Amlíne - Rochtain níos fearr ar r-fhianaise i ngleic na coireachta

Ghlac an Chomhairle cinneadh lena n-údaraítear do na Ballstáit an Dara Prótacal Breise a ghabhann leis an gCoinbhinsiún maidir le Cibearchoireacht (Coinbhinsiún Bhúdaipeist) a dhaingniú, chun leas an Aontais.

Cuirfidh an prótacal feabhas ar rochtain trasteorann ar fhianaise leictreonach atá le n-úsáid in imeachtaí coiriúla. Cuideoidh sé le comhrac na cibearchoireachta agus cineálacha eile coireachta go domhanda tríd an gcomhar idir na Ballstáit agus tríú tíortha a shimpliú, agus ardleibhéal cosanta do dhaoine aonair mar aon le comhlíonadh chaighdeáin cosanta sonraí an Aontais á gcinntiú ag an am céanna.

• Rochtain ar r-fhianaise: údarú tugtha ag an gComhairle do na Ballstáit comhaontú idirnáisiúnta a dhaingniú (preaseisiúint, an 14 Feabhra 2023)

Dhearbhaigh ambasadóirí Bhallstáit an Aontais an comhaontú ar thángthas air idir Uachtaránacht na Comhairle agus Parlaimint na hEorpa i ndáil leis an dréachtrialachán agus an dréacht-treoir maidir le rochtain trasteorann ar r-fhianaise.

Leis na téacsanna a comhaontaíodh, beidh na húdaráis ábhartha in ann orduithe breithiúnacha ar fhianaise leictreonach a sheoladh go díreach chuig soláthraithe seirbhíse i mBallstát eile.

• Comhaontú le Parlaimint na hEorpa dearbhaithe ag an gComhairle i ndáil leis na rialacha nua chun rochtain trasteorann ar r-fhianaise a fheabhsú (preaseisiúint, an 25 Eanáir 2023)

Ghlac an Chomhairle cinneadh lena n-údaraítear do na Ballstáit, chun leas an Aontais, an dara prótacal breise a ghabhann leis an gcoinbhinsiún maidir le cibearchoireacht (Coinbhinsiún Bhúdaipeist) a d’eagraigh Comhairle na hEorpa a shíniú.

Cuirfidh an prótacal sin feabhas ar rochtain trasteorann ar fhianaise leictreonach chun gur féidir í a úsáid in imeachtaí coiriúla. Cuirfidh sé le comhrac na cibearchoireachta agus cineálacha eile coireachta ar an leibhéal domhanda tríd an gcomhar idir na Ballstáit agus tríú tíortha a shimpliú, agus ardleibhéal cosanta á chinntiú do dhaoine aonair agus comhlíonadh chaighdeáin an Aontais maidir le cosaint sonraí á chinntiú ag an am céanna.

• Rochtain ar r-fhianaise: Údarú tugtha ag an gComhairle do na Ballstáit comhaontú idirnáisiúnta a shíniú (preaseisiúint, an 5 Aibreán 2022)

Ghlac an Chomhairle dhá shainordú lena dtugtar údarás don Choimisiún:

• caibidlíocht a dhéanamh thar ceann an Aontais Eorpaigh i leith comhaontú leis na Stáit Aontaithe chun rochtain ar r-fhianaise a éascú chun críche comhair bhreithiúnaigh in ábhair choiriúla
• páirt a ghlacadh sa chaibidlíocht i gComhairle na hEorpa ar an dara prótacal breise a ghabhann leis an gCoinbhinsiún maidir leis an gCibearchoireacht

Is é is aidhm don chomhaontú sin agus don dara prótacal breise rochtain ar r-fhianaise a éascú, amhail ríomhphoist nó doiciméid atá stóráilte ar sheirbhísí néalríomhaireachta, chun gur féidir iad a úsáid in imeachtaí coiriúla. Má thugtar i gcrích amach anseo iad, comhlánóidh siad creat an Aontais maidir le rochtain ar r-fhianaise atá á phlé faoi láthair ag institiúidí an Aontais agus ar ghlac an Chomhairle a seasamh ina leith i mí na Nollag 2018 agus mí an Mhárta 2019.

• Sainordú tugtha ag an gComhairle don Choimisiún chun caibidlíocht a dhéanamh i leith comhaontuithe idirnáisiúnta maidir le r-fhianaise in ábhair choiriúla (preaseisiúint, 06/06/2019)

Tháinig an Chomhairle ar a seasamh inniu i ndáil leis an treoir maidir le hionadaithe dlíthiúla a cheapadh d'fhonn fianaise a bhailiú in imeachtaí coiriúla. Beidh an treoir sin ina huirlis riachtanach do chur chun feidhme an rialacháin a bheidh ann amach anseo maidir le horduithe Eorpacha tíolactha agus caomhnaithe i gcomhair fianaise leictreonach in ábhair choiriúla, ar rialachán é ar ghlac an Chomhairle a seasamh ina leith i mí na Nollag seo caite. Leagann sé amach na rialacha maidir le hionadaithe dlíthiúla soláthraithe seirbhíse a cheapadh, a bhfuil sé mar ról acu a leithéid d'orduithe a fháil agus freagairt orthu.

