Kunsill Edukazzjoni, Żgħażagħ, Kultura u Sport, 20-21/11/2017, 20 u 21 ta' Novembru 2017

Riżultati ewlenin, 21/11/2017

“L-Ewropa mhix biss dwar l-ekonomija u s-suq uniku, hija wkoll dwar x'noħolqu, x’naqraw, x’nisimgħu, x’nilagħbu. Il-kultura, l-arti u l-isport huma l-kolla li tgħaqqad lill-komunitajiet tagħna flimkien. Dawn joħolqu sens ta’ appartenenza, u jikkontribwixxu għal soċjetajiet b’saħħithom, inklużivi u koeżivi. F’dawn iż-żminijiet ta’ sfida għall-Ewropa, huwa ferm aktar importanti li nżidu l-isforzi tagħna fil-livelli kollha biex inħeġġu l-parteċipazzjoni taċ-ċittadini f’attivitajiet bħal dawn. Ninsab ċert li ż-żewġ settijiet ta’ Konklużjonijiet li adottajna llum dwar l-aċċess għall-kultura permezz ta’ mezzi diġitali u dwar ir-rwol tal-kowċis fis-soċjetà ser jgħinuna nilħqu dawn l-għanijiet.”

Indrek Saar, Ministru għall-kultura tal-Estonja, li bħalissa għandha l-presidenza tal-Kunsill

Kultura/Awdjoviżiv

Il-Kunsill kellu skambju ta’ fehmiet dwar kif il-kultura tista’ tikkontribwixxi biex is-soċjetajiet Ewropej isiru aktar koeżivi. Il-Ministri ddiskutew b’mod partikolari x’jista’ jsir b’mod konġunt fil-livell Ewropew biex tissaħħaħ l-azzjoni fuq livell nazzjonali kif ukoll ir-rwol speċifiku tal-organizzazzjonijiet kulturali u ta' wirt storiku.

Il-Ministri ġew infurmati wkoll dwar l-istat attwali tan-negozjati mal-Parlament Ewropew dwar ir-reviżjoni tad-Direttiva dwar is-Servizzi tal-Media Awdjoviżiva, li tirregola l-koordinazzjoni mal-UE kollha tal-leġislazzjoni nazzjonali dwar il-media awdjoviżiva kollha, kemm ix-xandir tradizzjonali tat-televiżjoni kif ukoll servizzi fuq talba.

Il-Kunsill adotta wkoll konklużjonijiet dwar il-promozzjoni tal-aċċess għall-kultura permezz ta’ mezzi diġitali. Il-konklużjonijiet jenfasizzaw l-opportunitajiet ippreżentati minn teknoloġiji ġodda għal organizzazzjonijiet kulturali f’termini tal-immirar aħjar ta' udjenzi eżistenti jew li jintlaħqu oħrajn ġodda.

Sport

Il-Ministri ddiskutew l-isfidi ewlenin li qed jaffaċċja l-isport fis-seklu 21. Huma ħarsu lejn kif tista’ titjieb il-kooperazzjoni bejn il-gvernijiet nazzjonali u l-organizzazzjonijiet sportivi sabiex jirrispondu b’mod aktar effettiv għal kwistjonijiet bħalma huma l-integrità, il-governanza u l-kontribut tal-isport għas-soċjetà. Il-President tal-Kumitat Olimpiku Internazzjonali (IOC), Thomas Bach, ħa sehem fid-dibattitu fil-Kunsill għall-ewwel darba minn mindu dan ilu jeżisti f’din il-konfigurazzjoni.

Il-Kunsill adotta wkoll konklużjonijiet dwar ir-rwol tal-kowċis fis-soċjetà kif ukoll riżoluzzjoni bl-għan li jiġi żviluppat aktar id-djalogu strutturat ta' livell għoli eżistenti bejn l-istituzzjonijiet tal-UE, l-awtoritajiet tal-istati membri u l-movimenti tal-isport.

