Kunsill Ġustizzja u Affarijiet Interni, 5 u 6 ta' Ġunju 2014

Il-Kunsill jiddiskuti l-ġellieda barranin Ewropej

Fil-laqgħa tal-Kunsill tal-Ġustizzja u l-Affarijiet Interni fil-5 u s-6 ta' Ġunju, il-ministri ddiskutew il-kwistjoni tal-ġellieda barranin Ewropej u dawk minnhom li jirritornaw lejn pajjiżhom minn perspettiva tal-ġlieda kontra t-terroriżmu.

Id-diskussjoni kienet ibbażata fuq rapport imħejji mill-koordinatur għall-ġlieda kontra t-terroriżmu, bil-kooperazzjoni tal-Kummissjoni u s-SEAE. Dan id-dokument jiddeskrivi l-ħidma li saret s'issa fl-erba' oqsma ta' prijorità definiti mill-Kunsill f'Diċembru 2013 u jinkludi proposti ġodda għal azzjoni.

Il-ministri laqgħu r-rapport u enfasizzaw l-importanza ta' din il-kwistjoni, kif deher ċar wara l-attakk reċenti fil-Mużew tal-Lhud fi Brussell. Huma appellaw għal aktar kooperazzjoni fost l-atturi kollha, speċjalment fir-rigward tal-iskambju ta' informazzjoni, u biex il-miżuri l-ġodda proposti jiġu implimentati mill-aktar fis possibbli. Enfasizzaw ukoll il-ħtieġa għal involviment kontinwu ma' pajjiżi terzi f'din il-kwistjoni.

Fil-qasam tal-ġlieda kontra t-terroriżmu, il-Kunsill adotta wkoll l-istrateġija riveduta tal-UE għall-ġlieda kontra r-radikalizzazzjoni u r-reklutaġġ għat-terroriżmu. L-għan ewlieni ta' din l-istrateġija huwa li twaqqaf milli tinbet ġenerazzjoni ġdida ta' terroristi.

Task Force għall-Mediterran

Il-Kummissjoni aġġornat lill-ministri dwar l-implimentazzjoni tal-inizjattivi identifikati mit-Task Force. Il-Kunsill għaraf li s-sitwazzjoni fil-Mediterran hija ta' tħassib kbir, u ħa nota tal-proposti li saru mill-aktar stati membri esposti għal dawn il-flussi migratorji, filwaqt li stieden lill-korpi preparatorji tal-Kunsill biex jeżaminawhom.

L-ippjanar leġislattiv u operazzjonali aktar mifrux fir-rigward tal-migrazzjoni u l-asil ser jiġi diskuss mill-Kunsill Ewropew fil-laqgħa tiegħu li jmiss, bħala parti mil-linji gwida strateġiċi għall-iżvilupp futur tal-ispazju ta’ libertà, sigurtà u ġustizzja.

Żvilupp futur tal-ispazju ta' libertà, sigurtà u ġustizzja

Il-ministri kellhom l-aħħar dibattitu tagħhom dwar l-iżvilupp futur tal-ispazju ta' libertà, sigurtà u ġustizzja. Issa l-Presidenza ser tibgħat ittra lill-President tal-Kunsill Ewropew, Herman Van Rompuy, li tirrifletti l-pożizzjonijiet tal-Kunsill.

Din l-ittra ser isservi ta' kontribut sabiex, matul il-laqgħa tiegħu li jmiss, il-Kunsill Ewropew jilħaq qbil dwar il-linji gwida strateġiċi għall-ispazju ta’ libertà, sigurtà u ġustizzja.

Protezzjoni tad-data

Il-Kunsill laħaq qbil dwar approċċ ġenerali parzjali għal kwistjonijiet speċifiċi tar-regolament dwar il-protezzjoni tad-data, inklużi l-ambitu territorjali (Artikolu 3(2)) u t-trasferiment ta' data lil pajjiżi terzi jew organizzazzjonijiet internazzjonali (Kapitolu V). Il-ministri komplew jiddiskutu wkoll il-"mekkaniżmu ta' punt uniku ta' servizz".

Il-presidenza infurmat lill-Kunsill dwar is-sitwazzjoni attwali tal-proposta għal direttiva dwar il-protezzjoni ta' individwi f'dak li għandu x'jaqsam mal-ipproċessar ta' data personali għall-prevenzjoni, l-investigazzjoni, is-sejbien jew il-prosekuzzjoni ta' reati kriminali jew l-eżekuzzjoni ta' pieni kriminali.

Punti ewlenin oħra fuq l-aġenda

Il-ministri adottaw konklużjonijiet dwar rapport tal-UE kontra l-korruzzjoni mħejji mill-Kummissjoni u laħqu approċċ ġenerali dwar bosta proposti leġislattivi:

• regolament dwar l-Europol
• direttiva dwar salvagwardji proċedurali għat-tfal issuspettati jew mixlija fi proċedimenti kriminali
• regolament li jemenda r-regolament tal-Kunsill dwar il-proċedimenti ta' insolvenza