"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill kellu dibattitu ta' orjentazzjoni dwar il-fajls fil-pakkett "Lesti għall-mira ta' 55%" li jaqgħu fil-kompetenza tal-Kunsill Ambjent. Il-pakkett għandu l-għan li jallinja l-qafas leġiżlattiv tal-UE dwar il-klima u l-enerġija mal-objettiv li tinkiseb UE newtrali għall-klima sal-2050 u mal-mira tagħha li tnaqqas l-emissjonijiet netti ta' gassijiet serra b'mill-inqas 55% sal-2030, meta mqabbla mal-livelli tal-1990.
Il-ministri kellhom skambju ta' fehmiet dwar sistema għall-iskambju ta' kwoti tal-emissjonijiet għas-setturi tat-trasport bit-triq u tal-bini (ETS RTB) u, b'mod partikolari, dwar l-effettività tal-għodda biex jitnaqqsu l-emissjonijiet sabiex tintlaħaq il-mira ta' -55% fl-2030.
Il-ministri ppreżentaw opzjonijiet u parametri ewlenin li huma qiesu bħala l-aktar rilevanti biex tittejjeb l-aċċettazzjoni soċjali ta' skema bħal din filwaqt li tiġi garantita l-effettività tagħha, kif ukoll xi alternattivi possibbli għal din l-iskema.
Il-ministri ddiskutew il-parametri li għandhom jiġu stabbiliti għall-Fond Soċjali għall-Klima biex ikun jista' jappoġġa b'mod effettiv l-aktar gruppi vulnerabbli jekk tiġi stabbilita ETS RTB.
Lesti għall-mira ta' 55%: kif l-UE ser issarraf il-miri klimatiċi f'liġi (Infografika)
Il-batteriji u l-iskart ta' batteriji
Il-ministri adottaw approċċ ġenerali dwar proposta għal regolament li jaġġorna l-leġiżlazzjoni tal-UE dwar il-batteriji u l-iskart ta' batteriji.
Il-batteriji huma element ewlieni tat-tranżizzjoni lejn enerġija nadifa. Ir-regoli l-ġodda ser jippromwovu l-kompetittività tal-industrija Ewropea u l-ktajjen tal-produzzjoni u ser jagħmlu aktar batteriji disponibbli għall-bidla tagħna lejn mezzi ta' trasport b'żero emissjonijiet. Ir-regoli l-ġodda ser jiżguraw li l-batteriji fi tmiem il-ħajja tagħhom jinġabru kif xieraq u mhux jispiċċaw jintremew fl-ambjent. Dan ser jipprevjeni li s-sustanzi tossiċi li jinsabu fihom joħorġu fl-ambjent u jillimita drastikament il-ħela ta' materjal prezzjuż li jista' jiġi rkuprat fil-kuntest ta' ekonomija ċirkolari.
Barbara Pompili - Ministru għat-Tranżizzjoni Ekoloġika ta' Franza
Il-proposta għandha l-għan li tnaqqas l-impatti ambjentali u soċjali tal-batteriji matul l-istadji kollha taċ-ċiklu tal-ħajja tal-batteriji - mill-provvista tal-materjali sal-produzzjoni, l-użu u r-riċiklaġġ.
Il-proposta għandha l-għan ukoll li tindirizza d-diskrepanzi fis-suq intern minħabba regoli u informazzjoni mhux uniformi, billi toħloq kondizzjonijiet ekwi għall-operaturi ekonomiċi permezz ta' sett ta' regoli komuni aktar ċar.
Lejn katina ta' provvista sostenibbli, ċirkolari u Ewropea għall-batteriji (Infografika)
Deforestazzjoni u degradazzjoni tal-foresti
Il-ministri kellhom dibattitu ta' orjentazzjoni dwar il-proposta tal-Kummissjoni biex jitnaqqas kemm jista' jkun il-konsum ta' prodotti li ġejjin mill-ktajjen tal-provvista assoċjati mad-deforestazzjoni jew mad-degradazzjoni tal-foresti.
Il-proposta ġiet ippubblikata fis-17 ta' Novembru 2021 u tistabbilixxi regoli obbligatorji dwar id-diliġenza dovuta għall-operaturi li jqiegħdu fis-suq tal-UE prodotti bażiċi u prodotti derivati, bħall-ġilda, iċ-ċikkulata u l-għamara, assoċjati mad-deforestazzjoni u d-degradazzjoni tal-foresti.
