"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Ekonomiċi u Finanzjarji, 13 ta' Novembru 2025
Riżultati ewlenin
Waqt il-laqgħa tal-Kunsill, il-ministri qablu dwar miżuri biex tiġi indirizzata ż-żieda qawwija ta' pakketti żgħar li qed jimlew is-suq tal-UE. Il-Kunsill iddiskuta wkoll ir-reviżjoni tad-direttiva dwar it-tassazzjoni fuq l-enerġija u approva konklużjonijiet annwali dwar l-istatistika tal-UE. Waqt il-kolazzjon qabel il-laqgħa, il-ministri ddiskutew il-finanzjament għall-Ukrajna u t-tassazzjoni korporattiva internazzjonali.
Nixtieq nirringrazzja lill-istati membri kollha għal laqgħa kostruttiva ħafna tal-ECOFIN fejn ikkonfermaw l-impenn tagħhom li jindirizzaw il-ħtiġijiet ta' finanzjament tal-Ukrajna għas-snin li ġejjin. Qsamna l-fehmiet tagħna dwar l-għażliet għall-appoġġ, b'mod partikolari l-proposta tal-Kummissjoni dwar is-self marbut mar-riparazzjonijiet. Il-presidenza Daniża tqis il-proposta mressqa mill-Kummissjoni bħala l-aħjar għażla u l-aktar waħda realistika, li għandha tingħata l-ogħla prijorità bil-ħsieb li jittieħdu deċiżjonijiet fil-Kunsill Ewropew f'Diċembru.
Ninsabu kuntenti wkoll li lħaqna qbil politiku dwar it-tneħħija tal-limitu doganali ta' €150, li jiżgura li d-dazji doganali jitħallsu mill-ewwel euro, pass ewlieni għall-kompetizzjoni ġusta u l-kompetittività tan-negozji Ewropej.
Stephanie Lose, ministru għall-finanzi tad-Danimarka
Tassazzjoni fuq l-enerġija
Il-Kunsill kellu dibattitu ta' orjentazzjoni dwar ir-reviżjoni tad-direttiva dwar it-tassazzjoni fuq l-enerġija.
Il-ministri qasmu l-fehmiet tagħhom dwar it-test ta' kompromess. Filwaqt li ħafna ministri kienu lesti jappoġġaw qbil dwar il-kompromess, oħrajn ħassew li kienet meħtieġa aktar ħidma f'ċerti aspetti, prinċipalment relatati mal-kompetittività.
B'mod partikolari, xi ministri ma setgħux jaqblu mad-direttiva minħabba tħassib speċifiku dwar kwistjonijiet bħad-dispożizzjonijiet dwar l-indiċjar, it-tassazzjoni tal-fjuwil użat fis-setturi marittimi u tal-avjazzjoni, u t-trattament tat-taxxa tal-gass naturali u l-gass naturali likwifikat, kif ukoll rabtiet ma' fajls oħra relatati mal-klima.
Fil-konklużjoni tas-sessjoni, il-Presidenza ddispjaċiha li f'dan il-punt, il-Kunsill ma kienx jidher f'pożizzjoni li jaqbel dwar it-test ta' kompromess.
Illum il-Kunsill ħa azzjoni biex jindirizza l-influss lejn l-UE ta' pakketti żgħar li bħalissa mhumiex suġġetti għal dazji doganali - problema li twassal għal kompetizzjoni inġusta għall-bejjiegħa tal-UE u li tqajjem tħassib ambjentali.
Ninsab kuntenta ħafna li lħaqna qbil dwar l-eliminazzjoni tal-limitu doganali ta' €150. Aħna niżguraw li d-dazji jitħallsu mill-ewwel euro, u dan joħloq kundizzjonijiet ekwi għan-negozji Ewropej u jillimita l-influss ta' oġġetti bi prezz baxx. Qbilna wkoll dwar il-ħtieġa li naħdmu lejn soluzzjoni temporanja malajr kemm jista' jkun fl-2026.
Stephanie Lose, ministru għall-affarijiet ekonomiċi tad-Danimarka
L-ewwel nett, il-ministri għall-finanzi tal-UE qablu li jabolixxu r-regola attwali li tippermetti li oġġetti b'valur ta' inqas minn €150 jidħlu fl-UE mingħajr ma jitħallsu dazji doganali. Ladarba l-pjattaforma tad-data doganali tal-UE - il-pjattaforma ċentrali proposta tal-UE għall-interazzjoni mad-dwana u t-tisħiħ tal-kontrolli - issir operazzjonali, li bħalissa mistenni jsir fl-2028, id-dazji doganali rilevanti ser japplikaw għall-merkanzija kollha li tidħol fl-UE.
