"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Il-ministri għall-ambjent tal-UE approvaw il-konklużjonijiet tal-Kunsill li ser iservu bħala l-pożizzjoni ġenerali ta’ negozjar tal-UE għas-27 konferenza dwar it-Tibdil fil-Klima (COP 27) tan-Nazzjonijiet Uniti.
Ħarset kulħadd ser tkun fuqna f'Sharm El-Sheikh. L-UE minn dejjem kienet fuq quddiem nett tal-azzjoni klimatika u ser inkomplu mmexxu bl-eżempju. Il-protezzjoni tal-pjaneta tagħna għall-ġenerazzjonijiet futuri teħtieġ azzjoni dinjija komuni b'saħħitha. Ninsab kuntent li llum l-UE wriet li hija serja fl-ambizzjonijiet tagħha.
Anna Hubáčková, Ministru għall-Ambjent taċ-Ċekja.
Fil-konklużjonijiet tiegħu, il-Kunsill enfasizza li l-ambizzjoni globali trid tiżdied sostanzjalment biex ikun jista' jintlaħaq l-objettiv ta' 1.5°C, f'konformità mal-Ftehim ta' Pariġi, u jappella lill-pajjiżi kollha, lill-ekonomiji ewlenin b'mod partikolari, biex iressqu miri u politiki ambizzjużi biex jilħqu jirrevedu u jsaħħu l-NDCs tagħhom sal-COP 27.
Il-Kunsill ġedded ukoll l-impenn qawwi li sar mill-UE u l-istati membri tagħha biex ikomplu jżidu l-finanzjament internazzjonali tagħhom għall-klima u jappella lill-pajjiżi kollha biex iżidu l-isforzi tagħhom biex jimmobilizzaw finanzjament mis-sorsi kollha biex jappoġġaw l-azzjoni klimatika u jintegraw il-klima fil-flussi finanzjarji kollha.
Il-Kunsill approva il-konklużjonijiet li ser iservu bħala l-pożizzjoni ġenerali ta' negozjar tal-UE għall-15-il Konferenza dwar il-Bijodiversità (COP 15) tan-Nazzjonijiet Uniti.
Din ser tkun konferenza rivoluzzjonarja. Il-mexxejja dinjija ser jiltaqgħu biex jaqblu dwar il-protezzjoni globali tal-bijodiversità tagħna. Diġà qed naraw tnaqqis serju ta' speċijiet differenti u wasal iż-żmien li naġixxu. Ninsab kuntenta li l-UE qablet dwar pożizzjoni b'saħħitha għas-summit dwar il-bijodiversità. Il-protezzjoni tal-ekosistemi tagħna hija obbligu komuni għalina bħala umanità.
Anna Hubáčková, Ministru għall-Ambjent tar-Repubblika Ċeka
L-intenzjoni wara l-konferenza hija l-adozzjoni ta' qafas globali tal-bijodiversità għal wara l-2020, li jistabbilixxi għanijiet li jiggwidaw l-azzjonijiet globali għall-protezzjoni u r-restawr tan-natura fid-deċennju li jmiss.
Fil-konklużjonijiet tiegħu l-Kunsill appella għall-adozzjoni ta' qafas globali tal-bijodiversità għal wara l-2020 li jkun ambizzjuż, komprensiv u trasformattiv u jinkludi għanijiet fit-tul għall-2050, eżiti intermedji għall-2030 u miri orjentati lejn l-azzjoni għall-2030 li jindirizzaw b'mod effettiv u simultanju l-ixpruni diretti u indiretti tat-telf tal-bijodiversità.
Il-ministri kellhom dibattitu ta' orjentazzjoni dwar proposta biex tiġi riveduta d-Direttiva dwar l-Emissjonijiet Industrijali. Il-proposta għandha l-għan li tiggwida l-investimenti f'installazzjonijiet industrijali fuq skala kbira biex jintlaħaq l-għan ta' ekonomija ta' tniġġis żero u li tkun kompetittiva u newtrali għall-klima sal-2050. Il-ministri kellhom skambju ta' fehmiet dwar l-estensjoni tal-kamp ta' applikazzjoni tad-Direttiva biex tinkludi tipi addizzjonali ta' rziezet għat-trobbija tal-bhejjem u l-mekkaniżmu għal penali u kumpens għal danni għas-saħħa fil-livell tal-UE.
Il-ministri ssottolinjaw l-importanza tad-Direttiva dwar l-Emissjonijiet Industrijali u r-rwol importanti li qdiet fit-tnaqqis tal-emissjonijiet industrijali u t-tniġġis tal-arja b'mod ġenerali. Fir-rigward tal-aspetti agrikoli tal-proposta, id-dibattitu wera rikonoxximent wiesa' li dawn l-elementi l-ġodda jikkontribwixxu biex jintlaħqu l-għanijiet tal-Patt Ekoloġiku Ewropew dwar it-tniġġis. Fl-istess ħin, diversi stati membri esprimew tħassib li d-direttiva tapplika għall-irziezet żgħar u ta' daqs medju għat-trobbija tal-bhejjem. Fir-rigward tal-pieni u l-kumpens, ħafna stati membri appoġġaw ir-regolamentazzjoni tal-aspetti relatati mal-kumpens fil-livell tal-istati membri.
