"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Gwerra ta' aggressjoni tar-Russja kontra l-Ukrajna
Il-Kunsill Affarijiet Barranin qasam il-fehmiet tiegħu dwar l-aggressjoni Russa kontra l-Ukrajna.
Fil-bidu tad-diskussjoni tal-Kunsill, il-ministri tal-UE taw il-valutazzjoni tagħhom tal-aħħar żviluppi fir-Russja dwar ir-ribelljoni tal-grupp Wagner.
Is-sitwazzjoni għadha kumplessa u imprevedibbli. Għadna viġilanti u impenjati lejn koordinazzjoni b'saħħitha mas-sħab tagħna, is-27 stat membru u l-pajjiżi ġirien. Dawn il-ġrajjiet urew li l-istat Russu u l-kredibbiltà personali ta' Putin huma mdgħajfa. Is-sistema politika qed tixxaqqaq. Konna qed niffaċċaw lir-Russja bħala periklu minħabba li kienet theddida, għax għandha l-forza u l-ħila li tinvadi ġirien paċifiċi - kif għamlet. Issa r-riskju ġej mill-instabbiltà politika interna u l-fraġilitajiet ta' din is-setgħa nukleari ewlenija. Huwa aktar importanti minn qatt qabel li nkomplu nappoġġaw lill-Ukrajna.
Josep Borrell, Rappreżentant Għoli tal-UE għall-Affarijiet Barranin u l-Politika ta' Sigurtà
Il-Ministru għall-Affarijiet Barranin tal-Ukrajna, Dmytro Kuleba, imbagħad indirizza lill-ministri tal-UE b'vidjokonferenza, u għarrafhom bl-aħħar żviluppi fuq il-post u l-prijoritajiet u l-ħtiġijiet militari tal-Ukrajna, kemm fuq perjodu qasir kif ukoll twil ta' żmien.
Il-ministri tal-UE tennew l-impenn tal-UE li tappoġġa lill-Ukrajna matul il-kontroffensiva f'dak li għandu x'jaqsam kemm mat-tagħmir kif ukoll mat-taħriġ. Fir-rigward ta' dan tal-aħħar, ir-Rappreżentant Għoli informa lill-Kunsill li l-Missjoni ta' Assistenza Militari tal-UE b'appoġġ għall-Ukrajna (EUMAM Ukraine) kienet diġà ħarrġet 24 000 suldat Ukren, li ser jippermetti lill-UE tilħaq il-mira ta' 30 000 ferm qabel tmiem l-2023.
Il-Kunsill adotta żieda ta' €3.5 biljun għall-Faċilità Ewropea għall-Paċi (EPF), biex jiżgura s-sostenibbiltà u l-prevedibbiltà finanzjarja tal-EPF fit-tul, u jkompli jappoġġa lill-Ukrajna filwaqt li tippreserva l-kamp ta' applikazzjoni ġeografiku dinji tal-faċilità.
Fl-aħħar nett il-Kunsill iddiskuta l-isforzi globali ta' sensibilizzazzjoni li daħħlet fis-seħħ l-UE biex jiffaċilitaw il-pjanijiet għal paċi komprensiva, ġusta u dejjiema għall-Ukrajna, f'konformità mal-prinċipji tal-Karta tan-NU.
Ir-relazzjonijiet tal-UE mal-Amerka Latina u l-Karibew
Il-Kunsill Affarijiet Barranin kellu diskussjoni dwar it-tisħiħ tas-sħubija tal-UE mal-Amerka Latina u l-Karibew, qabel is-Summit UE-CELAC li jmiss fi Brussell fis-17-18 ta' Lulju.
B'mod partikolari, il-ministri qasmu l-fehmiet tagħhom dwar l-"Aġenda ġdida għar-relazzjonijiet tal-UE mal-Amerka Latina u l-Karibew", imressqa mill-Kummissjoni u r-Rappreżentant Għoli fis-7 ta' Ġunju 2023.
Huma ddiskutew ukoll il-prijoritajiet għas-Summit UE-CELAC, u kif dan jista' jsir katalist għat-trasformazzjoni pożittiva tal-aġenda ġenerali UE-LAC.
L-UE ser taħdem biex tikseb djalogu bireġjonali regolari u strutturat biex tiżgura s-segwitu u l-implimentazzjoni ta' azzjonijiet f'oqsma ta' interess komuni.
Diplomazija diġitali
Il-Kunsill kellu d-diskussjoni annwali tiegħu dwar id-diplomazija diġitali u approva l-konklużjonijiet tal-Kunsill dwar il-kwistjoni.
Il-ministri tal-UE qablu dwar il-fatt li l-UE għandha taqdi rwol ċentrali fit-tiswir tal-ġabra ta' regoli diġitali dinjin f'teknoloġiji kritiċi - mill-GDPR għall-Intelliġenza Artifiċjali - u bħala setgħa teknoloġika ewlenija.
