"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-ministri ħadu nota ta' rapport ta' progress u kellhom dibattitu ta' orjentazzjoni dwar il-fajls fil-pakkett "Lesti għall-mira ta' 55%" li jaqgħu taħt il-kompetenza tal-Kunsill Ambjent.
L-UE stabbiliet għaliha nnifisha l-objettiv li tnaqqas l-emissjonijiet netti tagħha tal-gassijiet serra b'55% sal-2030 u issa rridu nirriflettu dan l-objettiv fil-leġiżlazzjoni tal-UE. Il-proposti tal-pakkett "Lesti għall-mira ta' 55%" kienu prijorità ewlenija għall-Presidenza Slovena. Għamilna l-almu kollu tagħna biex nagħmlu kemm jista' jkun progress fuq il-pakkett filwaqt li niżguraw il-koerenza tiegħu.
Andrej Vizjak, Ministru għall-Ambjent u l-Ġestjoni tat-Territorju tas-Slovenja
Il-ministri ddiskutew il-fajls li ġejjin tal-pakkett:
ir-reviżjoni tal-iskema għall-iskambju ta' kwoti tal-emissjonijiet ta' gassijiet serra (EU ETS)
ir-reviżjoni tar-regolament dwar it-tnaqqis annwali vinkolanti tal-emissjonijiet ta' gassijiet serra mill-istati membri (regolament dwar il-kondiviżjoni tal-isforzi)
ir-reviżjoni tar-regolament dwar l-emissjonijiet u l-assorbimenti ta' gassijiet serra minn użu tal-art, tibdil fl-użu tal-art u l-forestrija (LULUCF)
ir-reviżjoni tar-regoli dwar l-istandards ta' rendiment fir-rigward tal-emissjonijiet ta' CO2 tal-karozzi ġodda tal-passiġġieri u tal-vetturi kummerċjali ħfief ġodda
ir-regolament li jistabbilixxi fond soċjali għall-klima
Il-ministri kellhom skambju ta' fehmiet dwar il-livell ta' ambizzjoni meħtieġ għal aktar progress fil-ħames fajls relatati mal-klima fix-xhur li ġejjin, b'kont meħud tad-diversi interkonnessjonijiet bejn il-proposti tal-pakkett "Lesti għall-mira ta' 55%". Il-ministri esprimew ukoll il-fehmiet tagħhom dwar dak li huma jqisu bħala l-aktar kwistjonijiet sensittivi fil-ħames fajls.
Lesti għall-mira ta' 55%: kif l-UE ser issarraf il-miri klimatiċi f'liġi (Infografika)
Il-batteriji u l-iskart ta' batteriji
Il-presidenza ppreżentat rapport ta' progress lill-ministri dwar is-sitwazzjoni attwali tad-diskussjonijiet marbuta mal-leġiżlazzjoni dwar il-batteriji u l-iskart ta' batteriji. Ir-rapport jippreżenta sommarju tad-diskussjonijiet li saru taħt il-presidenza Slovena u jidentifika l-aspetti u l-kwistjonijiet tekniċi li fadal li jeħtieġu aktar deliberazzjoni. Fid-diskussjonijiet tagħhom, il-ministri taw gwida għall-ħidma futura fuq din il-proposta.
Il-batteriji huma element ewlieni tat-tranżizzjoni lejn enerġija nadifa. Il-proposta tal-Kummissjoni, li ġiet ippreżentata sena ilu, għandha l-għan li tnaqqas l-impatti ambjentali u soċjali tal-batteriji matul l-istadji kollha taċ-ċiklu tal-ħajja tagħhom - mill-provvista tal-materjali għall-produzzjoni, l-użu, ir-riċiklaġġ u r-rimi.
Il-ministri kellhom skambju ta' fehmiet dwar l-istrateġija tal-UE għall-ħamrija għall-2030, ippreżentata mill-Kummissjoni fis-17 ta' Novembru 2021.
