"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill approva konklużjonijiet dwar it-tkabbir u l-proċess ta' stabbilizzazzjoni u ta' assoċjazzjoni bejn l-UE u l-Balkani tal-Punent.
Il-konklużjonijiet jivvalutaw is-sitwazzjoni f’kull wieħed mill-kandidati u s-sħab tal-UE, jagħtu linji gwida dwar il-prijoritajiet ta’ riforma, u jtennu l-impenn tal-Kunsill lejn il-politika tat-tkabbir tal-UE. F’konformità mal-metodoloġija riveduta tat-tkabbir approvata mill-Kunsill fl-2020, hemm enfasi qawwija fuq ir-riformi fundamentali fl-oqsma tal-istat tad-dritt, id-drittijiet fundamentali, l-iżvilupp ekonomiku u l-kompetittività, it-tisħiħ tal-istituzzjonijiet demokratiċi u r-riforma tal-amministrazzjoni pubblika.
Wara l-konklużjonijiet tal-Kunsill Ewropew ta’ Ġunju, u fil-kuntest tar-rakkomandazzjoni sussegwenti tal-Kummissjoni tat-12 ta’ Ottubru 2022, il-Kunsill jirrakkomanda li jingħata l-istatus ta’ pajjiż kandidat lill-Bożnija-Ħerzegovina, soġġett għal konferma mill-Kunsill Ewropew, bil-qbil li jittieħdu l-passi speċifikati fir-rakkomandazzjoni tal-Kummissjoni, sabiex jissaħħu l-istat tad-dritt, il-ġlieda kontra l-korruzzjoni u l-kriminalità organizzata, il-ġestjoni tal-migrazzjoni u d-drittijiet fundamentali. Il-Kunsill jistenna b’interess konferma ta’ din id-deċiżjoni mill-Kunsill Ewropew ta’ Diċembru.
Il-politika tat-tkabbir tal-UE hija ankra b’saħħitha għall-paċi, id-demokrazija, il-prosperità, is-sigurtà u l-istabbiltà fil-kontinent tagħna. Bil-konklużjonijiet tiegħu, il-Kunsill qed jibgħat messaġġ qawwi tal-impenn tiegħu lejn it-tkabbir tal-UE. Ninsab partikolarment kuntent dwar ir-rakkomandazzjoni li l-Bożnija-Ħerzegovina tingħata l-istatus ta’ kandidat u r-rikonoxximent tal-isforzi ta’ riforma tal-Ukrajna fi żminijiet tant iebsin. L-UE ser tkompli tappoġġa lill-Ukrajna fi triqitha lejn sħubija futura fl-UE u qbilna li nerġgħu lura għas-sitwazzjoni tat-Triju Assoċjat abbażi ta’ aġġornament ipprovdut mill-Kummissjoni fir-rebbiegħa li jmiss.
Mikuláš Bek, Ministru għall-Affarijiet Ewropej taċ-Ċekja
Il-Kunsill qabel dwar il-mandat tiegħu għal negozjati mal-Parlament Ewropew dwar il-proposta għal regolament dwar it-trasparenza u l-immirar ta' reklami politiċi.
F'kuntest fejn il-kampanji elettorali qed isiru dejjem aktar online u bejn il-fruntieri nazzjonali, il-proposta għandha l-għan li tippromwovi standards għoljin ta' trasparenza fir-reklamar politiku fl-UE, tillimita l-użu ta' reklamar immirat għal skopijiet politiċi u tiffaċilita l-forniment u s-sorveljanza transkonfinali tas-servizzi ta' reklamar politiku. Il-proposta ser tgħin fil-ġlieda kontra d-diżinformazzjoni, il-manipulazzjoni tal-informazzjoni u l-interferenza fl-elezzjonijiet, u tissalvagwardja dibattitu demokratiku miftuħ fl-istati membri tal-UE.
Il-mandat tal-Kunsill jibni fuq il-proposta tal-Kummissjoni, filwaqt li jsaħħaħ ir-regoli proposti, jiċċara kif dawn ser jiġu implimentati u jipprova jsaħħaħ iċ-ċertezza legali.
F'demokrazija b'saħħitha, iċ-ċittadini għandhom jirċievu informazzjoni oġġettiva, trasparenti u pluralistika, ħielsa mill-manipulazzjoni. Huma għandhom ikunu jistgħu jirrikonoxxu faċilment reklami politiċi, speċjalment online, u jkunu jafu minn fejn ġejjin. Jeħtieġ ukoll li nillimitaw u nimmonitorjaw b'mod strett l-użu ta' tekniki ta' mmirar. Ir-regolament il-ġdid ser jiżgura regoli aġġornati madwar l-UE biex jiġu protetti l-proċessi demokratiċi tagħna.
