Kunsill Edukazzjoni, Żgħażagħ, Kultura u Sport, 22-23/05/2017, 22 u 23 ta' Mejju 2017

Riżultati ewlenin

Awdjoviżwali u Kultura

Il-Kunsill laħaq approċċ ġenerali dwar il-proposta għal direttiva riveduta dwar is-servizzi tal-media awdjoviżiva abbażi ta’ test ta’ kompromess finali ppreżentat illum fil-Kunsill mill-Presidenza Maltija dwar kwistjonijiet ewlenin li għadhom pendenti: l-ambitu tad-direttiva, ir-regoli dwar il-ġurisdizzjoni, il-kwota għal xogħlijiet Ewropej u kontribuzzjonijiet finanzjarji.

• L-adattament għal bidliet teknoloġiċi, il-preservazzjoni tal-kompetittività Ewropea u l-valuri fundamentali fis-servizzi awdjoviżivi

Il-Kunsill adotta konklużjonijiet dwar strateġija tal-UE għal relazzjonijiet kulturali internazzjonali. Il-konklużjonijiet jipproponu t-twaqqif ta’ pjattaforma transsettorjali li tlaqqa’ flimkien esperti minn oqsma differenti ta’ politika (il-kultura, l-affarijiet barranin, il-kooperazzjoni tal-iżvilupp, l-edukazzjoni, id-drittijiet tal-bniedem, id-dwana eċċ.) biex jgħinu sabiex jiġu żviluppati sinerġiji u komplementaritajiet meta tkun qed tiġi implimentata l-istrateġija.

Fir-relazzjonijiet diplomatiċi, il-kultura qiegħda tiġi rikonoxxuta dejjem aktar bħala strument ta’ “soft power” li toffri l-possibilità li jiġu stabbiliti u jinżammu relazzjonijiet u kuntatti ma’ pajjiżi terzi meta l-politiki tradizzjonali ma jkunux biżżejjed.

“Ninsabu kburin ħafna li lħaqna qbil dwar is-servizzi tal-media awdjoviżiva. Din hija direttiva kumplessa ħafna li tittratta kwistjonijiet sensittivi ħafna bħalma huma s-suq intern, id-drittijiet u l-libertajiet fundamentali, id-diversità kulturali u l-protezzjoni tal-minuri.

Iżda s-suq u t-teknoloġija qed jiżviluppaw b’rata mgħaġġla. Irridu niżguraw li r-regoli rilevanti jżommu l-pass ma’ dan it-tibdil. Il-qbil tal-lum fil-Kunsill jikkostitwixxi pass ieħor ‘il quddiem lejn it-tlestija tas-Suq Uniku Diġitali, li huwa essenzjali għall-prosperità futura tal-Ewropa.”

Dr. Owen Bonnici, il-Ministru għall-Ġustizzja, Kultura u Gvern Lokali ta’ Malta

L-Isport

Il-Kunsill adotta riżoluzzjoni dwar il-Pjan ta' Ħidma għall-Isport tal-Unjoni Ewropea (2017-2020).

Il-Pjan ta’ Ħidma għandu għadd limitat ta’ inizjattivi ta’ politika li jindirizzaw kwistjonijiet ewlenin bħalma huma l-ġlieda kontra d-doping, il-ġlieda kontra l-logħob miftiehem u t-titjib tal-governanza tajba fl-organizzazzjonijiet sportivi.

Qed issir enfasi fuq il-ġlieda kontra l-korruzzjoni, il-protezzjoni ta’ minuri, l-iżvilupp ta’ konnessjonijiet bejn l-isport u s-suq uniku diġitali, inklużi drittijiet tal-media, kif ukoll fuq l-edukazzjoni fi u permezz tal-isport, ir-rwol tal-kowċis u d-diplomazija fl-isport.

Il-Ministri adottaw ukoll konklużjonijiet dwar l-isport bħala pjattaforma għal inklużjoni soċjali u bħala segwitu, huma ddiskutew kif tista’ tiġi żviluppata politika dwar il-media li tappoġġa l-għanijiet soċjali fl-isport.