Riżultati ewlenin, 20/11/2017

Żgħażagħ

Il-Kunsill wasal għal approċċ ġenerali dwar abbozz ta' regolament dwar il-Korp Ewropew ta' Solidarjetà. L-għan tar-regolament huwa li tissaħħaħ il-koeżjoni, is-solidarjetà u d-demokrazija fl-Ewropa billi joffri liż-żgħażagħ il-possibbiltà ta' volontarjat jew ħidma fi proġetti ta' benefiċċju madwar l-Ewropa.

• Il-Korp Ewropew ta' Solidarjetà: Il-Kunsill jaqbel dwar approċċ ġenerali

Il-Kunsill adotta konklużjonijiet dwar il-Ħidma Intelliġenti fost iż-Żgħażagħ. Il-konklużjonijiet jipproponu li l-media u t-teknoloġiji diġitali jintużaw fl-iżvilupp tal-prattika tal-ħidma fost iż-żgħażagħ, tar-riċerka dwar iż-żgħażagħ u tal-politiki taż-żgħażagħ bħala rispons għall-isfidi u l-opportunitajiet fl-era diġitali.

Il-ministri ddiskutew ukoll kwistjonijiet ta' tħassib għaż-żgħażagħ Ewropej u kif l-UE tista' tgħin sabiex dawn jiġu indirizzati. Il-Presidenza ser tibgħat messaġġi ewlenin minn dan id-dibattitu f'ittra lill-presidenti tal-Kunsill Ewropew, tal-Kummissjoni Ewropea u tal-Parlament Ewropew.

Mailis Reps, il-ministru Estonjana għall-Edukazzjoni u r-Riċerka, enfasizzat l-importanza li jiġu appoġġati u impenjati ż-żgħażagħ Ewropej:

“Jekk irridu niżguraw futur Ewropew sabiħ, jeħtieġ li nkunu konxji mit-tħassib taż-żgħażagħ Ewropej u nagħmlu dak li nistgħu biex dawn jiġu indirizzati. Jeħtieġ ukoll li nkunu żguri li qed nipprovdu liż-żgħażagħ bil-ħiliet u l-għodod li jeħtieġu biex jidħlu fis-suq tax-xogħol u jagħmlu suċċess minn ħajjithom f'dinja li qed tinbidel malajr.”

Edukazzjoni

Il-Kunsill adotta konklużjonijiet dwar aġenda mġedda għall-edukazzjoni għolja. L-għan ġenerali huwa li tiġi mmodernizzata l-edukazzjoni għolja sabiex iżżomm il-pass mal-ambjent li qed jevolvi malajr.

Huwa adotta wkoll konklużjonijiet dwar l-iżvilupp tal-iskejjel u t-tagħlim eċċellenti. Il-konklużjonijiet enfasizzaw l-importanza li tiġi żgurata edukazzjoni inklużiva u ta' kwalità għolja għal kulħadd, tissaħħaħ il-pożizzjoni tal-għalliema u l-mexxejja tal-iskejjel, u l-governanza tinbidel għal waħda aktar effikaċi, ekwa u effiċjenti.

Il-Kunsill adotta rakkomandazzjoni għal stħarriġ dwar is-sitwazzjoni tal-gradwati bħala mezz li jħeġġeġ u jappoġġa lil stati membri fl-isforzi tagħhom biex itejbu l-kwalità u d-disponibbiltà tal-informazzjoni dwar x'jagħmlu l-gradwati wara li jitilqu mill-edukazzjoni għolja jew mill-edukazzjoni u t-taħriġ vokazzjonali.

Il-konklużjonijiet u r-rakkomandazzjoni jsegwu l-komunikazzjonijiet tal-Kummissjoni tat-30 ta' Mejju 2017 dwar l-iżvilupp tal-iskejjel u tat-tagħlim eċċellenti, u dwar l-aġenda mġedda tal-UE għall-edukazzjoni għolja.