Minħabba l-urġenza tas-sitwazzjoni, illum il-Kunsill impenja ruħu wkoll li jaħdem lejn soluzzjoni sempliċi u temporanja biex jiġu imposti dazji doganali fuq dan it-tip ta' merkanzija malajr kemm jista' jkun fl-2026 u sakemm il-pjattaforma tad-data doganali ssir operazzjonali fl-2028. Il-ħidma biex tiġi żviluppata s-soluzzjoni ser tkompli fil-ġimgħat li ġejjin.
Il-Kunsill adotta deċiżjonijiet ta' implimentazzjoni li japprovaw emendi mmirati ppreżentati mill-Belġju, l-Estonja, il-Kroazja, il-Lussemburgu, ir-Rumanija u s-Slovakkja għall-pjanijiet għall-irkupru u r-reżiljenza tagħhom.
Il-Faċilità għall-Irkupru u r-Reżiljenza hija l-programm tal-UE ta' appoġġ finanzjarju fuq skala kbira b'rispons għall-isfidi li ħolqot il-pandemija tal-COVID-19 għall-ekonomija Ewropea. Din hija l-qofol ta' NextGenerationEU, strument ta' rkupru temporanju li jippermetti lill-Kummissjoni tiġbor fondi sabiex tgħin fit-tiswija tad-dannu ekonomiku u soċjali immedjat li ġie kkawżat mill-pandemija.
Biex jibbenefikaw mill-faċilità, l-istati membri jridu jippreżentaw pjanijiet għall-irkupru u r-reżiljenza (RRPs) lill-Kummissjoni, li jistabbilixxu r-riformi u l-investimenti li beħsiebhom jimplimentaw sa tmiem Awwissu 2026.
Sal-lum, ġew żborżati madwar €367 biljun mill-Faċilità għall-Irkupru u r-Reżiljenza.
Il-Kunsill approva konklużjonijiet dwar il-progress li sar fil-prijoritajiet statistiċi tal-UE.
Statistika komparabbli, affidabbli u ta' kwalità għolja hija ingredjent bażiku għal tfassil tal-politika bbażat fuq l-evidenza, speċjalment għall-koordinazzjoni tal-politika ekonomika.
Għalhekk, il-konklużjonijiet annwali tal-Kunsill dwar l-istatistika jirrieżaminaw il-kwalità, il-puntwalità u r-rilevanza tal-istatistika uffiċjali tal-UE, inkluż dawk li jirfdu l-governanza ekonomika tal-UE.
Il-konklużjonijiet iqisu wkoll kif l-istatistika tal-UE tista' tappoġġa l-ħidma f'oqsma ta' prijorità oħra bħall-akkomodazzjoni, it-tranżizzjonijiet ekoloġiċi u tal-enerġija, l-agrikoltura u s-sajd, u l-politika soċjali.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-Kunsill kellu skambju ta' fehmiet dwar dawn il-kwistjonijiet fid-dawl tar-rapporti reċenti tal-Kummissjoni, ippubblikati fil-21 ta' Ottubru 2025.
Id-diskussjoni ministerjali segwiet il-konklużjonijiet tal-Kunsill Ewropew tat-23 ta' Ottubru 2025. Dawk il-konklużjonijiet affermaw mill-ġdid il-ħtieġa urġenti li jsir progress f'din l-aġenda biex tiġi żgurata l-kompetittività tal-Ewropa, u ħeġġew lill-Kummissjoni u lill-koleġiżlaturi jaċċelleraw il-ħidma tagħhom filwaqt li jagħtuha l-akbar prijorità.
Il-ministri qasmu l-fehmiet tagħhom dwar ir-rapport annwali tal-2025 tal-bord fiskali Ewropew, il-korp konsultattiv indipendenti mwaqqaf fl-2015.
Ir-responsabbiltajiet ewlenin tal-bord jinkludu l-għoti ta' evalwazzjoni ex post f'waqtha tal-implimentazzjoni tal-qafas ta' governanza fiskali tal-UE, l-għoti ta' pariri dwar il-pożizzjonijiet fiskali taż-żona tal-euro u dawk nazzjonali.
Il-bord jipprovdi wkoll pariri dwar l-implimentazzjoni tal-Patt ta' Stabbiltà u Tkabbir u jagħmel suġġerimenti għall-evoluzzjoni futura tal-qafas fiskali.
Fl-4 ta' Novembru, fil-marġini tal-laqgħa, sar djalogu makroekonomiku fil-livell politiku (MEDPOL).
Is-sħab soċjali qasmu l-fehmiet tagħhom mal-presidenza u ż-żewġ presidenzi li jmiss, il-Kummissjoni, il-Bank Ċentrali Ewropew u l-president tal-Grupp tal-Euro. Il-laqgħa ffukat fuq l-importanza tar-riformi tas-suq tax-xogħol u tal-bini tal-kapital uman fit-tisħiħ tal-kompetittività tal-UE.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