Il-ministri kellhom skambju ta' fehmiet dwar kif tiġi żgurata sistema ta' diliġenza dovuta effiċjenti u effettiva sabiex tinkiseb it-traċċabbiltà meħtieġa biex jiġi żgurat li l-prodotti inklużi fir-regolament ma kinux involuti fid-deforestazzjoni u d-degradazzjoni tal-foresti. Il-ministri esprimew ukoll il-fehmiet tagħhom u ppreżentaw suġġerimenti għal definizzjonijiet komuni ta' termini ewlenin għall-applikazzjoni operazzjonali tar-regolament.
Matul diskussjoni waqt l-ikla ta' nofsinhar, il-ministri kellhom skambju ta' fehmiet dwar l-Ekoloġizzazzjoni tas-Semestru Ewropew. Is-Semestru Ewropew huwa ċiklu ta' koordinazzjoni tal-politika ekonomika, fiskali, soċjali u tax-xogħol fl-UE.
Il-ministri ffukaw id-diskussjoni tagħhom fuq kif is-Semestru Ewropew jista' jintegra aħjar l-isfidi ta' tranżizzjoni ekoloġika inklużiva u ġusta, filwaqt li jiżgura l-kisba tal-objettivi Ewropej fil-ġlieda kontra t-tibdil fil-klima u l-preservazzjoni tal-bijodiversità.
Il-ministri kellhom ukoll skambju ta' fehmiet dwar il-prinċipji ewlenin u l-prattiki tajba biex it-tranżizzjoni ġusta tiġi kkunsidrata fil-politiki ekonomiċi, b'mod partikolari f'termini tal-analiżi tad-distribuzzjoni tal-effetti, li għandha tissaħħaħ fis-Semestru Ewropew.
Il-Kunsill adotta mingħajr diskussjoni żewġ deċiżjonijiet tal-Kunsill relatati mal-pożizzjoni tal-UE fil-Konferenza tal-Partijiet 4.2 tal-Konvenzjoni ta' Minamata dwar il-Merkurju. Il-Konvenzjoni tipprovdi qafas għall-kontroll u l-limitazzjoni tal-użu tal-merkurju u l-komposti tal-merkurju, u tal-emissjonijiet u r-rilaxxi antropoġeniċi tagħhom fl-arja, fl-ilma u fuq l-art, bil-għan li jitħarsu s-saħħa tal-bniedem u l-ambjent.
L-ewwel deċiżjoni tikkonċerna l-emenda tal-Anness A għall-Konvenzjoni biex jiġi estiż il-kamp ta' applikazzjoni tiegħu għal prodotti addizzjonali miżjudin bil-merkurju, inkluż ċerti tipi ta' lampi. Tikkonċerna wkoll l-emenda tal-Anness B biex jiġi estiż il-kamp ta' applikazzjoni tiegħu billi tiġi stabbilita data finali ta' eliminazzjoni definittiva għal proċess tal-merkurju kopert minn dak l-Anness.
It-tieni deċiżjoni għandha l-għan li tiddefinixxi b'mod aktar preċiż il-kamp ta' applikazzjoni tad-dispożizzjonijiet tal-Konvenzjoni dwar l-iskart, u b'mod partikolari l-Artikolu 11(3) dwar l-obbligu li l-iskart tal-merkurju kkonċernat jiġi ttrattat skont il-prinċipju ta' mmaniġġjar ambjentalment korrett.
It-tieni segment tar-raba' konferenza tal-partijiet (COP) għall-Konvenzjoni ta' Minamata dwar il-Merkurju ser isir mill-21 sal-25 ta' Marzu 2022 f'Bali, l-Indoneżja.
Il-Kunsill adotta wkoll id-dikjarazzjoni tal-ftuħ mill-Unjoni Ewropea u l-istati membri tagħha fil-konferenza tal-partijiet għall-Konvenzjoni ta' Minamata dwar il-Merkurju. Id-dikjarazzjoni tal-ftuħ ġiet adattata b'mod partikolari biex tirrifletti l-pożizzjoni tal-UE u l-istati membri tagħha dwar l-aggressjoni militari tar-Russja kontra l-Ukrajna.
Pollutanti organiċi persistenti
Il-presidenza Franċiża għarrfet lill-ministri dwar is-sitwazzjoni attwali tal-proposta għal regolament dwar pollutanti organiċi persistenti (POP). Il-Kunsill adotta l-pożizzjoni ta' negozjar tiegħu fil-livell tal-ambaxxaturi fil-11 ta' Marzu bil-ħsieb ta' negozjati tat-trilogu futuri mal-Parlament Ewropew.
Il-proposta temenda l-annessi għar-regolament attwali, bil-għan li jiġu eliminati jew minimizzati l-emissjonijiet ta' dawn is-sustanzi kimiċi mill-iskart.
