Miżuri tal-UE għall-prevenzjoni tar-radikalizzazzjoni
Għalkemm ir-responsabbiltà ewlenija biex jiġi indirizzat it-terroriżmu hija f'idejn l-istati membri, l-UE żviluppat diversi għodod biex tipprevjeni r-radikalizzazzjoni.
L-UE u l-istati membri tagħha qed jaħdmu flimkien biex jipprevjenu r-radikalizzazzjoni fl-Ewropa. Ir-radikalizzazzjoni mhix fenomenu ġdid, iżda fl-aħħar snin saret theddida aktar serja, speċjalment minħabba l-iżvilupp ta' teknoloġiji ġodda u l-użu dejjem akbar tal-internet u tal-media soċjali.
Kif l-UE tiġġieled il-propaganda terroristika
L-UE u l-istati membri tagħha qed jaħdmu flimkien biex jipprevjenu r-radikalizzazzjoni fl-Ewropa. Ir-radikalizzazzjoni mhix fenomenu ġdid, iżda fl-aħħar snin saret theddida aktar serja, speċjalment minħabba l-iżvilupp ta' teknoloġiji ġodda u l-użu dejjem akbar tal-internet u tal-media soċjali.
Fid-29 ta' April 2021, l-UE adottat regolament dwar l-indirizzar tad-disseminazzjoni ta' kontenut terroristiku online.
L-awtoritajiet kompetenti fl-istati membri għandhom is-setgħa li joħorġu ordnijiet ta' tneħħija lill-fornituri ta' servizzi ta' hosting fejn jirrikjedulhom ineħħu kontenut terroristiku jew jiddiżattivaw l-aċċess għalih fl-istati membri kollha. Il-pjattaformi tal-internet imbagħad għandhom ineħħu jew jiddiżattivaw l-aċċess għall-kontenut fi żmien siegħa.
Ir-regoli japplikaw għall-fornituri kollha li joffru servizzi fl-UE, irrispettivament jekk għandhomx is-sede ewlenija tagħhom f'wieħed mill-istati membri jew le.
Il-fornituri ta' servizzi ta' hosting esposti għal kontenut terroristiku għandhom bżonn jieħdu miżuri speċifiċi biex jindirizzaw l-użu ħażin tal-pjattaformi tagħhom u biex jipproteġu s-servizzi tagħhom mid-disseminazzjoni ta' kontenut terroristiku. Id-deċiżjoni dwar l-għażla tal-miżuri tibqa' f'idejn il-fornitur ta' servizzi ta' hosting.
Ir-regolament il-ġdid jimmira lejn kontenut bħal testi, stampi, reġistrazzjonijiet awdjo jew filmati, inkluż trażmissjonijiet diretti, li:
- jinċitaw jew jikkontribwixxu għal atti terroristiċi
- jagħtu struzzjonijiet dwar kif jitwettqu reati
- jissolleċitaw il-parteċipazzjoni fi gruppi terroristiċi
Il-leġiżlazzjoni tipprevedi wkoll definizzjoni tal-kontenut terroristiku u tistabbilixxi b'mod ċar il-kamp ta' applikazzjoni tagħha sabiex tiżgura r-rispett sħiħ tad-drittijiet fundamentali. Tinkludi wkoll rimedji effikaċi għall-fornituri tal-kontenut u għall-fornituri tas-servizz biex iressqu lment meta jitneħħa l-kontenut.
Ir-regoli l-ġodda ser japplikaw mis-7 ta' Ġunju 2022.
Fl-2015, l-Europol ħolqot unità speċjali biex tindirizza l-propaganda terroristika fuq l-internet. L-Unità tal-UE ta' Indikazzjoni ta' Kontenut fuq l-Internet (EU IRU) għandha l-għan li taqbad u tinvestiga kontenut estremista terroristiku u vjolenti online u li tappoġġa lill-istati membri fuq dan is-suġġett.
Fl-2015, l-UE varat in-Network ta' Sensibilizzazzjoni dwar ir-Radikalizzazzjoni (RAN). L-RAN huwa network ta' aktar minn 6 000 prattikant tal-ewwel linja minn madwar l-Ewropa, bħal għalliema, uffiċjali tal-pulizija u persunal tal-ħabs, li jippromwovi l-iskambju tal-aħjar prattiki. Fost affarijiet oħra, il-ħidma tagħhom għandha l-għan li ttejjeb il-fehim ta' għaliex xi persuni huma aktar vulnerabbli għar-radikalizzazzjoni, u x'azzjonijiet jistgħu jittieħdu biex dawn jiġu protetti.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Sa mill-2015, il-Forum tal-UE dwar l-Internet laqqa' flimkien il-pajjiżi tal-UE, il-pjattaformi online, l-Europol, membri tad-dinja akkademja u s-sħab internazzjonali. Huwa jipprovdi pjattaforma għall-iskambju ta' informazzjoni dwar xejriet fl-użu tal-internet mit-terroristi, u kif dan l-użu qed jevolvi, kif ukoll - mill-2019 - biex jiġġieled l-abbuż sesswali tat-tfal online.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Ir-radikalizzazzjoni fl-Ewropa
Il-biċċa l-kbira tal-awturi tal-attakki terroristiċi li seħħew fl-Ewropa fl-aħħar ftit snin kienu ċittadini Ewropej, li twieldu fl-Ewropa u ġew radikalizzati mingħajr ma ħallew pajjiżhom.
Ir-radikalizzazzjoni tista' sseħħ għal raġunijiet differenti, fosthom it-twemmin reliġjuż, l-ideoloġiji, it-twemmin politiku u l-preġudizzji kontra gruppi partikolari ta' nies. Ir-radikalizzazzjoni taż-żgħażagħ għadha ta' tħassib kbir.
Hemm diversi modi kif persuni jistgħu jiġu radikalizzati: mill-membri tal-familja tagħhom jew mill-ħbieb, permezz ta' kuntatt dirett ma' gruppi estremisti jew permezz tal-internet.
It-teknoloġiji tal-komunikazzjoni online għamluha aktar faċli għat-terroristi biex jikkomunikaw bejn il-fruntieri u amplifikaw il-propaganda terroristika u l-firxa tal-estremiżmu. It-terroristi jużaw il-media soċjali u d-dark web biex jirradikalizzaw, jirreklutaw, jinċitaw il-vjolenza u jiffaċilitaw it-twettiq ta' attakki terroristiċi.
F'dawn l-aħħar snin, applikazzjonijiet ta' messaġġerija kriptata, bħal WhatsApp jew Telegram, intużaw minn ħafna biex ixerrdu l-propaganda terroristika u jikkoordinaw u jippjanaw l-attakki.
Filwaqt li l-ħabsijiet għadhom l-aktar art fertili għar-radikalizzazzjoni, xi gruppi estremisti wkoll kienu qed jirreklutaw persuni fl-iskejjel, l-universitajiet u postijiet ta' qima, bħall-moskej.
X'qed tagħmel l-UE biex tindirizza t-terroriżmu?
Agħmel dan il-vjaġġ fuq għoxrin sena u ara kif il-pajjiżi tal-UE tul dan iż-żmien ikkooperaw dejjem aktar mill-qrib fil-ġlieda kontra t-terroriżmu: billi pprevjenu lit-terroristi milli jixtru armi jew jibnu bombi, u l-ewwel u qabel kollox ippruvaw jiġġieldu r-radikalizzazzjoni.
L-aħħar reviżjoni: 7 ta' Ġunju 2022