differenti.

• Tisħiħ taċ-ċibersigurtà u r-reżiljenza fl-UE kollha – il-Kunsill jaqbel dwar il-pożizzjoni tiegħu (stqarrija għall-istampa, 3 ta' Diċembru 2021)
• Kunsill Trasport, Telekomunikazzjoni u Enerġija (Telekomunikazzjoni), 3 ta' Diċembru 2021

Il-Kunsill adotta konklużjonijiet li jistiednu lill-UE u lill-istati membri jiżviluppaw aktar il-qafas tal-UE għall-ġestjoni tal-kriżijiet taċ-ċibersigurtà, inkluż billi jiġi esplorat il-potenzjal ta' ċiberunità konġunta.

Fil-konklużjonijiet tiegħu, il-Kunsill jenfasizza l-ħtieġa li jiġu kkonsolidati n-networks eżistenti u li jiġi stabbilit immappjar tal-lakuni u l-ħtiġijiet possibbli b'rabta mal-kondiviżjoni tal-informazzjoni fi ħdan u bejn il-komunitajiet ċibernetiċi. Dan għandu sussegwentement iwassal għal ftehim dwar għanijiet u prijoritajiet ewlenin possibbli ta' ċiberunità konġunta potenzjali.

• Ċibersigurtà: il-Kunsill jadotta konklużjonijiet dwar l-esplorazzjoni tal-potenzjal ta' ċiberunità konġunta (stqarrija għall-istampa, 19 ta' Ottubru 2021)

Il-Kunsill iddeċieda li jestendi l-qafas għal miżuri restrittivi kontra attakki ċibernetiċi li jheddu lill-UE jew lill-istati membri tagħha għal sena oħra, sat-18 ta' Mejju 2022.

B"dan il qafas l-UE tista' timponi miżuri restrittivi mmirati fuq persuni jew entitajiet involuti f'attakki ċibernetiċi li joħolqu impatt sinifikanti, u li huma ta' theddida esterna għall-UE jew l-istati membri tagħha.

Miżuri restrittivi jistgħu jiġu imposti wkoll b'reazzjoni għal attakki ċibernetiċi kontra stati terzi jew organizzazzjonijiet internazzjonali fejn miżuri bħal dawn jitqiesu neċessarji biex jintlaħqu l-objettivi tal-Politika Estera u ta' Sigurtà Komuni (PESK).

• Attakki ċibernetiċi: il-Kunsill jestendi l-qafas ta' sanzjonijiet għal sena oħra (stqarrija għall-istampa, 17 ta' Mejju 2021)
• Sanzjonijiet: kif u meta l-UE tadotta miżuri restrittivi (informazzjoni ġenerali)

In-negozjaturi mill-Kunsill u l-Parlament Ewropew laħqu ftehim proviżorju dwar miżura temporanja li tippermetti lill-fornituri ta' servizzi ta' komunikazzjoni elettronika bħall-posta elettronika bbażata fuq il-web u servizzi ta' messaġġi jkomplu jidentifikaw, ineħħu u jirrappurtaw l-abbuż sesswali tat-tfal online, li tkopri wkoll il-ġlieda kontra l-grooming, sakemm tidħol fis-seħħ leġiżlazzjoni permanenti mħabbra mill-Kummissjoni Ewropea.

Il-ftehim jipprevedi deroga għall-Artikoli 5(1) u 6(1) tad-direttiva dwar il-privatezza elettronika u huwa soġġett għall-approvazzjoni mill-Kunsill.

• Il-ġlieda kontra l-abbuż tat-tfal online – ftehim informali mal-Parlament Ewropew dwar ir-regoli temporanji (stqarrija għall-istampa, 29 ta' April 2021)

L-UE hija mistennija li tagħti spinta lis-sigurtà tal-internet u ta' networks u sistemi ta' informazzjoni kritiċi oħra billi tistabbilixxi Ċentru ta' Kompetenza fil-qasam taċ-Ċibersigurtà biex tiġbor flimkien l-investiment fir-riċerka, it-teknoloġija u l-iżvilupp industrijali taċ-ċibersigurtà. Il-korp il-ġdid, li ser ikun ibbażat f'Bucharest, ir-Rumanija, b'mod partikolari ser jidderieġi finanzjament relatat maċ-ċibersigurtà minn Orizzont Ewropa u l-Programm Ewropa Diġitali.