Barra minn hekk, l-UE għandha tagħmel użu mill-approċċ tagħha ta' Tim Ewropa biex tiddefendi aħjar il-mudell diġitali tagħha ċċentrat fuq il-bniedem fejn ir-regoli diġitali qed jiġu deċiżi f'korpi multilaterali, bħan-NU, l-UIT, l-UNESCO, u l-OECD.
L-UE trid taħdem ma' sħab fdati, u tgħaqqad il-promozzjoni tal-mudell tal-UE permezz tal-konverġenza regolatorja u t-tisħiħ tal-kapaċitajiet mal-investiment fl-infrastruttura diġitali u l-ġlieda kontra l-inugwaljanzi diġitali. Il-Global Gateway ser ikun strument ewlieni f'dan is-sens.
Il-Kunsill Affarijiet Barranin kellu skambju dwar id-Djalogu Belgrad-Pristina. Ir-Rappreżentant Għoli informa lill-ministri tal-UE dwar il-laqgħat li kellu mal-President Serb Vučić u l-Prim Ministru tal-Kosovo* Kurti fit-22 ta' Ġunju fi Brussell biex jinstabu soluzzjonijiet għall-kriżi li għaddejja bħalissa. L-istati membri ssottolinjaw it-tħassib profond tagħhom dwar it-tensjonijiet li għaddejjin fit-Tramuntana tal-Kosovo u enfasizzaw l-importanza li l-partijiet inaqqsu minnufih it-tensjoni, skont il-linji fid-dikjarazzjoni tal-UE tat-3 ta' Ġunju.
Ilqajna l-ħelsien tat-tliet pulizija mill-Kosovo li kienu detenuti f'Belgrad. L-istati membri ser jieħdu miżuri - jekk meħtieġ - sabiex iżidu l-influwenza tal-Unjoni Ewropea u biex jappoġġaw id-djalogu għan-normalizzazzjoni. Nixtieq nisħaq li l-elezzjonijiet iridu jiġu organizzati fl-erba' muniċipalitajiet kollha tat-Tramuntana bil-parteċipazzjoni mingħajr kundizzjoni tas-Serbi tal-Kosovo f'dawn l-elezzjonijiet, u ż-żewġ partijiet jeħtieġ li juru li lesti jħarsu l-obbligi ta' Djalogu tagħhom. L-istati membri għadhom lesti jieħdu aktar miżuri jekk ma jidher ebda progress. U bir-raġun enfasizzaw li minn membri futuri tal-Unjoni Ewropea, nistennew imġiba Ewropea.
Josep Borrell, Rappreżentant Għoli tal-UE għall-Affarijiet Barranin u l-Politika ta' Sigurtà
* Dan l-isem huwa mingħajr preġudizzju għall-pożizzjonijiet dwar l-istatus, u huwa konformi ma' UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.
Il-Kunsill kellu skambju ta' fehmiet dwar it-Tuneżija fil-kuntest taż-żjara reċenti tal-President tal-Kummissjoni Ewropea u tal-Prim Ministri tal-Italja u tan-Netherlands. Il-ministri qablu li l-UE ser tkompli tgħin tindirizza s-sitwazzjoni soċjali u ekonomika iebsa li qed iħabbat wiċċu magħha l-pajjiż. Sabiex tiżgura l-istabbiltà tat-Tuneżija, l-UE offriet pakkett komprensiv ta' kooperazzjoni li issa jeħtieġ li jiġi approvat mill-Kunsill.
Fl-aħħar nett, ir-Rappreżentant Għoli semma l-ħidma li għaddejja tal-President tal-Kunsill Ewropew, Charles Michel, għan-normalizzazzjoni tar-relazzjonijiet bejn l-Armenja u l-Ażerbajġan.
Konklużjonijiet tal-Kunsill u deċiżjonijiet oħra
Il-Kunsill approva konklużjonijiet dwar is-Somalja, u l-Qorti Kriminali Internazzjonali fil-25 anniversarju tal-Istatut ta' Ruma.
Il-Kunsill adotta wkoll id-disa' pakkett ta' miżuri restrittivi dwar seba' individwi addizzjonali responsabbli għal ksur serju tad-drittijiet tal-bniedem fl-Iran, u deċiżjonijiet li jestendu l-mandat ta' EUBAM Libya, EUBAM Rafah u EUPOL COPPS.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Is-sitwazzjoni għadha kumplessa u imprevedibbli. Għadna viġilanti u impenjati lejn koordinazzjoni b'saħħitha mas-sħab tagħna, is-27 stat membru u l-pajjiżi ġirien. Dawn il-ġrajjiet urew li l-istat Russu u l-kredibbiltà personali ta' Putin huma mdgħajfa. Is-sistema politika qed tixxaqqaq. Konna qed niffaċċaw lir-Russja bħala periklu minħabba li kienet theddida, għax għandha l-forza u l-ħila li tinvadi ġirien paċifiċi - kif għamlet. Issa r-riskju ġej mill-instabbiltà politika interna u l-fraġilitajiet ta' din is-setgħa nukleari ewlenija. Huwa aktar importanti minn qatt qabel li nkomplu nappoġġaw lill-Ukrajna.