Mikuláš Bek, Ministru għall-Affarijiet Ewropej taċ-Ċekja
Bħala parti mid-djalogu annwali dwar l-istat tad-dritt, il-ministri kellhom diskussjoni speċifika għall-pajjiż, li kkonċentrat fuq żviluppi ewlenin fl-Iżvezja, il-Polonja, il-Portugall, ir-Rumanija u s-Slovenja.
L-eżerċizzju huwa parti mill-impenn tal-Kunsill li jsaħħaħ id-djalogu annwali tiegħu dwar l-istat tad-dritt u jagħmlu aktar strutturat, b'rispett sħiħ tal-prinċipji tal-oġġettività, in-nondiskriminazzjoni u t-trattament ugwali tal-istati membri kollha. Madwar nofs siegħa hija ddedikata għal kull stat membru. Id-diskussjoni ssir fil-kuntest tar-rapport tal-Kummissjoni dwar l-istat tad-dritt. Fi djalogu politiku miftuħ u kostruttiv, il-ministri jaqsmu l-esperjenzi, il-kummenti u l-aħjar prattiki tagħhom b'rabta mal-iżviluppi msemmija.
Dan kien il-ħames ċiklu ta’ diskussjonijiet speċifiċi għall-pajjiż li saru minn Novembru 2020 'l hawn. Is-sitwazzjoni f’25 stat membru issa ġiet koperta bħala parti mill-eżerċizzju.
Il-ministri ddiskutew l-abbozz ta’ konklużjonijiet tal-laqgħa tal-Kunsill Ewropew fil-15 ta’ Diċembru.
Fil-laqgħa tiegħu, il-Kunsill Ewropew ser jindirizza l-gwerra ta' aggressjoni tar-Russja kontra l-Ukrajna fid-dimensjonijiet kollha tagħha u l-appoġġ li l-UE ser tibqa' tagħti lill-Ukrajna. Il-mexxejja ser jerġgħu lura wkoll għas-suġġetti tal-enerġija u l-ekonomija.
Dwar is-sigurtà u d-difiża, il-Kunsill Ewropew ser jiddiskuti l-implimentazzjoni tal-Boxxla Strateġika u modi kif tkompli tiżdied il-kapaċità ta' sigurtà u ta' difiża tal-UE. Ser jagħti wkoll gwida dwar l-appoġġ lis-sħab tal-UE.
Il-mexxejja ser ikollhom ukoll diskussjoni strateġika dwar ir-relazzjonijiet mal-Viċinat tan-Nofsinhar u r-relazzjonijiet transatlantiċi.
Il-ministri qasmu l-fehmiet tagħhom dwar is-segwitu għall-attività ta’ rispons tal-Konferenza dwar il-Futur tal-Ewropa, li saret fit-2 ta’ Diċembru 2022.
Il-Kunsill approva d-dikjarazzjoni konġunta dwar il-prijoritajiet leġiżlattivi tal-UE għall-2023-2024, innegozjata bejn il-Kummissjoni, il-Parlament u l-presidenza tal-Kunsill, akkumpanjata mit-tliet presidenzi li jmiss.
Il-President tal-Parlament Ewropew Roberta Metsola, il-Prim Ministru Petr Fiala, f’isem il-Presidenza Ċeka, u l-President tal-Kummissjoni Ursula von der Leyen ser jiġu mistiedna jiffirmaw id-dikjarazzjoni konġunta fil-marġini tal-Kunsill Ewropew ta’ Diċembru.
Il-Kunsill approva wkoll il-punti fuq il-listi ta’ punti A leġiżlattivi u mhux leġiżlattivi mingħajr diskussjoni.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-politika tat-tkabbir tal-UE hija ankra b’saħħitha għall-paċi, id-demokrazija, il-prosperità, is-sigurtà u l-istabbiltà fil-kontinent tagħna. Bil-konklużjonijiet tiegħu, il-Kunsill qed jibgħat messaġġ qawwi tal-impenn tiegħu lejn it-tkabbir tal-UE. Ninsab partikolarment kuntent dwar ir-rakkomandazzjoni li l-Bożnija-Ħerzegovina tingħata l-istatus ta’ kandidat u r-rikonoxximent tal-isforzi ta’ riforma tal-Ukrajna fi żminijiet tant iebsin. L-UE ser tkompli tappoġġa lill-Ukrajna fi triqitha lejn sħubija futura fl-UE u qbilna li nerġgħu lura għas-sitwazzjoni tat-Triju Assoċjat abbażi ta’ aġġornament ipprovdut mill-Kummissjoni fir-rebbiegħa li jmiss.