• Pacáiste r-fhianaise: A seasamh comhaontaithe ag an gComhairle maidir le rialacha chun ionadaithe dlíthiúla a cheapadh d'fhonn fianaise a bhailiú (preaseisiúint, 08/03/2019)

Chomhaontaigh an Chomhairle a seasamh i ndáil leis an rialachán maidir le horduithe Eorpacha chun fianaise a thabhairt ar aird agus orduithe caomhnaithe Eorpacha i gcomhair r-fhianaise in ábhair choiriúla. Tá sí réidh anois tús a chur leis an gcaibidlíocht le Parlaimint na hEorpa leis an aidhm go dtiocfar ar chomhaontú roimh dheireadh an téarma pharlaimintigh.

• Rialachán maidir le rochtain trasteorann ar r-fhianaise: An Chomhairle tagtha ar chomhaontú faoina seasamh (preaseisiúint, 7/12/2018)

Phléigh na hairí ceartais an rialachán maidir le horduithe chun fianaise a thabhairt ar aird, agus na horduithe caomhnaithe Eorpacha. Bhí cuid mhaith de na Ballstáit sásta teacht ar chomhréiteach agus plé a dhéanamh maidir le nós imeachta um fhógra de chineál éigin a áireamh ann. Leanfar den obair ar leibhéal na saineolaithe féachaint le sainmhíniú níos fearr a thabhairt ar na príomhghnéithe a chuirfí in a leithéid de ''fhógra''.

• An Chomhairle Ceartais agus Gnóthaí Baile, 11-12/10/2018

Phléigh na hairí ceartais agus gnóthaí baile an pacáiste maidir le r-fhianaise. I dtaca leis an ngníomh CLOUD, a glacadh i Stáit Aontaithe Mheiriceá le déanaí, bhí an Chomhairle i bhfách le cur chuige amháin ar leibhéal an Aontais. Molann sí don Choimisiún leanúint den teagmháil atá ar siúl aige le húdaráis SAM agus sainordú caibidlíochta a thíolacadh go práinneach.

• An Chomhairle Ceartais agus Gnóthaí Baile, 04-05/06/2018

Thíolaic an Coimisiún Eorpach pacáiste tograí reachtacha maidir le r-fhianaise:

• rialachán maidir le horduithe Eorpacha chun fianaise a thabhairt ar aird agus orduithe caomhnaithe Eorpacha i gcomhair fianaise leictreonach in ábhair choiriúla
• treoir lena leagtar síos rialacha comhchuibhithe maidir le hionadaithe dlíthiúla a cheapadh chun críche fianaise a bhailiú in imeachtaí coiriúla

Ghlac an Chomhairle conclúidí maidir leis an teachtaireacht ón gCoimisiún maidir le cibearshlándáil théagartha a chruthú don Aontas. Sna conclúidí uaithi, d'iarr an Chomhairle ar an gCoimisiún togra reachtach a thíolacadh i dtús na bliana 2018 chun an rochtain trasteorann ar fhianaise leictreonach a fheabhsú. D'iarr sí freisin ar an gCoimisiún tuarascáil a thíolacadh faoi mhí na Nollaig 2017 maidir leis an dul chun cinn a bhí déanta chun bearta praiticiúla a chur chun feidhme a d'fheabhsódh an rochtain trasteorann ar fhianaise leictreonach.

• Conclúidí maidir leis an teachtaireacht chomhpháirteach maidir le cibearshlándáil théagartha a chruthú don Aontas

Sna conclúidí uaithi i mí an Mheithimh 2017, mheas an Chomhairle Eorpach gur den riachtanas rochtain éifeachtach ar fhianaise leictreonach a bheith ann chun an choireacht thromchúiseach agus an sceimhlitheoireacht a chomhrac.

• Conclúidí ón gComhairle Eorpach, 22-23/06/2017

Ghlac an Chomhairle conclúidí maidir leis an gceartas coiriúil sa chibearspás a fheabhsú. Sna conclúidí uaithi, ba dhíol béime ag an gComhairle an méadú a bhí ag teacht ar thábhacht na r-fhianaise in imeachtaí coiriúla i gcás gach cineál coireachta agus go háirithe i gcás na sceimhlitheoireachta. Leagtar amach sna conclúidí bearta nithiúla maidir leis an obair agus leis an ngníomhaíocht a eascróidh as na conclúidí.

• Comhrac i gcoinne gníomhaíochtaí coiriúla sa chibearspás: Bearta praiticiúla, mar aon leis na chéad chéimeanna eile, comhaontaithe ag an gComhairle (preaseisiúint, 9/6/2016)

Sa ráiteas comhpháirteach uathu, a eisíodh dhá lá tar éis na n-ionsaithe sceimhlitheoireachta sa Bhruiséil, chuir na hairí ceartais agus gnóthaí baile i dtreis nár mhór bealaí níos gasta agus níos éifeachtaí a aimsiú chun teacht ar fhianaise dhigiteach.

• Ráiteas comhpháirteach ó airí ceartais agus gnóthaí baile an Aontais, 24 Márta 2016