Kunsill Edukazzjoni, Żgħażagħ, Kultura u Sport dwar l-edukazzjoni, 15/02/2018, 15 ta' Frar 2018

Riżultati ewlenin

Programm Erasmus+

Il-Kunsill kellu dibattitu ta' orjentazzjoni dwar l-evalwazzjoni ta' nofs it-terminu tal-programm Erasmus+ u l-orjentazzjonijiet futuri għal wara l-2020. Il-ministri ffukaw fuq miżuri li jinkoraġġixxu parteċipazzjoni usa' fil-programm, b'mod partikolari mir-reġjuni periferiċi u mir-reġjuni li soċjoekonomikament baqgħu lura, kif ukoll firxa akbar ta' parteċipanti. Huma ddiskutew ukoll kif il-programm jista' jagħti kontribut aktar effikaċi biex isaħħaħ il-kapaċità tal-Ewropa għall-innovazzjoni billi jattira t-talent u l-kreattività.

Tul dawn l-aħħar 30 sena, Erasmus+ kien wieħed mill-aktar programmi tal-UE magħrufa, rinomati u ta' suċċess u appoġġa aktar minn 9 miljun persuna fl-Ewropa biex jiżviluppaw il-kapaċitajiet professjonali u personali tagħhom, u saħħaħ l-identità u l-valuri Ewropej. Id-dibattitu ministerjali tagħna jimlini kunfidenza li anke wara l-2020; il-programm ser ikompli jagħti opportunitajiet lill-Ewropej biex jistudjaw, jitħarrġu u jiksbu esperjenza u għarfien barra minn pajjiżhom. Krasimir Valchev, President tal-Kunsill, Ministru għall-Edukazzjoni u x-Xjenza tal-Bulgarija

Edukazzjoni

Il-ministri ddiskutew kif imexxu 'l quddiem l-aspetti marbutin mal-edukazzjoni tal-konklużjonijiet tal-Kunsill Ewropew ta' Diċembru. Il-Kunsill irrifletta dwar kif għandha tiġi żviluppata l-ħidma biex jitwettqu inizjattivi bħal "Universitajiet Ewropej", it-tagħlim tal-lingwi, ir-rikonoxximent reċiproku ta' diplomi u l-"Kard Ewropea tal-Istudenti". Kien hemm ukoll skambju ta' fehmiet dwar dawk il-miżuri b'enfasi fuq id-diġitalizzazzjoni u l-ħtieġa tat-tagħlim tul il-ħajja u l-edukazzjoni u t-taħriġ innovattivi.

• Aspetti marbutin mal-edukazzjoni tal-konklużjonijiet tal-Kunsill Ewropew, Diċembru 2017
• Kunsill Ewropew, 13-14/12/2017