Kronoloġija - Aċċess aħjar għal evidenza elettronika fil-ġlieda kontra l-kriminalità

Il-Kunsill adotta deċiżjoni li tawtorizza lill-istati membri jirratifikaw, fl-interess tal-UE, it-Tieni Protokoll Addizzjonali għall-Konvenzjoni dwar iċ-Ċiberkriminalità (il-Konvenzjoni ta' Budapest).

Il-protokoll ser itejjeb l-aċċess transfruntier għall-evidenza elettronika biex tintuża fi proċedimenti kriminali. Ser jikkontribwixxi għall-ġlieda kontra ċ-ċiberkriminalità u forom oħra ta' kriminalità fil-livell globali billi jissimplifika l-kooperazzjoni bejn l-istati membri u pajjiżi terzi, filwaqt li jiżgura livell għoli ta' protezzjoni għall-individwi u konformità mal-istandards tal-protezzjoni tad-data tal-UE.

• Aċċess għall-evidenza elettronika: il-Kunsill jawtorizza lill-istati membri jirratifikaw ftehim internazzjonali (stqarrija għall-istampa, 14 ta' Frar 2023)

Illum l-ambaxxaturi tal-istati membri għall-UE kkonfermaw il-qbil li ntlaħaq bejn il-presidenza tal-Kunsill u l-Parlament Ewropew dwar l-abbozz ta' regolament u l-abbozz ta' direttiva dwar l-aċċess transfruntier għall-evidenza elettronika.

It-testi maqbula ser jagħmlu possibbli li l-awtoritajiet rilevanti jindirizzaw ordnijiet ġudizzjarji għal evidenza elettronika direttament lil fornituri ta' servizzi fi stat membru ieħor.

• Il-Kunsill jikkonferma qbil mal-Parlament Ewropew dwar regoli ġodda biex jittejjeb l-aċċess transfruntier għall-evidenza elettronika (stqarrija għall-istampa, 25 ta' Jannar 2023)

Il-Kunsill adotta deċiżjoni li tawtorizza lill-istati membri jiffirmaw, fl-interess tal-UE, it-tieni protokoll addizzjonali għall-konvenzjoni dwar iċ-ċiberkriminalità tal-Kunsill tal-Ewropa (il-konvenzjoni ta' Budapest).

Dan il-protokoll ser itejjeb l-aċċess transfruntier għall-evidenza elettronika biex jintużaw fi proċedimenti kriminali. Ser tikkontribwixxi għall-ġlieda kontra ċ-ċiberkriminalità u forom oħra ta' kriminalità fil-livell globali billi jissimplifika l-kooperazzjoni bejn l-istati membri u pajjiżi terzi, filwaqt li jiżgura livell għoli ta' protezzjoni għall-individwi u l-konformità mal-istandards tal-protezzjoni tad-data tal-UE.

• Aċċess għall-evidenza elettronika: Il-Kunsill jawtorizza lill-istati membri jiffirmaw ftehim internazzjonali (stqarrija għall-istampa, 5 ta' April 2022)

Il-Kunsill adotta żewġ mandati li jawtorizzaw lill-Kummissjoni:

• tinnegozja f'isem l-UE ftehim mal-Istati Uniti li jiffaċilita l-aċċess għall-evidenza elettronika għall-finijiet tal-koperazzjoni ġudizzjarja f'materji kriminali
• tieħu sehem fin-negozjati fil-Kunsill tal-Ewropa dwar it-tieni protokoll addizzjonali għall-Konvenzjoni dwar iċ-Ċiberkriminalità

It-tnejn li huma għandhom l-għan li jiffaċilitaw l-aċċess għal evidenza elettronika, bħal emails jew dokumenti li jinsabu fuq il-cloud, biex jintużaw fi proċedimenti kriminali. Jekk aktar 'il quddiem jiġu konklużi, huma ser jikkomplementaw il-qafas tal-UE dwar l-aċċess għal evidenza elettronika li bħalissa qed jiġi diskuss mill-istituzzjonijiet tal-UE u li dwaru l-Kunsill adotta l-pożizzjoni tiegħu f’Diċembru 2018 u f’Marzu 2019.

• Il-Kunsill jagħti mandat lill-Kummissjoni biex tinnegozja ftehimiet internazzjonali dwar evidenza elettronika f'materji kriminali (stqarrija għall-istampa, 06/06/2019)

Il-Kunsill qabel dwar il-pożizzjoni tiegħu dwar id-direttiva dwar il-ħatra ta' rappreżentanti legali għall-finijiet ta' ġbir tal-evidenza fi proċedimenti kriminali. Din id-direttiva ser tkun għodda essenzjali għall-applikazzjoni tar-regolament futur dwar l-ordnijiet ta' produzzjoni u ta' preservazzjoni Ewropej għall-evidenza elettronika f'materji kriminali, li l-Kunsill adotta l-pożizzjoni tiegħu dwaru f'Diċembru li għadda. Hija tistipula r-regoli għall-ħatra tar-rappreżentanti legali tal-fornituri tas-servizzi, li r-rwol tagħhom huwa li jirċievu u jwieġbu għal tali ordnijiet.