Għalkemm il-pollutanti organiċi persistenti ġeneralment ma jibqgħux jintużaw fi prodotti ġodda, xorta waħda jistgħu jinstabu fi skart li ġej minn xi prodotti għall-konsumatur bħal tessuti reżistenti għall-ilma, għamara, plastik u tagħmir elettroniku. Il-proposta tintroduċi limiti stretti għat-tliet sustanzi li ġejjin, jew gruppi ta' sustanzi, fl-iskart:
aċidu perfluworoottanojku (PFOA) u l-imlieħ tiegħu u komposti relatati – li jinstabu f'tessuti reżistenti għall-ilma u ragħwa tat-tifi tan-nar;
dikofol – pestiċida, li qabel kien jintuża fl-agrikoltura;
pentaklorofenol, l-imlieħ u l-esteri tiegħu – li jinstabu fl-injam u t-tessuti ttrattati.
Tistabbilixxi wkoll valuri ta' limitu aktar stretti għal għadd ta' sustanzi oħra diġà elenkati fl-annessi, bħad-diossini u l-furani, li huma preżenti bħala impuritajiet fl-irmied u fin-nugrufun. Skart b'kontenut ta' POP ogħla minn dawk il-valuri limitu jrid jiġi ttrattat b'modi speċifiċi biex jiġi żgurat li l-kontenut ta' POP jinqered jew jiġi ttrasformat b'mod irreversibbli.
Programm dwar it-Tranżizzjonijiet lejn Enerġija Nadifa
Il-Kunsill approva l-intenzjoni tal-Kummissjoni li tingħaqad ma' impenn konġunt mhux vinkolanti biex taċċellera t-trasformazzjoni lejn sistema ta' enerġija netta żero permezz tal-Programm ta' Tranżizzjonijiet għal Enerġija Nadifa tal-AIE (Aġenzija Internazzjonali tal-Enerġija).
Affarijiet oħra
Il-Presidenza u l-Kummissjoni taw informazzjoni dwar it-tieni segment tal-ħames sessjoni tal-Assemblea tan-Nazzjonijiet Uniti għall-Ambjent (UNEA-5), li saret mit-28 ta' Frar sat-2 ta' Marzu f'Nairobi, il-Kenja. It-tema ġenerali tas-sessjoni kienet "It-Tisħiħ tal-Azzjonijiet għan-Natura biex Jintlaħqu l-Għanijiet ta' Żvilupp Sostenibbli".
Il-Kummissjoni tat informazzjoni dwar proposta ġdida għal direttiva dwar il-protezzjoni tal-ambjent permezz tal-liġi kriminali, li tiddefinixxi reati kriminali ambjentali ġodda u tintroduċi dispożizzjonijiet aktar dettaljati dwar sanzjonijiet, regoli biex jissaħħaħ l-infurzar u miżuri li jassistu lill-persuni li jirrappurtaw reati u jikkooperaw mal-awtoritajiet tal-infurzar.
Il-Kummissjoni appellat lill-istati membri biex jieħdu azzjoni urġenti rigward ir-ratifika ta' ftehimiet ambjentali multilaterali (MEAs).
Id-delegazzjoni Estonjana u dik Finlandiża taw informazzjoni dwar iċ-ċelebrazzjoni tat-30 anniversarju tal-Konvenzjoni fuq il-Protezzjoni u l-Użu ta' Passaġġi tal-Ilma Transkonfinali u Għadajjar Internazzjonali (Konvenzjoni dwar l-Ilma). Il-Konvenzjoni dwar l-Ilma ġiet adottata f'Helsinki fl-1992. Hija strument legalment vinkolanti li jippromwovi l-kooperazzjoni fil-ġestjoni sostenibbli tar-riżorsi transkonfinali tal-ilma.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-batteriji huma element ewlieni tat-tranżizzjoni lejn enerġija nadifa. Ir-regoli l-ġodda ser jippromwovu l-kompetittività tal-industrija Ewropea u l-ktajjen tal-produzzjoni u ser jagħmlu aktar batteriji disponibbli għall-bidla tagħna lejn mezzi ta' trasport b'żero emissjonijiet. Ir-regoli l-ġodda ser jiżguraw li l-batteriji fi tmiem il-ħajja tagħhom jinġabru kif xieraq u mhux jispiċċaw jintremew fl-ambjent. Dan ser jipprevjeni li s-sustanzi tossiċi li jinsabu fihom joħorġu fl-ambjent u jillimita drastikament il-ħela ta' materjal prezzjuż li jista' jiġi rkuprat fil-kuntest ta' ekonomija ċirkolari.
