"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-gwerra ta' aggressjoni tar-Russja kontra l-Ukrajna
Fil-Kunsill Affarijiet Barranin sar skambju ta' fehmiet dwar l-aggressjoni Russa kontra l-Ukrajna.
Fil-bidu tad-diskussjoni tal-Kunsill, il-Ministru għall-Affarijiet Barranin tal-Ukrajna, Dmytro Kuleba, indirizza fil-qosor lill-ministri tal-UE permezz ta' vidjokonferenza, u infurmahom dwar l-aħħar żviluppi fuq il-post u l-prijoritajiet u l-ħtiġijiet militari tal-Ukrajna.
Il-Kunsill ikkonferma d-determinazzjoni tal-UE li tkompli tappoġġa d-difiża leġittima tal-Ukrajna kontra l-aggressur, anke fid-dawl tal-attakki reċenti fuq il-portijiet Ukreni u l-ħażniet taċ-ċereali.
Id-diskussjoni tal-Kunsill imbagħad iffokat fuq l-impenji fil-qasam tas-sigurtà li l-UE tista' toffri lill-Ukrajna, biex l-appoġġ eżistenti jiġi ttrasformat f'impenn fit-tul għas-sigurtà u r-reżiljenza tal-Ukrajna.
Il-ministri kellhom l-ewwel diskussjoni dwar l-inizjattiva tar-Rappreżentant Għoli biex jiġi żgurat finanzjament aktar sostenibbli u prevedibbli għall-appoġġ għad-difiża lill-Ukrajna, billi tinħoloq taqsima apposta taħt il-Faċilità Ewropea għall-Paċi.
Iddeskrivejt lill-ministri l-inizjattiva tagħna biex niżguraw finanzjament aktar sostenibbli u prevedibbli għall-appoġġ għad-difiża lill-Ukrajna. Nipproponu l-ħolqien ta' taqsima apposta taħt il-Faċilità Ewropea għall-Paċi biex tipprovdi sa €5 biljun fis-sena għall-erba' snin li ġejjin għall-ħtiġijiet tad-difiża tal-Ukrajna.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Fl-aħħar nett, il-Kunsill iddiskuta t-terminazzjoni tal-inizjattiva tal-Baħar l-Iswed dwar iċ-Ċereali mir-Russja, u tenna l-appoġġ tiegħu għall-Formula ta' Paċi tal-Ukrajna, l-unika bażi komprensiva biex tinkiseb paċi ġusta u sostenibbli fil-fehma tal-UE.
It-Turkija
Il-Kunsill kellu skambju ta' fehmiet dwar ir-relazzjonijiet bejn l-UE u t-Turkija, wara l-konklużjonijiet tal-Kunsill Ewropew tad-29 u t-30 ta' Ġunju li stiednu lir-Rappreżentant Għoli u lill-Kummissjoni biex jippreżentaw rapport lill-Kunsill Ewropew dwar is-sitwazzjoni attwali tar-relazzjonijiet bejn l-UE u t-Turkija.
Il-ministri kellhom skambju ta' fehmiet dwar il-ħtieġa li l-UE terġa' tinvolvi ruħha mat-Turkija, u tibni fuq interessi komuni, filwaqt li tipprova tnaqqas id-differenzi eżistenti.
Li titnaqqas b'mod sostenibbli t-tensjoni fil-Lvant tal-Mediterran, kif ukoll li tinstab soluzzjoni għall-kwistjoni ta' Ċipru, f'konformità mar-Riżoluzzjonijiet rilevanti tan-NU, ikunu ta' benefiċċju għall-istabbiltà u s-sigurtà tar-reġjun kollu.
Tqies ukoll li r-rispett tal-libertajiet u l-valuri fundamentali kif definiti mill-Konvenzjoni Ewropea tad-Drittijiet tal-Bniedem, li għaliha t-Turkija hija parti, huwa essenzjali.