Il-Kunsill adotta formalment regolament dwar pollutanti organiċi persistenti, li huma sustanzi partikolarment ta' ħsara. Ir-regolament il-ġdid jirrevedi l-annessi għar-regolament dwar il-pollutanti organiċi persistenti, filwaqt li jintroduċi sustanzi kimiċi ġodda fil-lista ta' dawn is-sustanzi u jirrestrinġi l-preżenza tagħhom fl-iskart billi jsaħħaħ il-valuri ta' limitu tal-konċentrazzjoni ta' ċerti sustanzi. Il-valuri l-ġodda ta' limitu tal-konċentrazzjoni ser jiżguraw protezzjoni ogħla tas-saħħa tal-bniedem u tal-ambjent.
Il-Kunsill adotta deċiżjoni li tawtorizza lill-Kummissjoni tinnegozja, f'isem l-Unjoni Ewropea, ftehim internazzjonali biex jintemm it-tniġġis tal-plastik.
Il-Kunsill ta wkoll l-approvazzjoni finali tiegħu għad-direttiva dwar iċ-ċarġers komuni. Dan ifisser li fl-2024, ser isir mandatorju li jkun hemm port USB-C għal firxa sħiħa ta' apparat elettroniku, bħall-mobiles, tablets u headphones. Mhux ser ikun aktar meħtieġ li tixtri ċarġer differenti kull darba li tixtri mobile ġdid jew apparat simili: kollha kemm huma jistgħu jiġu ċċarġjati mill-ġdid bl-użu tal-istess ċarġer.
Il-ministri adottaw liġi ġdida tal-UE li tiffaċilita x-xiri f'waqtu ta' mediċini, vaċċini u materja prima u l-aċċess għalihom, tattiva finanzjament ta' emerġenza u tippermetti l-monitoraġġ tal-faċilitajiet tal-produzzjoni meta tfaqqa' kriżi oħra tas-saħħa. Dan ir-regolament tal-Kunsill dwar il-provvista ta' kontromiżuri mediċi jikkostitwixxi wieħed mill-elementi kostitwenti tal-Unjoni Ewropea tas-Saħħa.
Żewġ regolamenti oħra - adottati wkoll fil-laqgħa - jiffurmaw parti mill-Unjoni tas-Saħħa: liġi riveduta dwar theddid transkonfinali għas-saħħa u Ċentru msaħħaħ Ewropew għall-Prevenzjoni u l-Kontroll tal-Mard (ECDC). Huma jtejbu l-kapaċitajiet tal-UE li tirrispondi għal pandemiji futuri u kriżijiet tas-saħħa transkonfinali oħra.
Il-Kunsill adotta regolament, li ser jistabbilixxi tieqa unika għad-dwana. Ir-regoli l-ġodda ser jistabbilixxu l-kondizzjonijiet xierqa għall-kollaborazzjoni diġitali bejn id-dwana u l-awtoritajiet kompetenti sħab fil-fruntieri esterni tal-UE. Dan mistenni jiffaċilita l-kummerċ internazzjonali, iqassar il-ħinijiet għall-iżdoganar tal-merkanzija u jnaqqas ir-riskju ta' frodi.
Il-Kunsill adotta wkoll, mingħajr diskussjoni, il-punti l-oħra li jidhru fil-lista ta' "punti A".
Affarijiet oħra
Taħt affarijiet oħra l-presidenza spjegat is-sitwazzjoni attwali dwar id-Direttiva dwar ir-Reati Ambjentali. Il-proposta hija diskussa fil-Kunsill Ġustizzja u Affarijiet Interni. Il-presidenza u l-Kummissjoni aġġornaw lill-ministri dwar il-laqgħat internazzjonali reċenti ewlenin. Il-Belġju, appoġġat minn Spanja, ġibed l-attenzjoni tal-ministri għad-Direttiva dwar id-Diliġenza Dovuta. Il-Belġju pprovda informazzjoni lill-ministri dwar it-tniġġis minn sustanzi per- u polifluworoalkilati (PFASs). Is-Slovenja, appoġġata mill-Bulgarija, il-Greċja, Spanja, Ċipru, l-Awstrija u l-Portugall, infurmat lill-ministri dwar il-ġestjoni tan-nixfa fil-livell tal-UE. Spanja pprovdiet informazzjoni dwar it-tnedija ta' Alleanza Internazzjonali għar-Reżiljenza għan-Nixfa. Il-presidenza infurmat lill-ministri dwar Konferenza dwar l-Ippjanar ta' Pajsaġġi Reżiljenti għall-Klima.
Waqt l-ikla ta' nofsinhar, il-ministri kellhom diskussjoni informali dwar il-perspettivi tal-OECD fir-rigward tal-implimentazzjoni tal-Patt Ekoloġiku Ewropew u dwar il-kriżi attwali tal-enerġija fl-Ewropa, fil-preżenza ta' Jo Tyndall, Direttur għall-Ambjent fl-OECD.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Ħarset kulħadd ser tkun fuqna f'Sharm El-Sheikh. L-UE minn dejjem kienet fuq quddiem nett tal-azzjoni klimatika u ser inkomplu mmexxu bl-eżempju. Il-protezzjoni tal-pjaneta tagħna għall-ġenerazzjonijiet futuri teħtieġ azzjoni dinjija komuni b'saħħitha. Ninsab kuntent li llum l-UE wriet li hija serja fl-ambizzjonijiet tagħha.