Dan iċ-"Ċentru Ewropew ta' Kompetenza Industrijali, Teknoloġika u tar-Riċerka fil-qasam taċ-Ċibersigurtà" ser jaħdem flimkien ma' network ta' ċentri nazzjonali ta' koordinazzjoni iddeżinjati mill-istati membri.

Il-Kunsill adotta r-regolament li jistabbilixxi ċ-Ċentru u n-network f'April 2021. Dan ser ikun segwit minn adozzjoni finali mill-Parlament Ewropew.

• Iċ-Ċentru ta' Kompetenza fil-qasam taċ-Ċibersigurtà bbażat f'Bucharest jingħata l-approvazzjoni tal-Kunsill (stqarrija għall-istampa, 20 ta' April 2021)

Il-Kunsill adotta konklużjonijiet dwar l-istrateġija ta' ċibersigurtà tal-UE għad-deċennju diġitali. Din l-istrateġija ġiet ippreżentata mill-Kummissjoni Ewropea u mir-Rappreżentant Għoli tal-UE għall-Affarijiet Barranin u l-Politika ta' Sigurtà f'Diċembru 2020. Hija tiddeskrivi l-qafas għall-azzjoni tal-UE biex tipproteġi liċ-ċittadini u n-negozji tal-UE minn theddid ċibernetiku, tippromwovi sistemi ta' informazzjoni siguri u tipproteġi ċiberspazju globali, miftuħ, liberu u sigur.

Il-konklużjonijiet jinnotaw li ċ-ċibersigurtà hija essenzjali għall-bini ta' Ewropa reżiljenti, ekoloġika u diġitali. Huma jistabbilixxu bħala objettiv ewlieni l-kisba tal-awtonomija strateġika waqt li tinżamm l-ekonomija miftuħa. Dan jinkludi t-tisħiħ tal-kapaċità li jsiru għażliet awtonomi fil-qasam taċ-ċibersigurtà bil-għan li tissaħħaħ it-tmexxija diġitali tal-UE u l-kapaċitajiet strateġiċi tagħha.

• Il-Kunsill jadotta konklużjonijiet dwar l-istrateġija ta' ċibersigurtà tal-UE (stqarrija għall-istampa, 22 ta' Marzu 2021)

Il-Kunsill adotta konklużjonijiet li jappellaw għal aktar risponsi imsaħħa fil-livell tal-UE biex jiġi miġġieled it-theddid ibridu, inkluż id-diżinformazzjoni, u tissaħħaħ ir-reżiljenza. Il-Kunsill innota li teknoloġiji u kriżijiet ġodda, bħall-pandemija li għaddejja bħalissa, joffru opportunitajiet għal atturi ostili biex jespandu l-attivitajiet ta' interferenza tagħhom. Dawn jippreżentaw sfida addizzjonali għall-istati membri u l-istituzzjonijiet tal-UE, minbarra l-kriżi nnifisha.

Il-Kunsill għaraf li l-pandemija tal-COVID-19 tagħmel lill-UE u lill-istati membri tagħha aktar vulnerabbli għal theddid ibridu. Dan it-theddid jinkludi t-tixrid intensifikat tad-diżinformazzjoni u l-interferenza manipulattiva. L-indirizzar ta' theddid bħal dan, b'mod partikolari l-attivitajiet ċibernetiċi malizzjużi, id-diżinformazzjoni u t-theddid għas-sigurtà ekonomika jeħtieġ approċċ komprensiv li jinvolvi kooperazzjoni u koordinazzjoni effettivi.

• Konklużjonijiet tal-Kunsill dwar it-tisħiħ tar-reżiljenza u l-ġlieda kontra t-theddid ibridu, inkluż id-diżinformazzjoni fil-kuntest tal-pandemija tal-COVID-19 (stqarrija għall-istampa, 15 ta' Diċembru 2020)

Illum, in-negozjaturi tal-Kunsill u tal-Parlament Ewropew laħqu qbil proviżorju dwar proposta biex jitwaqqaf iċ-Ċentru Ewropew ta' Kompetenza Industrijali, Teknoloġika u tar-Riċerka fil-qasam taċ-Ċibersigurtà u network ta' ċentri nazzjonali ta' koordinazzjoni.