Żgħażagħ

Id-djalogu maż-żgħażagħ u l-kooperazzjoni Ewropea futura fil-qasam taż-żgħażagħ kienu s-suġġetti ewlenin tal-ħidma tal-Kunsill fil-konfigurazzjoni tiegħu Żgħażagħ. B'mod partikolari, il-Kunsill

• adotta riżoluzzjoni dwar l-iżvilupp futur tad-djalogu (strutturat) maż-żgħażagħ fil-kuntest tal-politiki għall-kooperazzjoni Ewropea fil-qasam taż-żgħażagħ wara l-2018. Ir-riżoluzzjoni tiddeskrivi l-prijoritajiet ewlenin għaċ-ċiklu li jmiss tad-djalogi, li ser ikollu bħala t-tema ewlenija tiegħu: "Iż-Żgħażagħ fl-Ewropa: x'imiss?".
  
  Ir-riżoluzzjoni tappella għal rieżami dwar kif id-djalogu jista' jittejjeb u jsir aktar effettiv fil-ġejjieni. Tappella wkoll biex tingħata attenzjoni partikolari lil modi biex jiġu żviluppati djalogu u kooperazzjoni kostruttivi ma' żgħażagħ minn ambjenti differenti, riċerkaturi u dawk li jfasslu l-politika fil-qasam taż-żgħażagħ u partijiet interessati minn setturi relatati oħrajn.
  
  
• adotta konklużjonijiet dwar il-perspettivi strateġiċi għall-kooperazzjoni Ewropea fil-qasam taż-żgħażagħ wara l-2018, li ser jipprovdu gwida lill-Kummissjoni waqt li twettaq evalwazzjoni intermedja tal-istrument ewlieni ta' politika f'dan il-qasam, l-"Istrateġija tal-UE għaż-Żgħażagħ".
  
  Il-konklużjonijiet jenfasizzaw il-bżonn li l-istrateġija futura tkun transsettorjali, flessibbli, risponsiva u trasparenti u tqis il-qagħda politika, soċjali, kulturali u ekonomika li qed tinbidel malajr fl-Ewropa.
  
  
• adotta konklużjonijiet dwar ir-rwol tal-ħidma fost iż-żgħażagħ fl-appoġġ liż-żgħażagħ għall-iżvilupp ta’ ħiliet essenzjali għall-ħajja biex tiġi ffaċilitata t-transizzjoni b’suċċess tagħhom għall-ħajja adulta, iċ-ċittadinanza attiva u l-ħajja tax-xogħol.

Edukazzjoni

Il-Kunsill adotta rakkomandazzjoni dwar il-Qafas Ewropew tal-Kwalifiki għat-tagħlim tul il-ħajja. L-għan tagħha hu li ttejjeb it-trasparenza, il-komparabbiltà u l-portabbiltà tal-kwalifiki madwar l-Ewropa billi toħloq qafas ta' referenza komuni għas-sistemi nazzjonali tal-kwalifiki.

Ir-rakkomandazzjoni tipprova wkoll tgħin biex jiġu mmodernizzati s-sistemi tal-edukazzjoni u t-taħriġ, u biex jiżdiedu l-impjegabbiltà, il-mobbiltà u l-integrazzjoni soċjali tal-ħaddiema u ta' min jitgħallem.

Il-Kunsill ħa nota tal-progress fuq il-Europass, li hi maħsuba biex tgħin sabiex tiżdied il-mobbiltà fl-Ewropa billi tipprovdi qafas li ser itejjeb l-aċċess għal informazzjoni dwar ħiliet u kwalifiki għal skopijiet ta' edukazzjoni u impjieg.

"Nagħtu ħafna valur lid-djalogu regolari tagħna maż-żgħażagħ. Huwa mezz importanti għalina biex nitgħallmu dwar it-tħassib u l-isfidi li jħabbtu wiċċhom magħhom, u joffri kontribut siewi dwar kif niżviluppaw l-aktar politika xierqa f’dan il-qasam. Issa hemm bżonn li nippjanaw għall-ġejjieni u neżaminaw kif nistgħu nkomplu ntejbu l-kooperazzjoni tagħna."

Nilqgħu wkoll l-adozzjoni tal-Qafas Ewropew tal-Kwalifiki u l-progress sinifikanti fuq id-deċiżjoni dwar il-Europass. Dawn huma żewġ komponenti importanti tal-Aġenda Ġdida għall-Ħiliet li ser tikkontribwixxi għat-titjib tal-impjegabbiltà u l-mobbiltà taċ-ċittadini Ewropej”.

Evarist Bartolo, Ministru għall-Edukazzjoni u x-Xogħol ta’ Malta