L-istrateġija tipproponi li tistabbilixxi qafas b'miżuri konkreti għall-protezzjoni, ir-restawr u l-użu sostenibbli tal-ħamrija u tipproponi ġabra ta' miżuri volontarji u legalment vinkolanti. Hija għandha l-għan li żżid il-karbonju tal-ħamrija fl-art agrikola, tiġġieled id-deżertifikazzjoni, tirrestawra l-art u l-ħamrija degradati, u tiżgura li sal-2050, l-ekosistemi kollha tal-ħamrija jkunu f'kundizzjoni tajba. L-istrateġija tipprevedi wkoll proposta leġiżlattiva, sal-2023, għal liġi ġdida dwar is-saħħa tal-ħamrija.
Il-Kunsill adotta approċċ ġenerali dwar l-abbozz ta' direttiva dwar ir-reżiljenza ta' entitajiet kritiċi. Dan l-abbozz ta' strument għandu l-għan li jnaqqas il-vulnerabbiltajiet u jsaħħaħ il-protezzjoni tal-infrastrutturi li huma essenzjali għas-soċjetà, il-funzjonament tal-ekonomija u l-benesseri taċ-ċittadini.
Il-Kummissjoni ppreżentat il-proposta tagħha dwar it-tnaqqis tar-riskju tad-deforestazzjoni u tad-degradazzjoni tal-foresti assoċjati mal-prodotti mqiegħda fis-suq tal-UE u l-proposta tagħha dwar il-vjeġġi tal-iskart. Il-Kummissjoni pprovdiet ukoll lill-ministri informazzjoni dwar l-implimentazzjoni tal-istrateġija tal-UE għall-bijodiversità għall-2030.
Il-presidenza tat informazzjoni dwar il-laqgħa informali tal-ministri responsabbli għal kwistjonijiet urbani – ir-rwol tal-bliet Ewropej fit-tranżizzjoni ekoloġika u fil-kisba tal-objettivi tal-Patt Ekoloġiku (li saret f'Ljubljana fis-26 ta' Novembru 2021). Il-presidenza infurmat ukoll lill-ministri dwar workshop fuq ir-riforma tal-Awtorizzazzjoni u r-Restrizzjoni ta' REACH (li sar f'Brdo fid-9 ta' Novembru 2021).
Il-presidenza u l-Kummissjoni rrappurtaw lill-ministri dwar laqgħat internazzjonali reċenti, inkluż is-summit COP26 dwar il-klima, l-ewwel parti tas-summit COP15 dwar il-bijodiversità, is-seba' sessjoni tal-Laqgħa tal-Partijiet għall-Konvenzjoni ta' Aarhus dwar l-aċċess għall-ġustizzja fi kwistjonijiet ambjentali u l-COP22 tal-Konvenzjoni ta' Barċellona għall-Protezzjoni tal-Baħar Mediterran kontra t-Tniġġis.
L-Awstrija, appoġġata mill-Ungerija, Ċipru u l-Lussemburgu tat informazzjoni lill-ministri dwar azzjoni koordinata dwar ir-regolamentazzjoni ta' pjanti miksuba minn tekniki ġenomiċi ġodda.
Spanja infurmat lill-ministri dwar it-tielet forum dwar l-arja nadifa (li sar f'Madrid fit-18 u d-19 ta' Novembru 2021).
Il-Litwanja, appoġġata mill-Bulgarija, Ċipru, l-Estonja, il-Latvja, Malta, il-Polonja u r-Rumanija u l-Ungerija, tat informazzjoni dwar il-pakkett dwar il-mobilità fil-kuntest tal-ambizzjonijiet tal-Patt Ekoloġiku Ewropew.
Franza ppreżentat il-programm ta' ħidma għall-presidenza tagħha li jmiss.
Il-Kunsill adotta wkoll mingħajr diskussjoni l-punti li jidhru fil-listi ta' punti A leġiżlattivi u mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-UE stabbiliet għaliha nnifisha l-objettiv li tnaqqas l-emissjonijiet netti tagħha tal-gassijiet serra b'55% sal-2030 u issa rridu nirriflettu dan l-objettiv fil-leġiżlazzjoni tal-UE. Il-proposti tal-pakkett "Lesti għall-mira ta' 55%" kienu prijorità ewlenija għall-Presidenza Slovena. Għamilna l-almu kollu tagħna biex nagħmlu kemm jista' jkun progress fuq il-pakkett filwaqt li niżguraw il-koerenza tiegħu.