Id-dimensjoni tal-politika barranija tas-sigurtà ekonomika
Ir-Rappreżentant Għoli ppreżenta fil-qosor lill-Kunsill il-komunikazzjoni konġunta tal-Kummissjoni Ewropea u tar-Rappreżentant Għoli dwar "Strateġija Ewropea ta' Sigurtà Ekonomika" tal-20 ta' Ġunju 2023, li tiffoka fuq id-dimensjoni tal-politika barranija tagħha.
Il-Kunsill ser ikollu diskussjoni dwar dan is-suġġett fil-futur biex janalizza modi ġodda possibbli għall-ġestjoni tar-riskji għas-sigurtà ekonomika tal-UE f'kuntest ġeopolitiku diffiċli u li qed jevolvi malajr, u jikkunsidra l-użu possibbli tal-istrumenti disponibbli fil-Politika Estera u ta' Sigurtà Komuni.
Ġrajjiet kurrenti
Taħt ġrajjiet kurrenti l-Kunsill iddiskuta, fost l-oħrajn, iċ-Ċina, is-Summit UE-CELAC tas-17 u t-18 ta' Lulju, l-Armenja u l-Ażerbajġan, u l-Proċess ta' Paċi fil-Lvant Nofsani.
Skambju informali mas-Segretarju tal-Istat tal-Istati Uniti Antony Blinken
Il-Ministri għall-Affarijiet Barranin tal-UE kellhom skambju ta' fehmiet mas-Segretarju Blinken dwar kif jistgħu jissaħħu l-kooperazzjoni u l-koordinazzjoni tal-politika barranija bejn l-UE u l-Istati Uniti li diġà huma b'saħħithom, inkluż dwar kif tista' ssir ħidma flimkien fuq l-isfidi globali, l-approċċi rispettivi lejn iċ-Ċina u l-involviment ma' sħab emerġenti.
Din kienet ir-raba' darba li s-Segretarju Blinken ħa sehem f'laqgħa tal-Kunsill Affarijiet Barranin mill-konferma tiegħu 'l hawn.
Il-partijiet iddiskutew il-livell bla preċedent ta' kooperazzjoni tagħna b'rispons għall-gwerra ta' aggressjoni tar-Russja kontra l-Ukrajna - kemm fl-appoġġ lill-Ukrajna kif ukoll fil-mitigazzjoni tal-konsegwenzi globali tal-gwerra ta' Putin, u ddiskutew sensibilizzazzjoni u involviment koordinati ma' sħab oħra madwar id-dinja.
Konklużjonijiet tal-Kunsill u deċiżjonijiet oħra
Il-Kunsill approva konklużjonijiet dwar il-prijoritajiet tal-UE fin-Nazzjonijiet Uniti matul it-78 Assemblea Ġenerali tan-Nazzjonijiet Uniti, Settembru 2023 – Settembru 2024.
Il-Kunsill adotta deċiżjoni dwar l-iffirmar u l-applikazzjoni proviżorja tal-Ftehim ta' Sħubija tal-Unjoni Ewropea u l-Organizzazzjoni tal-Istati Afrikani, tal-Karibew u tal-Paċifiku (OSAKP), bħala l-qafas legali l-ġdid għar-relazzjonijiet bejn l-UE u l-istati membri tagħha u d-79 pajjiż Afrikan, tal-Karibew u tal-Paċifiku, għall-għoxrin sena li ġejjin, li ser jieħu post il-Ftehim ta' Cotonou.
stabbilixxa reġim ġdid ta' sanzjonijiet li jippermetti lill-UEtelenka persuni u entitajiet Iranjani responsabbli għall-għoti ta' appoġġ militari permezz ta' droni għall-gwerra ta' aggressjoni tar-Russja kontra l-Ukrajna, u elenka wkoll sitt individwi taħt reġimi ta' sanzjonijiet oħra eżistenti
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Iddeskrivejt lill-ministri l-inizjattiva tagħna biex niżguraw finanzjament aktar sostenibbli u prevedibbli għall-appoġġ għad-difiża lill-Ukrajna. Nipproponu l-ħolqien ta' taqsima apposta taħt il-Faċilità Ewropea għall-Paċi biex tipprovdi sa €5 biljun fis-sena għall-erba' snin li ġejjin għall-ħtiġijiet tad-difiża tal-Ukrajna.