• Pakkett dwar l-evidenza elettronika: Il-Kunsill jilħaq qbil dwar il-pożizzjoni tiegħu dwar regoli biex jinħatru rappreżentanti legali għall-ġbir ta' evidenza (stqarrija għall-istampa, 08/03/2019)

Il-Kunsill qabel dwar il-pożizzjoni tiegħu għal regolament dwar l-ordnijiet ta' produzzjoni u ta' preservazzjoni Ewropej għall-evidenza elettronika f'materji kriminali. Issa huwa lest biex jibda n-negozjati mal-Parlament Ewropew bil-ħsieb li jintlaħaq qbil qabel tmiem il-leġislatura.

• Regolament dwar l-aċċess transfruntier għal evidenza elettronika: Il-Kunsill jaqbel dwar il-pożizzjoni tiegħu (stqarrija għall-istampa, 07/12/2018)

Il-ministri għall-ġustizzja ddiskutew ir-regolament dwar l-ordnijiet Ewropej ta' produzzjoni u preservazzjoni. Ħafna stati membri kienu lesti li jsibu kompromess u jiddiskutu l-inklużjoni ta' xi tip ta' proċedura ta' notifika. Il-ħidma ser tkompli fil-livell tal-esperti biex jippruvaw jiddefinixxu aħjar il-karatteristiċi ewlenin possibbli ta' "notifika" bħal din.

• Kunsill Ġustizzja u Affarijiet Interni, 11-12/10/2018

Il-ministri għall-ġustizzja u għall-affarijiet interni ddiskutew il-pakkett tal-evidenza elettronika. Rigward l-adozzjoni tal-CLOUD act tal-Istati Uniti, il-Kunsill kien favur approċċ komuni fil-livell tal-UE. Huwa ħeġġeġ lill-Kummissjoni biex tkompli l-kuntatti tagħha mal-awtoritajiet tal-Istati Uniti u biex b'mod urġenti tressaq mandat ta' negozjar.

• Kunsill Ġustizzja u Affarijiet Interni, 04-05/06/2018

Il-Kummissjoni Ewropea ppreżentat pakkett ta' proposti leġislattivi dwar evidenza elettronika:

• regolament dwar l-ordnijiet ta' produzzjoni u ta' preservazzjoni Ewropej għal evidenza elettronika f'materji kriminali
• direttiva li tistabbilixxi regoli armonizzati dwar il-ħatra ta' rappreżentanti legali għall-finijiet tal-ġbir tal-evidenza fi proċeduri kriminali

Il-Kunsill adotta konklużjonijiet rigward il-komunikazzjoni tal-Kummissjoni dwar il-bini ta' ċibersigurtà b'saħħitha għall-UE. Fil-konklużjonijiet tiegħu, il-Kunsill appella lill-Kummissjoni sabiex tippreżenta proposta leġislattiva fil-bidu tal-2018 biex jittejjeb l-aċċess transkonfinali għall-evidenza elettronika. Huwa appella wkoll lill-Kummissjoni biex tippreżenta rapport ta' progress sa Diċembru 2017 dwar l-implimentazzjoni ta' miżuri prattiċi biex jittejjeb l-aċċess transkonfinali għall-evidenza elettronika.

• Konklużjonijiet rigward il-komunikazzjoni konġunta dwar il-bini ta' ċibersigurtà b'saħħitha għall-UE

Fil-konklużjonijiet tiegħu ta' Ġunju 2017, il-Kunsill Ewropew qies li aċċess effettiv għal evidenza elettronika kienet essenzjali fil-ġlieda kontra l-kriminalità serja u t-terroriżmu.

• Konklużjonijiet tal-Kunsill Ewropew, 22-23/06/2017

Il-Kunsill adotta konklużjonijiet dwar it-titjib tal-ġustizzja kriminali fiċ-ċiberspazju. Fil-konklużjonijiet tiegħu, il-Kunsill enfasizza l-importanza li qed tiżdied tal-evidenza elettronika fil-proċedimenti kriminali f'kull tip ta' kriminalità, u b'mod partikolari għat-terroriżmu. Il-konklużjonijiet jistabbilixxu miżuri konkreti għal segwitu u azzjoni futuri.

• Il-ġlieda kontra l-attivitajiet kriminali fiċ-ċiberspazju: Il-Kunsill jaqbel dwar miżuri prattiċi u l-passi li jmiss (stqarrija għall-istampa, 9/6/2016)

Il-ministri għall-ġustizzja u l-affarijiet interni enfasizzaw il-ħtieġa li jinstabu modi biex tinkiseb evidenza diġitali aktar malajr u b'mod effettiv, fi stqarrija konġunta maħruġa jumejn wara l-attakki terroristiċi fi Brussell.

• Dikjarazzjoni konġunta mill-ministri tal-UE għall-ġustizzja u l-affarijiet interni, 24 ta' Marzu 2016