Flimkien, dawn l-istrutturi ser itejbu s-sigurtà tas-suq uniku diġitali, inkluż f'oqsma bħall-kummerċ elettroniku, il-mobbiltà intelliġenti u l-Internet tal-Oġġetti, u jżidu l-awtonomija tal-UE fil-qasam taċ-ċibersigurtà.

• Ċentru ta' Kompetenza ġdid u network ġdid fil-qasam taċ-Ċibersigurtà: qbil informali mal-Parlament Ewropew (stqarrija għall-istampa, 14 ta' Diċembru 2020)

Bucharest (ir-Rumanija) intgħażel mir-rappreżentanti tal-gvernijiet tal-istati membri tal-UE bħala s-sede prospettiva taċ-Ċentru Ewropew Industrijali, Teknoloġiku u tar-Riċerka fil-qasam taċ-Ċibersigurtà l-ġdid.

Iċ-Ċentru ta' Kompetenza fil-qasam taċ-Ċibersigurtà se jtejjeb il-koordinazzjoni tar-riċerka u l-innovazzjoni fiċ-ċibersigurtà fl-UE. Huwa ser ikun ukoll l-istrument ewlieni tal-UE għall-pooling tal-investiment fil-qasam tar-riċerka, it-teknoloġija u l-iżvilupp industrijali taċ-ċibersigurtà.

Il-Kunsill approva konklużjonijiet li jirrikonoxxu ż-żieda fl-użu ta' prodotti għall-konsumaturi u apparati industrijali konnessi mal-internet u r-riskji ġodda relatati għall-privatezza, is-sigurtà tal-informazzjoni u ċ-ċibersigurtà.

Il-konklużjonijiet jissottolinjaw l-importanza li tiġi vvalutata l-ħtieġa għal leġiżlazzjoni orizzontali għal perjodu fit-tul biex jiġu indirizzati l-aspetti rilevanti kollha taċ-ċibersigurtà tal-apparati konnessi, pereżempju d-disponibbiltà, l-integrità u l-kunfidenzjalità.

L-apparati konnessi, inkluż il-magni, is-sensuri u n-networks li jifformaw l-Internet tal-Oġġetti (IoT) u s-sigurtà tagħhom, ser ikollhom rwol ewlieni fit-tiswir ulterjuri tal-futur diġitali tal-Ewropa.

• Ċibersigurtà tal-apparati konnessi – il-Kunsill jadotta konklużjonijiet (stqarrija għall-istampa, 2 ta' Diċembru 2020)

Il-Kunsill iddeċieda li jimponi miżuri restrittivi kontra sitt individwi u tliet entitajiet responsabbli għal bosta attakki ċibernetiċi jew involuti fihom. Is-sanzjonijiet imposti jinkludu projbizzjoni fuq l-ivvjaġġar u ffriżar tal-assi, filwaqt li persuni u entitajiet mill-UE huma pprojbiti milli jagħmlu disponibbli fondi għal dawk elenkati.

• L-UE timponi l-ewwel sanzjoni li qatt ħadet kontra attakki ċibernetiċi (Stqarrija għall-istampa, 30 ta’ Lulju 2020)

Il-Kunsill adotta konklużjonijiet li jindirizzaw firxa wiesgħa ta' kwistjonijiet marbutin mal-implimentazzjoni tal-istrateġija diġitali tal-UE. It-test jenfasizza l-impatt tat-trasformazzjoni diġitali fuq il-ġlieda kontra l-pandemija, u r-rwol kritiku tagħha fl-irkupru ta' wara l-COVID-19.

Fir-rigward taċ-ċibersigurtà, peress li t-theddid u r-reati ċibernetiċi qed jiżdiedu fl-għadd u fis-sofistikazzjoni, il-ministri tal-UE għandhom l-għan li jtejbu l-kapaċitajiet ta' rispons tal-UE u jissalvagwardjaw l-integrità, is-sigurtà u r-reżiljenza tal-infrastruttura diġitali, in-networks u s-servizzi ta' komunikazzjoni. L-UE tappoġġa wkoll il-ħtieġa għal approċċ ikkoordinat biex jiġu mitigati r-riskji relatati maċ-ċibersigurtà u biex tiġi żgurata introduzzjoni sigura tal-5G.

• It-tiswir tal-futur diġitali tal-Ewropa - il-Kunsill jadotta konklużjonijiet (stqarrija għall-istampa, 9 ta' Ġunju 2020)

Fit-3 ta' Ġunju 2020, il-Coreper qabel dwar mandat ġdid għal negozjati mal-Parlament Ewropew dwar ir-regolament propost li jistabbilixxi ċ-Ċentru Ewropew ta' Kompetenza fil-qasam taċ-Ċibersigurtà u n-Network ta' Ċentri Nazzjonali ta' Koordinazzjoni. Il-pass li jmiss huwa li l-presidenza Kroata tikkuntattja lin-negozjatur ewlieni tal-Parlament biex tesplora l-possibbiltà li tiġi organizzata laqgħa ta' trilogu.

Il-presidenza ppreżentat ukoll is-sitwazzjoni attwali tal-implimentazzjoni tas-sett ta' għodod tal-UE għas-sigurtà tan-networks 5G.

• Vidjokonferenza tal-ministri għat-telekomunikazzjoni, 5 ta' Ġunju 2020

Il-konklużjonijiet tal-Kunsill marbuta mal-5G irreferew għall-implikazzjonijiet fuq l-ekonomija Ewropea u l-ħtieġa li jitnaqqsu r-riskji għas-sigurtà.

Il-ministri tal-UE saħqu li n-netwerks tal-5G ser jiffurmaw parti minn infrastruttura kruċjali għaż-żamma ta' funzjonijiet vitali soċjali u ekonomiċi.

• L-importanza u r-riskji ta' sigurtà tat-teknoloġija 5G: il-Kunsill jadotta konklużjonijiet (stqarrija għall-istampa, 3 ta' Diċembru 2019)

Il-Kunsill stabbilixxa qafas li jippermetti lill-UE timponi miżuri restrittivi mmirati biex jiskoraġġixxu u jirreaġixxu għal attakki ċibernetiċi li jikkostitwixxu theddida esternalill-UE jew l-istati membri tagħha.

B'mod aktar speċifiku, din id-deċiżjoni tippermetti lill-UE għall-ewwel darba li tissanzjona persuni jew entitajiet li:

• huma responsabbli għal attakki ċibernetiċi jew tentattivi ta' attakki ċibernetiċi
• jipprovdu appoġġ finanzjarju, tekniku jew materjali għal attakki bħal dawn
• huma involuti f’modi oħra

Jistgħu jiġu imposti wkoll sanzjonijiet fuq persuni jew entitajiet assoċjati magħhom.

Dan il-qafas japplika wkoll għal attakki ċibernetiċi kontra stati mhux tal-UE jew organizzazzjonijiet internazzjonali fejn miżuri ristretti jitqiesu neċessarji biex jinkisbu l-objettivi tal-Politika Estera u ta' Sigurtà Komuni (PESK).

• Attakki ċibernetiċi: Il-Kunsill issa jista' jimponi sanzjonijiet (stqarrija għall-istampa, 17/05/2019)

Fid-9 ta' April 2019, il-Kunsill adotta r-regolament magħruf ukoll bħala l-Att dwar iċ-Ċibersigurtà li jintroduċi:

• sistema ta' skemi ta' ċertifikazzjoni fl-UE kollha
• aġenzija tal-UE għaċ-ċibersigurtà biex tieħu post l-Aġenzija tal-Unjoni Ewropea dwar is-Sigurtà tan-Networks u l-Informazzjoni (ENISA) attwali

• L-UE għandha ssir aktar b'saħħitha fir-rigward ta' ċibersigurtà hekk kif il-Kunsill jappoġġa l-ftehim dwar ċertifikazzjoni komuni u aġenzija aktar b'saħħitha (stqarrija għall-istampa, 19/12/2018)

L-ambaxxaturi għall-UE taw mandat lill-Presidenza tal-Kunsill biex tibda t-taħditiet mal-Parlament Ewropew dwar l-akkomunament tal-għarfien espert dwar iċ-ċibersigurtà.

In-negozjati ser jiffukaw fuq żewġ inizjattivi:

• l-istabbiliment ta' bażi ta' għarfien mill-aqwa għaċ-ċibersigurtà msejħa ċ-Ċentru Ewropew ta' Kompetenza Industrijali, Teknoloġika u tar-Riċerka fil-qasam taċ-Ċibersigurtà
• l-istabbiliment ta' netwerk ta' ċentri nazzjonali ta' koordinazzjoni

• L-UE ser tiġbor flimkien u tinnetwerkja l-għarfien espert tagħha fiċ-ċibersigurtà: il-Kunsill jaqbel dwar il-pożizzjoni tiegħu rigward iċ-ċentri taċ-ċibersigurtà (stqarrija għall-istampa, 13/03/2019)

L-approvazzjoni tal-Att dwar iċ-Ċibersigurtà propost ser tippermetti lill-Unjoni Ewropea tintroduċi ċertifikazzjoni taċ-ċibersigurtà fl-UE kollha u tikkonsolida aġenzija permanenti tal-UE għaċ-ċibersigurtà.

Fl-10 ta' Diċembru ntlaħaq qbil proviżorju dwar il-liġi l-ġdida bejn il-presidenza u l-Parlament Ewropew.

Iċ-ċertifikazzjoni taċ-ċibersigurtà għall-UE kollha dalwaqt ser tkun disponibbli għal apparat konness mal-internet, u b'hekk il-konsumaturi jkunu jistgħu jagħmlu għażliet aktar informati u tkun aktar faċli biex il-kumpaniji jikkummerċjalizzaw il-prodotti intelliġenti tagħhom madwar l-Ewropa.

• L-UE għandha ssir aktar b'saħħitha fir-rigward ta' ċibersigurtà hekk kif il-Kunsill jappoġġa l-ftehim dwar ċertifikazzjoni komuni u aġenzija aktar b'saħħitha (stqarrija għall-istampa, 19/12/2018)

L-istati membri tal-UE qed jikkooperaw dejjem aktar fuq iċ-ċiberdifiża, bil-ħsieb li jsaħħu l-kapaċitajiet tagħhom.

Sabiex jintlaħaq dan l-għan, il-Kunsill adotta verżjoni aġġornata tal-qafas ta' politika għaċ-ċiberdifiża tal-UE.

L-aġġornament jippermetti lill-UE tieħu kont tal-isfidi tas-sigurtà li qed jinbidlu minn mindu ġie adottat il-qafas inizjali fl-2014. Huwa jidentifika l-oqfsa ta' prijorità għaċ-ċiberdifiża u jiċċara r-rwoli ta' dawk involuti.

Fl-aħħar laqgħa tiegħu fit-18 ta' Ottubru 2018, il-Kunsill Ewropew appella għal miżuri biex tinbena ċibersigurtà b'saħħitha fl-UE.

Il-mexxejja tal-UE rreferew b'mod partikolari għal miżuri restrittivi li jistgħu jirrispondu għall-attakki ċibernetiċi u jkunu ta' deterrent għalihom.

• Ċiberdifiża: Il-Kunsill jaġġorna l-qafas politiku (19/11/2018)

Il-mexxejja tal-UE appellaw għal aktar tisħiħ tad-deterrenza, ir-reżiljenza u r-rispons tal-UE kontra t-theddid ibridu, ċibernetiku, kif ukoll kimiku, bijoloġiku, radjoloġiku u nukleari (CBRN).

Huma għamlu dan b'rabta mal-attakki ċibernetiċi kontra l-Organizzazzjoni għall-Projbizzjoni ta' Armi Kimiċi (OPCW) f'The Hague.

Il-Kunsill Ewropew appella wkoll biex in-negozjati dwar il-proposti kollha taċ-ċibersigurtà jiġu konklużi "qabel tmiem il-leġislatura" - f'April 2019.

• Il-konklużjonijiet tal-Kunsill Ewropew, it-18 ta' Ottubru 2018

Il-Kunsill beda negozjati mal-Parlament Ewropew bil-ħsieb li jilħaq qbil dwar l-Att dwar iċ-Ċibersigurtà sal-aħħar tas-sena. L-approċċ ġenerali dwar din il-proposta ntlaħaq fit-8 ta' Ġunju.

L-Att dwar iċ-Ċibersigurtà għandu l-għan li jsaħħaħ ir-reżiljenza ċibernetika billi jistabbilixxi qafas ta' ċertifikazzjoni fl-UE kollha għall-prodotti, is-servizzi u l-proċessi tal-ICT. Il-proposta ttejjeb ukoll l-Aġenzija attwali tal-UE dwar is-Sigurtà tan-Netwerks u l-Informazzjoni (ENISA).

• L-UE ser toħloq qafas komuni ta' ċertifikazzjoni taċ-ċibersigurtà u ssaħħaħ l-aġenzija tagħha: il-Kunsill jaqbel dwar il-pożizzjoni tiegħu (stqarrija għall-istampa, 08/06/2018)

Il-Kunsill adotta konklużjonijiet dwar attivitajiet ċibernetiċi malizzjużi li jissottolinjaw l-importanza ta' ċiberspazju globali, miftuħ, liberu, stabbli u sigur fejn japplikaw b'mod sħiħ id-drittijiet tal-bniedem u l-libertajiet fundamentali u l-istat tad-dritt.

Il-Kunsill esprima t-tħassib serju tiegħu dwar iż-żieda fil-kapaċità u r-rieda tal-atturi ta' stati mhux tal-UE u dawk mhux statali li jsegwu l-objettivi tagħhom permezz ta' attivitajiet ċibernetiċi malizzjużi. L-UE ser tkompli żżid il-kapaċitajiet tagħha biex tindirizza t-theddid ċibernetiku.

• Rispons għal attivitajiet ċibernetiċi malizzjużi: il-Kunsill jadotta konklużjonijiet (16/04/2018)

L-istituzzjonijiet tal-UE ħadu pass importanti fit-tisħiħ tal-kooperazzjoni tagħhom biex jikkumbattu attakki ċibernetiċi.

Ftehim interistituzzjonali stabbilixxa Skwadra ta' Rispons f'Emerġenza relatata mal-Kompjuters (CERT-UE) permanenti li tkopri l-istituzzjonijiet, il-korpi u l-aġenziji kollha tal-UE.

CERT-UE ser tiżgura rispons kkoordinat tal-UE għal attakki ċibernetiċi fuq l-istituzzjonijiet tagħha.

• L-istituzzjonijiet tal-UE jsaħħu l-kooperazzjoni sabiex jiġġieldu l-attakki ċibernetiċi (stqarrija għall-istampa, 20/12/2017)

Il-Kunsill qabel li jistabbilixxi pjan ta' azzjoni għar-riforma taċ-ċibersigurtà tal-UE.

Il-ministri saħqu li s-sigurtà online hija essenzjali għaċ-ċittadini u n-negozji Ewropej.

• Kunsill Telekomunikazzjoni, 24/10/2017

Il-ministri għall-ġustizzja tal-UE komplew jiddiskutu kif tittejjeb il-ġustizzja kriminali fiċ-ċiberspazju. Huma adottaw żewġ settijiet ta' konklużjonijiet li jiddefinixxu miżuri prattiċi biex titjieb il-kooperazzjoni, kif ukoll skeda ta' żmien għal aktar azzjoni.

• konklużjonijiet dwar it-titjib tal-ġustizzja kriminali fiċ-ċiberspazju
• konklużjonijiet tal-Kunsill dwar in-network ġudizzjarju Ewropew taċ-ċiberkriminalità

• Il-ġlieda kontra l-attivitajiet kriminali fiċ-ċiberspazju: il-Kunsill jaqbel dwar miżuri prattiċi u l-passi li jmiss (09/06/2016)